أخـوي الـصـغـيـر تـزوج الـبـارحـة .. والـفـال لـي ( فيس حزين ) ...!! - صفحة رقم 6 - نادي الهلال السعودي - شبكة الزعيم

الـمـشـاغـب · #1 02/07/2008, 08:15 PM

بسم الله الرحمن الرحيم

مع بالغ الحزن والأسى تم زفاف حبيبي وصديقي أخي مساء البارحة على كريمة أبو زوجته ..

أسأل الله أن يبارك لهما ويبارك عليهما ويجمع بينهما على خير

لماذا قلت مع بالغ الحزن والأسى ؟ أنا أقول لكم لماذا

تعود تفاصيل هالسالفة إلى زمن عتيق جداً .. أي منذ حوالي ثلاثة أشهر أو تزيد

###########

كان يا ما كان:

كنت في يوم من الأيام في غرفتي في خلوة شرعية مع لابتوبي الجميل

فجأة نادتني ماما وعلى محياها ابتسامة خفيفة وقالت إنوو بابا يبيني الحين ..!!

يا إلهي

.. لماذا بابا يبيني؟ والحين بعد؟

أكيد في الموضوع سر خطير

<< لزوم الأكشن

ودعت لابتوبي ورحت للوالد وكان لحاله جالس .. حسيت من وجهه ان فيه موضوع مهم .. شوي والوالدة تدخل علينا وتجلس معنا ..!! لاااااا .. الموضوع أكيد كبير وللحين ساكتين

مالكم بالطويلة .. بدأ الوالد يفاتحني بموضوع الزواج

.. هنا حمّرن خدودي واستحيت ونزلت راسي

قالوا نبي نزوجك ونفرح بك ونشوف عيالك

رديت وأنا باقي منزل راسي قلت : والله اللي تشوفونه

قال أبوي : خلاص أجل بالصيفية هذي نزوجك

رفعت راسي بسرعة وقلت : لااااا .. أنا ما أفكر بالزواج الحين .. أبي أكمل دراستي

ردوا علي كلهم : طيب تزوج وادرس وكل أمورك علينا حتى تتخرج وتشتغل

بما أني صاحب مبدأ .. وما أتنازل عن مبدئي إلا إذا فيه عروض مغرية

.. رفضت هذا العرض لأنه لا يوازي طموحاتي

هنا أبوي بدأ يعصب : أقول تزوج وجع خلنا نزوج أخوك بعدك .. تراه مستعجل يبي يتزوج

رديت عليه بكل خوف : طيب عادي زوجوه قبلي .. وأنا متى ما بغيت الزواج علمتكم ..!!

سألني أبوي هل أنا سامح لأخوي بالزواج بكامل قواي العقلية؟ قلت نعم وأبصم بالعشرة بعد

توقعت أني تخلصت من هالورطة .. لكن للأسف استمرت هالورطة أسبوع كامل .. أبوي يتصل أخوي الكبير يتصل
وأهلي يتصلون وأخوياي يتصلون .. كلهم يبون يقنعوني بالزواج .. وأنا رافض

.. حتى صرت معاد أرد عليهم

وأخيراً انتهت معاناتي مع الزواج .. ومعاد كلمني أحد بهالموضوع

###########

كل اللي ذكرته فوق .. ولا يسوى ريال .. بس قاعد أطقطق على روسكم

الزبدة هي هنا تحت :

في الجامعة أحياناً أشوف أخوي وأسأله .. هاه بشر متى زواجك؟

<< مو حب فيه .. بس عشان يتزوج ويفكني

وكان كل ما أسأله يقول : ما أدري ما فيه أي جديد

كل فترة تمضي وتقترب الإجازة أجي أسأل أخوي نفس السؤال .. وما ألقى إلا نفس الجواب ..!!

حتى تأكدت ان ما فيه زواج بهالصيفية .. وان أهلي بس استخدموه وسيلة ضغط علي

<< منتب عاقل يا أبو ضغط

المهم .. انتهت الاختبارات وبدأنا في الاستعداد للمغادرة لأهالينا

كنا ننتظر واحد بيختبر بالليل ونمشي مع بعض وكان المفروض أخوي معنا .. إلا انه بالصباح قام وراح المطار بيسجل في قائمة الانتظار لأن ما معه حجز

اتصلت عليه .. قلت وراك مستعجل ؟ معاك أربع شهور بتخنز في الرياض .. خلك معنا أزين لك ..

رفض وقال ان الطريق مشوار وانه تعبان من بعد الاختبارات

<<< الله أكبر عليك كلها 3 ساعات بالكثير وتقول مشوار

طولت عليكم؟؟

المهم رجعت البيت .. وليتني ما رجعت

هناك توالت الصفعات علي من كل حدب وصوب

اكتشفت أن زواج أخوي بعد أسبوعين

وأن أخوي لما سافر مستعجل .. كان عشان العقد ( الملكة )

كل هذا وأنا يا غافل لك الله

يعني أنا ( زلابة )

مثلي مثل أي كنبة في البيت

انصدمت بقوووة

عاتبت أهلي لأنهم ما علموني .. قالوا عندك علم ان الزواج بالصيفية هذي .. والموعد حددناه قبل الاختبارات والمفروض أخوك اللي عندك يعلمك

رجعت على أخوي أعاتبه .. والله ما أذكر وش الأعذار اللي هو جابها لي لكن اللي أذكره انها اعذار ما تمشي على الطحاطيح اللي مثلي <<< أمحق طحطوح ما يدري بزواج أخوه إلا قبله باسبوعين

ولأن عيبي مثل عيب يـسـرا ( الطيبة الزايدة ) سامحتهم ونسيت الموضوع

###########

الحين الكلام اللي فوق صدقوني ماله علاقة بالحزن والأسى اللي ببداية الموضوع .. بس ما لقيت أحد أسولف معه غيركم

<<< ما يبي يقول زلايب

<< محشومين فديتكم

الأسى والحزن هنا تحت :

ترتيبات الزواج أنهكتنا .. نهار وليل شغل وتعب وكرف .. الساعات اللي مفروض أنام فيها أدخل النت ألعب بلياردو وأحط حرتي في المساكين اللي امهاتهم داعية عليهم ولعبوا معي

بعد هالتعب .. بدأ الفرح

اللي نغص علي فرحتي .. وأدخلني في حالة نفسية .. هو أن أغلب اللي حضروا وسلمت عليهم .. كانوا يعلقون بتعليقات مختلفة ( طبعاً مزح ) :

- ليه أخوك يطمر الدور؟ صدق عيال ما يستحون ..

- لا تشيل هم .. بنلقى لك وحدة يمكن ترضى فيك .. <<< يقصد وحدة طرما الله يعافيها ولا يبلانا .. لا ويقول يمكن ترضى

- لو فيك خير ما سمحت له يسبقك .. الحين مين بترضى فيك يالعانس ؟

- إذا عندك مشكلة ( احم احم ) ولا يهمك .. بنروح ألمانيا نعالجك وبتطيب

<< كل شي إلا التشكيك تكفون

- الظاهر بيجوني عيال ويتزوجون وانت ما بعد تزوجت .. ولما تتزوج وتجيب عيال بيصيرون ينادونك بـ : يا جد

والله كل هالتعليقات وأكثر جات من أكثر من 30 شخص بمختلف الأعمار .. ما وقف معي وشجعني إلا قليل

الحمد لله أنا جبل ما تهزني ريح

.. وكنت متوقع مثل هالتعليقات .. لكن اللي ما توقعته أن ردة الفعل بتكون بهالشكل

اليوم .. زارنا شايب عشان يبارك .. بعد ما تقهوى مد يده بجيبه وطلع ( المعونة ) ومدها لي

أنا هنا تمنيت الأرض تنشق وتبلعني

.. انلخمت ما دريت وش أقول

الحمد لله الوالد أنقذني أشّر على أخوي وقال : هذا هو العريس موب ذا ..!

قال الشايب : ما شاء الله .. ومتى زوجتوا سلطان ؟

<< لا تسألوني وش صار لي .. بغت تجيني جلطة

علمه الوالد أني عييت عليهم حتى أخلص الجامعة .. وأحس الشايب جاملني وما حب يحطمني ..

مع أني حاس أنه يقول في قلبه : عالجووووه

###########

والله والله ما معي وقت أراجع الأسلوب والإملاء .. كل شوي أكتب وأرجع .. كتبت الموضوع لمجرد الفضفضة .. عجبكم الموضوع الحمد لله .. ما عجب بعضكم يا ليت يعذرني ولا يقول لي : أسلوبك أفضل من كذا أو موضوعك أقل من مستواك .. لأني أكتب ببساطتي وما أحب أتكلف لأني منب كاتب كبير حتى أحد يشره علينا

ومسألة التوفيق بالمواضيع من رب العالمين

###########

أسئلة الواجب :

س1 ) هل زواج الأخ الصغير قبل الكبير عيب وتشكيك في فحولة الأخ الكبير؟

س2 ) هل تتزوج أخت سبقتها أختها الصغرى بالزواج؟ .. والسؤال موجه أيضاً للبنات بعد تغيير الضمير المؤنث ..!!

تسليم الواجب في نفس الرد

فمان الكريم