لن تمنعنا تصرفاتكم أيها المحسوبين على رجال الأمن من الحضور ومؤازرة زعيمنا
 

السلام عليكم ورحمة الله وبركاته

والعشر مباركة

بالأمس كنت أحد الحاضرين لمبارة زعيمنا أمام الرائد

واستغربت أثناء التفتيش للدخول إلى المدرجات أن رجال الأمن ياخذون أي علم هلالي..!

بحجه إن فيه كتابات وأرقام للاعبين الزعيم وألقاب بعض اللاعبين

واللي اثر فيني صراحة كان واحد كبير شوي في السن جاي ومعه أولاده الأربعة وشاري لكل واحد علم

ويوم وصله الدور في التفتيش خذوا أعلام أولاده

واحتج واعترض

وقال ليه تاخذونها,,أنا شاري أربعة أعلام العلم بـ 15 ريال يعني المجموع 60 ريال,,عشان ينبسطون عيالي

وفي الاخير تاخذونها بارده مبرده..لو إني داري ما دفعت فيها 60 ريال عشان تاخذونها

قال العسكري هذي أوامر الرئاسة

قال طيب أجل امنعوا اللي برا يبيعونها بس حنا وش ذنبنا نشتريها بمبالغ وفي الأخير ما تخلون عيالي يدخلون بها الملعب...

في الاخير المسكين دخل الملعب وهو معصب وعياله ضايقه صدورهم عشانهم خذوا الأعلام...

السؤال اللي يطرح نفسه؟؟

ما الحكمة من منع أعلام كتب عليها 20 القناص 10 الموهوب 11 الكنز والزعيم..؟؟

أظن العبارات المكتوبة ما فيها أي عنصرية ضد أي فريق ولا إسائة لأي شخص..!!

أنا مع منع الأعلام اللي مكتوب عليها عبارات عنصرية ضد بعض الفرق أو فيها اسائة لأي شخص...

السؤال الآن هل تعامل فرق الجار بنفس المعاملة رغم إني أشوف نفس الأعلام اللي منعت تدخل لمبارة الزعيم تدخل في مباريات الفرق الثانية..؟؟

رغم هذا لا الرئاسة العامة ولا الاتحاد السعودي ولا هيئة دوري المحترفين ولا غيرها راح يمنعنا من الدخول لتشجيع الزعيم

ومعك يا زعيم إلى نهاية المشوار

تحياتي

أبو طارق

يارجال خلها على ربك انا مقاطع حضور المباريات من سنه لا يخلونا نرووح نصلي واذا قلنا لهم برووح نصلي يقولون لا ترجع

غير كذا يتصرفوون معنا كاننا بابتدائي لايحترموون احد

ليه اعرض نفسي للاهانه اشوفها بالبيت احسن لي...

لا يا اخوي ما يمنعونك تصلي..!!

أصلا من هم عشان يمنعونا نصلي

نصلي ونرجع عادي

يمكن صار لك موقف من واحد ما يخاف ربه...