الذكرى .. نسيان يدق في عالم الناقوس .. ( مكتوبه بالاتوجراف ) ..

كان يا زمان في قديم المكان .. نقدم سبحونه من سباحين التالين ..

@ @ @

عودة خفيفه الى الخلف .. لنورد بعض الذكريات الطريفه ..

الزمن .. : موسم عام 1406هـ ..

في عصرية يوم من الايام ..

قررت الخروج الى اطراف الرياض مع احد اخواني ..
محمد ( ابو لمى ) .. تراه غير ( ابو لما المنتدى ) ..

هذا يكتب لمى ( الف مقصوره ) ... وهذا يكتبها لما ( الف ممدوده ) ..

ونتمنى انهاء هذا الخلاف والوصول الى حل وسط .. واقفال هذه القضية التي اشغلت العالم ..

المهم ..

قررنا الخروج للتنزه وشم شيء من الهواء ( سحب O2 ... واخراج CO2 ) .. وخر عن العالم الكيماوي ..

المهم خرجنا في هذه ه العصريه في وقت اعتدال الهواء .. وفي مكان قصي .. انزلنا عدة الشاي والقهوة ..

جلسنا نتجاذب اطراف الحديث ..

صرنا نتفنجل ونسولف .. وخذ من فلة الحجاج و( شقة المعتمرين ) ..
سواليف .. عن البورصه ومؤشر داو جونز .. واحداث 11 سبتمبر .. ( التي ستحدث بعد 16 عام .. وماذا ستكون ردود الفعل عليها ) .. و ون تو .. واحيانا طاخ طيخ .. وهك علي وأهك عليك ..

فجأه .. تذكرت .. فيه اليوم مباراة بين ( الرياض ابو عشره ) .. و( النصر ابو سته ) ..

حسبي الله عليكم يالاتحاديين .. فسقتوا وطلعتوا هالملايين وجمعتوا هاالاعبين وصرتوا تكمخون بها الاندية الغلبانه ..

قلت : .. يابو لمى وش رايك نفتح الرادو .. نشوف وصار على المباراة .. من اللي فاز ( رياض ابو عشره ) ولا ( نصر ابو سته ) تراها تبي تنتهي .. وهي مهمه والفائز يبي يتأهل للدور نصف النهائي .. لمسابقة الكأس الملك ..

عقد ابو لمى حاجبيه .. ( يالله فكيتهن ) وقال .. :

صح شغل التلفزيون ..

قلت : .. منقوله بالراديو .. مانقلت بالتلفزيون .. ولا معنا تلفزيون ..

رد ابو لمى بسذاجه : .. طيب ولا بالاوربيت .. :p

قلت : ... الله يهديك .. الاوربيت باقي عليها .. 16 سنه .. حنا عايشين بالماضي الحين ..

المهم .. فتحنا راديو السياره ..

والا هذا حافظ الجمعه ( الماضيه ) .. صوته يلعلع .. يبي يكسر الراديو ..!!

والله .. والا العالم مختبصه .. وشيل وحط ..

الرياض متقدم على النصر 2/1 .. ومابقي غير 8 دقائق ..

وتتم جريمة الرياض النكراء ..

قال ابو لمى وقد عقد حاجبيه للمره الثانيه من الدهشه .. ( يالله فكيتهن .. ويجي يعقدهن مره ثانيه ) :

اوف .. الرياض لخ النصر ويبي يطلعه .. ابو لمى لما عرف النتيجه !

((( بالمناسبه .. ابو لمى هذا كان قد عاد منذ وقت قريب من امريكا بعد ان امضى مايقارب العشر سنوات ..
لذا معلوماته وذكرياته معطوبه .. ولا هو فاهم الرياضه والكوره لدينا .. يمشي على الفطره .. وماهو عارف الطبخه .. )))

قلت : .. على هونك لاتصير عجل .. ماشفت شي ..

قال : .. وش تقصد ..؟

قلت : .. فيه شيء يبي يصير ..

ابو لمى : .. وش يبي يصير .. المباراة تبي تخلص .. خلاص راح فيها النصر ؟!

قلت : .. اتوقع .. فيه بلنتي ..

ابو لمى : .. حلو .. خليها تصير 3 / 1 ..

(( شوف التفكير الفطري عند ابو لمى .. على نياته المسكين ))

قلت : .. لا انت منتهي .. صب قهوه .. وتقهو احسن لك ..

رد ابو لمى بغضب :.. يعني ..؟؟؟!!!

قلت : .. يعني .. فيه بلنتي بس للنصر ..

ابو لمى : .. افا .. قل غير هالكلام .. بعدين وش يدريك .. ياالشتالي على غفله ..؟؟!!

قلت : .. جميع ظروف البلنتي متوفره ..

قال ابو لمى : .. فال الله ولا فالك .. وش هالظروف يالملقوف .. لا اقوم احشي لك خروف ..

قلت ..: ( النصر .. ماجد .. الرياض فريق صغير .. غير متلفزه .. النصر مهزوم .. مباراة حساسه .. والدكه العامره بالمرعبين )

.. لو توفر النصر مع عامل واحد لكان كافيا .. فكيف بكل تلك العوامل ..

ابو لمى ( ساخرا ) : .. تصلح محلل مع شلة المركاز .. بعد 16 سنه

قلت : .. لا تتمهزاء .. انا بعد 12 سنه ابصير كاتب رياضي ..

قال : .. هاهاهاها .. يصير خير .. انت اللي تقهو .. انا رحت لامريكا من هنا .. وانت خربت من هنا ..

فجأة .. صرخ جمعه .. وكأنما لدغته داب ام جنيب .. ( شكلها جايه تشجع النصر ) ..

ابو لمى ( الفطري ) : ... بسم الله الرحمن الرحيم .. وش فيه حافظ .. ياهو .. مقروص ولا طاح من الكرسي .. ولا غص بالميكرفون .. !!؟؟

قلت : .. لا ياهو ولا هوتميل .. لاتخاف .. الرجال مافيه الا العافيه ..اسمع ..

حافظ : ... بلنتي .. بلنتي .. للنصررررررر .. وباقي خمس دقائق ..

ابو لمى بخيبة امل : .. أي والله .. بلنتي .. !! زي ماقلت .. والله منتب بسيط ..

قلت : .. ترانا عارفين البير وغطاه .. هذولا عاجنينهم وخابزينهم

ابو لمى : ... الله يفكنا من هالابار والمخابز .. قال لك الحين ابار النفط ولا مخابز السلمان ..

مشجعي النصر .. نصرررر .. نصرررر .. نصررررر

ابو لمى ( ضاق صدره صار يتحكحك ) : تكفى مافيه بلنتي للرياض .. دور يمين شمال ..

قلت : انا قلت انت على الفطره .. وامريكا منظفة مخك .. ولا التلميع الساطع ..

ابو لمى ( عقد براطمه هالمره ) : يا اخي .. مافيه اي أمل ..

قلت : .. شف .. لو يطيح فريق الرياض كله بمنطقة الجزاء .. وينقسم كل لاعب شلقتين .. مايشمون بلنتي ..

ابو لمى ضاق صدره وألبد .. !!!

حافظ : .... قووووول .. قووووول .. تعادل 2/ 2

تنرفز ابو لمى ( وطمر واقف ) : .. اسكت الله يقطع حسك .. معلق مزعج ..

قلت : ... ابو جمعه .. وش ذنبه .. لو ماصارخ يبي يقطعه الريس .. حتت .. حتت .. ويرمي لحمه الاسود للبساس .. وتبي تنغث البساس وتروح للمستشفى البيطري .. ترى حافظ معلق مثقف ومهذب ..

حافظ : ... قوووول ... قوووول . ثالث للنصر .. في الوقت الضايع ..

قلت : ... حسبي الله عليك ياحافظ .. جالس امدحك .. ماتجملت اشوي ..

قام ابو لمى : ..( احتمى الاديتر عنده ) .. يالله مشينا صك الراديو .. لاعادت عليك انت وهالمباراة ..

قلت : .. طيب لو شفت البلنتي وش تبي .. تقول ..

ابو لمى : .. وش فيه البلنتي بعد ..؟ ..

قلت : .... اشم انه مطبوخ ..

ابو لمى : ... كيف شميت ياكولمبو .. والمباراة على بعد 30 كم ..

قلت :... اللي يقرصه الداب يخاف من الحبل .. ( متعوده دايما ) .. عندنا نسبه معروفه .. من ست بلنتيات .. واحد صحيح ..

رجعنا .. وابو لمى ما اخذ بخاطره على حافظ ..

قلت : .. يابن الحلال .. حافظ مسكين ماله دخل .. هذا الحكم هو اللي يصفر بلنتي !! .. حافظ يزاعق .. وهذا يصفر ..

ابو لمى بسرعه : .. وهذا يصرح ..

قلت : .. خوش تعليق يابو لمى .. وشلون جبتها .. لا فيك رجا .. بديت تفهم وتستوعب .. وتستعيد مستواك قبل امريكا .. هذي من العابك القديمه .. قبل تخرب ..

قام ابو لمى يرطن بالانجليزي ..

علمت من رطنه انه يقول (( الكوره الامريكيه افضل من كورتكم ) ..

قلت له : .. يابو لمى ترى جماهير منتدى الزعيم يتشكرون منك .. ومعجبين بحماسك .. وتعليقاتك الفطريه ..


واثر الرجال مهب لمي بعالم ثاني يكلم نفسه ..

تركته يرطن ويخذرف ..

@@

المهم وصلنا .. وانتظرت الاخبار ..

ماكان عندنا ذاك الوقت برامج رياضيه ..

...... لا ( كل الرياضه ) .. ولا ( اشرب الرياضه ) ..

# # الله يهدي عبدالله المقحم النصراوي .. مدير البرامج الرياضيه بالتلفزيون .. جاثم على رياضة التلفزيون من عشرين عام .. وكنها من املاك الوالد ..!!
الظاهر حالف ماتتحسن البرامج الرياضيه الا اذا فاز النصر بالبطولات .. علشان يمدحه ..

ما عندنا الا اخبار الساعه تسع .. .. ويقرأها سليمان العيسى .. بعد مارفعوه ..

من وظيفة ( تشششششش تششششششش ) ... الى مذيع ..

وجت الاخبار الرياضيه وابو داوود متشقق من الفرحه .. بفوز الاصفر ..

وشاهدت البلنتي ,, وليتني لم اشاهده ..

قلت ( بنفسي ) : .. وينك يابو لمى .. تشوف الفضيحه .. والله ان ترطن صيني مهب انجليزي .. وترجع لامريكا على رجليك ..

# # اللي يبي يشوف البلنتي يضغط اللنك هذا ..( امحق من لنك ) ..

((( الدقيقه 40 من الشوط الثاني .. النصر مهزوم وعلى وشك مغادرة الكاس .. وصلت الكرة لماجد داخل منطقة الجزاء في وضع جانبي .. حاول الاتجاه للمرمى .. حاصره مدافع الرياض وقفل عليه الطريق .. حاول ان يموه ولكن التكتل لم يسمح له بالمرور .. تباطأ قليلا .. فجأة عاد الى الخلف واعطى ظهره للمرمى .. وسار قليلا بالكره كمن يريد الخروج من منطقة الجزاء .. وبحركه عجيبه ( وطأ ) الكره وسقط على الارض .. رساله غير مباشره للحكم .. لم يكذب الحكم خبرا .. وكأنه ينتظر هذا السقوط على احر من الجمر .. فأندفع معلنا ضربة جزاء قاتله للنصر .. ولم ينفع احتجاج لاعبي الرياض .. سجلت البلنتي والتعادل .. وانهار الرياض .. فولج بعدها بدقيقتين هدف ثالث انهى المباراة ..))
خرج الرياض وتأهل النصر وقابل الاتحاد على النهائي وفاز بهدف وكاس الملك ..

وردد مشجعوه (( بطوله .. يابطوله والنصر من يطوله ))

والمهم لاينسوا ان في رقابهم دين كبير ,, لهذا الرجل الحكم وصافرته الرهيبه .. خصوصا في الدقيقه 40 من الشوط الثاني ..

الا يستحق التكريم .. ومنحه ولو هدية رمزيه .. بعد ان افرحهم واضاف بطولة في سجل ناديهم .. ؟؟!
الا يستحق مساواته .. بالعقيلي .. والمهنا ..

بوضع اسمه على قمصان اللاعبين بعبارة وفاء وعرفان .. اسوة بزملائه المذكورين ..

(((( العقيلي في قلوبنا ))))

((( لن ننساك يامهنا ))))

((( احبك ياشقير احبك )))

@@@@@@

اسدل الستار .. ( الفصل الاول ) ..

اصبروا .. شوي .. وين رايحين .. الحكاية لم تنتهي .. اتتظروا قليلا ..

@@@@@@ ( لاتزعل يابو هيا استعرنا رموزك ) ..


جاءت الصحف .. فتحت احداها اعتقد انها صحيفة الرياض ..

ولا الدعوى مختبصه .. بين لاعبي الرياض والحكم ..

اثر الدعوى صار فيها ضرب يفل الحديد ..

واشوف والا هالصور .. كنها حلقات الملاكمه ..

واذكر منها صورتين ..

# # الصوره الاولى ..

حارس الرياض متمدد على الارض مغمي عليه ..

وحوله لاعبي الرياض متحلقين عليه على شكل دائره .. و( يهفون ) عليه بالفوطه ..

والتعليق المكتوب تحت الصوره ..

((( الحارس يترنح من قوة لكمة الحكم )))

اثر الحارس المسكين .. اندفع بعد المباراة يبي يضرب الحكم .. وهذا الحكم مشهور .. وهو طويل وجسيم وقوي البنيه ( جبر ) ..

فما ان اقترب الحارس منه حتى عاجله بلكمة عنيفه .. اسقطت الحارس المغلوب على امره على الارض مغميا عليه .. ( ولا تايسون ) ..

# # الصوره الثانيه :

الحكم يخرج من الملعب بمعية الريس !! .. الريس يحتضن الحكم بجانبه ويكاد يضع بشته عليه .. كناية على انه تحت حمايته .. من أي اعتداء عليه .. وهذا موقف وطني من الريس لحماية الحكم .. خصوصا ان هذا الحكم اثبت انه ثروة .. وديك يبيض ذهبا ..

وكتب تحت الصوره ..

(( الحكم يخرج بحماية رئيس ؟؟؟؟ ))

تابعت العشرات من الحكام .. لم ارى حكما يخاف من التصريحات والترهيب مثل هذا الحكم ..
فهو لاينزل للملعب .. الا وسيقانه ترقل .. وركبه تتصافق .. وصافرته ترتعش ..

((( له مواقف ظالمه مشهوده ضد الهلال ))))

@@ في نفس الموسم الذي قاد فيه النصر للكأس ..

ونتيجة لحملة اعلاميه تحريضية للتحكيم ضد الهلال .. عقب اقتراب الهلال من لقب دوري 1406 هـ ..

احتسب هذا الحكم ضربة جزاء ظالمه على الهلال للوحده في نهاية الدوري .. كادت ان تنسف آمال الهلال في الفوز بذلك الدوري ..

@@ ولعل من اشهر مظالمه للهلال ..

عام 1414هـ .. في مباراة قبل النهائي في كأس الاتحاد ..
احتسب اغرب ضربة جزاء بالتاريخ .. للنصر ضد الهلال .. ليفوز النصر بضربة الجزاء هذه ..
( والله شيء .. يأخذون دوليينه للمنتخب من هنا .. ويطعنونه من هناك .. ) ..

هذا الحكم .. يعتقد الرياضيون انه هلالي .. وهذه من المعلومات الكاذبه ..
لانه كان لاعبا سابق بالرياض .. فقط هو درب ناشيء الهلال في الطائره في يوم من الايام ...... فزعموا انه هلالي ..!!

اعتقد عرفتم هذا الحكم الهمام .. والفارس الضرغام .. قاهر البراري والاكام .. ....انه ..

??????? عمر الشقير ؟؟؟؟؟؟؟؟؟؟

!!!!!!!!! رئيس لجنة التحكيم !!!!!!!!!!!

وهذه قاصمة الظهر ..

& وانتهت .. السبحونه .. ولا سباحين حبابه .. &
& بس تراها سبحونه حقيقيه .. مع التصرف بالسيناريو والحوار &

الاستاد صالح .... الحكم هذا بالذات جبان .... في مباراة النصر والهلال عندما طرد مصطفايا لمخاشنتة صفوق .. تجمع علية لاعبين النصر ومن ضمنهم ابوكوع (المرشد) ..... قال في نفسة اذا كان هذا في المباراة وش بيسوي الريس بعد المباراة...... الخوف مليح ياصالح.

مشكور يا استاذنا الكبير على القصة المضحكة المبكية
والله يستر من اللي جاي

آلف شكر لك أستاذنا / صالح السليمان ..

وإلى الامام يا حجة الهلال ..

يارائع مايجي منك الا السباحين ( والا الغطاسين ) الطيبه

اضحكتني الله يوسع صدرك;)

تحياتي وسلملي على ابو =======> ( الف مقصوره )

محبك سهل 888 ;) ;) ;)

مشكور يا استاذنا الكبييييييييييير على الموضوع الرائع

للاسف هذا حال غالبية الحكام .. وما ينلامون مادام هناك من يصلخهم بعد كل مباراه اذا لم يفز فريقه ولايوجد من يوقفه عند حده ..

ايضا لن نستغرب اي افعال تصدر من حكامنا في الوقت الحاضر مادام هذا التاريخ الاسود هو تاريخ رئيس لجنة الحكام ..

والله على كل ظالم ..

مره اخرى يعطيك الف عافيه على مقاليك الرائعين هنا و في الجزيره اليوم الذين زاد جمالهما خفة دمك المعروفه ..

يعطيك العافيه حبيبنا صالح السليمان ...

والله مقال وقصة رااااائعة ومميزة عشنا أحداثها على فنجال قهوة .. يووووووووو شيء غير طبيعي ..;)

تحياتي لك يالغالي .. وسلملي على ( أبولمى ) إللي عندك ..;)

أما ( مــلــك الألــواااان ) اللي عندنا ...
فسلامي له أبولما العزيز والغالي ..


أشكرك مرّة أخرى يالغالي صالح السليمان ...


زعيم من زعماء شبكة الزعيم
<TABLE STYLE=filter:GLOW(color="blue",strength=#+9)><FONT COLOR="white"> َ القلب الأزرق </TABLE></FONT>

سلام كبير لحجة الهلال الغالي
استاذي الكبير .... للاسف انهم يسرقون الهلال في وضح النهار والكل يعرف من هم ومن ورائهم ولكن ............ للاسف لا يوجد هناك من يحمي الهلال ............. غير عرق لاعبيه وجهد إداريه

الف شكر لك ولتوضيحك بعض الحقائق الغايبه عنا
تحياتي

مشكور ياخوي
على تذكيرنا بمواقف الحكام ضد الزعيم

أبو سليمان .. صراحــة ودي أعلق على الموضوع ،،،،

لكـن قبل كل شيء طــــرح سـاخر ومـعــــبر بطــريقــه خـرافية حقيقــة ...


هـــذا شـــيء ...


الشيء الآخــــر ...


رئيــس لجــنــة الحــكــام تحفــظ له أحقية لقب (( ملـك البلنتيـات الوهــميــة )) ...


ففـعلا بـلنتي 1406 مع الرياض في الدقــائق الأخــيرة والذي لم يصدقهــا ماجــد نفــســه والتي أثــرت تأثيرا كاملا على مرافقه في ذلك البلنتي (( صــلاح الســقــا )) وجعلــته يبتعد عن الرياضة بعدها قد عـرض هذا البلنتي حينها في برنامج أشياء لا تصدق !! .... وأيضا بلنتي (( العــيسى )) في كأس الإتحاد والذي تعرقل من هــواء العــواد في مباراة لم نرى العــواد فيها الا في تلك اللقطــة طوال المباراة !! مازال يعرض هـذا البلنتي في برنامج (( حدث في مثل هذا اليوم )) !! ... !! ... !! ... الخ


حدثت هذه البلنتيات في مباريات (( خــروج المغــلوب )) ...

هــذا هو رئيس لجــنة الحــكــام ... إذا ماذا نتوقع من الحــكام هذا اليوم ..!!




ميــر قــل لرفيقك أبو لمــــى يتــرك عــنه الكــوره أبركـــله ... حنــا وابتلشنا .. كفــايه عــــــــــذاب ..!! والله يــرحم الحــــال بس يـابو سليمان ...

مشكور يا استاذنا

حاضرها هالمباراه
كنت معزوم واحد نصراوي عازمني للمباراه على باله بيتسلى ضامن الرياض واذكر البلنتي كنه قدامي
وشاهدت اللكمه من عمر الشقير لسلطان الدوس حارس الرياض
لكمه كنها بوز جايه غريبه

وش تتوقع يابوسليمان من ناس يشيلون ويعتقلون العقيلي بالمطار !! والله فضايح مهي فضيحه

ابو لمى .. ربما لم يقتنع بوجود حكام يسعون لترجيح كفة فريق على حساب الآخر مهما اختلفت الدواعي والاسباب .. وكان ( كان الله في عونه ) يظن ان جميع الحكام تهمهم سمعتهم ونزاهتهم بالدرجة الاولى ومهما أخطأوا وتغاضوا وظلموا فإن ذلك يفسر بحسن نية ..
ولكن هل يفسّر ( ابو لمى ) تغاضي المهنّا عن بلنتي ( الكاتو ) بحسن نية ..؟؟؟ حتما ابو لمى اذكى من ذلك بكثير

صراحه أمتعتنا في وشكرااااااااااااااااا