السلام عليكم والرحمه..
أخباركم وعلوومكم؟؟

أكيد بخيرماشاءالله عليكم لو انكم منتب بخير كان مادخلتوا الموضوع..<<شكلها بدت بالبثاره قبل الموضوع
قبل لا اكتب اي شئ انا حبيت اعتذر لأخوي{الاميرالهلالي} على اللي صار بمووضووعك ومن جد حسيت بمعاناتكم فالعذر والسموحه منك على سوء الفهم العقلي اللي فيني<يوووه دايم

ثاني شئ ترى هذي اول مره اكتب موضوع فتحملو بثارتي اصلن ماكنت متوقعه اني في يوم راح اكتب بس اللي صاااااار اكبر من طاقتي
حنا عايله مثل كل العوايل عادي جميله قررت في يومن من السنوات آآآآآآ قصدي الايام..يعني ناخذ قهوتنا وشاهينا ونروح المنتزه وبحمدالله نزل القرار السامي من وزارة الداخليه لعايلتنا الموقره بالخروج يوم الاحد إلى افشل منتزه بالخرج ذا اللي بازين فيه{ياحبي لتس يالخرج}المووهم اخوي قال مانيب جاي إلا بصدقاي دخلوهم معنا قلنا ابشر ماطلبت طبعن اخوياه جو بسياره لحالهم هو قال لعمتي روحي كلمي رجل الامن{حسبي الله عليه}وقولي له إن فيه باقي عيال ماجوا اذا جوو خلهم يدخلون راحت وقالت له عاد تعرفوووون الرجاجيل اذا حاستهم{كلمتهم}حرمه..يوووووه ابشرري ماطلبتي ومن هالحسي..قالت خلاص اجل اعتمد قال افاء عليس اعتمدي..

المووهم ونروح عادي نتقهوى وشوي اخوي يدق على امي يقول لها الله لايهينس روحي انتي وواحد من اخواني للبوابه الرئيسيه دخلي اصدقاي ماراح اروح عشان ابووي مايقعد يحقق معي..الموهم راحت امي وتدقر فيذاك ويعيوون يقوولوون لا مافيه دخووول وماصدقوا انا نعرفهم{بيني وبينكم صادزين واحد دب والثاني اسمر والثالث ابيض} المووهم بشق الانفس رجل الامن{حسبي الله عليه}قال خلاص ادخلوا دخلوا وراح واحد من ذا السملق اللي يشتغلووون بالمنتزه ويلحقهم واشر لهم على مكان قال اجلسوا فيذا الموهم جلسوا خذو القهووه فجأه وبرهه من الزمن وانا في عززز تلذذي بطعم القهوووه اللي نصها هيل يدخل اخوي اللي بمتووسط ....يصرخ....

يممممممه محمد اخوي وولد عمي واخوياهم خذتهم الهيئه...طبعن اناخييير عسسى مااشر ابو الشباب ضايع لكم شئ عند عيالنا الموهم امي جتها النفاضه قال قوومي بسررعه ولاتقوولون لرجال محمد يقوول مالي خلق طقاق الموووهم قامت امي ومرت عمي آآآآآآآه يااحسرتي ياليتهم ماقاموا تخيليو يوم راحوا لقووهم بالجمس

عاد امي خافت على ولدها راحت مسكت الباب مع الدريشه والدريشه مفتوحه تخيلووا الوقااااحه الزاايده يصكرووونها على يد امي ومرت عمي ماسكه هذاك الشئ اللي يقوول وي وي للمطر هذاك اللي يمسح القزاز ايوووووه هذاك
تخيووا ماسكته بكل وقحه يشخطوون بالسياااره وبسررعه عشان تفلت يدها هو اني اصنهم بذا السماعات اللي جنبي هو اني الخهم من جد وقاحه..

طبعن يوم صارت الدعوه جمس وهيئه دقينا على الرجال وراحوا واقنعوهم بس رفضوووا قالوا لازم ناخذهم عمي يقوول لهم وش سووى يقول مدري جانا بلاغ من الاداره عنهم وجينا خذناهم يوم راحوا يسألون الااره قالوا لا مابلغنا ولاشئ طبعن من اللي بلغ والله العالم الظاهر انه ذا رجل الامن اللي بلياالله دخلهم حقد عليهم ..
تدروون أنا وش قاهرني بالموضووع ودابلن تسبدي ان ماحولهم احد هذا اولن ثانين جالسين بحاااال سبيلهم بقهوتهم لااااا وتخيلوا بعد يقول اخوي ورب المصحف سلمت السله حقت الترامس لخوي الثاني من هنا إلا هم جايينا من هنا يعني كانوا يحترونهم يخلصون قهوه عشان يمسكوونهم ومايكون فيه شئ من آثآر برائتهم<<أوووه الاخت تحمست آثآر
ويقوول ابد جو قالوا تعالوا يقول رحنا درعمنا معهم يقوول يعني ماجاء ابد في بالنا انا راح يصير هالشئ يقوول عادي جالسين وماحولنا عوايل وغير عن كذا عاي نتقهوى نلعب بلوت نحتري الشاهي يجي الموهم يقول درعمنا دخلونا الااره قالوا اثباتاتكم ؟؟
عطوهم ذا الضعووف {مادروا عن نواياهم}وقالو يالله على الجمس...
هاه قولوا لي شسووا..تسني اسمع واحدن منكم يقوول اكيد عيالكم غلطانين بقوولك لاا مستحيل كلهم توهم متخرجين من الثانوي ولا لهم خلق هبال كل واحد حاط يده على قلبه يحتري باي جامعه راح يدرس....
...ولااااااااابعد تخيلوا اخوي اللي بالمتوسط يقول للمطوع {استغفرالله العظييييم اللهم اني اكتب المووضووع وانا صايمه.}.يقووله ماسوووا شئ..تخيلوا وش قاله المطوع::

أنت انقلع..يااااااويل تسبدس تسبداه يانوره لعنبوا بالله عليكم هذا مطوووع له لحيه وله هيبه ..من جد ارحمهم
غير عن كذا اصلن ذا المنتزه مايجيه هيئه من عررفت عمري وش نططهم ذاك اليووم..
انا والله مااقوول لا حسبي الله عليه من رجل امن حسبي الله عليه..تدروون إن عمتي راحت تدووره تهزأه ليه يقوول اعتمدي ومن هالكلام وآخر شئ يسحب عليهم..بس للأسف مالقته لفت المنتزه كل ابووه مالقته..
عاد طلعوهم الرجال من الهيئه ووقعوا تعهد بس من جد لاتسألوني على ايش وقعوا انا احسه على بيااااض لان من الاساس مافيه شئ سووه..ولوا قلنا مثلن غالزلوا لعنبو في احد يغازل وهو جالس استغفرالله العظيييم..يبوووون للي يغازلوون صح انا علمهم منهم ورب المصحف جت ببالي فكره جهنميييييه بس اختي قالت اعقلي ..
كنت ناويه ارووح واستهبل واخلي اخووي يرقمني ويستهبل علي قدام رجل الأمن عشان هو طبعن يسووي فيها رجال ويجي يلعن خامس ذا اللي يرقمني عاد انا وناسه اطيح وجهه باقووله هذا اخويهههههههه بس يالله راحت

وبس وجينا من المنتزه الساعه11 الليل فيه احد يجي من منتزه هالوقت..بس ولايهمك أنا عن نفسي طلعت حررتي فيه يوم جيت اطلع كانت عمتي ومرت عمي يكلمون رجل امن ثاني خويه فيوم مريت قلت بصوت عالي طبعن:حسبي الله عليه جعله يحصل هالشئ بغاليه.. انا اكلمه وانا معطيته ظهري هو قال طيب كلموه هو انا وش دخلني ...هو قال كذا وإلا ماقاله انا ويي ويي وشحت بالعبايه والتفت عليه قلت وينه هاه وينه هو لو انه رجال وقد كلمته اللي قالها كان وقف هنا بلاه رخممممه..



يالله بطس تقبلوووا بثارتي اللي اليوم زايده حبتين وياليت تعطوني تعليقكم على الموضوع