انت تطلع اختك للسوق ؟؟ - نادي الهلال السعودي - شبكة الزعيم

نـــــــ15ــــــمر · #1 28/07/2008, 11:04 AM

بسم الله الرحمن الرحيم

السلام عليكم ورحمه الله وبركاته

لا اعرف كيف ابدا او بماذا اتحدث او كيف اكتب الموضوع

وانا على المسنجر الا ويتيني هذا الرابط من احد الاشخاص يقول لي ادخل وشف

بالنسبه لي المقطع اول مره اشوفه ويمكنه قديم ولكن انا متاكد انه في ناس ما شافوه

وان سبق وشفتوه ابي منكم تعليق واتمنى منكم احترام وجهات النظر

http://www.youtube.com/watch?v=K9uOQF502Qc

حبيت اسئل انت كيف علاقتك مع اختك او انتي كيف علاقتك مع اخوك ؟؟

هل في اسرار بينكم ؟؟

كل كم تطلعون مع بعض ؟؟ يوميا ..اسبوعيا ...شهريا ...سنويا ...ولا ماتطلع معها ؟؟

وش الاماكن الي تروحون لها ؟؟؟

هل في موقف صادفتموه وانتم مع بعض ؟؟

وش الاشياء الي تخوفك لم تطلع معها او تطليعين مع اخوك ؟؟

اتمنى التعليق على المقطع

تشــــــــاو

حتى ظلالي هلالي · #2 28/07/2008, 11:35 AM

هلا بكـ أخوي النمر 15

صبحكـ الله بالخير ورده

أنا قبل اشوف المقطع أول مافتحت الرابط عرفت المقطع
لاني شايفهـ الحلقهـ هذي كاملهـ ببرنامج 99

شوف الشيء اللي تعودنا عليهـ أن الاخ مالهـ علاقهـ قويهـ مع اختهـ
إلا ماندر ..
يعني شيء غريب عند المجتمع السعودي لو يكون بين الاخ واختهـ علاقهـ قويهـ
تشبهـ علاقة الصداقهـ ..

انا ماراح اتفلسف
لان اسألتكـ بحد ذاتها تطلع كل مافينا من حكي ..

إقتباس


	حبيت اسئل انت كيف علاقتك مع اختك او انتي كيف علاقتك مع اخوك ؟؟

علاقهـ ..
كيف الحال ..؟! وش أخباركـ ..؟!
بس

طبعا اذا شفتهـ بالصدفهـ وإلا يتعنى لي لا

إقتباس


	هل في اسرار بينكم ؟؟

مافيهـ أمل

أنا شخصياً ودي

بس هوى الاخو ضدي

إقتباس


	كل كم تطلعون مع بعض ؟؟ يوميا ..اسبوعيا ...شهريا ...سنويا ...ولا ماتطلع معها ؟؟

أكذب عليكـ أن قلت لكـ قد طلعت معهـ لحالي طلعهـ خاصهـ

كلها طلعات ضرورية ومشاوير .. وبعد نادر أكون لحالي معهـ

إقتباس


	وش الاماكن الي تروحون لها ؟؟؟

قلت لكـ مانطلع إلا مشاوير ضرورية

إقتباس


	هل في موقف صادفتموه وانتم مع بعض ؟؟

قلنا مانطلع

إقتباس


	وش الاشياء الي تخوفك لم تطلع معها او تطليعين مع اخوك ؟؟

مافيهـ حاجهـ تخوفني

بالعكس أحس بالامان

بس متى تجي هالطلعهـ

..

اخوي النمر
لو بتتكلم عن هالموضوع إلى بكرى
المجتمع (السعودي) أو بالاخص (القصيمي) << لاني أتكلم عن المجتمع اللي انا فيه

مافيهـ أمل يغير تفكيرهـ

تفكيرهـ ثابت ومصر عليهـ .. وابن ابوهـ يقنعهـ

كل الشكر لكـ ورده

MaRoUaNe · #3 28/07/2008, 12:10 PM

إقتباس

الرسالة الأصلية كتبت بواسطة حتى ظلالي هلالي


	اخوي النمر لو بتتكلم عن هالموضوع إلى بكرى المجتمع (السعودي) أو بالاخص (القصيمي) << لاني أتكلم عن المجتمع اللي انا فيه مافيهـ أمل يغير تفكيرهـ تفكيرهـ ثابت ومصر عليهـ .. وابن ابوهـ يقنعهـ كل الشكر لكـ ورده

ياخي كلن يتكلم عن نفسة مع أحترامي لك ...غير صحيح ان المجتمع القصيمي عنيد ومايغير معتقداته..

أنا من بريدة واعرف منذ نعومة أظافري أن الواحد ضروري يكون له علاقة قوية مع أخته .. كي يحميها ويكون سند لها من أي شر لا سمح الله ..

***********

حبيت اسئل انت كيف علاقتك مع اختك او انتي كيف علاقتك مع اخوك ؟؟

ج/ علاقة ممتازه وصداقة لأبعد الحدود

****

هل في اسرار بينكم ؟؟

ج/ اسرار وذكريات وكل شي بيننا .. سواء مع أختي أو الوالده الله يحفضها

*****

كل كم تطلعون مع بعض ؟؟ يوميا ..اسبوعيا ...شهريا ...سنويا ...ولا ماتطلع معها ؟؟

ج/ شبه يومياً

****

وش الاماكن الي تروحون لها ؟؟؟

ج/ المطاعم .. السوق .. كل شي ..

****

هل في موقف صادفتموه وانتم مع بعض ؟؟

ج/ كثيرة ..ومنها مرة (((....قد غرست في البر وهي معي وبلشت.. ولا فيه أرسال والحمد لله طلعنا بعد ثلاث ساااعات....))))

****

وش الاشياء الي تخوفك لم تطلع معها او تطليعين مع اخوك ؟؟

ج/ والله الحمد لله مافية شي يخوفن ابد

مشكور على الموضوع الجميل

حتى ظلالي هلالي · #4 28/07/2008, 12:37 PM

إقتباس

الرسالة الأصلية كتبت بواسطة Mr.Marwan


	ياخي كلن يتكلم عن نفسة مع أحترامي لك ...غير صحيح ان المجتمع القصيمي عنيد ومايغير معتقداته.. أنا من بريدة واعرف منذ نعومة أظافري أن الواحد ضروري يكون له علاقة قوية مع أخته .. كي يحميها ويكون سند لها من أي شر لا سمح الله ..

شوف اذا انت من نعومة أظافركـ على قولتكـ

وانت عايش كذا
فمستحيل تغير نظرتكـ .. وأحسن لو ماتغيرها

لكن شف كل اللي حولكـ ..
بتقنعني إن أغلب القصمان زيكـ ..!!
اللي مثلكـ قليلين ويعدون بالاصابع ..
عشان كذا أنا عممت .. لاني اشوف الاغلبيهـ ..

من ناحية يحمي اختهـ ويكون سند لها ..
أكيد كل واحد يبي يحمي إختهـ .. ونفس الاخت تبي أخوها يحميها ويكون لها سند

ما اختلفنا على هذي

بس فيهـ فرق بين العلاقة الــ(أخوهـ) وعلاقة (الصداقهـ):

يعني فيهـ فرق لما تكون تقول لها أسرار وبينكم كلام وطلعات.. (صداقه)

وفرق لما تكون توديها مع الاهل وتطلع انت وياها برضوا مع الاهل يعني طلعات عائلية ..ولا فيهـ أشياء خاصهـ بينكم ..

(أخوهـ)

أتوقع وجهة نظري واضحهـ ..!!

والله يخلي لكـ اختكـ ..
ولا يحرمها منكـ ..

اختكـ

MaRoUaNe · #5 28/07/2008, 02:07 PM

إقتباس

الرسالة الأصلية كتبت بواسطة حتى ظلالي هلالي


	من ناحية يحمي اختهـ ويكون سند لها .. أكيد كل واحد يبي يحمي إختهـ .. ونفس الاخت تبي أخوها يحميها ويكون لها سند ما اختلفنا على هذي

اللي اقصده يأختي بان يكون الرجل سند لأخته .. ((راح اعطيك مثال))

لما يزعج البنت أحد في الجوال .. البنت تبي تبلش شوي كيف تطلع من المشكلة ..

لكن إذا كانت لها علاقة قوية مع أخوها علطول راح تعلم اخوهاا بالسالفه ..

لأن بينهم اسرار .. وتفاهم ..

لكن لو العلاقة بينهم رسمية أتوقع صعبة انهااا تعلم أخوهاا بأن احد ابلشها بالجوال ..

حتى مو شرط الجوال اي مشكلة تقع فيها البنت ..

فاكيف يكون سند لها وهو ساهجن ابوها ولا يدري عنها والعلاقة رسمية

أتوقع وجهة نظري واضحهـ ..!!

إقتباس

الرسالة الأصلية كتبت بواسطة حتى ظلالي هلالي


	والله يخلي لكـ اختكـ .. ولا يحرمها منكـ .. اختكـ

جزاك الله خير على الدعوة والله يوفقك بالدنيا والآخره

هلالي من ارض اليمن · #6 28/07/2008, 02:24 PM

العلاقة بين الأخوان اجمالا تستند على تربية الوالدين وتوجيههم !!

هنالك أخوان يعيشون فيما بينهم كأنهم غرباء !! لا تجد احد يسأل عن الآخر .. ولا أحد يبال بالآخر .. ولا أحد يعلم عن الاخر سوى أسمه وان هنالك قرابة أخوية تجمعه به !!

هنالك أخوان على العكس من ذلك تماما .. هنالك احترام .. وهنالك تفاهم .. وهنالك توافق .. وهنالك أخوة حقيقة تقوم على الأحترام والتقدير المتبادل ،،

الوالدان يقع على عاتقهما المسؤولية الأولى في تحديد العلاقة بين الأخوان وتوجيههم بما يوثق العلاقة بين جميع الأخوان .. كبيرهم وصغيرهم .. رجالهم ونسائهم .. بحيث لا تجد تلك الحواجز التي نصنعها بايدينا ،،،

من جانب آخر من المهم ان يكون الأخ قريب من أخواته .. ليس من اجل الحماية فحسب بل ايضا من اجل التوجيه والرعاية .. ومن الجميل للأخت ان تشعر ان هنالك أخ قريب منها تستطيع ان تتعلم منه وتستفيد من خبرته وتوجيهاته خاصة وهو أكثر اعتراكا للناس والحياه ،،،

شكرا لك اخوي نمر

ونتمنى عودتك بالسلامة

والله يعطيك العافية

حتى ظلالي هلالي · #7 29/07/2008, 01:52 AM

ناس كثير تركوا الموضوع وبدو يحكون عن سالفة القصمان

لكن بترك الكلام كلهـ
لان حالة القصمان مفروغ منها

دايم يشوفون أنفسهم أحسن الناس وديرتهم أحسن ديرهـ

بس حبيت أعقب على نقطهـ

إقتباس

الرسالة الأصلية كتبت بواسطة Mr.Marwan


	اللي اقصده يأختي بان يكون الرجل سند لأخته .. ((راح اعطيك مثال)) لما يزعج البنت أحد في الجوال .. البنت تبي تبلش شوي كيف تطلع من المشكلة .. لكن إذا كانت لها علاقة قوية مع أخوها علطول راح تعلم اخوهاا بالسالفه .. لأن بينهم اسرار .. وتفاهم .. لكن لو العلاقة بينهم رسمية أتوقع صعبة انهااا تعلم أخوهاا بأن احد ابلشها بالجوال .. حتى مو شرط الجوال اي مشكلة تقع فيها البنت .. فاكيف يكون سند لها وهو ساهجن ابوها ولا يدري عنها والعلاقة رسمية

هذا التصرف مايتنتج من نوعية العلاقه

هذا شيء مفروض على الاخ انه يسويه مع اختهـ

يعني تعتقد لو ان علاقة الاخ باخته علاقه عاديه ماراح تقول له عن اللي يزعجها أو يضايقها..
بالعكس هذا شيء واجب عليه وعليها

دام هذا تفسير العلاقة عندكـ فعلاقتي مع اخواني احسن علاقة

نـــــــ15ــــــمر · #8 28/07/2008, 11:51 AM

حتى ضلالي هلالي

مرور جميل وخفيف الضل

ومشكور على الرد والتواجد

لكن انا راح اقولك حاجه

تدرين ان علاقتي مع اخواني بعد رسميه

يعني شوي واقول لاخوي الكبير كيف حالك طال عمرك والفرق الي بيننا 5 سنوات

يعني فكيف تتوقعين علاثتي مع اختي ؟؟

تشـــــــاو

الســفيرة · #9 28/07/2008, 11:52 AM

وعليكم السلام ورحمة الله وبركاتهـ

طول عمري كنت اتمنى اخ بعمري بس ربي ماكتبلي اخو الا لما وصلت الجامعة الحمدلله على كل حال

مادري ليش الحواجز يبنونها الاخوان والخوات بينهم !!

شفيها لو قعدو سوا وسولفو والا عزمو بعض على غدا والا عشا

محد بيحس بقيمة الثاني الا لما يطلع من البيت

الله يخليلكم اخوانكم وخواتكم يارب ورده

نمر يعطيكـ العافية ورده

بريماكس · #10 28/07/2008, 11:54 AM

هلا باخوي متعب

ورده

من ناحية المقطع انا شفت الحلقه من قبل وقسم بالله عدت هالمقطع هذا اكثر من مره وكل مره اضحك اكثر من اللي قبله من جد ناس متخلفه الله يعافيهم ولا يبلانا

.
اجل مايبي يطلع اخته عاار ؟ على ايش عاار تجر انت عليه يوم تقول عااار ؟ من جد ناس مريضه وعقوله محدوده ومتصكره يبي من يفتحها لهم

.
اما نايف ابوبدله اللي بجنب اللي لابس ثوب لو شايفه بالحلقه وش يقول .. قعد يبدي وجهة نظره ياليته ساكت احسن والله

المهم يساله صلااح عن علاقته مع اخته قال مانب فاضيله

،، اخوها ماهو فضيله مشغول عنده انياق وعنده وعنده ، الاخ مشغول بالابل

واكبر همه نياقه

واخته بالطقاق

.
اخواااتي عشان اكون صريح مانب معهم كثير لانهم مع اخوتي الاخرين مع زوجاتهم

وعلاقتي لاباس معاهم .و علاقتي معهم عااديه واللي تبيه تامر فيه مع اني جاااف شوي صراحه معهم

بس سوق مانب حريص عليه انا لاسباب شخصيه جداً

لاشفت الثمه تضيع علووومي صراحتن

لذلك مقرر ان لا اذهب اليه بتاتاً

.
من ناحية اخواني مافيه اي شئ رسميه

والله مابي اقول اشياء يمكن البعض يحسبني امزح او استهبل لكن والله صدق الميانه بيننا ماله حدود

اللي له لي واللي لي له ،،

والله يديمنا اخوه متحابين

خلوني اقولكم هاللي صارلي توووو يمكن له علاقه بالموضوع

تو صحيت عاد كنت مظطر اطلع اجيب ملاابسي من المغسله عاد ادور المفتاح مالقيته حست البيت مالقيته قلت يمه مفتاحي وينه ؟ قالت مفتاحي ولا مفتاحك

المهم انا قلت غريبه وينه

طلعت للملابق الا اشوف سيارتي ماهي فيه على طول قلت اخوي اخذه

.
السالفه اخوي هذا ( ف ) اخذ سيارتي يوم شافن نيم لان سيارته اخذه اخوي الثاني ( أ ) بسبب ان سيارته منسم كفره وعجاز يزينه هالصبحيه

ذكرت هالسالفه لانه توه حاصله واحس ان له دخل بالرسميه وو وو

اسمحلي يامتعب لي تعقيب بسيط على الاخت العزيزه حتى ورده
ياعزيزتي ليه المجتمع القصيمي بالتحديد فيه المشكله ؟

اذا كنتي تقولين مافيه امل يغيرون اطباعه فاعذرين يبي يظل حااالكم كذا لانك مبيته النيه ولا عندك نيه تحاولين تحلين وتغيرن من المشكله !!!
صارحتي اخوك ؟ سويتي شئ عشان تحكمين تقولين ثااابت وماراح يتحرك ؟
.
بالعكس اشوف فيه قصمان واااجد يضرب فيهم المثل بكيفية التعامل مع ابناءهم واخواتهم وكل شئ
.
بصراحه مدري وراه المجتمع القصيمي بكل شئ يضرب فيه المثل

ارهاااب قصيمي كل شين قصيمي ،، عجبي والله منكم وتفاكيركم !!

.
كل قطره فيني تفتدي ارض القصيييييييييييم

.
حبيت اسئل انت كيف علاقتك مع اختك او انتي كيف علاقتك مع اخوك ؟؟
بصراحه ياخوي علاقتي ماهي ذاك العلاقه يعني عشان اكون معاك واضح احس فيه فجوه بيني وبينه ولا اقدر اقوله اللي في بالي ويمكن هي تحس نفس الشعووور

يمكن انا شخصياً ماتعودت على هالشئ ونشأت عليه ويمكن لو اغير تتسهل الاموور

.
هل في اسرار بينكم ؟؟
الي اعرفه ان السر يكون شئ خااص

بالنسبه لي لا يوجد اسرار .. صارت زوجه ماهي اخت

كل كم تطلعون مع بعض ؟؟ يوميا ..اسبوعيا ...شهريا ...سنويا ...ولا ماتطلع معها ؟؟
اكذب عليك ان قلت ايه ،، طلعه خاااصه لاا او نادر مره .. وهذا مايعنى ان االاخت حبيسة الجدران بالعكس الحمدلله فيه اخوي قايم بالامر هذا

انا طول وقتي مشغول

.
عشان اكون صريح واتكلم بواقع الجميع او اللي اعرفهم ان العلاقه بين الاخ واخته علاقه محدوده نوعاً ما ،، يمكن السبب من المجتمع لم يلقى نظره لهذه المشكله وحلوله ،، اللي تسبب مشآكل ونحن نظن انها شئ عااادي

اكتفي لهذي الحد ولاهنت يابعدي وياليتك معطينا رايك انت حول علاقتك مع اختك و و

عالعموم شكراً ولاهنت واتمنى اني ماطولت عليكم ياحبااااااب وردهورده

ابوياسر .. ضراس المحتله

لاهدت نفسي · #11 28/07/2008, 12:01 PM

هلآ بك آخوي .. آلموضوع حسآس وجميل وآلمقطع آول مره آشوفه

بآلنسبه لي عآيش مع 5 آخوآن <~~ كلنآ عز1بيه بالبيت

يعني آسمحلي مقدر آجآوب علىآ آسئلتك ..

لكن آنآ آشوف من وجهة نظر

بالنسبه للسوق ومآلسوق .. آنآ مآآشوف فيهآ شيء آنهآ تطلع آختك للسوق تتقضىآ ..؟!

آصلآ نفسي آعرف .. وين الخرآب اللي بيجي بالسوق ؟!

طيب الزوجه تطلعهآ السوق ولآ لآ ..؟

وآلله حآله

دآمك وآثق منهآ .. ومتربيه آحسن تربيه .. مآينخآف عليهآ ^_<

تحيّتي (:

مــــهــــنــــد · #12 28/07/2008, 12:06 PM

هلا والله نمر
بصراحة ماشفت المقطع لكن راح تستغرب كثير لما تعرف أن أكثر الناس يعاملون أهلهم برسمية تامة يعني كأنه يتعامل مع غرباء .!

بالنسبة لي ياكثر الأسرار بيني وبين أهلي وياكثر الطلعات وعلى فكرة أنا من أشد المؤيدين للطلعات العائلية وأعتبرها الأكثر متعة بينما جميع الزملاء الي أعرفهم يقولوا أن طلعات العوائل مغثة أو على الأقل ماهي وناسة مثل طلعات الشباب ..!

بالنسبة للأماكن كلها مشتاقة لك يعني أي مكان حلو لازم نروح له مطاعم كوفي شوب والرياض عامرة بمثل هذه المحلات ، بالإضافة للمنتزهات مع أن الوالده الله يحفظها ماتدانيها .

هههههههههه بصراحة أذكر كنا طالعين البر وقت الشتاء وكنت لابس ثوب أسود وشال أسود وامشي مع أهلي كان فيه بنت قاعدة تسوق جيب وتطعس فيه وتقرب لنا تبغى البنات يشوفونها تسوق لما قربت مرة شافت العوارض وتحط الغشوة وهي تسوق وكادت تنقلب لولا أن الله رحمها هههههههه .

تسلم على الموضوع التحفة .

ومضة
سواء للبنات أو الشباب إذا أخوك أو أختك ما يقولك أسراره أجل لمين راح يقول أسراره ؟!

تحياتي ،،،،

F I N A L · #13 28/07/2008, 12:10 PM

تصدق اليوم جتني نفس الرساله

وأحس أن كلامهم بايخ جداً, جداً,

إقتباس


	حبيت اسئل انت كيف علاقتك مع اختك او انتي كيف علاقتك مع اخوك ؟؟

علاقة ممتزاهـ, ولله الحمد والمنهـ,

إقتباس


	هل في اسرار بينكم ؟؟

رقبتي في يدهــا

كل أسراري عندهــا ,

إقتباس


	كل كم تطلعون مع بعض ؟؟ يوميا ..اسبوعيا ...شهريا ...سنويا ...ولا ماتطلع معها ؟؟

قليل لأنـهـا مزوجهـ,
وبيتها بعيد عنـا ,

إقتباس


	وش الاماكن الي تروحون لها ؟؟؟

إذا طلعنا نروح البحر ,
أو السوق ,

إقتباس


	هل في موقف صادفتموه وانتم مع بعض ؟؟

NO

إقتباس


	وش الاشياء الي تخوفك لم تطلع معها او تطليعين مع اخوك ؟؟

مافيش حاقهـ,

تقديري

!. مجنون في زمن العُقلاء .! · #14 28/07/2008, 12:35 PM

أهلا ً بك
بصراحه لم أتابع المقطع
ولكن بمُجتمعنا للأسف هُناك حاجز لا أعلم ما أساسه بين الأخ واخته
ولا أدري بأني منطق تم بنائه وترميمه
هل هي العادات والتقاليد
لا أعتقد ذلك
ما أعلمه من كبار السن
بأن الشقيقه لها مكانه خاصه جدا ً حتى وأن كانت أصغر من الشاب سنا ً
شخصيا ً لا توجد أي حواجز بيني وبين شقيقاتي
وأعترف بأن بعض أشقائي يرون الحواجز ضرورية
ولكن بالنسبة ِ لي لا أسعى لهذه ِ الحواجز
ومسألة تبادل الأسرار مع شقيقاتي موجود بقاموسي
لأني أفهم معنى ذلك تماما ً
أخ وأخته .. لما الحاجز ؟
أجهل طريقة تفكير البعض وأجهل المُبتغى من ذلك
أتمنى من الشاب أن ينظر لأخته بنظره مُختلفه تماما ً
يحترم قرارتها ويقدر توجهاتها ويبادلها أسراره كي تنطق بأسرارها
فـ المسأله أخذ وعطاء
أحدى شقيقاتي تبلغ من العمر خمسة عشر عاما ً
وحينما تنطق بفكره أيا ً كانت
آخذ بفكرها ولا أستصغر رأيها أبدا ً

//

والحمد لله بأني لست ُ كـ غيري
دُمـــت

كاريزمـا · #15 28/07/2008, 12:39 PM

اهلين اخوي ...

هذا المقطع من حلقة لبرنامج 99 وكثر النقاش حولها ..

تفاجأت بعد ماشفت هالحلقه بتفكير بعض الأخوان معقوله ياصل فيهم التفكير كذا

وش اللي تتأثر .. من البيئه الخارجيه .. !!!! ( اسواق - ووو )

الواحد يكون على اساس النشأه الصحيحه متى ماكانت النشأه مستقيمه

والدين موجود كرادع من النادر هالشكليات تأثر عليه ..

يعني من المؤسف والمخجل شباب وهذي طريقة التفكير...!!!!

المصيبه مو هنا المصيبه في كلمته

عـــــــــــــــــاداتنا وتقــــــاليدنا ...

عادات وتقاليد ماأنزل الله بها من سلطان ..

يرجع يقول اختي ماعمرها طلعت واختي ماعندها نت ...

وهذا عـــــــــــــــــــــــــار

وموب عـــــــــــــــار طلعتك الساعه 2 بأخر الليل وبالتخصصي !!!!

صدقت يا صلاح .. نظرتك كانت صحيحه ..

لكن هذا اللي يقول ( حلال علي وحرام على غيري )

ونقطه حبيت أنبه لها ....

أكثر خطر البنت المكتوم عليها .. من قبل اهلها أولاً وأخوانها ثانياً

ماتجد من يسمع لها ..ولا ينصت لها ..

عمر ماكان هالأنغلاق على الفتاة ...حل سلمي .. بالعكس هي كائن حي حساس

يحتاج شكوى واستماع ليه مايكون هالشكوى لك أنت ياأخوها

بدل ذهابها لعيال الناس وبث شكواها عندهم فيه من يستغل ظروفها

والشيطان حاضر بكل وقت !!

الله يستر على بنات المسلمين آجمعين ...ويهديهم ويصلح بالهم ...

انا مااحب اتقيد بالأسئله كثير

مع انه ماعندي أخوان اشقاء ..

لكن ... الله رزقني أخوان

اتوقع لو لي اشقاء مايوازون ربع حنانهم وطيبتهم

الله يخلينا لبعض يارب .. ومايغير علينا

إقتباس


	المجتمع (السعودي) أو بالاخص (القصيمي) <<لاني أتكلم عن المجتمع اللي انا فيه مافيهـ أمل يغير تفكيرهـ تفكيرهـ ثابت ومصر عليهـ .. وابن ابوهـ يقنعهـ

حتى ظلالي هلالي

صدقيني مو من مجتمع معين من العوائل نفسها ...

انا قدامك قصيميه اب عن جد واشوف تعامل عائلتنا وبالأخص أخواني

ولا أروع مع أنهم قصمان ..

ان شاء الله تكبرين وتصادقين معهم ..حاولي تكون البادره منك

انتي بالاول بتفشلين بس صدقيني بعدها تكسبينهم

احلى احساس من الاخو لما يصادق اخته

يعطيك العافيه نمر 15 ..