الـحـرمـــــــــــــــــــــان - صفحة رقم 13 - نادي الهلال السعودي - شبكة الزعيم

abu_riman · #181 30/07/2008, 10:46 AM

^
^
^

هلا والله باخوي و طاريه

بس ترفق عاد لا تنطلق بالخيال واجد بعدين ما نلقاك إلا في الجزء العشرين

@@@@@@@@@@@@@@@@@@@@

متابعة و الدكتورة سارا لا تزعلون و لا تتشرهون ترى الدنيا ما تسوى و مردنا للقبر و ابن آدم مثل الإنسان --------> احلف قوة

والله العظيم إذا أنا رديت على أحد و تركت أحد أقسم بالله من غير قصد

كلكم غالين و كل له قدره ، لكن بعد ما فكرت في الوضع الظاهر إن القضية قضية ( النفسية ) وقت الرد ، يعني إذا مروق و مركز رديت إذا مو مروق أو جنبي العنا أكتفي بالاستمتاع بردودكم للتخلص من قلق العنا و من القلب أشكركم

يعني مثلاً ( لا مؤاخزة يعني

) الحين أنا في اجتماع مع مصارية قلبوا رأسي بكثر الحكي ، والله يا هم ما يسكتون ما شاء الله

متابعة و سارا و البقية ،،،

أقدر لكم متابعتكم و أتمنى أن تستمر ..
فتواجدكم مهم لي و هو الدافع من قبل لنشر الرواية هنا دون غير هذا المكان و هو الدافع الآن للاستمرار .

دمتم جميعاً تجبرون أي شخص على محبتكم .

@@@@@@@@@@@@@@@@@@@@@@@@@@

أسيرة الزعيم ،،،

أشوفك رميت المسئولية على نجمة و طلعت منها ؟!
حتى أنت و أخوك بس توصلون للنقطة اللي في نهاية الجزء وقفوا تفكير

متآبعه بصمت · #182 30/07/2008, 11:06 AM

أهم شيء إن ابن آدم مثل الإنسان

ودي أكون أول من يقرأ الجزء الجديد

< تلمح لك إن ودها تكمل الروايه

أبو ريمان إنت كريم وإحنا نستاهل

كل الشكر لطيبتك

abu_riman · #183 31/07/2008, 08:37 PM

@@ الجزء العاشر @@

ما وصل الكوب اللي بيد نجلاء لفمها ! وقف بنصف الطريق ! صارت عيونها أكبر مرتين !!
تجمدت أو يمكن وقفت أنفاسها !! ما أبالغ لو قلت كأني صرت بالغرفة لحالي في ظل صمت نجلاء !!
ركزت نظرها في وجهي !!

عبدالرحمن : " نجلاء !! "

ما في أي رد !!

بصوت أعلى ناديتها : " نجلاء !! "
نجلاء : " هاه عبدالرحمن "

عبدالرحمن : " وشو اللي هاه ؟! خير ؟! "

نجلاء : " نعم عبدالرحمن "

عبدالرحمن : " الله ينعم عليك ! عموماً كنت متوقع إن فيه شيء بينكم و بين مياسم "

نجلاء : " لا تحط براسك شيء ! ما بيننا و بين البنت إلا كل خير .

اللي أبيه منك عبدالرحمن إنك ما تفتح الموضوع نهائياً مع حنين و لا تناقشه خير شر حالياً .

عطني فرصة بس كم يوم و أرجع لك "

عبدالرحمن : " بس أنا أبي رأيك في البنت ؟! "

نجلاء : " شوف عبدالرحمن ! البنت ما فيها كلام ، و إذا ما نصحناك فيها تأكد إن السبب مو لعيب فيها لكن لأسباب ثانية "

عبدالرحمن : " مثل إيش يعني ؟! "

نجلاء : " هذا اللي أبيك تعطيني فرصة كم يوم عشانه "

كنت أبي أصر عليها عشان تحكي لكن دخول حنين علينا أجبرني على السكوت

حنين : " خياااااااااااااانة !!
تجين ما تعلميني ؟! اعترفي وين فطرك عبدالرحمن فيه ؟! "

عبدالرحمن : " يا حبك للظن الشين حنين !! "

نجلاء : " فطرني في مطعم ما في مكان ما ! ولا عزاء للغايرين !! "

حنين : " و تكذب بعد عبدالرحمن !! "

عبدالرحمن : " صدقتيها أنت ؟! والله تلعب عليك ما فطرتها ولا شيء ! "

نجلاء : " هالبنت يا عبدالرحمن بتتعبك بغيرتها !! الله يعينك عليها إذا تزوجت "
ثاني مرة نجلاء تقول هالكلمة !! معقولة تكون جادة فيها ؟!
ناظرت حنين و لاحظت إنها هالمرة استثقلت مزحة نجلاء !

فيني النوم و رأسي يعورني و ما لي خلق بعد ما شفت ردة فعل نجلاء قبل ما تجي حنين .

عبدالرحمن : " بعد إذنكم باطلع أرتاح شوي "

حنين : " فيك شيء عبدالرحمن !؟ "

عبدالرحمن : " سلامتك حبيبتي ، ليه ؟ "

حنين : " ليه ما رحت للدوام ؟! "

عبدالرحمن : " أبد ! بس ما لي خلق اليوم "

حنين : " طيب أفطرت ؟! "

عبدالرحمن : " الحمدلله ، شكراً حنين ، مع السلامة نجلاء "

حنين و نجلاء : " الله يحفظك "

طلعت غرفتي و الظاهر إني نمت قبل ما أحط رأسي على الوسادة من التعب .

@@@@@@@@@@@@@@@@@@

أنا نجلاء ، خلوني أحكي لكم الباقي من هالجزء بعد ما نام عبدالرحمن .

@@@@@@@@@@@@@@@@@@

حنين : " ما نام عبدالرحمن من أمس ! صح ؟! "

نجلاء : " ما أدري ، بس ليه تقولين كذا ؟! "

حنين : " إلا تدرين و أدري إنك تدرين "

نجلاء بعصبية : " أجل دامك تدرين ليه توقفين بطريقه ؟! وش فيها مياسم ؟! "

حنين : " نجلاء أنت تعرفين رأيي بخصوص مياسم "

نجلاء : " إيه أعرفه ، بس اسمحي لي ماني مقتنعة فيه ! و بصراحة أعتقد إن في سبب ثاني ! "

حنين : " يعني كيف نجلاء ؟! تبيني أزوجه بنت أمها تشوفنا أقل منها ؟!
بعدين تعالي نجلاء ! لا يكون صدقت نفسك إن غيرتي عليه بتخليني أتردد في اختيار الأفضل له "

نجلاء : " تبين الصراحة ؟! يا خوفتي تضيعينه !! و ما أستبعد إنك ما تبين مياسم لأنك تعتقدين إنها بتاخذه منكم ! صح أمها رمت علينا كلمة بيوم بس مو معناته خلاص ! يمكن ما كانت تقصد أو تسرعت أو ما كانت الصورة واضحة لها .
بعدين من حقه عليك توضحين له الصورة ، يعني اشرحي له الوضع كامل و خليه ياخذ قراره بنفسه !
هو رجال و يعرف مصلحته "

حنين : " مستحيل طبعاً "

نجلاء : " أنت ما تستاهلينه ! "

غطت حنين وجهها بكفيها و صارت تبكي .

ندمت على كلمتي ، تكدرت و حسيت بالذنب لكن بداخلي ارتياح جزئي بعد ما قلت كلام كنت من زمان أنتظر الوقت المناسب عشان أقوله .

طلعت حنين غرفتها و صرت أفكر في عبدالرحمن اللي أكيد بيلومني لو عرف إني تسبب في بكاء حنين ، أنا أعرف كويس مكانة حنين عند عبدالرحمن .

باقي في خاطري كلام أبي أقوله ، طلعت لغرفة حنين و حصلتها منسدحة على السرير .

نجلاء : " إذا ما راح تحكين لعبدالرحمن الحقيقة يا حنين ، أنا بنفسي باحكيها له ، ما عندي استعداد أشوف الولد يترك البنت و هي بخاطره ، إذا عرف كل شيء و قرر يتركها بقناعة براحته "

ناظرتني حنين نظرات استنكار و رجعت تناظر السقف .

تركت لها الغرفة و البيت كله و طلعت .

Canada's gallant · #184 31/07/2008, 09:53 PM

الحرمان << الله لا يحرمنا طلتك يا أبو ريمان

.. نتابع فترة و نسحب

عوافي

الـمـشـاغـب · #185 31/07/2008, 11:03 PM

بين قصة الحرمان وقصة حياتي فرق شاسع ..!

جيت أتخيل نفسي عايش بهالقصة وحسيت انه موب لايق

بالنسبة لي .. بأقول : حنين وش رايك بمياسم؟ .. بتقول : ما تصلح لك .. بأقول : ليه؟ .. بتقول : بعدين أقول لك ..!!

بروح أرقد .. وباليوم الثاني أدق على أبوي وأمي ونروح بيت مياسم نخطبها ولا علي بكلام حنين .. أجل تقول بعدين؟

شفتوا وشلون البساطة؟

أجل بأسوي مثل عبدالرحمن اتصالات وقلق وفطور واستعانة بصديق .. وبالأخير يطلع السبب عشان كلمة رمتها عليهم أم البنت؟

شرهتكم على اللي يسأل بنت عن مستقبله

العذر منك أبوريمان ورده .. بس والله رحمتك .. رايح كل شوي لغرفتك تبي ترقد ثم تهوّن بسبب التفكير في السبب .. ويومين ما نمت عشان سبب ما يستاهل .. لا ونجلاء بعد ساكتة أول ما قلت اسم مياسم منصدمة

.. والله لو انك قايل لها انك بتتزوج آرييل شارون عاد

Dr.Sara · #186 31/07/2008, 11:31 PM

افا افا ...

حنين ..!! طحتي من عيني

أكتشفت أنها :: مغرورة ! مشاغبة !

لا والله ماهي مثل شـــذو

و مستحيل بعد

لكن أكتشفت أكثر أنك أنت اللي كاتب القصة ..

A.K.N 505 · #187 01/08/2008, 12:36 AM

ما اعتقد ان سبب رفض حنين مقنع جدا ً...

باين ان حنين من البنات الحساسات بزيادة من سالفة زواجها و تعاملها مع من حولها.

BLUE BIRD 10 · #188 01/08/2008, 12:56 AM

قرأت القصهـ بأجزاءها العشر ...
و نترقب البقية بفارغ الصبر ..

بصراحه لدي بعض التعليقات المتواضعهـ ..
و لست بناقدة أو خبيرة أدبية ..

1- اهمالك للجانب الوصفي و التصويري

و تركيزك على الحوارات فقط ..

2- المبالغه في محبة حنين لأخيها ..

ورفضها للزواجه من مياسم دون سبب منطقي ..

و السبب اللي ذكر في الجزء الاخير ليس بمبرر ..

3- ارى بأن بعض التصرفات أو ردود الأفعال من شخصيات

القصه لاواقعية أو غير متوقعه .. مثلا في الجزء الثامن

عندما كتبت حنين ورقه لعبدالرحمن لم يذهب ليستفسرعن

السبب في نفس اللحظه مع أني أعتقد

بأنها هي رده الفعل الطبيعيه ..

دمت محلقاً في سماء الإبداع ..

ورده

الهنوووف · #189 01/08/2008, 01:15 AM

هلا بك

لو كنت بمكان حنين يمكن تكون رده فعلي مثلها
خصوصا لو هالشخص يهمني كثير

النظرة الدونيه شي مو سهل ويمكن تحطم حياه باكملهاا
لما الرجال يحس ان اهل زوجته ينظرون انه اقل منهم
اتوقع بتكثر المشاكل ويمكن هالشي تدريجيا ينتقل للبنت نفسها الي هي مياسم
ومع الايام تبدا تحس ان عبدالرحمن اقل منهااا

وكلنا نعرف سيطره الام على البنت
بعد الزواج
راح الام بين كل مره والثاني
بتقول لـ مياسم اايه من زينه

زوجك يحمد ربه انه ناسبنا

مارحمت الا هـالـ عبدالرحمن الله يكون بعونـه بس مدام السالفه اعجاب وارتياح فقط
بيلاقي الي افضل منها

والاهم بتكون اخته راضيه فيها

\

د..سارا
سؤال متطفل ..
وش الي خلاك تكتشفين ان بطل الروايه هو ابوريمان؟؟
؟؟ بس انتظر الاجابه نهايه الروايه علشان مانخرب

او بعيدا عن هنا
\
/
بالانتظــار

ربي يحفظك

الهنووف
كانت

هنا

ورحلت

عسيريه · #190 01/08/2008, 01:30 AM

.

.

حنين مالها دآعي بـ صراحه

يعني عشان كلمه تقوّم الدنيا وتقعدها
طيب لو هي من جد زعلت وخذت بخاطرها من كلمة ام مياسم لها
كان تركت مياسم من الأساس .. أعتقد ان حنين ظلمت الإثنين عبد الرحمن ومياسم
لأن مياسم مالها دخل بالسالفه كلها ليش تحكم عليها من تصرف وحيد من أمهآ
يعني معقوله ماشفعت لها سنوات الصداقه مع مياسم ؟؟

مُتآبعين

مع التحيه

الســفيرة · #191 01/08/2008, 01:54 AM

صباح الخير ورده

صحيح الكلمة تأثر وخاصة لما يتعلق الموضوع بالزواج ،، اعرف ناس للحين يتذكرون كلمة انقطت عليهم قدام مجلس وشايلين بخاطرهم على صاحبها من يوم قطها ...

ننتظر الباقي ورده

abu_riman · #192 01/08/2008, 02:14 AM

شكراً لكم على كل شيء ، أتمنى أن تكون بقدر تطلعاتكم .
شكراً للطائر الأزرق على النقد البناء

و أعتقد أن وجود أحداث غير متوقعة شيء جميل ، شخصياً تشدني أكثر .

هنا أقتبس ما ( قد ) يعكس كثيراً من مشاكل واقعنا ، و هذه الرواية ليست إلا من واقعنا .

إقتباس

الرسالة الأصلية كتبت بواسطة الهنوووف


	النظرة الدونيه شي مو سهل ويمكن تحطم حياه باكملهاا لما الرجال يحس ان اهل زوجته ينظرون انه اقل منهم اتوقع بتكثر المشاكل ويمكن هالشي تدريجيا ينتقل للبنت نفسها الي هي مياسم ومع الايام تبدا تحس ان عبدالرحمن اقل منهااا وكلنا نعرف سيطره الام على البنت بعد الزواج راح الام بين كل مره والثاني بتقول لـ مياسم اايه من زينه زوجك يحمد ربه انه ناسبنا

و أضيف على كلام الهنوف أنه حتى لو كانت البنت أعقل من الأم ، الولد ما راح يرتاح لأنه تبرمج على إنه أقل و بالتالي أي تصرف من البنت غير مقصود ممكن يفسره تفسير سيء .

أحد المعارف تزوج فتاةً كانت طموحه ، كان يتمناها .
كانت العقبة الوحيدة أنها أكبر منه بشهور و هذا السبب كان محل اعتراض أهل الولد ، لكن إصرار الولد كان أقوى من اعتراض الأهل و حصل الارتباط !

الناس ما يتركون أحد !!

وصل للبنت هالكلام و صارت حساسة ، و أي تصرف للولد حتى لو ما كان يقصد به شيء تفسره إنه يشوفها أكبر منه .
كل اللي أتمناه إن الولد يقدر يكمل مشواره مع البنت

abu_riman · #193 01/08/2008, 02:51 AM

@@ الجزء الحادي عشر @@

صحيت من النوم و نزلت و حصلت أمي .

عبدالرحمن : " مساك الله بالخير يمه "

أم عبدالرحمن : " هلا وسهلا ، عسى ما شر يا ولدي يقولون إنك ما رحت للدوام ؟ "

عبدالرحمن : " ما شاء الله ! اشتغلت الاستخبارات

أبد يمه ما في شيء ، مريتهم شوي و طلعت "

أم عبدالرحمن : " عبدالرحمن يا ولدي ما قلت لي عن البنت اللي في بالك ! "

عاد هذا وقته يمه !!
لكن ما تنلامين ، ما تدرين عن حوستنا الصباح !!

عبدالرحمن : " سمح أمرك يمه ، كلها كم يوم و أقول لك عنها "

أم عبدالرحمن : " الله يكتب لك ما فيه الخير "

صمت لدقائق ..

عبدالرحمن : " أو أقول لك استخرت الله و هونت !! "

نظرات تعجب متوقعة !! و ردة فعل من طرفي ليست إلا صمت مطبق !! و اللي يشوف نظراتي يقول هذا أول مرة يشوف ألوان الغرفة !!
" يمه ! وين حنين ؟! "

أم عبدالرحمن : " في غرفتها ! أختك اليوم ما أدري وش فيها ! الظاهر حساسيتها بتذبحها "

عبدالرحمن : " ليه ؟ وش فيها ؟ قايلة لك شيء ؟ أحد مضايقها ؟ "

أم عبدالرحمن : " و هو أحد يقدر و أنا أمك ؟! حنين الكل حذر في تعامله معها بسبب حساسيتها الزايدة ، بعدين أصلاً ما قابلت إلا نجلاء و الظاهر إنهم ما طولوا ، أجل ما شفت نجلاء ؟! "

عبدالرحمن : " إلا يمه !! "
كبار السن يا غافل لك الله ، على نياتهم ، لكنهم بركتنا الله يخليهم .

" باروح أشوفها "

طلعت لغرفة حنين ..
أستأذنت و سمحت لي ، حصلتها على فراشها تقرأ كتاب .

عبدالرحمن : " هلا حنين "

حنين : " هلا عبدالرحمن "

عبدالرحمن : " حنين فيك شيء ؟! ليه جالسة بغرفتك ؟! "

حنين " عبدالرحمن أنا فكرت في الموضوع و راجعت نفسي ، فإذا أنت مقتنع توكل على الله و خذ البنت و أنا قلت لك من أول إنها خوش بنت "

عبدالرحمن : " أنا ما جيت أناقش هالموضوع ، أنا جاي أشوف ليه حنين جالسة بغرفتها "

حنين و هي مركزة نظرها للكتاب : " عبدالرحمن ! صحيح أنا ما أستاهلك ؟! "

لما سمعت كلامها تضاربت الأفكار و الصور و أبي أمسك خيط ! تقطعت كل الخيوط !!

حنين و بصوت غيرته عبرتها تكرر السؤال : " صدق أنا ما أستاهلك ؟! "

عبدالرحمن : " حنين وش هالكلام ؟! ماني فاهم ؟! وش صاير ؟! "

بكت حنين أصلاً واضح من بدايتها .

سحبت نفسي و طلعت ، و كلمت نجلاء ، أكيد الإجابة عندها .

نجلاء : " هلا عبدالرحمن "

عبدالرحمن : " هلا ، وش فيها حنين ؟! "

نجلاء : " وش فيها غير الدلع ؟! "

عبدالرحمن : " أكلمك جد نجلاء ، لو سمحت وش صار اليوم ؟! "

نجلاء : " ما صار شيء ، قلت لها كلمتين تصحيها و تخليها تراجع حساباتها "

عبدالرحمن : " بس أنت عارفة إن حنين حساسة ، و مو أي كلام ينقال لها "

نجلاء : " حساسيتها هي اللي ضيعتها في زواجها ، و بتضيعك معها !
حنا ما صدقنا نشوفك مقتنع بوحدة ، تخربها بعينك من دون سبب ليه ؟! "

عبدالرحمن : " بس يا نجلاء يمكن في أسلوب أفضل ! "

نجلاء : " عبدالرحمن لازم تقهم إن اللي مخلي حنين تستمر في طبايعها أنت !! "

عبدالرحمن : " أنا ؟! "

نجلاء : " إيه أنت ! بدلعك الزايد لها و ما تبي أحد يقول لها شيء .
أنت ما راح تدوم لها ، و هي ملزومة تتعامل مع كل أصناف البشر ، و ما أظن إن أكبر همومهم أختك ما تنجرح "

عبدالرحمن : " أوف نجلاء ! كل هذا بصدرك !! "

نجلاء : " ترى إذا كل هذا بصدري فهو لغلاكم ، عموماً قلت اللي عندي و ارتحت و أنتم بكيفكم "

عبدالرحمن : " أوكي نجلاء ، شكراً ، مع السلامة "

رجعت لحنين و أنا فوقي تحت و تحتي فوق !!
حصلتها في غرفتها منسدحة بغيت أتكلم لكن تأثير كلام نجلاء كان قوي !!
رجعت لغرفتي و انسدحت مثل حنين !!