حلو طعم الفرح / بقايا - نادي الهلال السعودي - شبكة الزعيم

abu_riman · #1 02/07/2008, 12:13 AM

السلام عليكم ،،،

شكراً لميس عندما أهديتنا الفرحة في وقت يطل الهم فيه مع كل نوافذنا ..
شكراً عندما جعلتينا نعيش الفرحة ..
فرحة تخرج أخت لنا في هذا المكان نتمنى لها و للجميع كل التوفيق و لهم منا صالح الدعوات و أطيب الأمنيات ...

من حقك أن تقولي : " من قدكم ! خليتكم تفرحون ! "

أنساني الفرح التهنئة ، مبروك لميس ..

كنت ذات حضور بخيل ، فهل نرى ( طبعك ) الكرم يسود فتحضرين فنرتوي من حبرك ..

@@@@@@@@@@@@@@@@@@@@

أحب الكليجا الهولندية ..
دايم عندي في المكتب منها ..

خلصت و صار لي شهر بامر آخذ لي من التميمي كالعادة ...
كل يوم أقول بامر و أنا راجع للبيت و آخرتها تاخذني الهواجيس و ما أدري إلا و أنا واقف عند باب البيت !!

انشغلت عني الهواجيس في ليلة و وقفت عند التميمي و نزلت ..
ما معي فلوس قلت باصرف من الآلة ..
في الغرفة و احد و ثاني ينتظر و أنا وراهم !!

لما صار الدور علي شرفتنا مخلوقة ..
مخلوقة متلثمة و العطر فايح و العباية مفتوحة و الجنز حالف يتقطع و رجعت التفت هذا التميمي ولا قاعة الفور سيزون ؟!

تناظر تبي الدور !
تذكرت موضوع القاضي و قلت بصوت خفيف : أوكي بس ترى باخلي القاضي يكتب عنك موضوع !

قالت : إيش ؟!
قلت : تفضلي -------------> خاف

مساكين أمثالها ، يحاولون يخلون أكبر عدد ممكن يشوفهم !!
مساكين ! أكبر عدد ممكن يحتقرونهم !!

@@@@@@@@@@@@@@@@@@@@@@@@@

في ساعات الليل ..
- : حبيبي وش فيك ؟!
- : خايف !
- : من إيش حبيبي ؟!
- : منك ! خايف أفقدك !
- : حبيبي لا تقول كذا ! أنا مستحيل أتركك .
- : طيب اوعديني !
- : أوعدك حبيبي .
- : أنا ما أجبرك علي ، كل اللي أبيه تعطيني خبر قبل ما تتركيني ! مو أتفاجأ بغيبتك !!

قبل ما تطلع الشمس ، وصلت رسالة فيها : أبيك تنساني ، و أوعدك ما أزعجك ..

@@@@@@@@@@@@@@@@@@@@@@@@

ماني من اللي يوقف للسيارة عند نوع لا تكلفين
ولاني من اللي تجيبه الفلوس و لو كانت ملايين

ما يشدني جمال(ن) تصنعه المكاييج و الألوان
و مع احترامي ما يهمني كونك بنت آل ( فلان )

أبيها ( أنثى ) إذا شفتها ما كن بالدنيا انخلق غيرها
و إذا ضاقت بي الوسيعة في وقفتها عن قبيلة أبيها

أبيها ملاك(ن) طاهر(ن) مغسول(ن) بالأمطار
لها جبين أدمن السجود و دموع الخشوع أنهار

عقل(ن) كمله الله بالثقل و زين الأخلاق طاغي
ما ينافس أخلاقها إلا زينها و الملح فيها متناهي

ما أوعدك بمال قارون و ما يسبق اسمي سعادة
لكن أوعدك بعمر يخلي حياتك جنة كل هم أيامه

قلبي قصرك و صدري البوابة و ممشاك على يديني
عشقي لك سماه و خوفي عليك أسواره تتبعك عيني

القاضي · #2 02/07/2008, 12:43 AM

مبارك لإختنا لميس تخرجها و عسى الله أن يكتب لها التوفيق و السداد في قادم حياتها.

أبو ريمان ،

عدنا إلى سيرة الحب !! ألم أقل من قبل أن المحب هو من يدفع الثمن غالياً.

انتظرني في عودةٍ أخرى.

عسيريه · #3 02/07/2008, 01:44 AM

:

:

ياهلا ومرحباً ألف بـ مفكرنآ

حيآك الله يبو ريمان ورده

بدآية ألف مبروك تخرج أختنا الغاليه لميس

ماشاءالله تبارك الله
الله يوفقها ويرزقهآ الوظيفه السنعه

إقتباس


	مساكين أمثالها ، يحاولون يخلون أكبر عدد ممكن يشوفهم !! مساكين ! أكبر عدد ممكن يحتقرونهم !!

إيه والله إنك جبتها مساكين والله مساكين
تنآزلوا عن كُل شي , كُل شي بأبسط الطُرق

الله يهديهم ويصلحهم ويصلحنآ

أبو ريمآن مُبدع كالعاده , بس تراك قآطع نتمنى إستمرارك معنآ
دُمت بخير

مع التحيه

ڪـيــف الـζــآل ؟ · #4 02/07/2008, 02:49 AM

::

" مبرووك " .. لـ ( الأخت ) .. " لميس " ........... !!
و الله .. " يوفقهـآ " .. في .. بآقي .. " أيآمهـآ " ....... !!

::

إقتباس


	قبل ما تطلع الشمس ، وصلت رسالة فيها : أبيك تنساني ، و أوعدك ما أزعجك ..

لآ .. " تضمن " .. أبدآ ........... !!
فـ في .. ( الرقـة ) .. " تخدع " .............. !!
وهكذآ .. " حيل " .. ( الحـب ) ..... !!
وقـد .. " تتضح " .. ( أهدآفهم ) .. " مستقبلآ " ... !!

::

يعطيك العافية

~SaKaB · #5 02/07/2008, 04:16 AM

لي عودة ..

دعواتكم .. اختبار التحصيلي .. بعد سويعات ..

.........................................................
عدنا !!

هلا وغلا بأبو ريمان .. الحمد لله على سلامتك يا مطول الغيبة ..

المهم ترى كتبت رد .. وشفت ردك اللي بالصفحة الثانية ورجعت عدلته .. كله عشان أروووق

........................................................

أبارك لأختي لميس الهلالية التخرج .. وعقبال الوظيفة ..

إقتباس


	أحب الكليجا الهولندية .. دايم عندي في المكتب منها .. خلصت و صار لي شهر بامر آخذ لي من التميمي كالعادة ... كل يوم أقول بامر و أنا راجع للبيت و آخرتها تاخذني الهواجيس و ما أدري إلا و أنا واقف عند باب البيت !! انشغلت عني الهواجيس في ليلة و وقفت عند التميمي و نزلت .. ما معي فلوس قلت باصرف من الآلة .. في الغرفة و احد و ثاني ينتظر و أنا وراهم !! لما صار الدور علي شرفتنا مخلوقة .. مخلوقة متلثمة و العطر فايح و العباية مفتوحة و الجنز حالف يتقطع و رجعت التفت هذا التميمي ولا قاعة الفور سيزون ؟! تناظر تبي الدور ! تذكرت موضوع القاضي و قلت بصوت خفيف : أوكي بس ترى باخلي القاضي يكتب عنك موضوع ! قالت : إيش ؟! قلت : تفضلي -------------> خاف مساكين أمثالها ، يحاولون يخلون أكبر عدد ممكن يشوفهم !! مساكين ! أكبر عدد ممكن يحتقرونهم !!

تصدق لو أنا مكانك !! .. كان أحط النظارة بجيبي وأسحب ولا كأني أشوفها

والله من جد .. قسم بالله ما أخليها تجي قدامي

.. أخ ما بقى إلا هي ..

بس لو

أمي

عندك .. كان شافت شي مو طيب ..

ما تلقى وحدة مستهترة بالحجاب والا حتى محجبة وقليلة حيا

إلا وتنصحها ..

لا وبعد كل يوم أشوفها تغير أسلوبها

.. يمكن كل وحدة تنصحها بالأسلوب اللي تشوف إنه يناسبها !!

إقتباس


	في ساعات الليل .. - : حبيبي وش فيك ؟! - : خايف ! - : من إيش حبيبي ؟! - : منك ! خايف أفقدك ! - : حبيبي لا تقول كذا ! أنا مستحيل أتركك . - : طيب اوعديني ! - : أوعدك حبيبي . - : أنا ما أجبرك علي ، كل اللي أبيه تعطيني خبر قبل ما تتركيني ! مو أتفاجأ بغيبتك !! قبل ما تطلع الشمس ، وصلت رسالة فيها : أبيك تنساني ، و أوعدك ما أزعجك ..

الظاهر إن السطر قبل الأخير هو السبب

ما صدقت على الله وهو يقول أنا ما أجبرك عليّ

أنا أشوف وأتوقع كثير يشوفون مثلي .. اللي يبيعنا برخيص ببلاش بعناه

في كل الأمور ..
إلا عاد إذا كان لك عنده مصلحة

..

إقتباس


	أبيها ( أنثى ) إذا شفتها ما كن بالدنيا انخلق غيرها و إذا ضاقت بي الوسيعة في وقفتها عن قبيلة أبيها أبيها ملاك(ن) طاهر(ن) مغسول(ن) بالأمطار لها جبين أدمن السجود و دموع الخشوع أنهار عقل(ن) كمله الله بالثقل و زين الأخلاق طاغي ما ينافس أخلاقها إلا زينها و الملح فيها متناهي

هذي الأنثى كلنا نبيها .. بس تهقى نلقى مثلها هاليومين ؟؟

مدري

عموماً يا أبا ريمان .. أشكرك على موزوعك الزوووووء

.. ولا تقطعنا تاااني

والمعذرة .. اللياقة في أدنى مستوياتها ..

وكل الشكر لـ اللي دعولي .. دانكن دونات , الهنووف , وكل اللي أرسلولي فاكسات

هذا والسلام
سكب الهلال

دانكن دونات · #6 02/07/2008, 04:24 AM

إقتباس

الرسالة الأصلية كتبت بواسطة سكب الهلال


	لي عودة .. دعواتكم .. اختبار التحصيلي .. بعد سويعات ..

,,

الله يوفقك يالغالي وييسر لك

والله انا نفسك امس ونفس الوقت هذا خايف ومرتبك

الله يوفقك

دانكن دونات · #7 02/07/2008, 04:30 AM

,,

أهلاً بك أخي أبو ريمان
وصبحت بالخير وبالنور
وألف مبروك لأختنا لميس التخرج والله يوفقها في حياتها الباقية
شكراً لك أبو ريمان على الطلة

دمت بود

,,

الهنوووف · #8 02/07/2008, 04:45 AM

وعليكم السلام ورحمه الله وبركاته

هلا بك
وعودا حميدا

الف الف مبروووك لميس

التخرج
وينك يالقاطعه

لك ورده

@@@

كنا بمملكتنا مضرب المثل بالعفه والستر وهكذا اصبحنا
نماذج التبرج بكل مكان اصبحنا نراها
اسال الله الستر لنا ولبنات المسلمين ولشبابنا
ولو منك اخليها باخر الطابوووه هلااشكال ماتستاهل الاحترام

@@
الله يبعد عننا الفراق ولحظات الوداع
ومانقول الا يارب اجمع شمل حبيب (ن) بحبيبه

@@@
صح لسانك
والله يرزقكم البنات الصالحات

\

\

شكرا لميس
وشكرا صاحبه العبايه والكليجا الهولنديه
اعدتوا لنا قلم افتقدناه

ولاننسى
شكرا ابوريمان

ودي يليق بك يا مختلف

إقتباس

الرسالة الأصلية كتبت بواسطة سكب الهلال


	لي عودة .. دعواتكم .. اختبار التحصيلي .. بعد سويعات ..

إقتباس

الرسالة الأصلية كتبت بواسطة دانكن دونات


	,, الله يوفقك يالغالي وييسر لك والله انا نفسك امس ونفس الوقت هذا خايف ومرتبك الله يوفقك

الله يسهل عليكم
ويوفقكم

شدو حيلكم

الهنوووف

كانت

هنا

ورحلت

الـمـشـاغـب · #9 02/07/2008, 10:29 AM

أول شي نبارك للأخت لميس النجاح وعقبال بقية الأخوان ...!

بالنسبة للموضوع الحلو جداً أقول :

مرحبا بك أبو ريمان ومرحبا بموضوعك الطالع من قلبك العاشق ..

ما أجاملك والله .. أعجبت على الموضوع وخلاني أرد وأنا مغمض ما بعد فطرت وصحصحت ..

إقتباس


	قلت : تفضلي -------------> خاف

أكيد خفت؟

وإلا خليتها تتقدم عشان تصير عندك الصورة واضحة ( بأدق تفاصيلها ) ؟

ركز على أدق التفاصيل ترانا شباب ونعرف بعض

أمزح أمزح .. بالعكس هو من الأدب والاحترام أنك تخلي الجنس الناعم يتقدم

أنا مثلاً ما عمري شفت وحدة تنتظر الدور إلا وخليتها تتقدم

.. طبعاً بشروط .. يعني لو أشوفها تحوم الكبد والله لأخليها تخيس وهي وراي تنتظر

إقتباس


	قبل ما تطلع الشمس ، وصلت رسالة فيها : أبيك تنساني ، و أوعدك ما أزعجك ..

أحياناً تحس أن الكثير من البنات مريضات نفسياً ..!!
تصرفات تصدر منهن .. ما تصدر من عاقل ..!!

ما أتكلم عن الحالة اللي تكلمت عنها يا أبو ريمان .. أنا أتكلم عن بعض تصرفات البنات اللي ما لقيت لها تفسير ..!!

هل يمكن لقعدتهن بين أربع جدران سبب في الحالة اللي صايرة؟ لأنهن ما يطلعن ويحتكن بالناس وبالتالي ما يعرفن بالضبط كيف يتعاملن
مع الناس ؟؟ يمكن يكون هذا هو السبب؟؟

يا بنات أنا قلت ( بعض ) البنات .. ما عممت .. فلا تاكلوني بقشوري

وطبعاً اذا تكلمت عن بعض البنات مو معناه اني متجاهل بعض التماسيح ..
حسبي الله على ابليسك يا أبوريمان ورطتني معهن

( كلامي ليس بناء على أي تجربة شخصية أبداً .. وإنما من خلال اطلاعي على بعض المستجدات الإقليمية في المنطقة )

إقتباس


	قلبي قصرك و صدري البوابة و ممشاك على يديني عشقي لك سماه و خوفي عليك أسواره تتبعك عيني

وش عادها تبي زود ؟ ..
تشبيهات جميلة جداً ..

صح لسانك أبوريمان

سأطس الآن لأفطر .. سي يو ..!!

alhawey · #10 02/07/2008, 10:42 AM

وعليكم السلام والرحمه،،

هلا أبوريمان

الحمد لله على سلامتك..

إقتباس


	أحب الكليجا الهولندية ..

ترى ما تجيب الحرقان أبد

جئت لأرحب بك

abu_riman · #11 02/07/2008, 11:58 AM

هلا و سهلا أبو عبدالله

سيرة الحب !!
و ما الحياة إلا الحب ؟!

من حب الإله أسمى منازله إلى أدناها ..

بانتظارك يا صديقي ...

جميل أن يقترن الرد الأول بمعرفك ..

@@@@@@@@@@@@@@@@@@@@

عسيرية ،،،

فاقدينك ! ليه الغياب ؟!
أو أن ابتعادي هو ما يجعلني أشعر أنك بعيدة ؟!

جميل هذا التواصل ، جميل أن نلتقي بعد غيبة ..

في الكفة الأخرى ..
تذكري دوماً ..

هناك بنات " يرفعون الرأس " ..

شكراً لك .

@@@@@@@@@@@@@@@@@@@@@@

للمعلومية

هناك نص أدبي لدى القاضي ( وزارة الإعلام ) ينتظر الفسح ، فإن تم فسحه من قبل القاضي تم نشره !
خلاف ذلك سيبقى حبيس الأدراج .

الانطباع الأولي أنه لن يتم نشره لأنه - حسب ما تسرب لنا من الوزارة - يحتوي على على قبلات و " يبي له جلسة " !!

يمكن الحصول على تفاصيل أكثر من القاضي .

لي عودة بإذن الله

أبو راس · #12 02/07/2008, 12:07 PM

السلااااااااام عليكم

مراااااااااااااااااااحب

مبرووووووووك تخرج لميس

بس انت كيف عرفت؟
ما اشوف لها أي موضووووع في الصفحة الاولى؟
ما تلاحظ انك بتتخصص في نشر اخبار "العضوات"
يعني قبل كم اسبوع منزل موضوووع عن القديرة أسيرة
واليوم عن لميس..
وبكره مدري عن مين
-مع اختلاف الاسباب- في رأيي من الاسلم والافضل تخلي البنات ينشرون اخبار بعض ...

الا لو انك تدور عن لقب جديد تحت اسمك يكون مثلا "المتحدث الرسمي باسم عضوات المجلس"

المهممممممممممممممممممممممم

إقتباس


	في ساعات الليل .. - : حبيبي وش فيك ؟! - : خايف ! - : من إيش حبيبي ؟! - : منك ! خايف أفقدك ! - : حبيبي لا تقول كذا ! أنا مستحيل أتركك . - : طيب اوعديني ! - : أوعدك حبيبي . - : أنا ما أجبرك علي ، كل اللي أبيه تعطيني خبر قبل ما تتركيني ! مو أتفاجأ بغيبتك !! قبل ما تطلع الشمس ، وصلت رسالة فيها : أبيك تنساني ، و أوعدك ما أزعجك ..

احنا مالنا الا الظاهر
خصوصا اذا كاتبه قدمه بهالطريقة ولا فصّل ولا وضح
وظاهر هالكلااااام انه واحد على علاقة هاتفية مع وحده ويسولفون في الليل -يمكن قبل النوم-، وانتهى برسالة SMS تعلن نهاية العلاقة الغبر نظيفة...
بغض النظر عن حقيقة هالنص من خياليته ... هذا شيء فاسد المفروض لا يجهر به من باب تجميله وحبكته كموقف معاناة او رومانسية مؤلمة تلفت النظر وتثير مواجع القلب العاشق..
شيء كهذا لا ينشر الا من باب التحذير من العلاقات التلفونية -والتي تتطور الى لقاءات مباشرة- وتوعية الناس من خطرها والانزلاق بها خصوصا الفتيات

بيجيني واحد -من الجماعة اياها- ويقول كذا انتوا يا أعداء الحب
وانا راح اقول:
نعم..انا عدو الحب الغير شريف...
ولا تاخذون كلامي..انما جيبوا عالم شرعي واحد يقول علاقات التلفون زينة وحلوة وحب بريء وبعدين ناقشووووني

بيجي واحد فطين وبيقول:
انت وش عرفك..هذا صراحة وجرئه لان هالشي حاصل ونص الشباب يتكلمووون..
وبعدين يقول عبارته المشهووورة:
انتوا ليه تدسووون رؤوسكم بالترااااب..

وانا اقول:
وهل بهذا نفخر ونشتهر ونرفع راسنا فوق التراااب؟

مو المفروض اذا ما اقلعت عن السوء اقل شي انك تستر على نفسك؟
هل يغيب الحياء عن الخالق وعن المخلوووقين؟
اليس الله يستر ع العبد ما ستر على نفسه؟
وحتى لو كان الكلام خيالي،
فانا اعتقد انه من نشر السوء تصويره بأنه امر عادي وكسر حياء النفس منه مع كثرة تكراره والباسه لباس جميل تحت عنوان الحب والروماااانسية

فيسوغ للبعض الاقدام على هالشيء للمرة الاولى ونزيد الطين بلّة

الله يهدينا جميعا.........
وخصوصا اللي انوضعوا في موضع القدوة........

كتبت ما قرأتم،
وفتكم بخييييييييييييييييييييير

جرح يشكي · #13 02/07/2008, 01:11 PM

وعليكم السلام ورحمة الله وبركاته

اسعد الله ايامك بكل خير

نبارك لـ اختنا لميس نجاحها .. ونسأل الله ان يجعل التوفيق حليفها ..

****
ابو ريمان

الموقف اللي ذكرته .. لو حصل معي مثلما حصل معك لـ احتسبت الاجر في غض النظر عنها .. لانها ما تستاهل احد يطالع فيها بـ هـ المنظر ..ولحمدت الله انه اصلحني واصلح محارمي ..

***

الحب

لا تحكي لي لـ ابكي لك

***

استاذنك يا بو ريمان على الرد على ابو راس :

يقول عليه الصلاه والسلام " وهل يكب الناس علي وجوههم في النار الا حصائد السنتهم "

في امان الكريم

ورده

لميس الهلالية · #14 02/07/2008, 01:27 PM

و أنا أشكر لك ابو ريمان حروفك الكريمة
و أشكر استاذي القاضي من بعدك
و كل الحب و خالص كلمات الإمتنان للرائعة أسيرة

و للمشاغب و الهنوف وعسيرية و دانكن دونت وليو ميسي و ابو راس و جرح يشكي صادق الشكر و العرفان

أبو ريمان إذا ابتعدنا عن بناطيل الجينز و المكياج فأنا أرى أن للمرأة حق التقدم في أي طابور مختلط (إلا في المساجد طبعاً)
بصراحة وقوف المرأة في الطابور في مجتمع مثل مجتمعنا فيه من الخطورة ما فيه
عن نفسي أتمنى وجود صرافات خاصة بالنساء و إن كان ذلك صعبا فهو غير مستحيل

مرة أخرى أبو ريمان أشكرك على موضوعك و على تهنئتك
و أشكر كل من أرسل و هنأ حتى و إن لم يسعفني الوقت للرد عليهم
أتمنى أن أتمكن من العودة هنا لإنه مازال لدي أشياء أتمنى أن أعلق عليها

و كل إجازة و أنتم بألف خير

abu_riman · #15 02/07/2008, 01:57 PM

لميس هذا المشاغب مو ليو ميسي

بس بنمشيها لك بعد 16 سنة تقريباً دراسة .

فقط من أجل لميس حتى لا يلحقها ما لا يرضينا ..
اطلعوا على توقيع أسيرة الزعيم .

هذا لا يعني أنني لا أتواصل مع أسيرة و الماسه و لميس و مع غيرهن ممن أرفع رأسي بتواصلي معهن ، و لكن معرفتي بالخبر كان فقط من خلال توقيع أسيرة و إنها لا تعمى الأبصار و لكن تعمى القلوب التي في الصدور .

و إلى كل أخواتي هنا أقول ..
يشرفني التحدث باسمكن عن الحديث باسم أشباه الرجال .

طبتم و طاب مساؤكم و لي عودة بإذن الله .