][ ـــرابطة عشاق البارسا لموسمـــ 09/2008 ][ || إنها ثلاثية للتاريخ ولو كان التاريخ يدون المتعة فقط في سجلاته سيبقى اسم البارسا وحيدا || - صفحة رقم 218 - نادي الهلال السعودي - شبكة الزعيم

Mr.Barcelona · #3256 16/10/2008, 03:02 PM

ميسي : أفضل الحصول على لقب مع برشلونة على الحصول الكره الذهبية

goal

‎βαƦ¢α 4 ξνξƦ · #3257 16/10/2008, 05:14 PM

)( )( كـــــــــــــــرســـي الاعتــــــــــــــراف )()(

الإجابــات

ـهلاليـ

السـؤال الخامس والعشرين/ كـم عمـرك الانترنتـي ؟؟
( يعني كم لك داخل في النت )
والله تقدر تقول من خمس الى ست سنوات .. واذا تقصد مع الزعيم .. صار لي معهم ثلاث سنوات ..

..

السـؤال الأول الواحديـن/
أ- اسمك الكامل?
يزيد ولد عبدالعزيز ولد محمد المعشوق ..

..

ب-وين مولود؟
الرياض

ج-وين ساكن؟
الربوه

د-الوظيفه.
طالب في كلية الطب

م-الهوايات .
تقصد غير النووم طبعا" ..

.. فيه البلايستيشن 2 او 3 .. ما تفرق معي اكسر رووس الخلق وين ما رحت ومع مين لعبت ..

..

السـؤال الواحد والعشرون / هـل تحـب قعـدات الرصيـف؟؟
وفيه احد ما يحب جلسة الرصيف .. بس اكيد بدوون ما نأذي غيرنا .. رغم طبعا" في ذلك الوقت كل شياب الحاره يمووتون فيني ..

..

السـؤال الثلاثينون / وش تفضـل .... بـرد الشـتـاء ام حــر الصيـف؟؟
برد الشتا .. كل شي بالشتا له طعم .. الاكل والجلسه بالبر والطلعات مع الشباب .. تحس انك تطفش من طوول الليل .. وهذا احلى شي طول ليله ..

السـؤال السـادس/ قـل وجبـاتك اللي اكلتها امـس كلها .. فطور ... غداء ... عشاء ... ووين كلتها؟
فطورر : بيض - جبن - زيتون اسود - شاهي .
غدا : نووووووووم ..

..
العشا : معكرووونه + بيبسي

الـسؤال العاشر ميه / منذ متى وانت تشجع البرشا ؟
منذ مبطي .. من ايام ريفالدو

والفريق الهولندي .. ايام كانت الاوربت فيها انواع السرقه ..

.. ما اقول الا الله يخلي لنا الجزيره

..

السؤال الـخمسطعشرليون/ من هم اللذي اعجبك اسلوبه بالبرشا منذ تشيعك إليه حتى الان .. وهو لاعب واحد بس .
روووني وبس ..

..

السـؤال الخمسمية / تحب البزران ولا هم يحبونك؟؟ واذا كنت تحبهم وش بتسمي ولدك؟؟ واذا كانوا يحبونك وش بتسمي بنتك ؟؟
والله احبهم .. حلووين .. وانا من الحين معروف ان ولدي راح يكون اسمه فيصل .. وبنتي بـ حرف الالف << ما اقدر اقول اكثر من كذا عيب ..

..

السـؤال الأخيـر / تحب تلعب كيرم ..وهل انت محترف ؟
والله كنت العب .. بس يا اخوووي راحت اصابعي من اللعب .. وبالنسبه للاحتراف .. فانا والله من جنبها ..

..
السـؤال بعـد الأخيـر /
أ/ معك ثلاث بلكـات ...... اخـتر ثلاث اعضاء والزخهـم؟
( ترى تقـدر تلزخها كلها في راس واحـد على حسب الشهيه )
والله الاعضاء اللي هنا كلهم على العين والراس ..

..
لكن لو تقصد لاعب فاكيد راح الزخ فالديز وانا مغمض واضحك بعد ..

..

ب/ معك 11 جبنة كيري ... وخمس صاموليات .. وسكين .. وملعقه .. !!
اكتب معادله لتوزيع الجبن على الخبز بالتساوي .. ولمن تهديهااااا ؟؟
والله موب انا اللي اصلح لـ غيري << وش عنده طويل العمر ..

..
لكن ان كانت مصلحه وجاهزه للاكل .. فاكيد راح اعطيها كلها لـ أنس ..

..

جـ/ ماهو السبب؟؟؟؟؟
والله انس شكله دب

د/ ماهي افضـل فتره ( ساعات ) تقضيها في كـل يوووم؟
يعني الصبح ولا العصر ولا في الليـل..........؟ ولماذا؟
الليل اكيد .. لان الجو عندك ما يساعد تسوي شي في الصبح والعصر ..

..

م/ كم في مخباتك الحين ؟ نبي الصدق وخل عنك الفقش
400 ريال فقط لا غير .. واذا ما انت مصدق بـ اعطيك رقم حسابي .. لعل وعسى ترحمني وتضيف لي كم الف ..

..

ن/ اذا صرت مزكوم تستخدم المناديل والا شماغك؟؟
والله المتوفر .. بس اكيد الشماغ ما مثله وقت الحاجه .. والله يا هو يفك ازمااات ..

..

الاجابه بـ قلم الرصاص عشـان ماتملي لي الورقه شخاميط
ابشر طال عمرك ..

..

اكشخ واحد

1 / هوياياتك واهتماماتك وتطلعاتك المستقبيله ؟؟
هواياتي وجاوبت عنها .. و اكيد اتطلع باذن الله اني اكمل دراستي بالطب واتخصص في تخصص زي الاطفال او الباطنيه ..

2 / قارن بين عشقك للهلال و عشقك للبرشا .. وهل من الممكن ان يجتمع
عشقان في قلب واحد ؟؟
والله ان جيت للصدق يا مشعل .. انا الحين احب البرشا اكثر من الهلال .. يااخي الهلال سيء .. ما عاد هو الهلال ايام يوسف

وسامي

والغشيان

..
اما مسالة العشق فـ ممكن يجتمعون مع بعض ليش لا .. وعموما ترى يقولون لي ان قلبي كبير .. يسع الكل ..

..

3 / طريقه تفضل البرسا يلعب فيها .. مع وضع الاسماء ؟؟
اكيد 4-4-3 .. لكن طبعا" ما هو دايم .. وخصوصا" اذا كانت المباراة خارج ملعبك فـ 4-4-2 هي الانسب ..
بينتو ( او بدون حارس ما تفرق المهم لا يلعب بعض الناس ..

)
ابيدال ...... بويول ............ ماركيز ........ الفيس
كيتا ........ بيسكويز
اكزافي
انييستا ........... ايتو ............ ميسي

4 / العقم الهجومي للبرسا .. الاسباب .. الحل ؟؟
والله الاسباب :
- كثرة التغيير في خط الهجووم بحجة مبدأ المداوره .. وهذا الشي مطلوب لكن مو كذا .. يعني تونا في بداية الدوري مو معقوله ما نلعب مباراتين ورا بعض بنفس الخطه ..
- الحظ .. والله يا برشلونه تجيه حالات لو يلعب ايام الكوره ما تبي تدخل ..

..
- الانانيه اللي تصير في بعض المباريات ..
الحل .. زي ما قلت لك الثبات على التشكيله ونبعد عن مسألة مجاملة اللاعبين مثل هنري و بويان .. يعني ترى ما هو غصب يلعبون .. كله لـ عيون انهم ما يزعلون ..

..

5 / لو قدر الله علينا وصرت رئيس الرابطه

.. وش اول قرار تتخذه ؟؟
اخليك النائب ..

.. واطرد اي واحد له علاقه بالرؤساء السابقين << ناقصين انقلابات احنا ..

..

S U L A I M A N

1- وين تدرس يزودي .. نسيت صراحة .. وبأي مستوى .. هو انت الي بالمعهد ولا مشبه .. !؟
وإذا كنت بالمعهد فـ بأي قسم ومن يدرسونك

تمت الاجابه عن السؤال .. كل اللي عليك انك ترفع راسك فووق ..

..

2- إلى الحين معك الكابرس ولا غيرته

يب .. >> الله لا يخلينا منه ..

..

3- بصراحة .. نايف له يوزر ثاني ولا لأ

قصدك بدر ( ابو نواف ..

.. ) والجواب هو لأ ..

4- عُمر تشوفه دايم ولا لأ

طبعا السؤال هذا والي فوقه لازم تعرف من أقصد ترى

اكيد .. هو معي في الكليه ..

..

5- يوم تسمع صوتي ذاك اليوم وش حسيت فيه

< تلاحظ مسوي هيبه انا وصوتي كل واحد اسأله شرايك بصوتي

بصراحه كنت احسبك ثقل .. بس طلعت من جنبها ..

..

6- نرجع لأسماء الشباب والي لازم تفهم قصدي

تركي متى آخر مره شفته

تركي دخل وجاااوب ..

..

7- تحترين اسألك كم ببوكك صح ؟ لأ منب سائلك بس أبيك تحرك البلاطه شوي

سـم طال عمرك ما طلبت شي ..

..

8- شرايك بـ زين ماغيره حقت الجوالات .. هل تتوقع انه بتنجح بالسوق السعودي ؟ وطلعت رقم ولا لأ ؟
زين سيئه .. والدليل النصبه الكبيره حقت شهر عليك وشهر علينا ..

.. وابشرك ما طلعت رقم .. الله لا يخلينا من موبايلي ..

..

9- وش تميل له أكثر جريدة الرياض ولا الجزيره .. ؟
الجزيره .. << لا احد يقول لي متعصب للهلال ..

..

10- وش تحب تلبس بالثوب كبك ولا عادي ؟ قلابي ولا ياقه مدري وش

مخفي ولا ساده .. ؟
كبك .. قلابي .. مخفي ولا ساده ؟؟ << وش انت شارب يوم تسأل هـ السؤال ..

..

هلالي وأحب برشلونة 9

آولآ حيآك الله على الكرسي

،، و تو ما نور الكرسي

<< تعرفون لآزم نهآيط شوي

الله يسلمك ..

..

س1 \ شرآيك في بيتزآ هت

؟
ما عليها .. بس أفضل دومينوز و بيتزا ان .. << ارخص ..

..

س2 \ إذا عزمتك على بيتزآ هت ،، بتجي

؟
والله ما اقول لأ ..

..

س3 \ شرآيك في العنصرية الكتلونية

؟
احلى شي في الدنيا ..

..

س4 \ مآجد عبدالله

،، يصلح مُحلل

؟
ممكن اذا صاروا اللي يتابعونه مسـ آآ طيل ..

..

س5 \ ميولك في البريمر لـيق

؟
والله ما فيه فريق معين .. بس يمكن الارسنال ..

س6 \ رأيك بـ البوندسليقآ

؟ سؤال يوسف الطويل

جاوب عنه

،،
دوري مهضووم حقه .. واتمنى ان الجزيره تأخذه وتعطيه حقه .. بدل الدوري الهولندي والبرتغالي اللي ينقلونهم .. والمصيبه معروف البطوله لمن في هـ الدوريات ..

..

س7 \ نوع شمآغك اللي شريته بـ العيد

؟
البساااااام البصمه 12 .. << ما نيب متاكد من كثر ما يلعبون علينا بها البصمات ..

..

Lionel Messi

ســ 1 / فيه عضو قبل فتره او ممكن الرابطة القديمه يوزره BARCA-2006 .. وكان حاط صورة جولي .. صار بيننا مشكلة او نقاش وفهمه غلط .. واظنه ترك المنتدى .. هل لك علاقة فيه او تعرفه ؟؟؟
لا ,, ما اعرفه مجرد صدفه التقارب بالاسماء ..

ســ 2 / حاطه صورة روي كين ليه

موب استنقاص من اللاعب او شي عشان ما يجينا مانشستراوي ينبرش

اقصد ان الصوره نفسها ماهي زينه ؟؟
والله وانا اخووك .. اللاعب عاجبتني شخصيته .. انواع الاجرام ..

.. مع العلم اني ما اشجع المان ..

..

ســ 3 / فيه سؤالي عن البوندز نفسه بس بندر مدري ليه خش وخذاه مني

.. ابزرد عليها شي واحد .. وهو لو كنت محلي بتستمر والا بتتركه ؟؟
اكيد راح استمر .. انا معك ان الرابطه ناقصها الكثير من التواصل من شباب الزعيم .. لكن زي ما قلت لـ بندر .. الجزيره لو نقلت الدوري الالماني راح تزيد شهرته اضعاف ما هي عليه الحين ..

ســ 5 / تلعب ترافيان

اي سيرفر وكم سكانك ؟؟
لأ .. ولا ودي

.. لان اللي سمعته عنها انها تاخذ كل وقتك ..

..

ســ 6 / لو رجع بك الزمن وتبي تلحق على 5 لاعبين تبي تشوفهم .. من بتختار ؟؟
آآآكيد مارادونا .. كرويف .. بيكنباور .. ريفالينو .. اوزيبيو ..

ســ 7 / ميسي خليفة مارادونا .. انا اقول هي قصة الزمن بس ... لو ميسي كان بوقت مارادونا اتوقع راح يسوي الضجة اللي كان مسويها مارادونا .. والعكس صحيح .. هل توافقني ؟؟
والله ممكن ليه لا .. بس ان جيت للصدق .. في عهد مارادونا كان فيه انواع الضرب .. ولا ظنيت ميسي راح يستحمل الخشونه اللي كانت موجوده في السابق ..

ســ 8 / سبب غيابك عن الرابطة بالفتره الماضيه ؟؟
مثلك عارف عطله .. ومشاغل هـ الحياة .. صعبه يجي يوم تكون فيه فاضي ..

ســ 9 / هلا ليتك كم تعطيها من 100 ؟؟
85

ســ 10 / ليونيل ميسي .. عضو اللجنة الاعلاميه .. بسطرين وش تقول فيه بصراحه من ايجابيات وسلبيات ؟؟
من هو اصلا ليونيل ميسي .. << امزح ..

..
والله مع اني ما اعرفك شخصيا" .. الا انك من الناس اللي الانسان يرتاح لهم .. وغير كذا صورتك اللي انحطت في المنتدى محسستني انك انواع البرائه ..

..
وصراحه انت من الناس اللي اتمنى تكون لي علاقه فيهم في المنتدى وبرا المنتدى .. واتمنى اني اكون متواجد في اقرب جمعه لكم يا شباب الزعيم ..

..

ســ 11 / مطعمين تعتبر من الــ TOP عندك ؟؟
توم توم ..

.. << كوجبات سريعه ..
تشيليز .. << طبعا هذا ما نروح له الا اذا طلعت المكافأه ..

..

PUYOL Carles

1- بداية مشوارك مع الكره الأوروبيه ؟ ومتى تابعت البارسا ؟
تمت الاجااابه يا ريس .. انظر الى اعلى الصفحه ..

..

2 - رأيك في لابورتا بشكل عام ..
لابورتا قام بقفزه قويه للفريق بعد ما كان الفريق في حالة جفاء مع البطولات .. ولا ننسى ان الفريق كان يعاني من كثرة الديون .. لكن مع لابورتا بدأ الفريق ينتعش على المستوى الاقتصادي ..
السلبيه الكبيره فيه من وجهة نظري .. هي سوء التصرف في بيع اللاعبين باسعار اقل من المتوقع بكثير ..
وايضا" لا ننسى المشاكل اللي صارت في الفريق في الموسمين الماضيين .. واهم من كل هذا انه كان السبب الرئيسي في نزول مستوى روني .. بـ تركه اللاعب على راحته الى ان طاح الفأس بالراس ..

3 - فالديز كان جامع للكرات .. واليوم اصبح حارس اساسي وأحد كباتن الفريق .. وسبقه في هالشئ قوارديولا .. تتوقع فالديز يصلح يكون مدرب

والله مع برشلونه كل شي ممكن ..

.. لكن ما تدري لعله اذا صار مدرب يكون افضل ..

..

4 - رأيك مع مقولة بيب اكثر شخص يعرف برشلونه.
مقوله تصف اللي صاير في الفريق في الفتره الحاليه .. يعني شووف حبيب قلبي .. غوارديولا على يقين من ان رايكارد لم تكن مشكلته في الخطه .. بل كانت في اللاعبين انفسهم .. من غياب الروح الى المشاكل بين اللاعبين .. كل اللي سواه غوارديولا انه بدأ شغله بحل ها المشاكل .. طبعا" هذا غير اللاعبين اللي جابهم الفريق في هذا الموسم ..

5 - كرويف. وجوده كمستشار اول لـ لابورتا .. شئ سلبي ام ايجابي.
من ووجهة نظري سلبي اكثر من انه ايجابي .. كروويف لاعب ومدرب اسطووري لنا كـ برشلونيين .. لكن للاسف اللي اشوفه انه فارض سيطرته بشكل كبير على لابورتا .. ولعل هذا الشي من النقاط السلبيه الموجوده لدى لابورتا ..
المفروض ان يوضع في مكانه الطبيعي كـ مستشار لا اكثر ولا اقل .. يعني يبعد عن المدرب ويخليه يشتغل على راحته بدون فرض شي عليه ..

..

6 - هل تفضل القناعه بالفلسفه الهولنديه. ام تفضل التغيير الى شئ آخر ..
برشلونه من يووم ما عرفته وانا اشوفه يلعب الكوره الهولنديه .. وما اخفيك ان هذا هو السبب الرئيسي لـ تشجيعي البرشا .. لكن هذا ما يعني انه في مباريات معينه تتنازل شوي وتلعب بطريقه محافظه اكثر ..

F.C.Blugrana

سـ1 / F.C.Blugrana .. إيجابياته ؟! .. سلبياته ؟! بكل صراحة لاهنت ورده

.
والله يا عبدالعزيز انا ما شفت عليك شي اقدر اقول عنه سلبيه واضحه .. اما ايجابياتك : تميزك بالتواقيع والاخبار والمواضيع خارج الرابطه .. تنسيقك في كتاباتك اقل ما يقال عنه انه مميز .. وتبي الصدق راح اقول لك مثل ما قلت لـ يوسف .. مهم اننا كرابطه تتعدى علاقتنا الرابطه .. يعني ما يمنع نشوف بعض في مقهى او استراحه ..

..

سـ2 / وش شعوركـ إذا شفت هاليوزرات :

S U L A I M A N
ادري ان واحد مسكين بـ ينذب عليه ..

..

Hilali 3asal
خبر جاااي في الطريق ..

..

العاشق الكاتلوني

احسن وااحد في الرابطه ..

..

محب الذئب 9
شخص حببني في الرابطه ..

.. ويجيني الحماس للاخبار ..

..

PUYOL Carles
رد متزن راح ينهي الخلاف في الرابطه ..

..

Lionel Messi
اكثر واحد يقول وينكم يا شباب وهو انواع السحب ..

..

أكشخ واحد
احس هنري يشوف الرابطه معنا ..

..

F.C.Blugrana

كتابة رد يعور العيووون ..

..

سـ3 / رأيكـ بـ ( المدرعمين ) .. ووش رايك بمشجعي اللاعب الواحد

؟!
المدرعمين .. ما احبهم وغير كذا تشويه للرابطه بشكل يكرهك الدخول للرابطه .
وجماهير اللاعب الواحد يا كثرهم .. بس تراهم حلووين ويفهمون كوره << اعطيهم جووهم ..

..

ABDULAZIZ

أبيـك تجـاوب بكلمـة وحــدة

..

وش رايـك فـي كـلا مـن:

ميســي

..
المجنون

زيـدان

..
الفيلسوف

الدعيـع

..
الاخطبوط

تشافـي

..
الماايسترو

الأسطـورة سامـي الجابـر

..
الذئب

A B D U L A Z I Z

..
الخبـل ( في الردود بس ..

.. )

تييـري

..
العجيب ( على قولة راؤوف خليف

)

====================

مـن تتوقـع راح يعمـل فـارق في البرسـا هـذا الموسـم ؟
والله الواضح الى الان ميسي .. وممكن تشافي وانييستا ..

تتوقـع بعـد خمسيـن سنـه راح نشاهـد المنتخـب السعـودي فـي دور الـ 16 فـي كـأس العالـم في إسبانيـا

..
يجيب الله مطر ..

..

علـى مستـوى العالـم مـن الأفضـل:
اذا تقصد الفتره الحاليه :
الهجــــوم : ميسي
الوســــط : كاكا - كريستيانو - روبينهو

الدفـــــاع : نيستا
الحراسـه : بوفون

مسي الخبر

س1/ تتـوقع البرسا هذه السنة يجيب بطوله

....؟
باذن الله .. كل شي ممكن في الكوره ..

..

س2/هل يحتـاج برشلونه لاعبين في الانتقالات الشتوية...؟
من وجهة نظري الفريق مااشي زي الحلاوه ..

.. اذا احتجنا لاعب راح يكون بسبب غياب لاعب للاصابه او الانتقال .. وهذا اللي ان شاء الله ما يصير ..

س3/رونالدينو هو من خسر البرسا او العكس....؟
الاثنين .. البرشا خسر الساحر صاحب اللعب الخنفشاري ..

.. وروني خسر الفريق والجمهور اللي يطرب للكوره الحلوه ..

4س/ من تتوقع يكون هداف الدوري الاسباني هذي السنه

.....؟
ميسي او ايتو ..

..

س5/ هل تتوقع ان يتأهل المنتخب السعودي لكأس العالم...؟
والله مجموعتنا زلايب .. واذا ما تاهلنا بيكون عيب علينا ..

..

س6/ تشوف برزون بريك....؟ <اتوقع تشوفه

وماهي شحصيتك المفضله في المسلسل....؟
يب .. تي بااغ

خلصت الاسئله ان شاء الله ماثقلنا عليك

ولو ,, حياك الله ..

..

الفهد

1\ هل البرشا مهيء هالموسم للمنافسة أو لحصد بطولة دوري ابطال اوروبا للمرة الثالثة في تاريخه ..؟
باذن الله ..

2\ كم عندك تي شيرت لبرشلونة

فانيله وحده بس ..

..

3\ هل عشقك للبرشا أكثر من عشقك للهلال أو العكس

؟؟
يب .. عشقي للبرشا اكبر ..

..

4\ وش رآآآيك فييييييييني

؟
انت كذا

.. بس يا ليت تكثر طلاتك علينا في الرابطه ..

عاشق الأمير الأسيوي

مساء الورد لأجمل عضو يثري الرآبطة بـ توآجده بـ التميز والنشاط .. ورده
إن شاءالله أن الأسئلة تعجبك ولن تذهب بعيداً عن الرياضة ومستقبلك ..

الله يسلمك اخووي حموود .. شهاده على عيني وراسي ..

..

س1 ./ ما رأيك بنهاية ريفالدو في الدوري الأوزبكي ..؟
والله عن نفسي ما تمنيت لاعب بحجم ريفالدو ينهي مشواره الرياضي في دوري عادي جدا" .. لكن هذي سنة الحياه .. مو كل لاعب كبير لازم ينتهي بنادي كبير ..

..

س2 ./ أنييستا عندما ظهر آمام العالم اعتبر ان طريقة لعبه تشابه أكزافي .. ما رأيكـ ..؟
والله ممكن هذا الشي كان في البدايه .. اما الان فاللاعب وصل لـ مرحله صار له فيها اسلوب خاص فيه .. وهو الآن من الاركان الاساسيه للفريق والمنتخب .. ومن الصعب تعويضه في حالة غيابه .. مثله في ذلك مثل اكزافي وميسي ..

س3 ./ هل شاهدة أول لقاء لميسي مع الفريق الأول .. اذا نعم .. هو سجل هدف رائع
من فوق الحآرس ولكن تم ألغائه .. ولكن رجع مرة أخرى وسجل نفس الطريقة ..
هل شعورك نفس شعور الجماهير والـ مقاعد الـ vip عندما وقف الجميع يصفق له ..
بـ المختصر وش كان شعورك وهل تنبأ أحساسك ان يصل لهذا المستوى الخيالي ..؟
نعم .. واذا ما خانتني الذاكره كانت قدام آآلباسيتي .. هدف روعه وخيالي وزعلت كثير على الهدف الملغى .. اما مسألة اني تنبات بانه راح يصل لهذا المستوى فـ لا .. لكن للامانه كانت فيه بوادر نجوميه .. ممكن السبب الفريق كان يساعد على البرووز ..

س4 ./ لو تخرجت من المرحلة الدرآسية التي تريد التوقف عندها ..
ورزقك الله بوظيفة وبـ دراسة خارجية الى بلد قوي بـ التعليم ..
.. والوظيفة رآتبها ومميزاتها حلوهـ .. السؤال .: ماذا ستختار ..؟
والله الوظيفه اولى .. يكفيني باني راح اكون قريب من الاهل والاصحاب .. ولاتنسى وانا اخووك مهما كان تظل الغربه شينه ..

محب الذئب9

س1 / مـن آفضـل لآعـب عنـدك .. [ محـلي / عـآلمـي ] ؟
محلي وعالمي : سامي الجابر ..

.. عالمي : مارادونا ( مع العلم اني برازيلي ) ..

س2 / مـن آسوء لآعـب عنـدك .. [ محـلي / عـآلمـي ] ؟
محلي : عمر الغامدي ..

.. وعالمي : جووتي ..

..

س3 / من تفضـل (آيتـو .. توريس ) ( كـآسيـآس .. بوفـون ) ( بيـرلو .. كزكز ) ( جيـرآرد .. لمبـآرد ) .. ؟
ايتو - بوفون - كزكز - لمباآآآرد ..

..

س4 / وش تنتـظر مـن برشـلونة و آلهـلآل آلسنـة هـذى .. ؟
الدوري لـ برشلونه .. والآسيويه للهلال ..

..

س5 / ميـسي آنيستـآ كـزكـز يلـعبـون مـع آلبـرسـآ ومنتخبـآتـهم دآئمـآ تتـوقـع بيـآثـر بشكـل كبيـر علـى مسـتوآهم فـي آلجـولآت آلقـآدمـة .. ؟
ما دام ان التصفيات راح تتوقف لـ مده طويله .. ان شاء الله ما عليهم خووف من الاصابااات .. وان شاء الله يظل مستواهم في ارتفاع من مباراة لأخرى ..

س6 / بـرشـلونـة جـآبـو لآعبيـن فـي آلدفـآع صغـآر فـي آلسـن كـآسيريس / بيكـي .. مـن تتـوقع بيـبرز آكثـر .. ؟
الى الآن بيكيه قاعد يثبت نفسه من مباراة لأخرى .. اما كاسيراس من الصعب الحكم عليه .. لكن الواضح انه بيكون مشروع مدافع صلب في المستقبل القريب ..

س7 / وش أفضـل عنـدك تـشوف آلمبـآرآة فـي آلبيـت ولآ في قهـوة .. ؟
اذا المباراة فيها فريق اشجعه فانا افضل البيت .. لان اعصابي بصراحه ما تستحمل ..
اما اذا الفريق ما يهمني مجرد مباراة حلوه بين فريقين قوويين القهوه احلى ( اقعد اجنن بجمهور الفريقين ..

.. )

س8 / تتـآبـع آلتنـس آلآرضـي .. وآذآ متـآبـع مـن لآعبـك آلمفضـل .. وآذآ متـآبـع وعنـدك لآعـب مفضـل ليـة مـآتشـآرك فـي رآبطـة آلتنـس .. ؟

اتابع وبقوه .. فيدرر

.. ما شاء الله هو فيه رابطه مسؤوله عن التنس ..

.. والله ان حصل لي وقت ابشر بعزك ..

..

س9 / مـن مطـربـك آلمفضـل ..؟
راشد الماجد ..

..

س 10 / تفضـل آلطـلعة بـر ولآ آستـرآحـة .. ؟
الاستراحه اكثر .. لكن يظل البر له جووه الخاص وخصوصا" في الشتا ..

..

س 11 / تلـعب آلعـآب آونـلآين فـي آلنت .. ؟
لا .. ولله الحمد ..

..

س12 / كـم بـآقـي لـك وتخلـص آلكليـة .. ؟
4 سنوات

س13 / معك سيـآرة ولآ لآ .. وآذآ معـك وش آلسيـآرة ..؟
يب .. كابريس 2006 اسود

وحبيت في نهاية ها المشاركه اني اشكرك على اختيارك لي ..
واشكر جميع الشباب اللي شاركوا بالاسئله .. واتمنى اني كنت عند حسن الظن ..

..

مشكور يزيد

...
من اميز مراحل الكرسي بصراحه

..

F.C.Blaugrana · #3258 16/10/2008, 07:41 PM

.. ][ راؤول :" أنتظر الكلاسيكو بفارغ الصبر " .. ويشيد بمستوى البلوجرانا ][ ..

لاعب نادي ريال مدريد .. راؤول جونزاليس أشاد بمستوى البلوجرانا مع مدربهم جوارديولا .. حيث قال :" من الملاحظ تطور برشلونة بشكل كبير عن الموسم الماضي .. مع وجود نفس اللاعبين تقريباً .. أعتقد أن المجموعة هي التي تغيرت " ..وأضاف :" برشلونة مرشح للفوز بجميع البطولات .. أنا أتوق لما سيسفر عنه الكلاسيكو "..

Sport . Es

F.C.Blaugrana · #3259 16/10/2008, 08:01 PM

تامودو :" أنا ضد برشلونة ( Anti-Barcelona ) " ..

يظهر صورة الهدف التاريخي بالنسبة له

أعرب لاعب إسبانيول ( الغريم التقليدي لـ برشلونة ) راؤول تامودو عن موقفه تجاه برشلونة .. وعن تفضيله ريال مدريد على البرشا في جميع الأحوال .. وعن مدى كرهه الكبير للبرشا حيث قال :" أنا أكره برشلونة ! هذا صحيح " .. وأضاف :" أنا لا أعيش على ذكريات الماضي ! لكني سجلت هدفين في مرماهم الجميع شاهدهم ".. علما أن دافعه لظت تسجيل الهدفين ( على حد قوله ) لمصلحة الريال للحصول على الدوري .. وضد برشلونة ..

ترجمت اللي يخص فريقنا .. الباقي يتحدث عن إنه مخلص لفريقه

..

Goal

لهالدرجة برشلونة مسوي فيكـ كذا

.. إعذروه يحتاج لشوية تنفيس

..

.... .... .... .... ....

شباب أنا الحين طالع فيه أخبار للترجمة

..

تصريح لبيكيه
فابريقاس :" أريد أن أعود للوطن

أطيب المنى

BARCELONISTA · #3260 16/10/2008, 10:58 PM

|| جيرآرد بيكيه ،، جئت إلى هُنا لـكي آلعب

||

جيرارد بيكيه ،، آهم الوجوه الشآبه لـ هذا الموسم ،، يعتقد بيكيه " يجب على الفريق آن يسير إلى الطريق الصحيح خطوة تلو الخطوة " ثُم قال " لقد جئت لـ البرشآ لكي آلعب ،، و آحجز مكان رئيسي في الفريق " ،،

الموندو

BaRcaAaWey · #3261 16/10/2008, 11:41 PM

فابريقاس :" أريد أن أعود للوطن

يا ليت واحد يترجمه لأني حاولت مرات ومرات وبائت محاولاتي بالفشل الذريع

في انتظار الترجمة

وصورة الرابط موجودة انسخ الصورة وبعدين اختار إضافة رابك وبعدين حط الرابط << للي ما يعرف يحط الرابط ويبي يترجم ولو إن الطريقة موجودة بموضوع السلمي

Mr.Barcelona · #3262 16/10/2008, 11:53 PM

بيب يفتح باب الرحيل لـ توريه

أكد مدرب برشلونة الاسباني بيب جوارديولا عدم اعتراضه
على انتقال محور الارتكاز يحيى توريه عن صفوف نادي
برشلونة الاسباني خلال فتره الانتقالات الشتوية
توريه الذي لعب 38 مباراة الموسم الماضي في الليقا ودوري الابطال لكن الان لم سوى اربع مباريات
اذ احـتل مكانه سيرجو بوسكيه الذي حاز على ثقه مدربه
ومع هذا الحاجز يمكن الاعتبار أن توريه سيغادر من الكامب نو
لاسيما بوجود عرض نادي اليوفي

goal

شباب في سؤال لنقاش

س1/ هل انت مع بقاء يحيى توريه أم لا....؟

roma for ever · #3263 17/10/2008, 04:00 AM

السلام عليكم ورحمة الله وبركاته
كيفكم يابرشاويه والله رابطه اكثر من رائعه يعطيكم الف عافيه
وعاد انا من حولكم من عند الروماويه بس في نفس الوقت اعشق الفريق الكاتلوني بعد روما فياليت ترحبون فيني معاكم اخ وزميل معاكم
تحياتي forza roma

PUYOL Carles · #3264 17/10/2008, 05:05 AM

روما فور ايفر .. حياك حبيبي .. بيتك ومطرحك ..

ترى على فكره شباب .. بالنسبه لـ توريه نقطه اخرى ايضا .. بوسكيتس الى الآن لم يلعب في دوري الابطال .. وتوريه كان موجود كبديل في اول مباراه ومن ثم اساسي لمدة 90 دقيقه في اصعب مباراه واجهتنا هالموسم .. يعني معناتها اللاعب الى الآن لايعتمد عليه بشكل نهائي .. ومازال توريه له الأولويه في المباريات الصعبه ( افتراضيا يعني )

شخصيا الى الآن مازلت اؤمن بان الا صاير فتره وبس .. ومومعناته خروج او شئ .. وياليت بيب في مؤتمره قبل مباراة بلباو يوضح للجميع موقف توريه ويظهر ثقته فيه ويسكت الصحافه

===

يزيد

يسلمو

Z.Y.Z · #3265 17/10/2008, 05:38 AM

شباب في سؤال لنقاش

س1/ هل انت مع بقاء يحيى توريه أم لا....؟[/CENTER][/QUOTE]

اكــــــــــــــــــيــــــــد

يحي لاعب ممتاز يقوم بدور دفاعي , يعني هو افضل من سيرجو , بصراحه حرام يطلع انتظر اجابات اخواني

عبيط زماني · #3266 17/10/2008, 06:47 AM

انا مع بقائهـ

هو نجم لكن بيب ما عطاهـ فرصة حقيقية

S!R BARCA · #3267 17/10/2008, 08:18 AM

* غووودي يغيب عن الفريق لـ مدة شهر لـ اصابته مع منتخب بلاده ..

.. *

المصدر

S!R BARCA · #3268 17/10/2008, 08:26 AM

* قيمة كسر عقد بيدرو مساويه لـ عقد ميسي *

رفعت ادارة برشلونه قيمة كسر اللاعب الشاب بيدرو وذلك بعد ان تم تصعيده للفريق الأول .. لـ تصبح قيمة كسر عقده 150 مليون ..
و لـ يساوي بذلك نجم الفريق في الفتره الحاليه ليونيل ميسي ..

يزيد

ღ Lover Barca ღ · #3269 17/10/2008, 08:48 AM

إقتباس


	والله احبهم .. حلووين .. وانا من الحين معروف ان ولدي راح يكون اسمه فيصل .. وبنتي بـ حرف الالف << ما اقدر اقول اكثر من كذا عيب .. ..

ويلوموني فيك

ونعم والله

بس انتبه ولد ثآني لا تسميه بندر

برب أخبآر ورده

ღ Lover Barca ღ · #3270 17/10/2008, 08:57 AM

.

هذآ الحكم اللي بيحكم مبارتنآ مع اتلتيك

.