04/06/2008, 09:21 AM
|
 | زعيــم مميــز | | تاريخ التسجيل: 21/04/2005 المكان: Jubail Industrial City
مشاركات: 1,871
| |
|
أيام لاتنسى في الغربه
السلام عليكم ورحمة الله وبركاته
كيف حالكم يالربع وش اخباركم . بشروا يامبتعثين ان شاء الله ان اموركم ماشيه عال العال , الله يوفقكم ويردكم سالمين غانمين.
وش رايكم أسولف عليكم ونغير شوي جو بعد ماخلصنا من الاختبارات وهمومها. والحمدلله ابشركم تخرجت وانهيت الماجستير ولله الحمد والمنه.
يوم الخميس 22\5\2008 كان من أجمل الايام واحلاها اللي مريت فيها وهو يوم حفل التخرج ,وهذا أول حفل أحضره في حياتي عشان كذا ماراح انساه وراح يبقى الاجمل والاحلى والاكمل<<< متأثر بمصطفى الاغا.
المهم أصبحت يوم الخميس وأضبط القهوه اللي تعدل الراس واتقهوى وأفطر وأعين من الله خير , قلت خلني اقوم البس من بدري واطلع اتمشى على النهر قبل لايبدأ الحفل.
لبست البدله الرسميه وكشخت وجيت للربطه (الكرفته). ايييييييه هنا توهقت وش لون اربط الربطه وأحاول وأحاول يمين يسار ياولد وش لون تربط الربطه وهذي أول مره في حياتي البس ربطة العنق. هذي والله البلشه. كلمت الشباب , الحقوني احد يعرف يالربع, والحمدلله ماقصروا الله يعطيهم العافيه ويوفقهم فكوني من أزمة الربطه اللي أخذت مني أكثر من ساعه.
رحت للحفل وحضرنا وجانا طويل العمر ريس الجامعه وماقصر كرم الخريجين.    بعد ماخلصنا من الجامعه قلنا خلنا ناخذ جوله في ربوع ولايتنا . المهم بعد عدة مشاورات اتفقنا نروح لاحدى المزارع القريبه من جامعة برنستون تمشيه ونمر الجامعه (الجامعه الاولى على مستوى الولايات الامريكيه حاليا وهي الجامعه التي تخرج منها صاحب السمو الملكي الامير سعود الفيصل وزير الخارجيه.) ركبنا على موترنا وتوكلنا على الله وربطنا الاحزمه.<<< ياكرهني للحزام . وصلنا للمزرعه ونزلنا ومرينا على صاحب المزرعه وماقصر رحب فينا ويفتح البوابه قال ادخلوا المزرعه مزرعتكم اخذوا اللي تبون وتمشوا وخذوا راحتكم بس ياجماعه لاتخربون الزرع .
اخذنا كم صندوق ودخلنا في ذاك الجو اللي ماودك تغيب شمسه والخضره والعلوم الطيبه.
المهم كان الغرض من جيتنا للمزرعه اننا نشتري فراوله . رحنا للفراوله والله لايوريك حبه في الصندوق وخمس في البطن. الين شبعنا من الفراوله وملينا صناديقنا . وناخذ لنا جوله في المزرعه ونروح نحاسب قيمة الفراوله ونطلع من المزرعه.    قابلنا عند طلعتنا امريكي, ويوم شافنا نتكلم عربي جانا الرجال ودخل عرض وسولف معنا قال امشوا معي للبيت ونطلع بعدها امشيكم على المدينه والجامعه.
رحنا مع الرجال ودخلنا البيت وتقهوينا وريحنا شوي . وطلع مو بسيط هالامريكي , جده كان من المقربين للدوله السعوديه ومؤلف كتاب عن القبائل السعوديه ومحتفظ الرجال بكتاب جده ويعرف معظم القبايل وينهم عايشين فيه. صراحه تفاجئنا بالمعلومات اللي ملم فيها وبعضها مانعرفه حنا يالسعوديين. وعنده صور للملوك وأصحاب السمو الملكي والامراء وأكثر شي شد انتباهي صور للملك فيصل الله يرحمه لأول مره أشوفها وأغلبها هنا في أمريكا.   طلعنا حنا وياه للجامعه(Princeton University). فعلا الجامعه تستحق تكون الاولى بجداره في كل شي حتى انها تفوق على هارفرد وMIT في جمال المباني وروعتها والتنظيم . صراحة لما دخلنا الجامعه يحس الشخص باحساس غريب وكأنه أول مره تدخل جامعه في حياتك. على فكره البروفيسور جون ناش موجود في الجامعه .<< من وجهة نظري انه اخر العباقره, اللى الى الان ماجاء أحد بعدهم يخترع شيء جديد وغير مسبوق.      وبعدها مشينا ورجعنا لشقتنا بعد يوم رائع ورحله ممتعه. وفي الختام ياليت ياشباب نشوف مشاركاتكم ببعض الايام والاحداث اللي مريتوا فيها في الغربه. تحياتي لكم. أخوكم/ أبو فهد |
( حبر = شيخ بالاسلام او قسيس في النصرانية )
والتوراة , والمصيبة ان عنده نسخة انجليزيه من القران وقاري كثير منه 
الوضع العادي
