\
/
ذي الأيام يعيش اخواننا التلاميذ أحرج أوقات سنتهم العصيبة >> يا عيني على البلاغة يا شيخ
وعلى هالأساس راح نخصص هالموضوع وندردش فيه عن الاختبارات وكل واحد يفضفض ويهك ويفقش ويسوي اللي يبي المهم أنه يطيّح اللي في راسه من الاختبارات

قبل ما أعطيكم قصصي مع الاختبارات هاك الحين >>>وش عنده التمساح
بأقولكم مزاجي للمذاكرة وكيف كنت أحب أذاكر ، طبعاً كنت كأي طالب متنّح ومن جنبها ما أفتح المذكرة الا قبل الاختبار بست أو أربع ساعات (أنواع الثقة ) لأني اخذتها درسأوّل كنت أجلس ثلاث اربع أيام أكفر كفر في المقرر وآخر شي تجي الأسئلة شرق وغرب مرة ناديت المراقب وقلت له أني غلطت ودخلت قاعة مادة ثانية !!!!! عقب تكرار هالمواقف قلت ما بدهاش، يقلع أبوها اختبارات... 5/5 ما نبيها راح نرضى بـ4.9 وبكذا صارت أيام الاختبارات عندي
من أمتع أيام السنة..... كييييييييييييييف؟؟ أقولكم كييييف
(كييييف يعني شلون مهوب عاصمة أوكرانيا الولد مهوب مثقف ولا شي )


.
.


.
.


إذا جت أيام الاختبارات أروح كل يوم بعد الاختبار للرفقان اللين في عنيكش وأضف لي فيلمين ثلاث أرجع للبيت وأصفق أبوها نومه ألين الساعة العاشرة ليلاً (وعلى سكان خارج جده مراعاة فوارق التوقيت يا سمجك أنت ونطلاتك بعض الأحيااان ) هذا إذا كان الاختبار الساعة 8 أو10 وأن كان بعد الظهر ما أقوم ألا الساعة3 الفجر أقوم والوجه يكون مستطيل على مربع ومنتفخ تقل محطوط لي هوا في فمي أصحصح وأنفض جسمي زي الخيل وأغسل وجهي وأشوف لي لقمة جاهزة (والله يالبيك له طعم ثاااني أيام الاختبارات ) ثم يبدأ جدولي الصدقي أضبط لي ترمس شاهي من النوع الخاااثر اللي ما ينشرب ألا في كاس كرافت ثم أحط الفيلم في الفيديو وأخليه يقلع المسألة كانت نفسية أكثر من أنها سعة صدر >>>بدا يتكلم زي اللين يطلعون في التلفزيون
كنت أهيئ جوي ونفسيتي للمذاكرة لأنه ما كان عندي استعداد أني أنرفز أو يضيق خلقي عشان
الدراسة لا خلاااااص أخذتها درس وكانت الأمور ماشيه عال العال

بعد ما ينتهي الفيلم أروح للمطبخ والبيت يكون كله هجده ألا أنا كأني جني لحالي
وأبدا في تضبيط كوب راااائق من النسكافة المخلوطة بحليب البوني (حليب بوني اللي عليه رسمة أم خدودالشينه )
طبعاً أنا أنسان فلته ونظرتي ثاقب الحليب ما أحطه مع النسكافه عبث...... لا
لأنه لو ما حطيت حليب مركز راح تخليني القهوة مسنتر ألين بكره المغرب وبكذا ينعفس جدولي كله لأن
جزيئات الحليب تتصارع بشراسه مع أيونات الكافيين الموجود في النسكافه بشكل يشغلها عن تحفيز
الجهاز العصبي المسؤول عن تنظيم عملية النوم (قسم بالله أنكم منتب كفو هالمعلومات لكن
لازم نقولها من باب تبرئة الذمة وتزكية العلم )
وين وصلت؟؟؟؟ أيه أقول بعد ما أضبط القهوة وأحطها في ذاك الكاس الكبير اللي كنه محفره أرجع
لغرفتي وأولع لمبة المكتب الصفرا اللي شمعتها 100...أخاف أحد يسأل في الردود عشان كذا
أقولها من هالحين بعضكم فيه لقافه غريبة (هذا وش قصة أهله طايح تهزيء في الجميع )


بعد كذا أبدأ في المذاكرة اللي يحتاج فهم أفهمه اللي يحتاج قرايه أقراه واللي يحتاج حفظ
أبرشمه كذا على بلاطه لأن الذاكرة عندي شخاميط
والحمد لله أني ولا مرة سقطت مهوب شطاره أو فهلوه....
لكن الله الساتر سبحانه ستر علي وأعمى المراقبين عني

أحياناً تكون بعض المواد محتاجه أنك تذاكرها مع مجموعة
(نقعد نسمّع لبعض..... خخخخخخخخ )
وإذا كانت المادة كذا أرتب أموري أننا نتجمع مبكر لأن السواليف ما تحلى ألا وقت المذاكرة
حنا ندري عن كذا وعشان كذا نلهي أنفسنا بالفقش والنصب والتهليس والحش ألين تجي
الساعة ثنتين أو ثلاث ثم نبدأ نراجع جميع

بعد ما أطلع من الاختبار كان من الموبقات بين مجموعتنا أننا نتكلم عن الاختبار
أو نراجع الإجابات زي بعض الدوافير السخيفين اللين يحسبون أنهم إذا راجعو
الإجابات بقدرة قادر راح تتغير في أوراقهم (الولد مهوب حاقد عليهم ولا شي )

ثم ينعاد الجدول نفسه....كل ليله عشان كذا إذا جت الإجازة ما أحس بطعمها زي المثابرين والمثابرات
اللين كانوا ينثبرون في بيوتهم ويذاكرون

الصراحة مدري الاختبارات بكره أو السبت اللي بعده لكن من هالحين أبدو فضفضو
ولا تخلون الاختبارات تسيطر عليكم (يبي يخربهم هالحشرة)

\
/
فضفضة وكنت أحابب أشارك إحساس الإختبارات
وبالتوفيق للجميع

وتقبلوا فائق إحترامي وتقديري
دمتم بعبير الجوري
\
/
ورده