#1  
قديم 14/06/2008, 02:40 AM
موقوف
تاريخ التسجيل: 23/02/2005
مشاركات: 296
موبايلي... نبيها بس هي ما تبينا

السلام عليكم معاشر الزعماء

كثر المنادون في شبكة الزعيييييييم بضروروة الاشتراك مع مو بايلي ,,, لدرجة ان بعض الاعضاء ينفي هلالية من لايشترك بموبايلي وكان الاصل موبايلي ... و اظن ان هذا عين الخطا...
انا اؤيد الاشتراك في موبايلي ودعم فريقنا من خلالها و هي خدمه عندهم عند غيرهم يحتاجها كل احد ,,, فلماذا لاتكون هذه الخدمه اللي الواحد منا يحتجها تدعم الفريق اللي هو يحبه

لكن المشكله اللي له تجربه سيئه مع موبايلي مثلي هل يستغني عن الهاتف المحمول لانه اذا ما اشترك في موبايلي يصير مشجع غير مخلص للزعيم ...!!!؟؟؟

انا اكره الاتصالات من يومها ولي معاهم 7سنوات مشترك بس الحقيقه تقدر تتحملهم بعض الاحيان ..

اما موبايلي يشهد الله اني رحت اطلع شريحة مفوتره من عندهم مع وجود شريحة الاتصالات الاوله عندي كله حبا في الزعيم و حماس لموبايلي انهم تعاقدو مع الزعيم ,,, لكن اللي حصل غير وجهة نظري فيهم و خلاني اقول يازين تعامل الاتصالات بجنبهم ...

معليش بقول القصه كامله عشان تفهموني وذا انا غلطان توجهوني :

رحت لمكتبهم بنفسي ,,, و كان فيه موظفين اثنين ... واحد منهم عنده زباين ,,, و الثاني فاضي بس باين انه سيء ,,, ما كلف نفسه حتى بشي بسيط وهو قولة تفضل استريح ,, مع ان هذا هو المفروض ,,, لانك انت كزبون تماما مثل الضيف اللي يدخل عليك في بيتك مع الفرق الواسع انك انت هنا راح تدفع فلوس ,,,
,,, الحقيقه قلت مشي حالك يمكن انه نصراوييييي!!! ,,, جلست و بادرته بالكلام لاني انتظرت يقول تفضل و ش تبي لكن يشهد الله انه ما قالها .... المهم قلت له انا ابغا شريحه مفوتره بس ابغا اعرف التفاصيل عنها ... انا سألته من هنا وانا احس ان الرجال ما وده اني سألت .... يتكلم باقتضاب و يطلع الكلمه بعد ما يمضغها عشرين مره ... شوي و تحول الكلام بيني و بينه الى تحقيق انا اسأل وهو يجاوب بطريقه ممله اضطرتني اني اخرج من عنده و لا عاد اكمل مشواري مع موبايلي ... بعد ما طلعت قلت في نفسي والله انا الغلطان اني اجيهم ... ركبت سيارتي و قلت ابوهم لابو موبايلي ... شوي,,, قلت في نفسي هذا موظف ضمن شركه كبيره و الحقيقه مع انه يمثل الشركه الا انه لايمكن اني احكم انها سيئه بسبب موظف واحد ... تدري يابو الليد روح لمكتب ثاني خلنا نشوف ... واقول بيني و بين نفسي والله اني مشترك مع موبايلي مشترك مهما كان خلاص ملينا الاتصالات ,,, و التحالفات الصفراء ,,, وفعلا توجهت لمكتب اخر وكان قراري صائب د خلت فيه موظف واحد و زميله مش موجود وهذا الموظف عنده ثلاث عملاء لكنه كان ممتاز و لبق
اول ما دخلت مع الباب قال لي تفضل اجلس واشر على الكرسي و كان و الله محترم وشهاده لله ... قلت في نفسي فرق و الله ,, وفعلا حرام تحكم على احد لمجرد موقف واحد ... جلسنا ندردش دردشه جماعيه انا و الموظف و العملاء الثلاثه اللي قبلي لان السيستم كان فيه خلل و ينتظرون انه يصلح .... 10 دقايق الا الموظف الثاني جاي و كان محترم بس ما كان لبق ... فيه ادب لكن كان فيه ثقل زايد ... المهم رحت انا و احد العملاء اللي كانوا عند الموظف الاول رحنا للي توه جا بحيث يصير هنا اثنين وهنا اثنين ....
الوكاد اخذت العلوم منه و استفسرت عن كل شي و قررت اني اطلع الشريحه ,, وفعلا طلب بطاقة الاحوال و اعطيته ومن هنا ابغاكم تركزون معاي ... بطاقة الاحوال مجدده توها وهي البطاقه الجديده ( بطاقة الهويه السعوديه ) و انا اللي حضرت بنفسي ماهو احد ثاني
وفي مكتبهم مكتب موبايلي و اللي استلمها مني هو موظفهم بنفسه ,, وهو اللي عبأ البيانات بنفسه في النموذج ,, واعطاني اوراق العقد و وقعتها بنفسي ورجعتها له ... ثم اعطاني الشريحه و سألته متى راح تشتغل قالي من الان مشتغله قلت كثر الله خيرك وخير موبايلي ووالله كانت لحظه شعرت فيها بالانتصار على الاتصالات وقلت الان اعرف انتقم الحين ارمي شريحة الاتصالات و اهنأ بموبايلي و نصير في غنا عن المنه ... بس سبحان الله قبل ما اخرج من عند الموظف الا واحد من العملاء داخل و هو زعلان ويتكلم مع الموظف بزعل .. عاد تلقفت انا و قلت و ش فيك عسى ما خلاف اذا هم راعين مشاكل خلنا نخلي الشريحه هنا من الحين قبل نطلع قلتها و الله و انا امزح وضحكت في وجهه لعله يهدى الوضع شوي .. المهم قال الرجال يا خي هم كويسين ورسومهم كويسه لكن حاطين نقرهم مع فصل الخدمه ما يصدقون خبر الا و تلاقيهم فاصلين عليك الخدمه و قال لي قصته بسرعه وان عنده شريحتين و حده له وحده لزوجته و مسددهم لكن له يوم ما رجعوا الخط ... قلت بيني و بين نفسي و الله هذي الحركه مبطلتها الاتصالات من سنين لكن لعلها حاله استثنائيه و ما فيه عمل من دون اخطاء ... توكلنا على الله بس لايهمك احد ,,,, واطلع من عندهم سيده و اشتري ذاك الجهاز الجديد من نوكيا توه جديد من الحداد ... كله لعيون الشريحه الجديده موبايلي ... وروح البيت و اركب الشريحه بالجهاز الا و الله مافيه ارسال قلت تدري خله يشحن الجهاز الجديد و باستخدم جوالي الاول ياما يشحن الجهز الجديد و اكيد الارسال يكون بدا ... وزين اني مارميت شريحة الاتصالات ... الله وكيلكم لليوم الثاني ما شتغت الا بعد اربع وعشرين ساعه وو الله هذا اللي حصل ...

المهم اشتغلت و بديت انقل الارقام من الجهز الاول على الثاني تمهيدا لقشع شريحة الاتصالات ... بس لكثرة الارقام كنت اطفش ,,, فقلت بيني و بين نفسي بخلي لي وقت محدد على مدار ثلاث ايام و تكون الارقام منقوله باذن الله ... اليوم الثاني اتصل علي الموظف وانا في العمل و رحب في بالانضمام الى عالم موبايل ( قلت بيني وبين نفسي ايه بعدي هذولا و لا بلاش ) شوي الا الموظف يقول معليش بناخذ من وقتك !!! قلت ليييييه؟ قال نبيك تحدث البيانات لو تكرمت ... قلت اي بيانات ؟؟ قال بيانات الهويه و رقم التواصل و صندوق البريد ووو ... حسيت انه بيطول... قلت ياخي والله انا بالشغل الان معليش واعتذرت بلطف لاني كنت مشغول فعلا... المهم اتصل الموظف مشكور وكنت مشغول فعلا بقيادة السياره و ماعندي البيانات فقلت لعله في وقت لاحق ... ثم اتصل اليوم الثاني و انا في العمل ايضا فما رديت ... بعدها بنصف ساعه اتصل وانا لازلت في العمل فما رديت ايضا ... شوي يوم طلعت من العمل الساعه 4 عصرا احاول اتصل من موبايلي الا المكالمات محظوره ...قمت و اتصلت عليهم رد الموظف سألت ليه مفصول ..؟؟؟ قال : انت الموظف اتصل عليك 3 مرات من اجل تحديث بياناتك ومارديت عليه عشان كذا فصلوه عنك ... قلت ياخي توي مطلع الشريحه مالي يومين و ش تحدثون ...!!! قال : معليش هذي سياسة الشركه ... قلت : ياخي سياستكم بتطير العملاء .. قال : لابد عشان نتأكد ان الشريحه مع نفس العميل ما تكون بيانته مزوره و الشريحه مع واحد غيره .. قلت : سبحان الله الحين انا جيت لمكتبكم بنفسي ومعاي اثباتي الاصل مش الصوره .. و عند موظفكم وهو اللي عبأ البيانات بنفسه .. و وقعنا على اللي تبون نوقع عليه كيف بيصير التزوير .. بعدين اذا اتصلتوا ورد عليكم اللي بيده الشريح قطعا ماراح تعرفون انه هو فعلا اللي بسمه او لا لانه ببساطه يمكن معه المعلومات كلها و يعطيكم ايهاها و انتهينا .. التحديث اذا بيصير لازم العميل يكون عندكم بنفسه و اثباتاته الاصل معه او هذا ما يسمى بتحديث ... بعدين كيف تحيث وتوي مالي غير يومين او ثلاثه ... قال : ياخي هذي سياستنا تبي اي خدمه ثانيه ... قلت : لا مشكور و انتهت المكالمه ... ونويت و الله اني ارمي شريحتهم على طول يدي ... وهنا تذكرت الاتصالات و فرحتي بالخلاص منهم ... بس قلت خلك على قردك لا يجيك اللي اقرد منه لين ربك يفرجها ... كلمتهم مره ثانيه مع موظف ثاني ودار نفس الكلام بيني وبينه .. وانا اعرف انه موظف يمكن ما بيده شي فقلت على الاقل لو توصل للمسؤلين عندك ان هذي وجهة نظر احد العملاء فقط لا اكثر ولا اقل ...

ثلاث ايام وحن قلبي للزعيم ,, ولموبايلي ,, وقلت هذي شركه كبيره ولها سياستها ,, ثم هم يريدون ان يقدمون خدمه جيده و يضمنون حقهم ايضا ,, و بعدين مثلك مثل غيرك و لعل الرساله و صلت او بتوصل ,, بعدين نفتك ايضا من الاتصالات و منتها ... فقررت اني اكلمهم و احدث بياناتي مع عدم القناعه بانها طريقه مجديه لكن مجبر اخاك لا بطل .. و الله فعلا و اكلم الموظف مره اخرى و اشرح معاناتي من جديد و ابين وجهة نظري لعل و عسى .. ثم طلبني اني احدث بياناتي .. وفعلا صار الكلام هذا .. وقال لي الموظف ربع ساعه يشتغل معك .. قلت : شكرا و سألته عن النت و الجيل الثالث و الكنكت و العروض اللع عندهم حول هالموضوع ... و ابي استفسر عن الون قيقا و الخمسه قيقا ... فنصحني بالاشتراك المفتوح انه ب 350 ريال و لايقيدك شي ... فقلت خلاص ابي المفتوح ... قال : اذا انتظر لما يرجع خطك ثم كلمنا مره ثانيه و اطلب الخدمه ... قلت زين انتظرت يمكن اقل من ربع ساعه وفعلا رجع الخط ... و ارجع اتصل عليهم عشان اطلب الخدمه الا و اتفاجأ الا هو نفس الموظف قلت زين هذا توه خابرني فطلبت منه الخدمه شوي الا يقول لي ما نقدر ننفذ الخدمه حتى تدفع مقدم 350 ريال و هذي والله المفاجأه اللي ما كنت اتوقعها .. قلت ياخي انا شريحتي مفوتره و باسمي مفروض تجي على الفاتوره قال لا هذا نظامنا و هذي سياسة الشركه ... يبن الحلال انا توي اكلمك ما قلتي هالكلام قال لا هذي سياسة الشركه ومعليش و مدري وشو قلت طيب وش الحل .. قال لازم تدفع مقدم او فيه اشتراك ثاني اللي 30 ميقا ب 10 ريال في الشهر او 100 ميقا ب 25 ريال في الشهر وبعدين كل 1ميقا داونلود زياده يحسب عليك ب 2,48 ريال ,, قلت والله ياهو تو متش لكن تدري ابي اشترك فيه و على الله ... وفعلا اشتركت .. بس بصراحه كذا ما راح اواص معاهم لانه بيكون غالي جدا وعالي التكلفه ... فلذلك يعذرني الزعيم اذا و اصلت مع الاتصالات لان مو بايلي ماهم حريصين علينا مثل ما حنا حريصين عليهم ........

تجربه شخصيه لا يقاس عليها ........

والسلام .......
اضافة رد مع اقتباس
  #2  
قديم 14/06/2008, 03:38 AM
زعيــم متواصــل
تاريخ التسجيل: 18/04/2008
مشاركات: 54
كونكت موبايلي رديئه جدا
وتعاملهم مع المشاكل متأخره

لكن شامل الاتصالات ممتاز جدا عندنا وماعليها كلام هي أفضل الموجود على الأقل


هذا إلي جبرني على الإتصالات

أنا أبحث عن الأفضل بالخدمات فقط

والإتصالات لازالت أفضل السيئين

اللهم عجل بزين لعلها تكون الأفضل
اضافة رد مع اقتباس
  #3  
قديم 14/06/2008, 03:48 AM
زعيــم نشيــط
تاريخ التسجيل: 27/11/2004
مشاركات: 522
بصراحه مشكله غريبه

بس لو ابذكر لك مشاكل وفضائح الاتصالات مايكفي اسبوع اكتب عنهم
اضافة رد مع اقتباس
  #4  
قديم 14/06/2008, 03:50 AM
زعيــم متألــق
تاريخ التسجيل: 19/03/2008
المكان: دنيا غريبة
مشاركات: 1,021
الله يعطيك العافية ولازم ندعم الفريق الهلالي .
اضافة رد مع اقتباس
  #5  
قديم 14/06/2008, 03:50 AM
الصورة الرمزية الخاصة بـ هـ بحت ـلالي
زعيــم مميــز
تاريخ التسجيل: 23/10/2005
المكان: حـائـل
مشاركات: 28,053
ههههههههههههههههههههه

الله يعين قلبك

شف الازين لك واختاره
اضافة رد مع اقتباس
  #6  
قديم 14/06/2008, 03:56 AM
الصورة الرمزية الخاصة بـ الملك"توتي"
زعيــم مميــز
تاريخ التسجيل: 26/07/2005
المكان: شفت آخر الدنيا؟هـ وراها شوي
مشاركات: 3,340
ياخي والله القصة طويلة ..

وبصراحة الموضوع زحمة
فيه فن اسمه ( فن الاختصارات ) تعطي الزبده ولا تنقص شي لكن باختصار

عالعموم ..

شوف اخوي انا متعامل مع الشركتين وبصراحة مدري عن الشريحة العام

بس المسبقة الدفع موبايلي ممتازة جدا

الاحتيالات ( سوا ) ادعي عليهم ليل نهار ..

انا انصحك بشريحة مسبقة الدفع من موبايلي ولا تفلها .. إلا فل ابوها بعد

واعذرني ترى ما قريت الموضوع كامل كامل .. قريت جزء بس

شكرا ولا تزعل مني اذا زودتها شوي .. تراني امزح قسم
اضافة رد مع اقتباس
  #7  
قديم 14/06/2008, 05:50 AM
موقوف
تاريخ التسجيل: 01/02/2008
مشاركات: 37
الله يلوم اللي يلومك

والله العظيم أن شركة الإتصالات أفضل بكثير من موبايلي

و مشكلة موبايلي في خدماته و خدمة العملاء ( 1100 ) خاصة >>>

إذا رد واحد من الموظفين يعطيك كلام يختلف عن الثاني حتى لو تسبب عليك في خساير مثل نقل

الباقة و غيرها الكثير الكثير و في الأخير يقولون الموظف غلط أحنا بنحاسبه طيب و فلوسي

يقول أطلب ربك
اضافة رد مع اقتباس
  #8  
قديم 14/06/2008, 06:25 AM
موقوف
تاريخ التسجيل: 02/07/2005
المكان: في أحضان نجد
مشاركات: 2,193
أخوي بس لو تصبر لين تطلع فاتورتك بتدعيلي أول مرة أسمع فاتورة شهرية قيمتها ماتتعدى 90 ريال حتى لو ما تخلي الجوال عن إذنك يعني في الشهرين 180 ريال ياأخي أنا أول في الإتصالات إذا طلعت فاتورتي أقل من 400 أسوي عيد والحين نتضايق إذا فاتورة موبايلي 100 ريال
اضافة رد مع اقتباس
  #9  
قديم 14/06/2008, 11:35 AM
زعيــم مميــز
تاريخ التسجيل: 20/02/2008
المكان: جــــــــــــــد هـ
مشاركات: 4,577
أخوي بس لو تصبر لين تطلع فاتورتك بتدعيلي أول مرة أسمع فاتورة شهرية قيمتها ماتتعدى 90 ريال حتى لو ما تخلي الجوال عن إذنك يعني في الشهرين 180 ريال ياأخي أنا أول في الإتصالات إذا طلعت فاتورتي أقل من 400 أسوي عيد والحين نتضايق إذا فاتورة موبايلي 100 ريال
اضافة رد مع اقتباس
  #10  
قديم 14/06/2008, 11:49 AM
زعيــم مميــز
تاريخ التسجيل: 05/03/2004
المكان: تايه في دنيا الران
مشاركات: 3,404
إقتباس
الرسالة الأصلية كتبت بواسطة 0 الحوت الازرق 2
أخوي بس لو تصبر لين تطلع فاتورتك بتدعيلي أول مرة أسمع فاتورة شهرية قيمتها ماتتعدى 90 ريال حتى لو ما تخلي الجوال عن إذنك يعني في الشهرين 180 ريال ياأخي أنا أول في الإتصالات إذا طلعت فاتورتي أقل من 400 أسوي عيد والحين نتضايق إذا فاتورة موبايلي 100 ريال

شف بهذي النقطه انت صادق انا بالاول ما العب الا فوق ال500 اما الحين اذا طقت 200


بس الشي الشي في موبايلي ان لو هناك كذا رقم بإسمك وواحد من الارقام صدرت له فاتوره

فصلو كل الارقال اللي بإسمك والله كانت ورطه بس الحمد لله الله يخلي مسعود الهندي حلال المشاكل

ههههههههههه على اسمه اكثر من 10 ارقام هههههههههههههه
اضافة رد مع اقتباس
  #11  
قديم 14/06/2008, 12:30 PM
الصورة الرمزية الخاصة بـ @P-ALZAEEM-d@
زعيــم مميــز
تاريخ التسجيل: 04/04/2008
المكان: منسدح بالملحق
مشاركات: 1,627
بالعكس انا محول رقمي لموبايلي وماشيه اموري زي العسل



ومطلع كونكت
ووش المشكلة انك تدقع بالصراف لهم 350 ريال
انت دافع دافع
اضافة رد مع اقتباس
  #12  
قديم 14/06/2008, 05:55 PM
موقوف
تاريخ التسجيل: 23/02/2005
مشاركات: 296
شكرا للجميع على الردود و التفاعل مع الموضوع

انا اللي ابي اقوله ,, انه من المفروض ان مادام موبايلي نازله للسوق و السوق فيه منافسه من شركه سابقه و شركه ثالثه جايه وبقوه .,, لابد انهم يكونون حريصين اشد الحرص على عملائهم على الاقل يسهلون الخدمات شوي
ويخففون اللعب شوي ما يفصلون الخط على اتفه الاسباب ...

ثم اللي يقول ان رسومهم رخيصه شوف اشتراكات الانترنت عندهم ال واحد ميقا الزياده على الباقه اللي انت مشترك فيها يحسب عليك ب 2,48 يعني لو بتحمل 100 ميقا زياده راح تدفع 248 ريال زياده واحسب يا حساب ,,, غير قيمة الباقه و قيمة الاشتراك الشهري ....

بصراحه لازم يكون فيه فرق واضح عشان يغريك انك تشترك معهم او على الاقل يكون تعاملهم شوي مرن ...

انا اول مره اشوف دفع مقدم لخدمه اذا كانت شريحتك مفوتره ... في الاتصالات ما عمرها صارت ...

شكرا للجميع على المرور مره اخرى ..........
اضافة رد مع اقتباس
  #13  
قديم 14/06/2008, 06:17 PM
زعيــم جديــد
تاريخ التسجيل: 27/03/2006
مشاركات: 16
خل ذا كله عنك

اردى شي يقهرك لو تصدر لك فاتوره قطعو جوالك ولا عندهم مهلة 48 ساعه هذا

انسى بصراحه مع احترامي لموبايلي المفروض كشركه انتي جايه تنافسين بالخدمه

باللي وش المنافسه حاليا والاتصالات افضل في تقديم الخدمه

شركة الاتصالات لو انقطع جوالك وانت في مكان ما تقدر ترجع جوالك

موبايلي تقعد تندب حظك يعني يعني حركه قديمه ووقحه بصراحه وغير طيبه من الشركه

ثاني شي..

يكذبون وربي على انفسهم الشركه يوم يقولون غطيناها وش غطيتو ياشيخ

الشبكه تعبانه تعبانه تعبانه عيب وربي عيب

بيتنا بوسط بيوت هالعالم وابراج جنبنا وحوسه ومدري ايش وبالنهايه يقطع الجوال

افا والله

انا حولت اول امس وتوهقت خل عنكم بس
وودي ارجع للاتصالات بس متعلق مع موبايلي بشروطها الغبيه وتعهداتها

يقولك ماتحول الا بعد سنه او تدفع كامل المبلغ

طيب قدم لي خدمه زينه واقعد لاشبكه لاخدمه وتقولي اقعد
الله يلعن ابو الذل ياشيخ
اضافة رد مع اقتباس
  #14  
قديم 14/06/2008, 06:37 PM
زعيــم مميــز
تاريخ التسجيل: 01/05/2006
المكان: الهوى ** شرقــآآآوي **
مشاركات: 13,283
موبايلي اقسم بالله اطلق من الاتصالات بكل شي

والفرق .. لاحظها اخي المشجـع بالفاتورة << ترى متعوب عليها

يعني رجـع آخر فاتورة لك بالاتصالات

واذا اشتركت بموبايلي وصدرت الفاتورة .. شف كم يطلعلك ؟
اضافة رد مع اقتباس
  #15  
قديم 15/06/2008, 12:33 PM
زعيــم متواصــل
تاريخ التسجيل: 20/04/2008
مشاركات: 103
مشكوووووووووووووووووووووووووووووووووور اخوي
تسلم على الموضوع,,,,,,,,,,,,,,,,,
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 04:36 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube