(( سوبر سايز .. ويذ تشيز .. لكن ليش تحسب لحم البقر ؟؟ )) .. (( رسالـة )) .. !!
بسـم اللـه الرحمـن الرحيـم
حيالله الجميع .. حيالله كل(ن) باسمه ..
أنا أدري أنكم بتقولون وش هالفاضي اللي قاعد يكتب له موضوع في هالوقت . الناس مجتمعة تستانس واللي يولم شغيلاته للعيد واللي مودي شماغه يكويه
واللي قاعدن يولم الشروط (( طبعاً .. الشروط أسألوا حقين شقراء عنها اذا ما عرفتوها )) . واللي واللي .
عموماً .. أنا راح أبدا الموضوع بـ سالفتين صارت لي أنا شخصياً ..
السالفـة الأولـى
ياطويلين العمر .. هالسالفة صارت لي في مطعم كان شعاره في صورة غنمه وهالغنمة نوعها (( هرفي )) ويقال والعهدة على الراوي ان هالمطعم كان للوليد وألحين ما أدري من هو له ولا ودي أقول أسم المطعم وتكفون لحد يسألني عن الأسم لإني بـ ارفض . 
ذاك اليوم . وانا تاكي في الاستراحة مع الشباب . مالي بالطويل . قعدت عند واحد يقاله (( ابو خالد )) وسواليف انا وياه . الزبدة انه قالي (( ياخي بعض المطاعم نصابين )) . قلت له (( ليه ؟؟ )) . (( ذاك اليوم رايح لـ هـر ... واطلب منهم ويجيك ابو الشباب المحاسب ويحط الجبن من راسه وانا ما طريت له الجبن .. ياخي المسألة مهيب واقفة على ريال ولا ريالين .. المسألة أنه يستغفلون الناس وهذا شيء يقهر )) . (( والله غريبة .. أنا بالعادة يسألوني قبل .. تبي جبن ولا لا والببسي تبيه كبير ولا لا )) . (( ياخوي .. انا صايرن لي هالموقف )) . عموماً وتمر الايام وانا طالعن أتعشى ومعي (( ابو خالد )) . (( هاه يابو خالد وين تبي نتعشى ؟ )) . (( اهااا جابك الله .. تذكر يوم اقولك سالفة هر... ؟؟ )) . (( خخخخخخخخخخخ ايه ايه .. يابن الحلال مصدقك وش دعوة )) . (( رح له )) . (( ابشر )) . المهم وانا اللي اوقف عند هالمطعم اللي كلمتكم عنه . دخلت . (( السلام عليكم )) . (( وعليكم السلام )) . رحت للمحاسب طبعاً سعودي . (( يا خوي .. عطني وجبة نواعم .. و وجبة تورتيلا )) . (( وغيره ؟ )) . (( سلامتك )) . (( الحساب ... 35 )) . (( أبشر )) واعطيه الـ 35 . انتظرت لمدة ربع ساعة . خلص الطلب . ويوم جا بـ يعطنياه . الا وأشوف الببسي كبير . (( الا ياخوي .. من قالك عطني الببسي سوبر سايز )) . وارجع للمنيو . وأشوف السعر المفروض أني ادفعه . ألا وألقى أن النواعم سعرها 15 والتورتيلا سعرها برضوه 15 . يعني الحساب كله 30 . (( أخوي .. أنت من راسك أضفت الجبن ومن راسك معطيني الببسي كبير )) . ابو الشباب تلعثم شوي (( ايوة .. لكن الإضافة بـ ريالين بس لكل وجبة والجبن بـ ريال واحد .. وهذا شي بسيط وعشان كذا اضفته )) . في هاللحظة ما أخفيكم أن اللي على يميني ويساري يناظروني ولسان حالهم يقول (( الله يلعن ابو القعاطة )) . عموماً قلت للمحاسب (( انا ما ابي لا جبن ولا ببسي كبير وعطني الـ 5 ريال )) . ابو الشباب راح للفلبيني المدير وعلمه السالفة . جاني الفلبيني . فهمّته السالفة . وانتهت السالفة على (( نو بروبلم سير )) وعطوني الخمسة . في هالوقت . جيت للمحاسب السعودي وقلتله (( شف ياخوي .. انا والله ما همتني هـ الخمسة )) . و أشق هالخمسة أبيه يتاثر بكلامي لكن ما حولكم أحد أبو الشباب وده يقول ضف وجهك (( وهذا انا اشقها قدامك ... لكن ياخوي والله الذي لا اله ألا هو أني خايف(ن) عليك من ذنب هـ الخمسة ريال )) . (( وش دعوة .. ياخوي تراها خمسة ريال منت مسامحنا عنها ؟ بعدين انا وراي زباين عن اذنك )) . (( ياخوي مهيب مسألة مسامح ولا لا ... ياخوي أنت تستغفل ناس .. عموماً ما أقطعك ... لكن أنا فكيتك من ذنب هـ الكم ريال .. لكن وانا اخوك خف الله واحرص على حساباتك .. انت يمكن أنك تسويها على حسن نية لكن اعرف ان اللي تسويه غلط وترى ان مادري عنك الزبون اللي انت استغفلته فـ تراك محاسب من الله )) . وأطلع من المطعم .
السالفـة الثانيـة
هالسالفة صايرة(ن) لي في سوبر ماركت كبير يقال والعهدة على الراوي انه فرنسي وهو من طقة كارفور ما ودي أقول اسمه أخاف أشوه سمعته ذاك اليوم وانا رايح اتقضى من هالسوبر ماركت . طبعًاً ومثل أي سعودي يدخل وهو يبي شغيلات بسيطة . واذا جا الحساب ألا وهو ضافن محلهم كله . جيت للمحاسب . (( السلام عليكم )) . (( وعليكم السلام )) . برضوه سعودي المحاسب . جمع الاغراض في الاكياس (( الحساب 457 )) . عطيته البطاقة . سحب الفلوس . عطاني الفاتورة . خذت الفاتورة . وقعدت اناظرها لقافة بس . وتطيح عيني على (( لحم بقر )) وأنا أصلاً اذا شفت البقر تحوم تسبدي يعني مافيه أمل اكل لحم بقر . أصلاً لحم الغنم ويالله اكله . رجعت للمحاسب (( ياخوي .. انا ما شريت لحم بقر وأشوفك حاسبه )) . (( كيف ؟ مستحيل .. عطني الفاتورة .. لا اللحم انت شاريه وتأكد .. يمكن الطفل اللي معك شاله ولا شي )) . ما أخفيكم اني قفلت معي والمشكلة انه يتكلم بثقة وانا جايه بـ احترام عشان ارقع له اللي صار ويعطيني فلوسي واتوكل على الله . (( اسمعني ياخوي .. الطفل اللي معي ما لمس الأكياس .. و رجّع لي الفلوس أحسن من ان الموضوع يكبر )) . والله في هالوقت تذكرت محاسب هر.. لكن ذاك محترم شوي موب مثل ذا وهذا معاملته زي وجهه وما يستاهل من يذّكره بشيء . المهم عطاني فلوسي وكنسل الطلب . رجعت للبيت . حطيت الاغراض . رحت للاستراحة . قلت لهم السالفة . وانا مستغرب وشو له يسوي هالحركة يعني هو مهوب مستفيد . معقولة غلطان ؟ . كان معنا واحد يشتغل في إدارة العثيم . وله علم بـ هالامور . قال (( شف يابو راشد .. المحاسبين ذولا هم مسؤلين عن كل ريال يطلع من عندهم وأي نقص يخصم من رواتبهم . وهالسالفة كثير تحصل عندنا . وهالمحاسب اللي بغى يمشيها عليك . ما ودي أظلمه لكن أكيد أنه مطلوب فلوس وحب انه يعوض على حسابك )) . فهمت السالفة كلها من كلام خوينا ذا .
السالفتين الموضحة أعلاه . للاسف أن أبطالها سعوديين . طبعاً مافيه مقارنة بين محاسب المطعم ومحاسب السوبر ماركت لان حق المطعم ما كان عنده نية
سرقة واللي سواه مجرد إستغفال الزباين . لكن محاسب السوق ابو الشباب ناوي يسرق فلوس من الزباين وهذي مشكلة .
هالموضوع .. اتمنى ان أحد اللي يشتغلون محاسبين في أي سوق يعلقون و يأكدون كلامي . لان هذي مشكلة وهذا مصدر رزقهم . يعني لما يكون مصدر الرزق حرام من المؤكد ان كل ريال يطلّعه من هالمصدر برضوه حرام . كلنا سمعنا مقولة (( كثرة المساس تفقد الإحساس )) وفعلاً .. هذا اللي يصير . شبابنا يتساهلون في أمور تافهة وهي كبائر .
ما ودي أطول .. وعذراً على ركاكة الأسلوب .. لإنني كتبته على عجل .. وهذي رسالة أتمنى ان الكل يوصلها لـ اللي يهمه هالامر . وكل عام وأنت بألف خير ..
ملحوظة : تراني حاولت أشفر الاسماء بقدر المستطاع 
اللي ما عمري راجعت فاتورة لا بسوق ولا مطعم ولا سوبر ماركت 
!
..
الوضع المتطور
