ياسر في دوامة الأصابه ... - نادي الهلال السعودي - شبكة الزعيم

قناص الوادي · #1 19/09/2008, 04:01 AM

السلام عليكم ورحمة الله وبركاته

كيفكم يازعماء ومبرك الفوورز وعقبال إن شاء الله الدوري والأسيويه ...

لاطول عليكم لاكن هذا الموضوع بناقش وياكم عن النجم ياسر ...

بس أبيكم تتعاونون ونشوف وش هي مشكلة ياسر

( ومستواه الضعيف مره بالنسبه لنجوميته السابقه )

<< هذي أنا أعرف بينط لي واحد ويقولي ياسر مستواه ماتغير هذا مابيه يرد ولا
عليه أمر << موضوعي وكيفي ...

ياسر من بعد الأصابه مستواه نازل وهذا شي طبيعي مره ...

وكلنا قلنا إن شاء الله كم مباره وراح يرتفع مستواه ...

لاكن ياسرطول المباره ومع كل كوره توصله يحاول أنه يقدم مستوى يرضي
الجمهور أو يحاول أنه يسجل هدف خيالي من أهدافه الخياليه السابقه ...

وأعتقد أنكم لاحظتوا هالشي من مبارات المنتخب السابقه وهذا أكبر غلطه وقع فيها ياسر ... تدرون ليش لانه حاول يسترد مهاراته وفنياته ومجمل لعبه قبل الأصابه في أول مباره له بعد الأصابه وهذا والله القادر على كل شي أنه شبه مستحيل في كرة القدم ...

طبعآ أهتمامه أنه يقدم مستوى له تأثيرات أخرى وهي ...

أن نفسيته أثرت عليه ومن أول مباراه وصار طول المباره يبي بس انه يجيب هدف او يقدم مستوى مرضي للجماهير ... وصارت الأصابه بدل ما تأثر على جسمه أثرت على نفسيته ...

والأمر الثاني أنتوا شتوا مبارات اليوم ومبارات المنتخب مع الأمارات ...

ولاحظتوا أيضآ نفسية ياسر وأستحقاقه للكرتين الصفر اللي من نظري كان ياسر في غنى عنها ... لاكن هذا من تأثير الأصابه أيضآ ...

وكلنا نعرف أن أي لاعب ممتاز أذا أنقطعت منه الكوره أو ضاعت هجمه يبداء نفسيته تتعب ويبداء يكون لعبه خشن شوي ... ولازم يمسك أعصابه شويات

وبالنسبه للحلول في أعتقادي سهله مره ...

وهي التدريج في المستوى فقط ولاغيرها حل ...

وبصراحه ياسر لازم يفهم من قبل المدرب ويبين له أنه لازم يتدرج في المستوى ولازم يمسك أعصابه شوي لاننا في حاجته بعد توفيق الله سبحانه ...

وهذا تحليلي لمستوى ياسر والحلول ... وأنا عارف أني قصرت كثير في التحليل
وفي الحلول بس أعذروني ولاكن غيرتي وحبي لياسر هو اللي خلاني أكتب الموضوع وش دراكم يمكن مناقشتنا نظهر بها لحل لمشكلة مستوى ياسر ونرجع لهجومنا الأول اللي يريحنا كثيررر ...

والحين أبي كل واحد يعطيني تحليل لمستوى ياسر ولاينسى أن يقترح حل مناسب له ...

علامة أستفهام ..؟؟؟

لوكانة الأصابه في أحد من لاعبي الهلال غير ياسر مثلآ لاقدر الله ...
ونزل مستواه وهذا شي طبيعي هل الجماهير الهلاليه ستتعامل معه كما تعاملت مع ياسر ؟؟؟

وهي بالفعل حدثة للعنبر وغيرهم كثير لاكن كلامي هذا أبي منه أنكم تتعاملون مع لاعبي الزعيم جميعآ بدون أستثناء مثل تعاملكم مع ياسر لان هذا يصب في صالح الكيان الهلالي ...

وشكرآ

أخوكم ... بازوكا الدوسري

stnq blo · #2 19/09/2008, 04:05 AM

لحووول هو يمداه يلعب؟؟؟

يا حبيبي وياعزيزي ياسر من بعد العمليه الي اجراها ما لعب مع المنتخب الى شوط كامل والاطباء يقولون غير جاهز ميه بلميه

ومع هذ1 المباراه الي راحت سجل هدف وش تبيه يسوي يعني؟

لازم كل مباراه يجيبلك هدف؟؟؟

عجبي على الناس الي ودها تنتقد بس ما تعرف

قناص الوادي · #3 19/09/2008, 04:13 AM

أقول الله يرحم والديك في ذى رمضان ...

عود وأنا أخوك وأقرا الموضوع زين ... أنا قاعد أطالب ياسر أنه مايضغط على نفسه ...

إقتباس

الرسالة الأصلية كتبت بواسطة قناص الوادي


	وبالنسبه للحلول في أعتقادي سهله مره ... وهي التدريج في المستوى فقط ولاغيرها حل ...

وبعدين أنا الظاهر كاتب في الموضوع الردود اللي مثل هذي مابي أشوفها غصب هي ...

ولو أني بكره ياسر كان مانيب كاتب موضوع كان بحط في توقيعي أني أكره ياسر ولا علي منك أو من غير ...

والله شي يقهر الواحد يتعب ويكتب موضوع كله حب للهلال وبالأخير يجيك واحد ماله شغل الا الرد وتحطيم أصاحب المواضيع والسبب أنه ماقرى الموضوع زين ...

stnq blo · #4 19/09/2008, 04:20 AM

]

بس أبيكم تتعاونون ونشوف وش هي مشكلة ياسر

( ومستواه الضعيف مره بالنسبه لنجوميته السابقه )

[

يكفي جملتك هذي واذا انت تكتب شي ما تعرفه هذي مشكلتك

واقولك رح تسحر بالله

مايكبرني لقب · #5 19/09/2008, 04:24 AM

يا عزيزي كلامك سليم

بس مو ملاحظ ان ياسر ثابت محله ما يرجع للوسط زي اول ويستلم كوره

اكيد المدرب مجبره انه ما يتراجع علشان يمسك دفاع الرائد في منطقتهم وولا يتقدمون

وثاني شي كم كوره وصلت لياسر خلينا صريحين

الكور الى وصلت له تنعد بالاصابع ووحده او ثنتين الى خطيره

قناص الوادي · #6 19/09/2008, 04:31 AM

stnq blo حبيبي ألحين أنت عاجبك مستوى ياسر ؟؟؟

يخوي حتى اللي مايعرف كوره يعرف أن ياسر في أسوء حالاته والله العالم ...

والظاهر انك أنت اللي تكتب شي ماتعرفه والدليل مسوي ماسكني بالجمله هذي ...

رضيت ولا مارضيت ياسر موب في مستواه والهدف أرجع وشفه وبتعرف جاته الكوره بارده

مبرده ولو أنه لاعب في درجة المناطق جاب الهدف والله العالم ...

zaeem in New Zealand · #7 19/09/2008, 04:34 AM

لله درك ياياسر كم انت كبير

بعض الاعبين كسعد الحارثي ومالك معاذ يغيبون بالاشهر عن مستواهم ويعودون في مباراة واحدة وتقام لهم الامجاد وتنسى لهم فترة الغياب

أما انت ياياسر تكون حاضر دائما وان غبت عن مستواك مباراة او شوط تنسى لك الامجاد وان خسر الفريق فانت السبب

انها حالة شاذة لا توجد في كرة القدم الا مع جمهور الهلال

قناص الوادي · #8 19/09/2008, 04:37 AM

إقتباس

الرسالة الأصلية كتبت بواسطة مايكبرني لقب


	يا عزيزي كلامك سليم بس مو ملاحظ ان ياسر ثابت محله ما يرجع للوسط زي اول ويستلم كوره اكيد المدرب مجبره انه ما يتراجع علشان يمسك دفاع الرائد في منطقتهم وولا يتقدمون وثاني شي كم كوره وصلت لياسر خلينا صريحين الكور الى وصلت له تنعد بالاصابع ووحده او ثنتين الى خطيره

هلا بك أخوي ...
ياسر مهاجم ليش يرجع وسط أذا كان يسحب الدفاع طيب ليش أذا بدت الهجمه نلقاه برى المنطقه ...
وبالنسبه لعدد الور أخوي ياسر أول توصله نفس الكور ويستثمرها وماتضيع ...
وحتى الكور اللي توصله تلقاه يبي يسحب بالاعب وتنقطع يعني قليل يناول الكوره لاخواه ...

وألحين بتقنعوني أن ياسر مستواه ماتغير ...

طيب مستواه اليوم مثل مستوى الصويلح كلهم راجعين من أصابه
وبالعس ياسر أصابته ماطولت مثل الصويلح ولا العنبر ...
ياناس ياسر أول تلقاه شعله في الملعب وألحين تحس أنه ما هو في الملعب ...

وهذا رااايي ...

هلا(موت)لي · #9 19/09/2008, 04:42 AM

صدقت ياقناص الوادي

وما ابي ازيد على كلامك

لأن خير الكلام ماقل ودل

ياسر لازم ينتبه ان يد الله مع الجماعة

والمستوى الجماعي الفعال هو الي راح

يرجعه لمستواه الحقيقي وطبيعي الاصابه تأثر عليه

بس ماعليه يابو سعيد شد حيلك ودعواتنى لك بالتوفيق

والف مبروك لك اخوي قناص الوادي خاصة ثم لكل من ينتمي

لهذا النادي العريق **************

قناص الوادي · #10 19/09/2008, 04:44 AM

الحمدلله ...

وين كلامك هذا ودفاعكم عن ياسر مادافعتوا عن نواف وعن الشلهوب وعن المفرج وغيرهم ...

لله دركم يانواف ويالمفرج ويالشلهوب فقد نسوا الزعماء المشوار الطويل اللي كان مرصع

بالبطولات والنجوميه مع الزعيم ... واللي كان حتى قبل ياسر ... ليس كرهآ في ياسر ...

الله يشهد على حبي لياسر لكن هذا مايخلين أكره باقي الهلالين اللي هم أصل النادي ...

ياحبيب أنت وياه أرجعوا وفكروا وفكرو مره ثانيه وبعد ثالثه أيوه حبايب قليي فكرتوا ...

طيب تأكدو أنكم هلاليين ماهو ياااسريين ...

عاشق سلطان السعود · #11 19/09/2008, 04:47 AM

لوكانة الأصابه في أحد من لاعبي الهلال غير ياسر مثلآ لاقدر الله ...
ونزل مستواه وهذا شي طبيعي هل الجماهير الهلاليه ستتعامل معه كما تعاملت مع ياسر ؟؟؟

ماخلصو من غير اصابه مساكين والله بياكلون علي عينهم وانت بتصير مندس ههههههههههههههه

حياتي يازعيم · #12 19/09/2008, 04:50 AM

ياسر لابد يراجع نفسه ويحاول يطور من مستواه لأنه كذا مباراه لم يؤدي المطلوب منه ...
ولكن يبقى آسر القلوووووووب...
يعطيك العااااااااااااافيه....
دمتم بخير...

تحياااااااااااااااااااااتي

قناص الوادي · #13 19/09/2008, 04:50 AM

هلابك أخوي هلالي ...

هذا اللي كنت أنتظره من الأعضا لاكن للأسف الردود سلبيه كالعاده ...

أما أنهم يقولون مندس ولا ينتقدون رايك نقد جارح بس وغير هالردود قليله مره ...

والسبب العاطفه أو حب اللاعب أكثر من الهلال ...

وشاكر لك مرورك العطر أخوي ...

لفته ... أنا قاعد لكم هنا من اليوم ورايح إن شاء الله ياجماهير اللاعب لاني تحملت كثير ...

zaeem in New Zealand · #14 19/09/2008, 04:52 AM

إقتباس

الرسالة الأصلية كتبت بواسطة قناص الوادي


	الحمدلله ... وين كلامك هذا ودفاعكم عن ياسر مادافعتوا عن نواف وعن الشلهوب وعن المفرج وغيرهم ... لله دركم يانواف ويالمفرج ويالشلهوب فقد نسوا الزعماء المشوار الطويل اللي كان مرصع بالبطولات والنجوميه مع الزعيم ... واللي كان حتى قبل ياسر ... ليس كرهآ في ياسر ... الله يشهد على حبي لياسر لكن هذا مايخلين أكره باقي الهلالين اللي هم أصل النادي ... ياحبيب أنت وياه أرجعوا وفكروا وفكرو مره ثانيه وبعد ثالثه أيوه حبايب قليي فكرتوا ... طيب تأكدو أنكم هلاليين ماهو ياااسريين ...

اخوي يعني لازم ننتقد ياسر ونحطمه علشان نصير هلاليين

وش هالنظرة اللي عندك

قناص الوادي · #15 19/09/2008, 04:58 AM

لا أنا ماقلت أنتقده معي أنا قلت أن مستواه نازل ...

وقلت نبي الحل ماقلت نبي نصب الزيت على النار وننتقده ...

لاكن اللي خلاني أرد هذا الرد أنه مسموح تنتقد أي لاعب في هذا المنتدى سواء نقد بناء أو هدام

الأ ياسر لاتنقده بأي طريقه وهذا خطاء لازم ننتقده نقد بنا ونعلمه وش أخطاء فيه ...

بتقولي ما أخطاء مافيه أبن آدم خطاء ...

وأبيك ترجع للمواضيع اللي عن نواف وعن المفرج وغيرهم مب يسبوون فيهم موب ينقدون ...