@@ البنات Vs عشق الرياضة @@ - نادي الهلال السعودي - شبكة الزعيم

الهلالي 11 · #1 29/05/2008, 02:03 AM

السلام عليكم ورحمة الله وبركاته

قبل البداية الله يقلع ام الحال

تخيلو كتبت الموضوع والوان وتنسيق وكل شي وحركات ...

وانا اللي احط استعراض الموضوع ...

شفت الوضع اوكي وكله تمام ... جيت بنزل الموضوع ويطفي الجهاز ...

كيف ... ليش ... ما السبب ... الله اعلم

طبعا يمكن تقولون طيب وش دخلنا ...

انا بقولكم وش المطلوب منكم ...

كل واحد قبل ما يرد لازم يظهر تعاطفه معي على اللي صار

والله من الحرة اللي فيني ... ان شاء الله يمديني اجمع افكاري مرة ثانية

الشي الثاني .... مبروك لوك المنتدى المانشستراوي الجديد

اليوم موضوعي يدور بخاطري من زمان

<=== يا كثر ما يدور بخاطره اشياء

لا من جد هالموضوع من فترة وهو يدور ويلعب انسايد مي

من كثر اللي اشوفه والقصص اللي اسمعه كنت ناوي اتكلم عنه ...

لكن قلت يا رجال دنيا

بعد زيارة مدريد الاخيرة للرياض ... تطور الموضوع وقلت بعد انسى

لكن وصلتني صورة على الايميل هيضت مشاعري من جديد تجاه الموضوع

الموضوع يا غاليين

سبب حب البنات للرياضة ...

انتشرت في الفترة الاخيرة ظاهرة ان البنات يعشقون ويتابعون كرة القدم ... خاصة الاوروبية

او بالاصح ... هو متابعة لاعبين هم معجبين بهم اكثر من انه متابعة لعبة ممتعة

يعني حنا يا الشباب ودنا واحد يحرث الملعب ويمتعنا ويفوزنا

انا كمانشستراوي ما يهمني شكل براون كثر لعبه

قبل لا اتحمس عشان ما يصير قلق وسوء فهم ...

فيه بنات يتابعون الكورة لمجرد الكورة ... لكن للاسف هم قليل ...

والكثير يتابعها لمجرد ان فلان حلو ... يجنن ... يهبل

انا لا اقصد هنا ان البنت عيب تشوف كورة ما هي اخلاقنا

تبغى تتابع بكيفها ... لكن بحدود الادب والمنطق

واللي بيقولي انت غلطان ... بقوله ليش البنات ما يشجعون منتخبات افريقيا

ليش ما نشوف صورة ايتو وجنبه قلب

ووالله من اللي اشوفه سواء بالمنتدى ... او بالنت ... او على الطبيعة ...

وما يصلني من مصادر موثوقة ... وكيف انواع التغزل باللاعبين يخيلني اتاكد من قناعاتي

يعني مثلا ... لو مشجع ميلاني ... ومالديني باحد المباريات جاب في مرماه 3 اقوال

هل متوقعين ان راعينا يقول ... فدا عيونك الخضر

تفداك البطولة كلها

طبعا لا ... لانه بيجيب سابع جد له وهو يسب ويهاوش

وفي الجهة الاخرى ...

لو شخص يتابع كرة قدم نسائية ...

وتجي وحدة مزيونه تشوت بلنتي وتضيعه

انا شخصيا ... بقول يفداك القول والعارضه ... ليتني حارس واخليكي تسجلينها

لسببين ... الاول انها بنت وحلوة ... والثاني ان المباراة ما تهمني ... كثر ما انا مهتم بمتابعة جمال البنت

واتمى تركزون على هالنقطة لان هي محور الموضوع

زي ما قلت ... انتشار ظاهرة عشق البنات للاعبين هي ما جعلتني اكتب ...

والدليل على كلامي ... ان النسبة الاعلى منهم يشجعون ايطاليا

اسالهم ليش ...

وحدة تقولك ... يا ويل قلبي يا توتي ليته سعودي

والثانية ... اروح ملح يا جيلاردينو

والثالثة ... كل ما جا بيرلو تحط ستوب بالرسيفر

والرابعة ورا كنفارو ... ودل بييرو ... والقائمة تطول

ولا يهون كاكا اطلق برازيلي طلع على الدنيا

اللي بسببه نسبة مشجعات البرازيل زادت 5%

<== تذكرون هالرقم

وقت زيارة الريال للرياض للعب مع النصر

احد زملائي بالعمل مدريدي لدرجة تعصب خيالية

لو تسالونه كم رقم مقعد سوبورو زيرونا يجاوبكم

طبعا الاسم المذكور اعلاه احد المشجعين بالمدرجات

يعشق مدريد ... ويكره برشلونة بجنون

وقت وصول مدريد لفندق الفيصلية الساعة 2 الفجر كان هناك ...

مع انه متزوج الخبل

المهم يقولي وقفنا ونشوف الاعبين وهم ينزلون ونسلم عليهم ...

يقولي تلقى واحد يسب ويهاوش لاعب معين وهو مستانس وياشر بيده

حتى ان واحد رمى كلمة قوية على جوتي ... وهو مبسوط ويحيهم

المهم ثاني يوم اللي هو يوم المباراة ... رجع الظهر للفندق ...

زلب ام الدوام وقال يمكن يمديني القطلي صورة مع احد ....

يقولي الله لا يوريك ...

اللي جاية ولابسة لبس الله يستر عليها

واللي ناشبة للسيكورتي تكفى دخلني اصور معه ...

واللي شوي وتصيح تكفى دخلوني عنده

يقولي فيه بنات واضح انهن مهمات وقدرو يدخلون بواسطه

وفيه وحدة حلوة ... السكيورتي قالها انتظري هنا وشوي وانا اوعدك انك تدخلين

واللي تقول تكفى دخلني ابوسه واعطيك الفين ريال

طبعا الموقف اللي فوق وصلني على الايميل ....

وما اعرف صحته كثر ما انا متاكد من صحة اللي قبله

اللي طالبة راؤول ... واللي تصيح ودها تشوف راموس ...

واللي تنتظر جوتي ... واللي متشوقة لرؤية كانافارو ...

والغريب ديارا ما عليه طلب ما ادري ليه

يقولي خويي ... نزل مدرب اللياقة او زي كذا ما ادري والله واحد من الطافم الاداري ...

يقول انا شفت ما عنده زحمة رحت تصورت معه ...

جتني وحده تسالني ... منهو ذا ...

يقول علمتها وزودت شوية بهارات طلعته قاط مع كالديرون بالنادي

يقولي ... بعد شوي الناس ناشبين له يتصورون معه ...

طبعا اللي خلاني اصدقه اني اعرف مدى عشقه لمدريد ... وفوق هذا وراني صور بجواله

=================================

اعذروني والله كنت كاتب اكثر من ما كتبت حاليا ...

لكن مع اللي صار وطفى الجهاز ... طارت معه بعض الكلمات

لا اريد ان اربطكم بمساحة معينة ... ولا احدد ردودكم باسئلة نقاشية ...

سافتح المجال لكم لاترك لكم حرية التعبير ... كل واحد يكتب اللي بنفسه

بس بليز ... بدون اساءة ... بدون غلط ... بدون تجريح ...

عبر عن رايك بحدود المنطق ... وتذكر ان فيه بنات بالمنتدى بمنزلة خواتنا

تحياتي لكم ... وشاكر مشاركاتكم مقدما

اخوكم ... الهلالي 11 (عبدالرحمن)

داري انكم نازلين مدرعمين تدورون الصورة كل اعضاء الزعيم لعابين

يعني واضح اني خلصت موضوعي من اخر جملة ... وباقي شاكين انه فاصل اعلاني

هذي الصورة ... والله يستر على بناتنا

طبعا لو تلاحظون راموس واقف على السرا بيجيه الدور

ولو يجي واحد اصلع يتزوج ...

يقولون ما نبيه اصلع

هلااالي وأفتخر · #2 29/05/2008, 02:22 AM

صراحة أنا أتفق معك..
أغلب البنات اللي يتابعون الكورة يتابعونه عشان اللاعبين..
والبنات اللي تشوفهم لابسين فنايل لأندية تلقى الاسامي (توتي,كاكا,كرستيانو) ..

لكن فييرا... إيتو..دروجبا

مستحيل تشوف ,,

بس الصورة الأخيرة

..
صورة تقهر صراحة.. يعني خيرات بلدنا تروح للأجانب وحنا ما نحصل منها شي

الهلالي 11

.. مشكووور ع الموضوع البطلورده ,,

أســطورة الأســاطير9 · #3 29/05/2008, 02:25 AM

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

Gran Atlético · #4 29/05/2008, 02:28 AM

إقتباس


	قبل البداية الله يقلع ام الحال تخيلو كتبت الموضوع والوان وتنسيق وكل شي وحركات ... وانا اللي احط استعراض الموضوع ... شفت الوضع اوكي وكله تمام ... جيت بنزل الموضوع ويطفي الجهاز ... كيف ... ليش ... ما السبب ... الله اعلم طبعا يمكن تقولون طيب وش دخلنا ... انا بقولكم وش المطلوب منكم ... كل واحد قبل ما يرد لازم يظهر تعاطفه معي على اللي صار والله من الحرة اللي فيني ... ان شاء الله يمديني اجمع افكاري مرة ثانية الشي الثاني .... مبروك لوك المنتدى المانشستراوي الجديد

يا حرام والله حركه تقهر
اذا كنت كاتب موضوع طويل ورد طويل
واذا جيت تنزل الموضوع فجأه
يضيع الموضوع بسبب جهازك أو الاتصال يقطع معك

وان شاء الله الجاايات أكثر بالنسبة لك

>> يقاله تعاطف معك

بالنسبة لموضوع البنات يتابعون كرة القدم
وعشقهم للاعبيين

هو طبعاً وبكل تأكيد أن فيه بنات يتابعون كرة القدم
بسبب أن اللاعب وسيم والبنت خاقه معه

وفيه بنات بالعكس تمام
يتابعون كرة القدم بـ غرض حبها لكرة القدم
وليس بسبب لاعب معين لأنه وسيم وغيره

...

يعني البنات الأن اللي تجمعوا
وحاولوا يدخلون الفيصليه
من أجل التصوير و السلام ومشاهده
لاعبيين ريال مدريد الحلويين

هن بالتأكيد لم يذهبوا الا بسبب أنها
معجبه بـ لاعب معين لأنه وسيم

لأن لو كان قصدها حب كرة القدم
لما ذهبت للفيصليه من أجل
مشاهدة و تصوير مع لاعبيين الريال

...

من المفترض أن البنت
اللي تتابع كرة القدم
تتابعها على أنها كرة قدم
للمتعه
وتشجيع الفريق الذي تحبه
ضمن آطار الاحترام
وعدم الخروج عن المألوف

...

ما أقول الا الله يستر على بناتنا
يعني من جد الزمن هذا كثرة الفتن

شكراً لك أخوي الهلالي 11

عاشق مدريد · #5 29/05/2008, 02:36 AM

مرحبتين اخوي

موضوع وفكره متعوب عليها الصراحه

من جد انا ملاحظ ان الشغله ذي منتشره كثير

حتى في المدارس سمعت انها بشكل كبير مره !

ما اقول الا الله يعافيهم ولا يبلانا يارب !

اغلب البنات مايتابعون الكوره الا عشان الوجيه السنعه

يعني مافكروا لا بتكتيك مدربين ولا هالخربطه

هو مثل ما الشباب يروحون وطي مع البنات شي طبيعي ان البنات يسوون نفس الشي !

لكن المشكله انها تروح تلبس فنايل لاعبين وتعلق صورهم بكل مكان يالله لاتبلانا ومن هالشغلات !

مدري يالغالي هل الصوره هذي اكيد انها في السعوديه !!

مصيبه صراحه اذا كانوا سعوديات !

A B B O D · #6 29/05/2008, 03:08 AM

اول حاجه احب اوقف لك دقيقه تعاطف وحزن ..

ممممم .. خلصت ..

انا متفق معك في كون ان اخواتنا يشجعن للشكل - في الغالب - وكما أسلفت لو هن جد يشجعن من اجل الكره ..
كان شفنا روبينيو وديارا وايسين وايتو والمعتوه ادي بتواقيعهن وبجنبه قلب على قولتك

عـ العموم يالغالي .. موضوع في الصميم ..

واتمنى من خواتي الفاضلات ما يزعلن .. لأننا ما نقصد احد بعينه ابدا ً ..

وبالنسبه للصوره .. نو كومنت !! صراحه شي يقهر ..

شكرا ً لك اخوي عبدالرحمن .. ورده

(مـلـك الـشـوت) · #7 29/05/2008, 03:16 AM

الله لا يبلانا والله اهل العقول في راحه

يعني مادري وش هالاعجاب الكبير شيء غريب

المحاميه الايطاليه · #8 29/05/2008, 03:32 AM

مشكور اخوي على هالنقاش

بصراحه انا شجعت اليوفي من 2004

وخصوصا الملك دل بيرو

والحين ابشجع الازوري بيورو 2008

the boss CR7 · #9 29/05/2008, 05:09 AM

انا بصراحه انقهر من البنات اللي يشوفون المباراة عشان لاعب!!!!!!!!!!يعني بيجيك ولا لو شافك بيفكر فيك؟؟؟اصلا لو بغى ماشاور هذا من ناحية السعوديين!!!!اما من ناحية الاوروبيين بصراحه..لاتعليق!!على العموم الله يستر على بناتنا

@سلطان الهلال@ · #10 29/05/2008, 05:22 AM

أشوى أن الكمبيوتر طفى عليك ..

لأنك كنت كاتب أكثر من كذا .. تعبت وأنا أقرا

ما شاء الله عليك ..

أخوي عبد الرحمن ..

المشكلة الأكبر أن الكثير من المشجعين الرجال ( أعرف بعضهم شخصيا ) يحب اللاعب لأنه وسيم ..

ليس لأنه زين ولا مملوح وناعم .. للأسف .. بل لأنه وسيم وساامة رجاااااااااااال .. للأسف

هذا اللي أشوفه ..

وهذا اللي يغبن ..

الله يستر على بنات المسلمين .. لكن هم ما تغيرت فطرهم .. حبت لاعب قطعة

..

مب زي اللي ذكرت سابقا ..

أعطيك مثال مماثل لما ذكرته أنت لكن للشباب : أغلب الشبااب هدااهم الله يتاابع فيديو كليبات لهيفاء ونانسي واليسا وبرتني ومادونا وشاكيرا وجنيفر لوبيز وغيرهن الكثيـــــــــر .. وهو لا يفهم انقلش ولا شي .. ولا يتابع عشان الفن والطرب .. لأن السابقة أسمااؤهن لا يمتن للفن والطرب بشيء .. بس يحبهن عشان جمالهن وأجسامهن وإغرااءهن وتقـيـ .. وووووو ..

آسف إن كنت صريح شوي ..

مشكووور على مواضيعك التي دائما ما تكون متميزة .. كما هو أنت ..

شكرا لكـ ..

ورده

هواوي الزعيم · #11 29/05/2008, 07:59 AM

أول شيء الحمدلله أنه طفاا الجهازعليك

ناوي تقلبها حصه مطالعه أنت

< مايستحي

والله يالغالي هاذي سوالف المراهقات والله يهدي بناتنااا ويهدي الشباب بعد

ومشكور على غيرتك

الغرناطي · #12 29/05/2008, 08:21 AM

أهلين الدحمي ...

الصراحة هاذي تشوفها واجد ..

:

و أكبر دليـــل ؛؛ ياسر القحطاني ؛؛

:

يعني تقولي أختي أنه يوم جاء للهلال صار بالمدرسة هوايل ( حفلات - رقص - ... الخ ) , والمشكلة أنها مدرسة تحفيظ !! أما يووم جاء ليلو ليش ما سوو كذا

بس أنا متأكد ما شجعوا ياسر الا علشان شكله !!

.

:

بس أتوقع البنات مووووب للكورة

عاشق السيدة العجوز · #13 29/05/2008, 09:08 AM

كنت ابكتب رد طويل جداً عن المهازل التي حدثت اثناء قدوم ريال مدريد للسعودية

لكن مستقبلي اهم من اضيعه من اجل بعض الـسـاقـ؟؟؟

يعطيك العافية اخوي

فتى النزهه المدلل · #14 29/05/2008, 09:59 AM

إقتباس

الرسالة الأصلية كتبت بواسطة عاشق مدريد


	مدري يالغالي هل الصوره هذي اكيد انها في السعوديه !! مصيبه صراحه اذا كانوا سعوديات !

لالالا ,, أتمنى من كل قلبي إنها تكون مركبه أو على الأقل مهب عندنا بالسعوديه ,, خصوصا إن الأشباه سعوديه و الله

مع إن بنات الفيصيله و المملكه مهب غريبتن عليهن هالحراكات ,, يسوون اكثر و الله وإسألو مجرب راح مرتن للملكه و طلعت علي الروحه اغلى من بيع السوق ,,

حرمت مرتن ثانيه إذا جيت الرياض أروح لم المملكه ,,

برايفت/ التسليب كنافرو شاقه وجهه الضحكه من الفرحه ,,

إيه من قده

J o S e · #15 29/05/2008, 11:02 AM

...........تكفيك هالوقفة حزن

فعلا شيء غريب على البنات حركات ما هي طبيعية و الله لو كل ذا الأحداث صدقية بتكون نقلة نوعية في المملكة

إذا الريال كان هنا والبنات سوو كذا كيف لو انتقل كاكا و كريس للريال كل البنات منطلقين للفندق و بسرعة غير قانونية

وش ذا الصورة من زين كانافارو الأقرع

بس تخيلوا الصورة هنا كيف السكيورتي دخلهم ؟؟؟ بس الصورة ملعوبة

ما أبي أكثر كلام لأني أبخبص

مواضيعك مقلعة تفكيرك عالي وتعجبني المواضيع اللي زي كذا

عبدالرحمن

ورده