(( يوميات رمضانيه " 11 " )) نيوتن .. وسر عشقه للسنبوسة بالفرن !
.
فكرة : سندريلا الهلال .
اعداد ومتابعة : هلالي من ارض اليمن, و الهنوووف .
تصميم : عسيريه .
لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير .
**][ يوميات رمضانية 1429 هـ ][ **
لقد عدنا إليكم .. تحملنا الاشواق للقياكم .. ونسعد ان نعيش معكم .
في سلسلة تحمل بين طياتها يوميات الأعضاء الرمضانية من كل عام ،،
هذه السلسلة أنتم أهل بيتها ونحن ضيوفاً في حضرتكم ،،
أهلا وسهلاً بكم أحبتنا .. ودعونا نرحب سويةً بالمضيف " الحادي عشر " العضو المتميز " نيوتن " لكي يحكي لنا أحداث يومهِ مع شهر رمضان المبارك . 
بسم الله الرحمن الرحيم
أول شيء .. أشكركم على الإستضافة ..
هاهو الثلث الأول من هذا الشهر الفضيل ينقضي وكأن الامس هو اليوم الأول منه ..
ما أسرع تلك الأيام والليالي الخيّرة وياليتنا جميعاً قدمنا ولو بالشيء اليسير المرضي للرحمن ..
للمعلومية ..
الاسبوع الماضي عندي إجازة ورايحن للديرة ..
ولا لو أقولكم يومياتي في وقت الدوام ان كان حامت تسبودكم .. لان كلها نوم .. اللهم لك الحمد ..
في الحقيقة ولا أخفيكم أني متوهق ..
كلكم قريتوا اليوميات اللي نزلت في الحدعش يوم اللي راحت ..
وكلكم قريتوا واستمتعوا .. باللي قدموه الاخوان و الاخوات ..
لذا .. اللي أقدر أقوله .. (( لقد ورطتموني الله يسامحكم ))
والله مدري وش ابدا به لكن خلوني اسرد لكم اللي صار أمس الخميس ..
بداية من الفجر ..
مانمت ألا الساعة سبع الصبح وكله منكم شايلن همكم ..
قلت التسذب حرام وخصوصاً ان حنا برمضان ..
يعني بالعربي لازم أسوي اكشن بيومي واكتبه لكم كودكم تستمتعون ..
وانا نايم جت الساعة ثمان ثم تسع ثم عشر ثم حدعش ثم حدعش ونص << بيطول السالفة
المهم .. واقوم الساعة حدعش ونص .. وأصلي << لا ياشيخ
بعد الصلاة ..
قعدت بالبيت .. والهواجيس لاعبتن بي >> طيب اقرا قران
وش أسوي .. ؟؟
مالها ألا التلفزيون ..
وأنا متجه لـ التلفزيون وقبل ما أضغط الزر << الله من زين الوصف ..
(( هلا نيوتن .. )) <<< أبوي يحاتسيني ..
(( هلا بو نيوتن )) .. (( ألحين مدامك قاعدن لا شغل ولا مشغلة .. ليش ما تروح تتقضى عني ؟؟ )) .. (( ابشر )) ..
واطلع من البيت في الظهرية << هالشايب عليه وقت للتقضي ..
وأروح لـ محل للجملة يقاله المطرفي وألقاه مسكر ..
طبعاً .. الشايب ما يتقضى ألا منه .. ولا مهوب لازم تقضي ..
رجعت للبيت نزولاً لرغبة الشايب ..
وألقاه ابو الشباب راقد << اثره مصرفني ورقد ..
رحت للتلفزيون .. شغلت فنون لقيت (( التنديل )) وأناظرها مع العلم أني شايفها يوم الاربعاء المغرب لكنها جايزتن لي ولا تفوتكم ..
تراها زينة .. لا ولو تشوفون ابو شهاب وهو يطرد التنديل من بيته ... ان تسان ضاقت صدروكم عليه << مسك خط ..
المهم ...
ويذن العصر ..
وأصلي .. (( السلام عليكم ورحمة الله .. السلام عليكم ورحمة الله )) << الإمام ..
ويوم ألتفت يسار وألقى الشايب جالسن على يساري ..
بغيت أقوم .. لكن الله يجزاه خير الشايب مسك يدي ..
وأقعد معه وقريت لي قران .. تقريبا ساعة ..
طلعت من المسجد .. طبعاً مستحيل أدخل البيت العصر لإن ريحة البيت تسبب لي أزمة ..
رحت أمشي على رجولي على أساس أنها رياضة ..
بقى على أذان المغرب خمس دقايق ..
رحت البيت .. جلست على السفرة أنا والأهل ..
وش ذيك السفرة .. وش أقولكم بس ..
ما أقول .. ألا (( تسلم يدين .. ام نيوتن )) والله ما قصرت ..
ياهي تضبط (( السنبوسة )) الله يخليها لي ..
طبعاً .. السنبوسة .. سنبوسة فرن .. المقلية مالي فيها ..
بعد المغرب
كالعادة ... جلسة عائلية ولا تقوم هالجلسة ألا بـ الشوربة ..
جت (( كلنا عيال قرّية )) وعقبها (( بيني وبينك )) وسط تجاهل من عائلتي الموقرة ..
وكعادتنا .. سوالف وضحك والله يدوم هالضحكة ..
أذّن .. العشاء ..
وصلينا .. وبعدها التراويح ..
بعد التراويح .. هالوقت .. وقت فضاوة ..
دخلت النت ..
ساعة ... ساعتين .. والله مدري كم بالضبط ولا ودي أتسذب عليكم ..
طبعاً .. تتخل دخلة النت روحات وجيات في البيت ..
مالي بالطويل ..
جت الساعة ثنعش ونص .. وأرسل هاليوميات للشباب ..
عاد اللي جاي .. المفروض أني بـ أسويه ..
يعني .. يمكن انه ما يصير ..
الساعة وحدة .. أطلع لـ المزرعة ..
جلسة بريئة مع الشباب ..
سوالف .. لين قبل الفجر بساعة ..
ونضبط لكم ذاك المندي ..
نصلي الفجر .. ثم بـ أرقد لين صلاة الجمعة ..
بعد الجمعة .. <<< خلاص يابوي .. أنت عندك يوم واحد ..
وتكفون .. لحد يقول وين الاكشن .. ؟
لان هالحتسوة .. مجرد إضافة إثارة ..
كل الشكر للمتميز**][ نيوتن.♥][ **
وانتظرونا غداً مع الرائع دائماً صمت الرماد .
أرق التحايا وأطيبها من
مشرفيي واستشاريي المجلس العام
الوضع الشجري
