وانهدمت ذكريااااات الطفووولة!!!!!! - نادي الهلال السعودي - شبكة الزعيم

ســـــ SMN2002 ـليمان · #1 23/08/2008, 03:10 AM

السلام عليكم ورحمة الله وبركاااااته
لا ادري من اين ابدا
وكذلك لا اجيد ترتيب الافكار وتنسيق الموضوع
ولكن ساااعبر عن مشااااعري عندما رايت مبنى مدرستنا الابتدائية التى درست بها ودرس بها اخواني اللي اكبر مني وحتى اصغرهم اللي تخرج منها عاااام 1425 وهو يهدم بعد ان وقف بجنبها المبنى الجديد
مرت علي الذكريااااات والاحداث من اول ابتدائي وحتى سادس
قضيت فيها اجمل مراااحل عمري وكيف وهي من علمتنا الالتقاء بااااكبر مجتمع بعد حارتنا
صفوفها وغرفها ومختبرهااا وملاعبهااااااا ومقصفها وكل جزء تحركنا فيه
ضحكنا وبكائنا
مدرسينا من احببنا ومن كرهنا
كتبنا ودفاترنا
كراسات الرسم والالوان ومدرس الفنية
الرياضة ومدرسها
الموقف الاول لي في اول يوم دراسي اتذكره الان بكل تفااااصيله ومكانه ولكن بعد اياااام سوف يكون كان هنا
اتذكر في اول يوم لي بالمدرسه ضيعت رحت مع صف ثااااني وتدربت معهم ويوم مشى الطلاب لصفهم سألني اللي فبلي بالطاااابور انت طالب جديد قلت له ايه قااااال رح يم خويااااك هذاك هم جاااالسين يأكلووون ويشربوووون
هذا الطالب رسب بثااااني ولحقته وهو الان مسجووون في العراااق الله يفك اسره ويرجعه الامه
والموقف الثاااني يووم كنت دااااخل الصف قرصتني عقرب وقلنا للمدرس ولا صدقنا بس الحمدلله مااصار شيء
وبهذي السنة حصل لي اغرب موقف وناااادر جدا انه يحصل مع احد ثااااني
تهااااوشت مع اخوي اللي اكبر مني وضربته بحجر على راسة وطلع دمه
والله اني اذكر المكان زين بين صفوووف اول وثااااني بس الحمدلله ماعلم المدير عليه

طبعا الموووواقف والذكرياااااات كثيرة
واذكر مدرس ثااااني يوم ضربني بالطااااولة بس اني نسيت الالوان
واذكر يوووم قعدت ابكي بسبب ان ولد خااااالتي مو بصفي
واذكر رحلتنا يم مركز الابحاااااث وموقع الرجاجيل التراثي
واذكر حيلتي اذا بغيت اطلع من المدرسة احرك راااسي لين ادوووخ واستاذن من المدير واحلف له ان رااااسي يوجعني
كله كرهي للحصة السادسه
صدقوووني المفرووض المدارس القديمه المفروض تخلى على شكلها لان بحق وحقيقه خرجت اجياااال هم الان من دعاااايم المجتمع وعااااصرت مرااحل التعليم الذهبية رغم قلة الوسائل التعليمية عكس الان
وكاااان في هذاك الوقت كاان الاباء مع انهم لايعرفون الكتاااابه يجون للمدرسه ويحرسون كل الحرس على تعليم الابناء
وكانوا يرددون كلمتهم المشهوره خذوه لحم وردوه لنا عظاااام كان مايهمهم شيء لو قطع المدرس ولدهم تقطيع
كانوا مايردون على ولدهم اذا شكى لهم بالعكس يحملوونه الخطأ ويمكن يضربووونه
اذكر امي الله يطول بعمرهااااا كانت تكتبي لي مع انها ماتعرف تكتب
ماما كانت تقول لي اعمل دويره ثم شخطه ثم حط عصا

الله يااازمااااااان ياكتاب القراءة
وكرتي كرتي ماااحلاهاااا تعلو تعلو حتى السقفي

ذكرياااااااااات مرت سريعه وانا اشاااااااهد البوكلين وهو قااااااااعد يهدم الادارة وصف سااادس والبوابه الرئيسية
بعد ان اجهز على الصفوف الاولية وكاااانت معزولة عن الصفوف العليا

لية يااااااااوزاة التربية والتعليم
معجبكم مبناااااااااااكم الجديد اللي من بعد التسليم وتبدا المشااااااااااكل والصيانة رايحه جاااايه
خلو المباااااااااااني القديمة ترا حديدهااااا قوووووووي مااااااجااااااه غش ولا فية تقسيم للمناقصاااااات

اااااااااااااه تعليمنا من جرف لدحديره

رغم اني مدرس ولكن لا اجد لذة التعليم في السااااااااااابق

وتقبلوا تحيااااااااااااتي ورده

وليد القحطاني · #2 23/08/2008, 03:13 AM

اخي سليمان لي عودة على موضوعك بإذن واحد أحد

ورده ..,

............................

أهلا أخي سليمان

الحقيقة الكل يعلم ان التعليم في السايق كان افضل من التعليم حالياً

من مدرسين ومن طلاب ومن تربية .

ولكن كان الطالب يخرج ويعرف ماذا تعلم

اما الآن الواحد يقول متى تنتهي حصة الكيمياء او الفيزياء

شكراً سليمان . وسلم لي ع اخوك راعي الدم

فمان الكريم

مَاهِينُورْ · #3 23/08/2008, 07:05 AM

,.

وعليكم السلام ورحمة الله وبركاته ,.
يا هلآ ويامرحبا بأبو ...

>> ضيعت إسم البنت " أصغر مشجعة هلالية " الله يحفظها ويستر عليها يارب

..
مرحباً بعودتك أستاذ سليمان و حياك الله من جديد ورده ..
.,
يا الله ,, الله يعينكم

,.
أنا مقهورة

وأنا أشوف مدرستي جالسين يرممون فيها بس من برى ولا من داخل هي هي ماتغيرت يعني وش الفايدة ؟؟!! ..
..
مواقف جميلة

,, إستمتعت صراحة بما ذكرت

,,
,.

إقتباس


	هذا الطالب رسب بثااااني ولحقته وهو الان مسجووون في العراااق الله يفك اسره ويرجعه الامه

الله آمين ,.
,.

إقتباس


	تهااااوشت مع اخوي اللي اكبر مني وضربته بحجر على راسة وطلع دمه والله اني اذكر المكان زين بين صفوووف اول وثااااني بس الحمدلله ماعلم المدير عليه

ههههههههـ متهووور

..
,.

إقتباس


	والموقف الثاااني يووم كنت دااااخل الصف قرصتني عقرب وقلنا للمدرس ولا صدقنا بس الحمدلله مااصار شيء

خخخخخخـ أجل مو بس أنا اللي إنقرصت

..
أذكر إني إنقرصت بأيام الإختبارت و أنا بالابتدائي بس إنقرصت بالبيت >> مادري وش جايبه العقرب لـ بيتنا

..لكن أستاهل ماحد قالي ما أقول أذكار المساء هكاليوم

..
من دلاختي رحت من بكرا أحظر الإختبار و أنا ما ذاكرت لآني جلست بالمستشفى إلى الليل

وجبت بالاختبار 2 ونص من 8

>>

..
>> معليش طولت بالسالفة وهي مالَهْ دخل بالموضوع

,,
.,

إقتباس


	واذكر حيلتي اذا بغيت اطلع من المدرسة احرك راااسي لين ادوووخ واستاذن من المدير واحلف له ان رااااسي يوجعني

ههههههههـ

تذكرت وحدة الله يذكرَهْ بالخير إذا دخلتَه أمَّهْ تنام

وماجاه النوم " طبعاً تخاف من الظلام "

تجلس تضغط على عيونَهْ بأصابع يدينَهْ إلين تنام

..
والآن ياعمري عندَهْ ضعف نظر بسبب ماكانت تسويه

..
.,

إقتباس


	لية يااااااااوزاة التربية والتعليم معجبكم مبناااااااااااكم الجديد اللي من بعد التسليم وتبدا المشااااااااااكل والصيانة رايحه جاااايه خلو المباااااااااااني القديمة ترا حديدهااااا قوووووووي مااااااجااااااه غش ولا فية تقسيم للمناقصاااااات

صدقت ..
على إني ما أفهم بهالأمور

.. إلا إن أغلب المباني الجديدة ليست مؤهلة وكثيراً مايتردد عليها عمال الصيانة

..
ليت إدارات المدارس تهتم فقط بنظافة المدرسة القديمة وإصلاح الأمور البسيطة فقط ..!!
.،

ســـــ SMN2002 ـليمان
الله يعطيك العافية على هالموضوع ورده ..
وسّعت صدري بمواقف الدراسة ولو إن الموقف الرئيسي يقهر بهدم المدرسة

..
.,

هلاليه سنعه · #4 23/08/2008, 08:11 AM

وعليكم السلام رحمة الله وبركاته

اهلا اخوي سليمان ..
من جد ذكريات الطفوله حلوه نسترجعها ونحن لها ..
ببرائتها وعفويتهاوحلاوتها ..

واحلى شئ مكان وقوعها ..
بصراحه منظر مؤلم ترى اللحظات والسنوات
الجميله تنهدم في لحظات ..

تذكرت يوم كنت بثالث انا وبنتي عمتي
بفصل واحد واول يوم جو اخواتنا بأولى
ياكلون حلاومصاص ويشربون عصير>> بقلبها

ويلعبون ونناظرهم منقهرين ..
وحناالمدرسات روحونا نشيل الكتب تمزعت كتوفنا

إقتباس


	واذكر حيلتي اذا بغيت اطلع من المدرسة احرك راااسي لين ادوووخ واستاذن من المدير واحلف له ان رااااسي يوجعني كله كرهي للحصة السادسه

زين اشوا ماتحلف كذب بس والله عندك تخطيط
حنا يالبنات حيلتنا بالمناديل ونلونها بالقلم الاحمر
ونسوي انفسنا دايخات ..

ياحلوووها من اياااااااااام

اخوي سليمان الله يعطيك العافيه على الموضوع ورده
اللي حرك الشجون ..

دمت بخير ..‘‘

القيصر رهيب · #5 23/08/2008, 11:13 AM

أهلآ بالاستاذ

الصراحه الذكريات الجميله جميله

ما تتذكر وش قالوا عنك الطلاب يومك تطق أخوك ؟

واعيباهـ بس مدرس هذا كبرك وتطق أخوك يومك في الابتدائي

درست الابتدائيه في مدرسه كانت تزخر بالعديد من الطلاب المميزين

ما زلت أتواصل مع 2 من الصف الاول الابتدائي أعرفهم والان متخرج من الثانويه هذا العام

رغم أني معرفتي فيهم كانت طقاق لأنهم 1/ب وحنا 1/أ

كان أكرهـ ما علي الغياب حتى لو تعبان أحاول أروح عشان ما يفوتني شي
ومرهـ غبت وطلعت للبقاله أجيب صامولي والبقاله جمب المدرسه وأنا مار
وأشوف الطلاب واقفين كلهم على الباب يحترون واحد طلع يجيب الكورهـ
ويوم شافوني كأنهم أول مرهـ يشوفوني يزاعقون ومستانسين علي علي

كنت أروح المدرسه من صباح الله خير مبكر عشان ألعب كورهـ

الان مبنى مدرستي الابتدائيه للإيجار

سقى الله أيامها

أستاذ سليمان شكرآ لكـ على إسعادنا بذكرياتكـ
وإتاحة الفرصه لنا

الهلالي دائماً · #6 23/08/2008, 03:00 PM

هلا وغلا اخوي الحبيب ابو شادن

الله يعطيك العافية على الموضوع الجميل الذي هيض الذكريات

ما احلى الايام اللي قضيناها *** فيها الوفا دام وشلون ننساها

بصراحة اخوي سليمان الدراسة اول احسن وابسط والله يذكر ايام الابتدائية بالخير

وواضح انك كنت لعاب

وانا ما شاء الله علي كنت مؤدب بقوة >>>اي هين

اذكر مرة في سادس ابتدائي شلحنا انا واحد من العيال سيكل حارس المدرسة ورحنا فيه للبيت
نزلت انا اول وكمل هو .. من بكرة رحت المدرسة قلت له وين سيكلنا

قال بعته بـ40 ريال

قلت عطني نصيبي يا حرامي

والله ياهو ماكان في مخ ماخذين الدنيا عباطة

الله يغفر لنا ويتجاوز عنا ...

وبصراحة انا تجين فترات اروح اتعشى في هرفي اللي جنب مدرستنا واتذكر الايام الحلوة

واصحاب الابتدائي رغم ان التواصل معهم صعب الا اننا اذا تقابلنا تكون الجلسة مزركشة

شكرا لك ابو شادن

ودمت بخير ,,,