شطحاتي الجزء الاول. - نادي الهلال السعودي - شبكة الزعيم

واين روني · #1 22/05/2008, 03:26 AM

بسم الله الرحمن الرحيم

سلام من الله عليكم ورحمة منه وبركاته

تسيف الحال ان شاءالله تكونو بصحه وعااافيه

في البدايه هذا الموضوع باين من عنوانه يعني نكون بسالفه ونشطح بسالفه ثانيه

سوالف اليوم عن تقلبات الجو سبحان الله المدينة حر والرياض حر والباحه مطر وثلج << شفتها بالجريده

وعسير امطار غزيره يعني الصيفيه بالجنوب

بس صراحه اللي صاير في لبنان تقال حرب عصابات وهذا واقع خطير يأثر على اليسا وهيفا وعلى

جمال لبنان السياحي << قل قسم >> قسم

يعني انتو شايفين ارتفاع الاسعار كيف رز الشعلان 48 ريال

يعني كبسه مافيه .

سؤال هل تؤيد ارتفاع الاسعار ...؟

انا اتوقع الحكم استعجل في طرد اللعب لان هذا مزح من النوع القوي

والمفروض بطاقه صفراء او انذار شفوي << محمد فوده

أهم شي الاخلاق وحب والوطن

بصراحه برنامج شاعر المليون مدري وش يحس فيه كيف الفراعنه يخسر ويفوز الشبرمي

شفتو اداراه نادي النصر يقولون الهلال وسامي مو احسن منا اجل ماجد عبدالله يسوى له اعتزال

بعد ماشاب وقامت تتطقطق عظامة المفروض اعتزاله مسوى من زمان .

على ايام سيدنا القدر طعج الله راسه << كلمه واحد من شلتي الموقرة

وامس اشاهد قناه العربيه ويجيبون هيلاري كلنتون ووقعت في غرامها

احبها بس هي

ماتحبني

جعلها ماتفوز هي وراسها اللي كنه كنافه بالقشطه

بالله تذكرون التلفزون السعودي قدييييييم يوم يطفي طوووووووووووووووووووووووووووووووووووووووووووووط

وتطلع الوان قوس قزح

ايام قديمه كنا الصباح نقوم ننتظر افلام الكرتون

وكان فيه برنامج يقهر اعتقد مايتفرج عليه احد

اللي هو وجه لوجه

وربي برنامج طفشان الساعه 12 باليل يوم الجمعة << ماشاءالله ذاكره بعير

والله العطاله حلوه صراحه لكن تحس ناقصك شي تحس انك تبي تعيش زي الناس وتبي تدور على

تعيسه الحظ

<< يقصد سعيده >> وتبي تجيب ورعاااان وتفرح يوم ورعك يقول بابا

تحسه وقتها كانك مدير مدرسه بالديره ماعنده الامدرسين و13 طالب وفصل و 16 حمام وانتو بكرامه

معادله صعبه مدير + مدرسين +13 ورع + فصل + 16 حمام = افلقني اذا حليتها

^^^^^^
لحسه مخ

وش رايكم بسروال طيحني بصراحه جابو موضه جديده وهي ارفعني

ينفع لحقين الموضات .

سروال يبطح نفسه <<يقصد سؤال : اذا ريت صديقك لابس طيحني جعله يطيح بحفره وش تسوي.؟

وش رايكم بواحد اشتر شاني وهو صغير ويوم شرب نص العلبه كب الباقي على راس جده

مع الشرفه << يعني بلكونه >> ماتحسون انه قوي << مو انا

ابشركم كتبت ببيت هز اركان المدن الساحليه :

البيت اقول فيه : كنت اتأمل البحر & فجأه سقط سروالي

<< سبب سقوط السروال غير معروف.

وفي روايه عن مدير شرطه الموياء << يقصد الدفاع المدني >> ان السبب هو شده التأمل عند الشاطى.

سؤال يبي اجابه :- انا رحت للصرافه وحطيت بطاقه الاحوال قالت لي الصرافه انت دلخ وطشتها

بوجهي وقالت طس قمت جبت الرخصه حقت القياده قالت تستهبل اخر شي اخذت بطاقه شحن

ولانفع تكفون قولولي وش الحل ....؟

احس ان اختبار القدرات يضحكون على خلق الله والله ياهم يطلعون فلوس

ودي اني اختبار قياس

كان مايحتاج اتوظف

.

تحدوني مااخلي سعبيلكم تقوطر

دققو في الصوره ^_____^

علك ايام زمااااان

انا بعتذر

إلى كل من أخطأت أو قصرت بحقه أو آذيته بقصد أو دون قصد في عام 1428هـ 2007 م أقول له
(ما شفت شي والقادم ألعن)

اتمنى ترشحوني اكون رئيس لاامريكا

وش ينقصني كشخه ورزه وطويل وقوي ومؤدب واتكلم

عنجليزي واحس اني بتزوج كوندليزا رايس مدري احس انا واقع في غرامها

وهي كذالك

بس الزمن ابعدنا عن بعض .

<< يعطي نفسه امل في الحياه

نسيت لااقولكم انا الحين جالس اخطط لااحتلال العالم

انا وشلتي الموقرة

انا احب وطني ووطني يحبني << كثر منها >> وفي بلادي كل شي جميل جداً فيه اماكن جميله

وكلنا نحبه واحب بابا عبدالله عسى الله يحفظه ويخليه لنا .

وش رايكم بسفن اب دايت بالله مو حلو طعمه

انا احبه واحب اللي يشربه ^___^.

وه فديته ياناس

.

انا فكرت اشتغل مضيف بالطايره عشان ابوي يقول لجماعتنا ولدي رحال مثل ابن بطوطه .

عاد جماعتنا ماعندك احد لو يسمعون جرس البيت يدق يقولون احلى جتهم رساله

حنا واحد من جماعتنا اشتغل في استعلامات المستشفى صارو ينادونه دكتور

وواحد في الاسعاف ابوه قام ينصب يقول ولدي ظابط في الاسعاف

واصلاً ولده دلخ يحسبها

سياره اسكريم

^^^^^^^
اعتقد ان هالطيب سبب انتشار مرض انفلونزا الطيور والا ليش يجمع ريش الدجاج

ويادار مادخلك شر

اذا كان للشطح عنوان فعنوانه مستر عاطل (( واين روني ))

اتمنى تكون عجبتكم الشطحات والقادم افضل

والحين خلاص انتهيت من الجزء الاول من شطحاتي .

ماابي مشكور ولا يسلمو رد على الاسئله اقتبس وش اللي اعجبك من شطحه وشكر.

مــــافــــيــــه

وظــــايــــــــف <<العطاله طولت

ومضه :- على كف القدر نمشى ولاندري عن المكتوب .

وفي الختام التحيه والسلام .. ^_____^ ..