الحقيقة إني قرأت قصة الأخ ((نيوتن)) عن عشة الحمام وربط الأحداث في القصة بالأحداث في الإعلام الرياضي وخاصة الـART فأحببت المشاركة بهاالقصة المتواضعة ولعلهاتعجبكم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــــــــــــــــــ
مذكرات لاعب الملايين
أخوكم ماهو راعي كورة وبرغم هذاأنامبدع في السنترة يعني خذ واحد جالس في الدايرة يسنتر.
طبعاً بحكم إهتمامات أبناء جيلي الكروية كنت أروح ألعب معهم وكل عصرطاقتني الشمس وليته على سنع ماغير أسنتر ويمكن الفريق الثاني إذا الأهداف فيه كثيره يستنجد فيني ويطلب خدماتي.
المهم مرة من المرات في مباراة مالقوا أخوياي إلا أنا ألعب معهم أساسي وكان مع الفريق الثاني لاعب مهاجم جثه عري وأسود يروع والمباراة حامية مرة وأنا مايعنيني الوضع لإني كمالة عدد وقبل ماتنتهي المباراة جتني الكورة والظاهرغلطانة وميريلحقني اللاعب العري المهاجم حقهم وأنامن الروعة أنحشت جهة بابهم وأركض وهذااللاعب وراي ومن حلاوة الروح قمت أعدي من لاعبينهم من غير وعي وهم يتطايحون يمين ويسار ولاوقفت إلاأناوالكورة داخلين بابهم وأخوياي يشيلوني ويحببوني وكنه هدف زليخة وأنا حسيت بطعم الحياة عقب ملاحق هاللاعب العلة وعلموني أني سجلت هدف الفوز في الوقت بدل الضايع وهو بالمناسبة أول هدف في حياتي كلاعب وكغيرلاعب بعد.
الظاهركان فيه كشافين للمواهب من حقين الأندية وشافوني وأنا أسجل هدف الغفلة وجاز لهم الهدف الله العالم ومن بكرة وأناجاي الملعب متأخرعقب المجهود الخرافي اللي سويته أمس ولقيت الملعب حوله سيارات كثير فياقراازرقا وددسن أصفر بخطوط زرق في الزاوية وكوريلا بيضاء عندالباب الثاني وجمس أخضرفي الجهة الثانية وهناك كابرس أسود وجنوط صفرووجه اصفر مقابل الدايرة وبغيت ألعب ويعيون أخوياي قالواأنت متأخروحنا كاملين قلت الله يالدنيا وأمس منقذكم وجايب هدف وقمت أهددهم بخرب اللعب وقبل ماتنتهي المباراة طلع واحد من أخوياي ومادريت عنه وأناناوي أخرب اللعب وأطب الملعب وهم ساكتين لإني بداله وأناناوي أخرب وميرتجيني الكوره عالية وأناأحط رجلي بقوة من وراالدايرة أبي أسطحهافي حدا البيوت ومادريت إلا والكورة في المقص حق باب الفريق الثاني وأخوياي يشيلوني ويحببوني ويدورون بي وعلموني إني جبت هدف التعادل آخرالوقت .
يوم طلعت وتقل سيارة اللي طالعة من الملعب مهوب آدمي ويتجمعون حولي وقع بخمسين واللي يقول بمية واللي بربع مليون وميرينتق دب من الكابرس الأسود الظاهرماعليه من الدراهم أو انهم يطبعونها عنده بالبيت قال وقع بسته مليون وميرينكتمون راعي الددسن والكوريلا ويحاولون راعي الفياقرا والجمس لكن الدب فرق بالسوم مافي مجال قلت أناماأوقع إلامعي صويلح ولدعمي لإني ماأعرف أسنتر إلا له وميريقول الدب أنت وولدعمك بعشره مليون والله وأوقع حتى بجبهتي وأروح للبيت راسي منتفخ حتى إني يالله دخلت مع باب البيت على ورا ولفيت راسي شوي لين دخل .
من بكرة رحت الملعب وإلا أمة لاإله إلا الله في الملعب ويتحرون المزيون يجي وهالصحفيين والتلفزيونات حتى حقين الرادو جايين وميريسحبني واحدقال أنامديرالمركز الإعلامي حق نادي راعي الكابرس الأسود ولاتتكلم مع أحد وبنسوي لك مؤتمرصحفي تقول اللي تبغى وروح بيتكم دحين ويودوني بسيارة كلهاستائر ومظلله بأسود من زود التكتم .
المهم أنهم خذوني بطيارة خاصة للديرة اللي فيها النادي اللي بلعب له ومن المطارللنادي وألقى عالم ينتظروني وهم يغنون الاجودي ياكلك حبه حبه .
ويعطوني فنيله وقالوالي لاوقعناألبسها ويوم وقعنا ويدقني مدير المركز ألبس الفنيلة قلت يااخوي ديرتكم حر ورطوبه وجايبين لي فنيلة كم طويل بعد أبفصخ ثوبي ويكفي بقعد بالفنيلة العلاقي قال أقول ألبس لا أخلي هذولا ياكلونك حبه حبه وأطالع وألقى حولي أربعة من نوعية المهاجم اللي لحقني قلت ألبس وأسلم ولوفيه رطوبة.
في المؤتمر الصحفي لاحظت أنهم يحدحدوني علشان أحش بالفرق الثانية وبالذات فريق راعي الفياقراالزرقا والجمس الأخضروميرأشاورواحد من الشباب قال حش وماجاك علي وأناماأكذب خبر وأبدا أنصب وأألف لهم وهم مسفهلين والدب بيتشقق وقال لي ترى أهديت لك سيارة جديدة.
في أول تمرين لبسوني جزمة أم حبوب وأنا عادة إذا لبست جزمة لبست شراع وأطب الملعب وأروح للدايرة على طول قال المدرب تعال التمرين أول ويقطعون بطني تمارين سويدية وماجا اللعب إلا واناتافل العافية ولاأقدر حتى أسنتر وأطلع من الملعب قالوا توه لياقته مهيب مكتملة ومير يمسكني مديرالمركز الإعلامي قال شوف دحين مانحتاجك يعني أبني لياقتك على مهلك نبغاك بس قدام فريق راعي الفياقراالزرقا وفريق راعي الجمس الأخضر قلت أبشر ولايهمك بواحد يسنترلكم لين تملون وهوهز راسه وراح والظاهريحسبني أمدحه أو أوعده بشي .
من بكرة وعقب التمارين السويدية لعبنا وجتني الكورة وفيه لاعب عندهم يحب ينتشرفي كل مكان في الملعب وهو ينبرش علي وماوعيت إلا بالمستشفى وفيه عسكري من المرور يقول للدكتور نبي نعرف بس وين صدم ومن اللي صدمه والدكتور يقول له القصة ماهيب حادث سيارة القصة لعب كورة .
سوولي ماأدري كم عملية وصارت رجليني كلهايسار يعني عندي حذفة لاركضت وفي التمرين لاجيت في اليساروأنطلقت أحك في الشبك حق المدرجات وأنااخاف يحسبني الحكم بتضارب مع الجمهور وهم ماعليهم متعودين لاعبينهم يطلعون يتطاقون ويعودون يلعبون.
المهم أني مافيني فايدة قبل ماتخرب رجليني وشلون يوم خربت ويحطوني في القائمة اللي بتلعب قدام فريق راعي الفياقراالزرقا ويطببوني آخرالوقت وقال لي المدرب خلك في اليمين وأناعادتي ألعب يساروأبداأركض معهم رايحين وراجعين وأنتبهت أني صرت احذف من اليمين لين المرمى حق الفريق الثاني وفي وحده من الإنطلاقات تجي كورة معكوسة قويه وتصدم فيني وتجي هدف وشف المدرجات ودكة الإحتياط والعالم بيطيرون من الفرح وتنتهي المباراة وأنا تقل عريس هذايحبني وذاك يشيلني والمدرجات يقولون الاجودي ياكلك حبه حبه .
الأدهى إني قاعد أسمع التحليل حق المباراة وواحد من المحللين يقول اللاعب هذا لازم يروح المنتخب وهو من طراز نادر وتحركاته مدروسه ومحسوبه وتمركزه سليم ومشاغب وأشغل المدافعين ... عاد أناأحسبه يتكلم عن رونالدينيو والمفاجأه السارة إنه يتكلم عني يامحاكيكم .
الجرايد من بكرة ومديرالمركز الإعلامي شابين في مدرب المنتخب لازم يضمني للمنتخب ومن بعد بكرة ومدرب المنتخب معلن أسمي قي القائمة.
في آخر تمرين مع النادي قبل ماأروح للمنتخب جتني الكورة وينبرش علي ذاك اللاعب اللي يحب الإنتشار وأنا ماأدري وش سويت وفكني الله ولاأمداني أطب الأرض إلا والثاني منبرش ولاوعيت إلا في المستشفى ونفس العسكري يسأل الدكتوريقول نبي نعرف رقم ونوع السيارة اللي كانت تفحط قبل الحادث والدكتوريقول ماعليك هذي كورة.
المهم بعد كم عملية قصرت يعني ماادري كم سانتي لكن في جهة قصرت أكثرمن الثانية وصارفيه ميلة مع الحذفه اللي أول صرت لاعب بدعه.
الأكيد ماعاد فيني رجا والمدرب يقول لي المرة الأولى حطيتك يمين وعالجت موضوع الحذفة ألحين يبي لناملعب مائل أو أننانخلي مبارياتنافي دحديرا .
ــــــــــــــــــــــــــــــــــــــــــــــــــــــــــــــــــــــــــــــــــ
أعتقد الأندية واضحة وبعض شخصيات القصة واضحين.
مشكورين على القراءة وأتمنى تكون أعجبتكم وتقبلوا تحياتي وكل عام وانتم بخير
عذب السجايا(منتدى الزعيم)
الوضع العادي
