EPL2 || روعة ديكو تقود تشيلسي للإنتصار .. السيتيزن يصحو بثلاثية .. فليتشر يقود المان للفوز ||
السلام عليكم مساكم الله بالخير جميعاً ورده
الدوري الإنجليزي بدأ الأسبوع الماضي .. دوري يقدر اللي يتابعونه .. هالانجليز دارين اننا فاضين و لا ورانا شيء و الطفش مالي حياتنا فـ بكروا فيه شوي الجولة اللي راحت كانت ممتعة و فيها مباريات جميلة جداً و بنتعرف على اللي صار فيها بعد شوي
:: .. || .. :: أحداث الجولة الأولى :: .. || .. :: بدأ الدوري الإنجليزي أول جولاته الأسبوع الماضي يوم السبت الساعة 2.45 ظهراً بتوقيت الرياض و ضواحيها << هذي للتاريخ و التوزيييع .. و قوووووول قول قول قول .. أول هدف في الدوري الإنجليزي الممتاز موسم بتوقيع الديك الفرنسي سمير نصري يا لبى يا رؤوف أول مباراة كانت بين آرسنال و ويست بروميتش .. بروميتش شكلهم طفارة المساكين حتى اعلان ماعندهم على قمصانهم المباراة انتهت بفوز القنرز 1 - 0 سجله سمير نصري من لعبة أكثر من رائعة .. طقطقة جميلة جداً .. تصدقون وش حلاة هالمباراة .. حلاتها ماجد جريتار ستاينسون .. سجل أفضل أهداف الجولة من وجهة نظري في هالمباراة .. هدف خااااااااااااااااالع .. مدري وشلون جاه قلب بس يشوت بهالطريقة هالخبل المباراة كانت بين بولتون و ستوك سيتي .. بولتون فاز 3-1 و كانت بداية رائعة تبشر بالخير و كأنهم يقولون الموسم الماضي لن يتكرر .. لكن تصدقون مافيهم خير .. مع ان ياسكلاينن كويس بس ليه يجحدون الحبسي اللي استبسل معهم نهاية الموسم الماضي عليك بهم يا ناصر تصدقون فيه أهداف في اوروبا اشوفها أقول وش هالقديمين توهم يطبقونها عندهم أرتيتا سجل هدف رااائع من خطأ من مكان قريب من الركنية .. مهوب قريب مرة لكن حوله بس تذكرت فيه طيب الذكر ابويعقوب المباراة هذي كانت مجنونة .. تقدم بلاكبيرن بهدف ديفيد دان و هدفه حلو بعد .. و تعادلوا ايفرتون بهدف ارتيتا ثم تقدموا إيفرتون برأسية ياكوبو و من صناعة أرتيتا .. ثم تعادلوا الروفرز بهدف سانتا كروز .. و قبل نهاية المباراة بكم دقيقة سجل أويير هدف الفوز للروفرز ليتحصلوا على ثلاث نقاط مهمة على أرض إيفرتون 13 تعاقد و زحمة .. شوارزر و جونسون و زامورا و كامارا و مدري من و في النهاية خسارة في البداية من هال سيتي الصاعد الجديد
المباراة انتهت 2 - 1 لـ هال سيتي .. سجل لفولهام سيول كي هون بالراس .. و سجل لهال جيوفاني لاعب السيتيزن السابق .. و فولان
وصلنا اللحين عند أول مصري .. اللي هو ميدو و معه بعد محمد شوقي في نفس الفريق [ ميدلسبرة ] .. البورو قدموا متعة خاصة و كبيرة في هالمباراة قدام توتنهام الغريب .. توتنهام الكل كان متوقع انه بيكون غير لكن البداية ما تبشر بالخير
المباراة انتهت 2 - 1 للبورو .. سجلوا البورو هدفين أول شي عن طريق ويذير و عن طريق ميدو .. أما السبيرز حتى هدفهم مسجله مدافع ميدلسبرة روبرت هوث كنه متصدق عليهم أشتون قاد فريقه ويست هام للفوز قدام ويجان .. أشتون سجل هدفين في هالمبارة اللي انتهت 2 - 1 .. الجميل في المباراة هو ان المصري الثاني عمرو زكي سجل أول أهدافه في الدوري الإنجليزي الممتاز مع أول مباراة له
يا والله المصيبة يا الربع ذا الآدمي .. ما عمري شفته تعبان و لياقته منتهية .. توريس سجل هدف الفوز للريدز في مرمى سندرلاند في الدقيقة ثلاثة و ثمانين من تسديدة قوية من خارج منطقة الجزاء
المباراة كانت حليوة .. مشكلة كين انه ما تأقلم مع الفريق صح الى اللحين .. و بينيتز مدري وش فيه ماسكة معه على أربيلوا رغم وجود بديل ! .. حتى قلب الدفاع لعب هيبيا و أتوقع لو لعب غيره [ سكيرتل أو آجير ] ممكن نشوف الريدز مسجل من بدري .. وشلون لا تسألون منيب فاضي اشرح قل قسم تشيلسي بطريقة جديدة .. بلاعبين مختلفين .. مهوب مختلفين من ناحية الأسماء لأن مادخل فيهم الا بوسينجوا و ديكو .. لكن من ناحية الاداء كانوا مرووووقين .. مباراة أعتبرها أفضل مباريات الجولة مع مباراة المانيو
تشيلسي لزخ بورتسموث 4 - 0 .. الجدير بالذكر ان ديستان المهايطي حقهم كان يهايط قبل المباراة و تسبب في بلنتي يا شين المهايطية سجل أول أهداف تشيلسي جو كول و الثاني أنيلكا .. و سجل الثالث لامبارد .. أما الهدف الرابع سجله ديكو بتسديدة مجنوووووونة .. وهذي صورة متحركة للهدف من عمل العضوهلالي مدريدي 23
أما المباراة الثانية فـ كانت بين أستون فيلا و السيتيزن .. مارك هيوز و بداية سيئة جداً مع الفريق بدايتها بخسارة على أرضه من فريق ميتلاند الدنماركي في تصفيات التأهل لكأس الإتحاد الأوروبي و اللحين خسارة ثقيلة من أستون فيلا بأربعة أهداف
الفيلا قدموا مباراة جميلة و كان يمديهم يسجلون أكثر و على الرغم من ان باري صنع هدفين الا انه كان واضح عليه عدم التركيز .. يمكن لمفاوضات ليفربول دور .. عموماً المباراة انتهت 4 - 2
سجل للفيلا كارو و أغبونلاهور [ هاتريك ] وسجل للسيتيز إيلانو من ضربة جزاء و الظهير الأيمن الكرواتي كورلوكا
أما أخر مباريات الجولة فكانت قمة بين المانيو و نيوكاسل على الأولد ترافورد .. نيوكاسل شفناه فريق يختلف عن الموسم الماضي .. ودفاعه متحسن كثير مع كولوتشيني و أكثر لاعب أعجبني البثر الأرجنتيني صديق ناصر مكسب كبير للماكبايس دفاعياً و هجومياً بس يبيله يركز شوي ولا يندفع مرة عموماً المباراة انتهت 1-1 سجل للماكبايس مارتينيز من ضربة ركنية سجلها براسه .. و تعادل المانيو بعد هالهدف بدقيقة واحدة بس وسجل الهدف فليتشر بصناعة من جيجز :: .. || .. :: تـرتـيـب الـدوري :: .. || .. ::
:: .. || .. :: فـريق الـجـولة الأولـى :: .. || .. ::
:: .. || .. :: الـهـدافـيـن :: .. || .. ::
:: .. || .. :: مـبـاريـات الـجـولـة الثانـيــة :: .. || .. ::
//،،// الـسبــت //،،//
بلاكبيرن × هال سيتي
المباراة بتكون إختبار صعب لهال سيتي .. الفريقين كلهم فايزين المباراة الأولى .. لكن الروفرز فوزه كان خارج ارضه .. فوز هال سيتي على فولهام ممكن يكون عامل الارض و الجمهور له دور غير انها اول مباراة فالحماس يكون في قمته
مباراة اذا شفت اسم الفريقين بتقول سهلة للروفرز لكن أعتقد انها صعبة و ما راح تعدي على خير لهم .. هال سيتي فريق جيد و منظم .. و ممكن يواصل تحقيق المفاحأت .. مع ان اينس مسوي شغل ممتاز مع الروفرز !
المباراة بيلعبونها الساعة 5.00 العصر بتوقيت السعودية .. و بتكون منقولة على شو كوميدي إكسترا << القناة راكبة على شكل مدرب بلاكبيرن بينيتز أحسه خايف من هالمباراة و بصراحة ما ينلام .. فريقه المباراة اللي راحت ما قدم مستوى ممتاز .. و البورو أمتعوا الجميع قدام السبيرز و انتصروا بسهولة
المباراة مع انها ستقام على ملعب الأنفيلد الا اني أعتقد انها بتكون اول تعثر للريدز .. ساوثجايت كل موسم فريقه يكون أفضل من اللي قبله .. هالمدرب بنفسه كل موسم يثبت انه مدرب رائع
المباراة بتبدا الساعة 5.00 العصر بعد .. و بتنقل على شوسبورت1 بتعليق عربي و وشوسبورت 2 بتعليق واستديو انجليزي
يا سلام يا هالمباراة .. أحس انها بتكون أفضل المباريات .. الفريقين بادين هالموسم ناوين انهم يقدمون أفضل من موسمهم الماضي .. كلهم نجحوا في الجولة الاولى حتى وان كان نيوكاسل متعادل الا انها تعتبر مباراة ناجحة
المباراة بيلعبونها الساعة 5.00 العصر بعد و بتنقلها قناة اكستريم سبورت .. اعتقد هالقناة صار اسمها جيم جام و الا مدري وش بس فيه حرف الـ [ ج ] و الـ [ م ] ستوك سيتي بيلعب أول مباراة على أرضه في الدوري الإنجليزي الممتاز .. هالامر بيصعب الأمور على أستون فيلا .. لكن ما أعتقد انهم بيشكلون مشكلة كبيرة للفيلا .. اعتقد الثلاث نقاط بتكون من صالح الفيلا
المباراة بتلعب الساعة 5.00 العصر بتوقيت السعودية و بتنقلها قناة شو شاشة إكسترا
الجريحين .. هالفريقين كان الجميع يتوقع و لازال البعض يعتقد أن الموسم هذا بيكون مغاير لهم بحكم انهم تعاقدوا مع كذا لاعب مهم .. لكن الجولة الأولى ما تبشر بالخير للسبيرز .. و كان خواندي راموس أحد الاسباب بجعله بيرباتوف احتياطي
لكن سندرلاند أدى مباراة جيدة قدام الريدز .. وكان يفتقد مهاجمه الرائع جونز .. مدري ليه أحس ان جونز و ضيوف بيشكلون ثنائي مجنون في سندرلاند
هالمباراة أنتظرها لأنها أول مباراة للسبيرز على أرضه بعد هالتعاقدات الكبيرة .. بتبدا المباراة الساعة 5.00 العصر بتوقيت السعودية و بتنقلها قناة شو سبورت 3
إيفرتون و ويست بروميتش .. مباراة جريحين بعد .. و بتكون صعبة جداً على التوفيز لأنها على أرض ويست بروميتش .. صعوبتها في ان الفريق لم يستطع الفوز على ارضه وهذه المباراة بتكون خارج أرضه و أمام فريق صاعد حديثاً و بيكون متحمس مع أول مباراة بين جماهيره في الدوري لهذا العام أو بالأصح مع أول مباراة بعد عودة الفريق للدوري الممتاز
المباراة بتلعب الساعة 5.00 العصر و بتنقل على قناة شو مسلسلات إكسترا 1
المباراة الأخيرة في هاليوم بتكون على أرض فولهام اللي بيستضيف فيه فريق آرسنال .. مباراة ديربي لندن .. يعني حماس جماهير و مباراة إن شاءالله تكون خباااال
القنرز يمكن يغيب عنه هالمباراة بعد فابريجاس اللي غاب المباراة الماضية .. لكن سمير نصري قايم بالواجب و أكثر .. بس مدري متى بيفتكون من أديبايور المباراة بتلعب الساعة 7.30 مساءاً بتوقيت السعودية .. وبتكون منقولة على شو سبورت 1 باللغة العربية و شو سبورت 2 باللغة الإنجليزية
//،،// الأحــد //،،//
اللحين جينا لبطل هالموسم إن شاءالله .. أوه نسيت انهم فريق عواجيز يا الله وشلون بناخذ اللقب .. وش هاللاعبين الشيبان وش بيسوون شي جديد فوز بالاربعات و متعة .. لا ما ينفع تشيلسي بيسافر للعب في ملعب ويجان << تقارير شوتايم .. لازم بيسافر .. ويجان يتلقى دعم كبير من تركي و الله يستر منهم .. المصارية يتحمسون على هالفرق الكبيرة والله يستر بس من هالزكي المباراة بتلعب الساعة 3.30 العصر بتوقيت الرياض و ضواحيها .. و ستنقل على قناة شو سبورت 1 باللغة العربية و شو سبورت 2 باللغة الإنجليزية .. ودي أتكلم عن المباراة لكن احس اني طولت في التقديم و ما عاد لي نفس عساني بس اوصل للنهاية عاد جمهور السيتيزن أعوذ بالله اذا زعل أحياناً ما يحضر .. يعني هالمباراة يمكن تلقونهم زعلانين و لا يجون مع ان المباراة بتكون قوية قدام الهمرز
أكثر فريق أرحمه في هالدوري بسبة انهم تعاقدوا مع بن هايم .. المباراة بتلعب الساعة 6.00 بتوقيت السعودية و بتنقل على شو سبورت 1 باللغة العربية و شو سبورت 2 باللغة الإنجليزية //،،// الأثــنــيــن //،،//
الزلايب مانشستر بدون رونالدو صاروا يقشرون بصل .. فوز بالملعنة في الدرع الخيرية .. و تعادل مخيب في أول مباراة في الدوري و الحين إن شاءالله البومي بيسوونها و بيهزمونهم المباراة بتلعب على ملعب البومبي و إن شاءالله يكون جيمس مستقعد الأثنين و يشتغل كراوتش فيهم مع ديفو و كرانيكار .. لا يا احمد مهزومين مهزومين إن شاءالله
المباراة بتلعب الساعة 10.00 مساءاً بتوقيت السعودية .. و بتكون منقولة على شو سبورت 1 باللغة العربية و شو سبورت 2 باللغة الإنجليزية
المجال اللحين مفتوح لكم للمشاركة وإبداء آرائكم و التفاعل و اللي تبونه سووه لا يردكم شي .. و اسمعوا .. ترى مشكور و يعطيك العافية شغلها ما يمشي هنا .. هنا حذف مع انذار .. هالكلام للناس راعين هالردود بس أما البقية ما يحتاج نقول لهم شي لأنهم ما شاءالله عليهم ردودهم تخلينا ندورها في كل مكان و نقراها
و في الختام كان معكم أسيــ الزعيم ــر في التقديم .. و الفـآرس الهـلالي !! في التصميم
ورده ورده