بسم الله الرحمن الرحيم
السلام عليكم ورحمة الله وبركاتة ,,
بعد الحزن اللي جاني والتفكير العمييق حبيت اني افضفض لكم عما حدث لي من قصص يحز لها الخاطر .
ففي يوم من الايام وفي المدرسه المتوسطه , كان معنا طالب اسمه محمد هذا الطالب ماشاء الله عليه من افضل الطلاب بالعربي ( دافور ) ,
كان أغلب طلاب الفصل يعتمدون عليه في حل الواجبات يعني هو يحل والطلاب ينقلون منه ,
وطبعاَ محمد كان مسوي العجايب في الانجليزي ,
يعني ماشاء الله عليه كان بلبل الفصل , حتى انه اذا يوم من الايام نقصته درجه ممكن يبكي ,
المهم مرت الايام والسنين , وتحديداً بعد مرور 3سنوات , يعني ثالث ثنوي , رحت البقاله وانا بدخلها اشوف واحد قدامي شعره طويل ,
هالوجه موب غريب علي , محمد ؟؟ لا لا مو محمد !! قربت منه ,
واناظر الا والله محمد 
, السلام عليكم كيف الحال الخ .... هاه بشر كيف الدراسه , وأتفاجأ انه يضحك ؟؟ يقول انا في المدرسه الفلانيه ودرجاتي زفت والنسبه في الستينات ؟!!! مو معقول هالكلام انت نسبتك في الستين ؟؟ قال : ايه والله هذا اللي صاير .
وفجأة يقول لي تخاويني قلت له وين ؟ قال خشه << يعني تفحيط , المهم اعتذرت منه ومشيت ,
المهم بعدها انا صراحه انصدمت , يعني مو معقوله هذا محمد ؟؟؟
بس ماأقول الا الله يهديه
,,,
السالفه الثانيه , وهي اللي بجد ضيقت صدري ,
في أيام الثانوي وتحديداً في ثاني ثانوي , كان فيه طالب جديد على الفصل , اسمه ايوب ,
طبعاَ ايوب متدين , المهم في يوم من الايام وفي حصة القران , قال المدرس ايوب ابيك تساعدني على التسميع وتمسك بعض الطلاب وتسمع لهم .
من حسن حضي سمع لي ايوب , المهم اول مارحت عنده سلمت عليه وكان يبتسم في وجهي ويرحب فيني , وقعد ينكت علي شوي ,
المهم قعدنا حوالي دقيقتين كانت ممتعه جداَ,
من البداية انا حبيت هالشخص ,وبعد ماتعرفنا على بعض سمع لي وكان علي خطأين وقال لي انا بسلم الكشف للمدرس على انه عليك خطأ واحد ,
حبيته اكثر 
وشكرته , ومرت الايام وتعرفت عليه اكثر ويوم عن يوم يزداد حبي لهالشخص , وقررنا يوم من الايام نطلع انا وايوب وبعض الشباب للأستراحه . طبعاَ ايوب قعد يسولف علينا ويحكي لنا عن الشباب اللي يقابلونهم , في بعض البراري ومعهم مسكرات .
وطبعاً كالعاده الجلسه ماتخلو من النكت الطريفه << يعني الذبات
طلعنا من الاستراحه , وكل يوم اتشوق اني اروح المدرسه عشان ابي اسولف مع ايوب ,
الرجل لطييييف جداً حتى المدرسين يحبونه صحيح انهم ماسلموا من الذبات بس كانوا يتقبلونها منه وكأنه خويهم , المهم عدت الايام ومرت سنه وانتقلت انا لمدرسه ثانيه , ونقل معاي واحد من نفس المدرسه زميل قريب جداً لأيوب ,
طبعاً في هالسنه قلت اتصالاتي بأيوب , ولما سألت عنه قالوا لي , ماعليه ماشيه اموره
بس انه زحف شوي ؟؟
قلت لهم وشلون قالوا صار يخاوي ناس سيئين !!!
وبرضوه عدت هالسنه وفي الجامعه , وأثناء الإختبارات النهائيه , كنت انا في المصلى ومعي بعض الشباب ,
دخل واحد من باب الكلية ! لابس كاب ( طربوش ) والثوب يسحب في الارض والشعر لين الكتف !! انا اناظر فيه !! هالوجه مألوف عندي ؟؟!! هذا أيوب !!
لالا مو أيوب مستحيل يكون هذا هو , المهم قلت خلني اروح اتأكد ولما قربت منه ناظرني نظره حاقد ؟؟ كأني عدوه !!
ويناظر بطرف عينه , وقتها انا قلت مستحيل يكون هذا أيوب صحيح الشبه نفس الشبه , لكن يخلق من الشبه أربعين .
المهم رجعت لمكاني , وأنا اهوجس هذا هو ولالا ؟؟
وبعد مرور فترة من الزمن , كنت عند احد الزملاء وتكلمنا عن ايام الدراسه ,
على طول تذكرت أيوب وسألته عنه وياليتني ماسألت 
, كان رده علي كالصاعقه قعدت حوالي 10 دقايق كأني متشنج !!
قال لي أيوب صار راعي بنات وسفرات لمصر ومراقص !! وشراب !! لالالالا , أتحداك يكون ايوب اكيد انت مشبه , لللأسف هذا ايوب !
ايوب اللي عشت احلى لحظات حياتي معه , ايوب اللي كان يتصل عي بعد كل اختبار ويسألني عن حلي ,
ايوب اللي كان ينصحني ابعد عن ... عن ... عن أشكاله حالياً , للأسف اقولها وفي قلبي غصه .
آآآه يالدنيا فعلاً الدنيا ماتسوى , الدنيا حقيره كما قال الرسول عليه الصلاة والسلام .
اللهم اهدي شباب المسلمين اللهم اهدي شباب المسلمين اللهم اهدي شباب المسلمين .
آآآمين
والسلام خير ختام
,,
الوضع المتطور
