"نبوية" .. مدرّسة مصرية في مدرسة أهلية و بنفس الوقت تبيع في المقصف .. وخطـّها الرقعة زين .. لذلك يخلّونها المدرّسات تضبّط لهم صحايف .. وتحضّر عنهن بعض الدروس وكل صحيفة بعشرة أريل وكل درس بـخمسة.. رجلها المهندس (رجب) .. يشتغل في (البلدية) من أول ماجاء للديرة وهو ماسكه معه غلط يحتسي عامّي مثلهم !! حوّم تسبودهم في اجتماعات الدوام .. وفي مجالسهم وصلت البجاحة بـ"رجب" إنه صار يطّق عقال مخمل .. وثوب الدفة ويلبسه جديد بدون كوي .. فتشوفه هو وعرافيط ثوبه مطاير مع هالشيبان .. وخذ يا قرق ووجع راس .. وسواليف"ن" تسنها وجهه ..
قدّر الله عليه هو "نبوية" وطلعّوا (شرايح موبايلي) !! فرحوا بهالجوالات .. و قاموا يسّوقون لـ(موبايلي) !! لدرجة نص المدرّسات وفرّاشتين .. حوّلوا لـ"موبايلي" .. ولا بقى من حقين البلدية إلا 3 على "الاتصالات" و (رجب) زعلن عليهم ..ولا عاد صار يدّق عليهم وإذا بغاهم ضروري أرسل (كلمـّني) ودايم يقول لهم : إخسٍ عليكم الله مار يغربشكم .. حوِّلوا !!
أمس رحلته للقاهرة الساعة 11 بالليل .. وخايفن تفوته الرحلة ومن آذان العصر .. هو و"نبوية" محضّرين بالصالة الدولية !! المهم إنه يدقدق على حقين مصر .. يبي يعلمـّهم متى وصوله !! طفـّى الجوال وشغلّه تسعميّة مرة يحسب البلاء من (جهازه) .. و"نبوية" فيها الصيحة !! ساعة وتبي ترجع الشبكة !! ساعتين !! عقب العشاء وتبي ترجع المياه لمجاريها !! لا (موبايلي) صرّحت وش اللي صار بالضبط !! و (خدمة العملاء) ما يرّدون على اتصالات العالم !! والدعوى ضايعة !! والعالم هناك يحترون اتصالهم !!
(ظنكم يبي يرجع "رجب" يسّوق لموبايلي) !!
(لكن الغلط من رجب ونبوية ليه ما علمّوا أهلهم من مبطي) !!
موبايلي وش ذنبها !!
-----------------------------
(دحيّم المستوي) .. موظف على الرابعة بالجمارك بالرياض .. هادي ماله في اللف والدوران .. أفدغ ويسّدد جواله أول بأول ولا له أصدقاء إلا عيال خالته .. هو ونظاراته اللي يجيك إطارهن أسود وعدساتهن كبار .. كنهن بيالات مقلبـّة !! رجع للشقة وأخذ له غفوة عشان يرجع للديرة إذا برد الجو ..وخفّت الشمس .. مسك الخط !!ويوم قام .. حرث الشقة حرث يدوّر جواله ومفاتيحه .. وصار هالفاهي مقفّل عليهن في الددسن !! وأهله يدقدقون عليه !! والشبكة ما تمسك !! وهو جايب له (سيم) ويحاول يفتح السيارة !! يوم أذنّ المغرب .. والوضع متأزم !! فصخ نظاراته .. وكسر (قزازته) بنظاراته !! ودخّل يده وفتح الباب .. لقى (19) رسالة من أمـّه .. و326 مكالمة لم يرّد عليها !! يحاول يرسل !! يحاول يدق ماش !! وأهله في الديرة .. دارين إن شوفه (شجر) .. وتبدأ الوساويس !! و ( موبايلي) ما شاء الله عليهم .. طالع (المتحدث الرسمي) حقهم .. ولأن مبدأ (الشفافية) فوق كل اعتبار !! ما خلّوا قناة (ماصّرحوا فيها) أقل شيء امتصاص غضب العالم !! وتهوين عليهم !! وعشان يصيرون (هالقراوى اللي يحترونه في الديرة) على بينـّه !!
حط (دحيّم) جواله في مخباته وراح لم محل قزاز وغيّر قزازته ولا قضت سيارته إلا الساعة 9 ونص !! والعالم في الديرة مخترشين عليه !! انحاق عرسهم !! و ماتت الفرحة بقلب أبوه وعمـّه !! لا يقدرون يدّقون عليه !! ولا يقدر يعلّمهم وش اللي صاير !!
(( وش ذنب دحيـّم )) ؟!
إلا ذنبه ونص !! ليه ينسى مفاتيحه وخل ثوارته تنفعه !!
موبايلي مالها دخل !!
----------------------------------
أنتم خوذوا عمرتكم وإذا خلصتوا بيننا (جوال) !!
راحت (هياء وبناتها ومعهم ولدها عبّودي) .. و أبوهم يبي يخلصّ عمرته ويروح يدوّر لهم (شقة) بهالزحمة .. ووجع هالراس !! (لأن دعاية "موبايلي" قوية ) ..كل العائلة محوليّن جوالاتهم لها !! قضوّا عمرتهم وعبّودي ماسك عباة أمه .. وخواته يدقدقون على أبوهم !! وهياء مرسله له (ترانا قضينـّا عمرتنا ونحتريك عند أول واحد يبيع مساويك عند مستشفى أجياد) !! وأبوهم (طقـّه هّم) ما قد جاه في حياته !! وعبّودي هالبزر وشلون يبي يدبّر أهله !! وبنـّياته مابيدهم حيلة !!
(أنا أشوف الغلط موب من موبايلي .. الغلط من هياء .. تسان صارت حرمة .. ولا راحوا مع هالبزر وخلوا أبوهم) !!
--------------------------
سعود المطخطخ .. من التجار الكبار .. أبثر أم العالم بــ(كونكّت موبايلي) عنده رحلة (للصين) وتعرفون ربعنا إذا صار بمخباته قرشين !! غث العالم وبدأ يهايط .. وعنده ولد عمّ يعرف لـ(Power Point) وكل عائلتهم آخذين فيه مقلب إنه هكر !! وجزّم (سعود المطخطخ) إنه ما عاد يشتري (تذاكره) من (مكاتب الحجوزات) .. وقايلن له : تذااااكر إلكترونية وريّح راسك !!
آخر موعد لشراء التذكرة (9 بالليل) !! و سعود شابك (كونكتـّه) من الساعة أربع العصر .. ونايم على بطنه .. ويحاول في هالـكونكـّت !! وفات موعد شراء التذاكر !! عدّل بدّل !! وش السالفة !!
الموضوع سهل .. ( شبكة موبايلي ما عاد تشتغل) !!
صدقونـّي الغلط راكب (المطخطخ) ليه ما ضبـّط حجزه مبطي !!
موبايلي دخـلها في حجوزات وخرابيط !! وأحد غاصبه (يستخدم شريحتهم) !!
يا أخي بعض الناس يقهرون !!
---------------------
إلى الشريك الرسمي لـ(نادي الهلال) !!
- هل أنتم مستوعبين حجم الكارثة اللي صارت ؟! هل هناك خطة لـ(تلافي) هالخلل والفضيحة اللي صارت !! هل من المعقول (شركة عملاقة - ترعى ملايين المشتركين) .. مالها "خطوط بديلة " !! ومهما كانت المبررّات .. العالم (طرحت فيكم الثقة ) !! وما ناقشوكم في كثيرررر من الأمور !! تبون نجاملكم ؟! أوكي أنتم أطلق شركة في (المجموعة الشمسية و مجرة درب التبانه و الحجاز ونجد وملحقاتها) !!
و وش فيها إذا (سحبتوا على العالم ) ولا حسبتّوا لهالأمور !! ترا الموضوع طبيعي ويصير في (صالات العروس) !! وقد صارت مثل هالكوارث في (سوق أوشيقر) !! ووش الفرق بينكم وبين (محلات حلة القصمان) كلكم مالكم خطط بديلة !!
ولا راح نناقشكم بـ موضوع الأبراج اللي تشتغل على (كهرب) !! طيب يا موبايلي (يالشريك الرسمي لنادي الهلال) .. معقولة شركة عملاقة تشغّل أبراجها عن طريق الكهرب .. طيب وإذا طفى الكهرب عن (قرية من هالقرى اللي مشغّلين أبراجكم عن طريق كهربها ) وشلون يكلموّن العالم ؟! ترا (السراج ) ما يدّق !!
موبايلي .. بمجرد ما طرح فيكم (الزعيم) ثقته .. ومدّ لكم يده .. هل استوعبتوا (حجم الزيادات المطّردة ) في سعة شبكتكم ؟! وإلا (التعامل بلغة " لا تدقق " ) هي اللغة الأفصح !!
اللي صار صار !! و ( نبوية ورجب ) و ( هياء وعيالها ) و(دحيّم وأهله) و (سعود ورحلته اللي راحت بلوّشي) (وغيرهم ألوف مألفة ) !! .. منتظرين ( تعوووووويض .. يكون بحجم الكارثة اللي صارت ) !!
جمهور (نصف الأرض ) اللي أنقطعت عنه (أخبار معشوقه الأزرق) لأكثر من (نصف يوم ) منتظرين " خبر يعيد لهم الثقة من جديد " !! و كلنا بانتظار ( قرار .. أو " رضاوة " تغسل آثار هالزلة !! )
ويجب أن نتعامل مع هالموضوع بلغة ( أرقى ) وباحترام عهدناه من (موبايلي) تجاه عملاءها اللي يكنوّون لها ( كل الود والاحترام ) !!
سلام عليكم ..
قال ايش قال " غطّيناها " !! 
الوضع المتطور
