نادي الهلال السعودي - شبكة الزعيم - الموقع الرسمي - لأهل الرياض خاصة والجميع عامة- بخصوص الكهرباء!!

السلام عليكم

بداية انا حددت اهل الرياض لأن انا من الرياض، فمتأكد من وجود هالمشكله في الرياض اما باقي المدن فالله اعلم.....

المشكله ببساطه هي ان بيت اي واحد مننا فيه كهرب 110 و 220 فولت، وزي ما انتم عارفين فيه اجهزه كهربائيه تشتغل على خط واحد 110 أو 220 وفيه اجهزه تشتغل على الخطين يعني طومتطيك ;) ..... وهنا تبدأ المشكله وهي الاجهزه اللي تشتغل على 110 فولت لأن الكهرب اللي في بيوتنا مهوب 110 بل انه قد يصل الى 145 فولت وهذا اللي صار معي.... القصه بدأت يوم خربت الثلاجه وجبت اكبر المهندسين حقين الجفالي ويوم كشف على الثلاجه لقى ( السخان ) وهو يستخدم لإذابة الثلج - لقاه خربان سالته ليش؟؟ :uhoh: .... قال : علشان الكهرب اللي يوصله اكثر من حاجته !!! :eek: قلت وشلون؟؟؟ قال هو مجهز انه يتحمل كهرباء 110 وكحد اقصى 125 فولت وغالبية الاجهزه الكهربائيه كذا بس انت الكهرب اللي في بيتك اكثر من 125 علشان كذا احترق السخان بسرعه.. وعلشان تتأكد راح اقيس لك الكهرب عندك..... يوم حط الجهاز حق القياس ويطلع قوة التيار عندي 145 فولت :eek: ..... قلت ليه كذا؟؟؟ هل عندي مشكله في التمديدات؟؟ قال لا؟؟ كل الرياض كذا.... شمال وشرق وغرب وكل الرياض كذا.... والسبب شركة الكهرباء :sleep: :upset: قلت والدبره وش اسوي؟؟؟ اكيد بيخرب السخان الجديد اللي ركبته؟؟؟ قال لازم تركب جهاز ضبط التيار علشان ما يوصل الثلاجه الا 110 فولت بس.

المهم انا حبيت اتأكد زياده من كلامه
وش سويت؟؟؟
طبعا كلكم تعرف السشوار حق الشعر....
المهم ذا السشوار يشتغل على الخطين وكنت احطه على 110 وصدقوني كان يخرب في اسبوع اسبوعين واذا طول قعد له شهرين ثم جبت جديد ( طبعا مهوب لي لحرمتي )
المهم اخر واحد حطيته على 220 فولت وصدقوني انه يدهر الى يومكم له اكثر من سته شهور ماقال اح :D

علشان كذا نصيحه اي جهاز يحول الكهرب لحراره مثل السشوار او سخانه المويه او مكوى الملابس وغيرها كثير حاولوا تحطونه على 220 وتراه افضل للجهاز واطول لعمره الافتراضي

ولا تنتظرون شركة الكهرب تجي وتحل هالاشكال وتعترف بخطأها وتبرر له

وترى كلامي هذا على مدينة الرياض اما باقي المدن فما ادري عن كهربهم لأن بعض المدن فيها بس 220 فولت.

وختاما آآآآآسف على الاطاله،،، بس حبيت افيدكم بتجربتي