بسم الله الرحمن الرحيم
السلام عليكم ورحمة الله وبركاته
وبعد :
ودي أدخل على الموضوع بدون مقدمات .. لأن النفسية مش ولا بد ..!!
:::::::::::::::::::::: ( مشكلة عاطفية )
كل يوم أصحى من النوم متأخر شوي .. ومعنى متأخر شوي إني أصحى بعد الساعة 9 بالليل .. شي طبيعي لا دراسة ولا وظيفة ولا هدف ..!
المهم بعد ما أصحى أروح المطبخ وآكل لي شي يغير من ريحة فمي قبل ما أتوجه إلى " استراحة الدشرة " عند أخوياي الداشرين ..! طبعاً أنا حريص جداً على استغلال وقتي على أكمل وجه .. عشان كذا وأنا في الطريق تلقوني أدق على حبيبة القلب " نوسة " حتى يكون ليومي طعم وقيمة ..!
في يوم من الأيام .. صحيت مثل كل يوم وتوجهت للاستراحة وفي الطريق دقيت على حبيبتي " نوسة "
لكنها ما ردت .. توقعت أن أهلها عندها ومبتلشة عشان كذا دقيت مرة ثانية وثالثة وعاشرة
.. لكنها برضه ما ردت ..!
غريبة ؟؟!! لا تكون نايمة ؟ لا مو من عادتها تنام هالوقت ..! أول مرة يصير لي معها كذا ..!
مسكت معي أن أستمر بتكرار الاتصال حتى ترد الحمارة الحقيرة
.. فجأة وصلتني رسالة .. في البداية توقعتها من رسايل الـ "Call me " اللي دايم يرسلها لي وجيه الفقر بعض أعضاء المجلس العام ..
قريت الرسالة وكانت من حبيبتي " نوسة " :
" أرجوك إذا كنت حبيتني من قلبك فأرجوك تنساني " ..!!انصدمت في البداية
ثم بعدين ضحكت عرفت أنه ملعوب من ألاعيبها الخبيثة .. فرديت عليها بهالرسالة :
" يا حبي لك يالواطية ما تعرفين تلعبين علي .. أنا أبو شغب والأقر على الله .. كان غيرك أشطر " 
ردت علي : " لا والله أتكلم جد .. أنا انخطبت واسأل صديقتي " نسمة " الدبة إذا ما صدقتني " 
وصلت الاستراحة وبقيت في السيارة أرسل لها وترسل لي .. لحد ما طلبت منها ترد علي شوي حتى أفهم السالفة زين .. وافقت بعد تردد .. ثم طلبت منها تدق هي لأن الرصيد قرب يخلص ..
اتصلت هي وقبل ما يدق الجوال رديت بلهفة :
" نوسة " مو معقول اللي قاعدة تسوين فيني؟ أنا ابن آدم لحم ودم ..! 
قالت : وش أقدر أسوي ؟ قل لي وش اللي أقدر أسويه عشان ما نتفارق؟
قلت لها : ارفضيه وما أحد يقدر يزوجك غصبن عليك ..
قالت : وإذا رفضته ؟ كم رفضت غيره كثير ولا صار شي ؟ تبيني أعنس؟
قلت والدمعة نازلة من خدي : لا لا .. ارفضيه وأنا بأجي أخطبك من أبوك الخبل بس خلي ظروفي تتحسن شوي .. 
قالت بكل وقاحة : ومتى بتتحسن ظروفك؟ دايم أسمع منك هالكلام ولا يصير شي .. دامك مع شلة الدشرة ما لك طموح ولا هدف فما راح تتحسن ظروفك .. اعذرني أنا بانتبه لنفسي وانت انتبه لنفسك ..!
رديت عليها : أقول أنتي ونخرتك اللي كنها مستودع بندة لا تغلطين .. احمدي ربك أنك لقيتي مثلي أنتي حتى أسامة المولد يخاف يمر من جنبك ويجيه الجدري ..
ما كملت جملتي إلا وأسمع صوت القطار طووط طووط طوووط .. قفلت بوجهي السافلة ..!!
:::::::::::::::::::::: (داخل الإستراحة )
نزلت من السيارة بتثاقل .. وجهي كله حزن وكآبة .. ودخلت الاستراحة ولاقيت كل ترحيب وحفاوة من معشر الداشرين ..
جلست في مكاني وأنا مهموم بعد فراق أغلى حبيبة ..
بدأ الأخويا بسؤالي عن الحال .. قلت وكأنها هي اللي تسألني :
حالي بعد فرقاك يا زين شينه .. من هو بعد فرقاك يسعد سنيني
ذبحتني بالهم وأصبحت ضنينه .. إما أموت وارتاح والا تجيني
عرفوا الشباب أنها مشكلة عاطفية .. فبدأ كل واحد يعطيني من هالنصايح ..
اللي يقول : أحسن لك تنساها ودامها جات منها أبرك ..
واللي يحاول يرفع من معنوياتي ويقول : هي الخسرانة وين بتلقى مثلك؟ بتلقاها بعد يومين تعرف قيمتك وترجع ..
واللي يقول : إذا تبي علاج مجرب .. فترى ما ينسيك البنت إلا بنت غيرها ..
واللي يقول : تعال خذ لك مزة صاروخ تنسيك نوسة وأبوها ..
رديت عليهم : كفاااااااااااية .. خلااااااص ارحموووووووني ..!!
شرب .. وحبوب .. وحشيش .. وبنات ... وبعديييييين؟؟ وين السعادة؟؟
أنتوا مبسوطين من حياتكم كذا؟؟
كل إنسان له طموح في حياته إلا أنتم .. حياتكم هي هي .. ولا تقدرون تغيرونها ..
أنا من هاللحظة قررت أتوب إلى الله توبة نصوحة .. وأترك عالم الدشرة نهائياً وهذا فراق بيني وبينكم .. لازم ألقى
نفسي لأني من هاللحظة صار عندي طموح وهدف محدد ..!!
كل الداشرين في الاستراحة حسوا أن الوضع جدي ولا فيه استهبال فسكتوا وهم يناظروني ويحاولون يفهمون وش قاعد أقول أنا ..!
قال واحد منهم :
معليش يبو شغب .. بس ممكن تفهمنا وش تقصد من كلامك هذا كله؟ قصدك أنك بتترك الشرب والحشيش والبنات؟ بتصوم أنت الحين ورمضان ما بعد جاء؟ 
غسلت يدي منه وقمت من مكاني عشان أترك هالمكان اللي دمرني ...
قبل ما أطلع سألني واحد ثاني :
لحظة أبوشغب .. تقول بتتركنا عشان التوبة والطموح .. ما قلتنا وش هالطموح ؟
رديت على سؤاله المنطقي وقلت ودمع التوبة على خدي :
ايه أنا تبت من الدشرة وقررت أحدد لي طموح غير عن كل الناس .. قررت أترك الدشرة ويصير طموحي " الانحراف " .. وداعاً ..!! 
تركت عالم الدشرة وأصدقاء استراحة السوء إلا ما لا نهاية .. ورجعت للبيت حتى أحدد أبرز ملامح طموحي الجديد ..!
:::::::::::::::::::::: ( في البيت )
وصلت البيت واغتسلت ثم انسدحت على السرير استعداداً ليوم جديد مشرق وجميل..!
ما مداني أغمض عيني إلا واتصال يجيني من رقم ما عرفته ..
- السلام عليكم ورحمة الله وبركاته
- وعليكم السلام يا هلا ..
- هلا بك أبو شغب ما عرفتني؟
- والله الصوت موب غريب علي .. أفصح عن نفسك يا أخا الود ..
- أنا خالد " الفاهي " ما هقيت أنك ماسح رقمي ..
- نعم يالفاهي وش تبي ؟ مسحت كل الماضي من حياتي مو بس رقمك ..
-
أبو شغب بصراحة أنا و3 من الشباب وحارس الاستراحة البنقالي وليد فكرنا في الكلام اللي أنت قلته وأثر فينا كثير
وقررنا أننا نتوب عن الدشرة ونسلك عالم الانحراف معك حتى نكون فاعلين في المجتمع ..
- يا مرحبا ويا مسهلا بالأخوان .. أفرحتوني والله بكلامكم.. خلاص خل الشباب يجون الحين للبيت عشان يأدون القسم ونحدد أهدافنا واستراتيجيتنا من الليلة ..!
- أوكي يا زعيم .. نص ساعة وحنا عندك إن شاء الله ..!! :::::::::::::::::::::: ( في الإجتماع )
وصل الفاهي وكان معاه العبقري وأبوكتف والبنقالي وليد .. رحبت فيهم دخلتهم المجلس وقفلت الباب وخليتهم يقفلون جوالاتهم للحفاظ على السرية ..
بدأ الشباب بالقسم على الإخلاص والعمل والمحافظة على أهداف الجماعة اللي اتفقنا على تسميتها بجماعة الأخوان المنحرفون
.. ثم بدأنا في عقد الاجتماع :
بدأت أنا بقولي : يا أخواني حنا اجتمعنا هنا حتى نتعاون جميعاً في تحديد أيدولوجية العمل الذي سنسير عليه .. لا تناظروني كذا أدري أن كلمة " أيدولوجية " هي السبب بس ما عليكم منها خلونا في المهم ..
الحين نبي نعرف وش نبي نسوي؟ وشلون نصير منحرفين يشار لنا بالبنان؟ وقبل كذا نبي نعرف وش هي قدراتنا حتى نقدر نخدم الجماعة فيها ..
رفع يده الفاهي وتكلم :
والله أني مدري وش تخربط به يا أبو شغب .. بس بالنسبة لقدراتنا فأنا معروف بعلاقاتي وواسطاتي .. والعبقري معروف بذكاءه وتخطيطه .. وأبو كتف معروف بقوته وجبروته .. أما البنقالي فما عنده سالفة غير الخمور والبلاوي اللي أنت خابرها .. خلنا نفصله ونقيم عليه حد الردة أزين
رديت عليه : لا بالعكس البنقالي هو اللي بيفيدنا عن الأماكن اللي نبيها والمتطلبات الضرورية للجماعة .. هاه يبو كتف كنك تبي تقول شي ؟
أبو كتف : يا خوي وش دعوى مسوين جماعة منحرفين ولا ندري وش بنسوي؟ وش المطلوب منا عشان نصير منحرفين؟
- هاه يالعبقري جاوب الأخ .. لأني أنا نفسي مدري وش معنى منحرف بس مسكت علي أحدد طموح وما لقيت غيرها كنت أسمع إمام المسجد يقولها : "انحرف عن جادة الصواب " فعرفت أنها كلمة زينة دامها جات جنب الصواب ..!
رد العبقري : لا الانحراف غير كذا بكثير .. الانحراف أحلى من الإجرام وأعلى طبقة من الدشرة .. الانحراف عالم واسع وما يثبت فيه إلا كل من عنده قلب ميت .. إذا بغينا نصير منحرفين بحق وحقيق لازم نسرق وننهب ونجرم ..
تحمس الفاهي : يعني يالعبقري لو أبوشغب يمسك شغالتنا البثرة ويكسر عينها بمقطع بلوتوث يصير منحرف؟
رديت وأنا معصب : أعوذ بالله .. تبيهم يعدموني ؟
رد علي العبقري : لا يا أبوشغب وش يعدمونك؟ وينا فيه؟ .. ترى هالأمور ما تتعدى كم سنة .. ودام الفاهي معه واسطة فوضعك تمام ..!
قلت : لا لا .. حتى ولو .. مستحيل أسويها مع شغالة .. دوروا أحلى من شغالتهم وأنا موافق ..
المهم يالله أنا بنام الحين طسوا لبيوتكم وكل واحد يفكر وش بنسوي بكرة واجتماعنا في مثل هالوقت هنا .. ولا تنسون تنظفون هالبنقالي قبل ما تجيبونه ريحة الزيت براسه صدعت راسي ..!
مشوا المنحرفين الجدد من عندي وأنا طسيت لغرفتي وسريري ونمت وأنا محتضن دبدوبي ..
:::::::::::::::::::::: ( البدء في عالم الانحراف )
اجتمعت الجماعة في وكرها الجديد في استراحة " سوا " في شرق الرياض .. وبدأنا في تنفيذ أولى عملياتنا
في سرقة السيارات آخر .. أبو كتف مسؤول عن السرقة والعبقري عن المراقبة .. والبنقالي هو المسؤول عن بيع
السيارة عند أحد معارفه في التشليح ..
استمرينا في سرقة السيارات والحمد لله سوقنا ماشي زي الحلاوة وجمعنا مبلغ محترم من هالسرقة .. والأمن المحترم مشغول بقضايا أهم مثل الإرهاب وغيره ..
لكن في يوم من الأيام تهوروا العيال وبغوا يسرقون سيارة عليها القيمة .. لكن حظهم ذيك الليلة كان أقشر كفشوهم أهل السيارة ومسكوهم وبلغوا عليهم الشرطة ..
لكن الحمد لله ما مرت 48 ساعة إلا والفاهي الذيب طلعهم بالواسطة ..!!
بعد ما سلمت الجرة هالمرة .. قررنا نغير استراتيجيتنا .. فانتقلنا إلى خطة بديلة من تخطيط أبو كتف ..
كانت خطة أبوكتف عبارة عن قطع الطريق على السيارات المارة من نفس الحارة ... عارضنا الفكرة لأننا في السعودية بلد الأمن و الأمان ولأن هذا مستحيل يحدث هنا .. وما وافقنا له إلا بعد ما ذكر لنا عدة أحياء في جدة وهنا في الرياض
وللتأكيد لنا مرّ بنا على حي الفيصلية اللي يسكن هو فيه وشفنا بأعيننا اللي يصير .. حارات ضيقة ومطبات من صنع
أهل الحي حتى يمنع هروب السيارات المارة وشباب على يمين ويسار الشارع ..
بدأنا في استيجار شارع من شوارع الفيصلية .. وفعلاً كان الداخل للحارة مفقود والخارج مولود .. أوقفنا سيارة جمس
كان فيها ولد شباب ومعاه حرمته ..
شفتهم قلت للجماعة : خلوهم يمشون لحد يكلمهم ...
عارضني أبو كتف وقال :
بالعكس هذا شكله منغنغ ومعاه عايلة وبيعطينا الفلوس اللي نبيها بدون مشاكل ..
وبعدين حتى لو خليناه يمشي .. اللي ورانا ما بيخلونه ويمكن يتحرشون باللي معه بعد ..
قلت : لا يا أبو كتف حنا منحرفين وهذي مو أخلاقنا .. خلهم يرجعون وأمّنوا لهم الطريق عشان ماحد يتعرض لهم ..!
جات سيارة ثانية عليها 3 من الشباب الكووول اللي ما أدانيهم .. وقفناهم وأخذنا كل اللي معهم حتى واحد كان منهم
لابس بنطلون " طيحني " خليناه يفسخه وأخذناه منه
.. كذا أحلى إما يلبسه كله أو يفسخه كله .. صح؟
فجأة واحد من هالثلاثة شكله يبي يهاوش نزل من السيارة بسرعة وهو معصب وقال :
" يا كرهي لكم " 
وركب السيارة ومشى ..! يا حبي لهم وهم معصبين
بعد ما مشوا خفت أنهم يبلغون علينا الشرطة .. بس الحمد لله ما صار شي لأن أبوكتف يقول أنهم مستحيل يدخلون هنا إلا إذا كانت الجريمة خطيرة جداً ..!!
استمرينا على هالشغلة أيام حتى ملينا من قلّة السيارات اللي تمر .. فقررنا نغير في الاستراتيجية مرة أخرى ..!
هالمرة البنقالي وليد هو اللي اقترحت الفكرة .. وهي أن نبدأ في تجارة أقراص الديفيدي وبيعها ..
سفهنا هالفكرة لأنها تجارة ومالها دخل بعالم الإنحراف .. لكن البنقالي قال :
" اعطي الهر فرسة " .. قلنا أوكي نشوف
هالتجارة لين نلقى لنا فكرة أفضل ..!!
صرت أنا والعبقري اللي نشتري الديفيدهات ونعطيها البنقالي وهو يجمعها ويتفق مع الزباين والفاهي وابو كتف هم اللي يوصلونها للزباين .!!
حققنا مبالغ خيالية في ظرف أيام وكنا مبسوطين من هالريح .. لكن اللي كان ينغص علينا فرحتنا هو أن هالتجارة شريفة وما للانحراف فيها دخل ..!!
العبقري كان شاك في الوضع وصارحني .. وافقت له أن ياخذ دور الفاهي في توصيل الديفيديهات اليوم عشان يقدر يشوف وش فيها ..!
بعد التوزيع وصل أفراد الجماعة ما عدا البنقالي والعبقري ... ما درينا إلا البنقالي جاينا يركض وهو يصيح يقول انه شاف الشرطة ماسكين العبقري ومركبينه معهم ..!!
خفنا وارتبكنا لا يكون العبقري يعترف علينا ونروح في داهية..!!
الفاهي تكفل باخراجه وقال : بطلعه لو يكون ان شاء الله في قوانتنامو .. ما عليكم ..!
طمنا كلام الفاهي .. وقررنا نغير الاستراتيجية لحد ما يرجع لنا العبقري ..
المرة هذي أنا اللي اقترحت الفكرة .. وهي ندخل مستشفيات الولادة .. وأول ما ينزل المولود من بطن أمه نلقطه على طول ونبيعه على أحد هالعصابات بالداخل أو بالخارج ..
كنت أقول هالاقتراح وضميري يأنبني .. لكن لازم أسوي كذا ولا ما راح أصير منحرف ..!!
بدأنا بأول عملية .. دخل أبوكتف لقسم المواليد وأنا دخلت بعده .. شفت الوضع آمن وماحد سألنا من نكون ثم أشرت لأبوكتف يدخل وياخذ أحد هالأطفال ويلفه بجريده ... دخل الذيب وطلعنا من المستشفى بصعوبة ..
أول ما شفت الولد ما شاء الله طالع مثل القمر
.. بغيت أتفل بوجه أبو كتف الغبي .. المفروض يزرف ولد شين عشان العصابات تبي ولد معوق ويقطعون يده ورجله عشان يصير شحاذ محترف .. أما هذا والله حرام ينقطع منه شي ..
قال أبو كتف : أجل والشين موب حرام ينقطع منه شي ؟
سمعت هالكلمة من أبو كتف وكأن أحد صفعني كف وأيقظ ضميري النعسان
.. فعلاً خذ الحكمة من أفواه الدلوخ ..!!
صحى ضميري وطلبت من أبو كتف والفاهي يرجعون الولد لمكانه .. وتوووبة يا رب ..!!
راحوا ثم رجعوا وهم يقولون : " ترى لقينا في سرير الولد ولد ثاني وحطيناه جنبه .. الظاهر أنهم حسوا أن الولد ضاع فحطوا مكانه ولد ثاني عشان ما يتورطون عند أهله " 
قلت : يالدلوخ حتى لو حطوا ولد ثاني فأكيد بيتورطون عند اهل الولد الثاني ..!
قال أبو كتف : طيب وإذا كان فيه توأم ووزعوا الولدين على السريرين؟
انلحس مخي ... ويييييين حنا عايشين فيه؟؟؟؟ معقولة كل هذا يصير في بلدنا؟؟ لا ما أصدق .. لالا .. خلاص صدقت لأني شفت وسمعت بعيني كل اللي يصير ..!
رجعنا للاستراحة بعد ما قررت أعلن اعتزالي عالم الانحراف .. لكن قبل ما أعلن قراري المصيري على الجماعة طلبني الفاهي في كلمة راس ..
قال لي بعد ما طلعنا برا : أبو شغب بأقول لك سر خطير ..
قلت : خير يالفاهي ؟
قال : أنا كلمت واسطتي في جميع مراكز الشرطة وأكدوا لي أن العبقري ما هو في أي قسم عندهم ..
قلت متعجب : أجل وين طس فيه؟ مو وليد البنقالي قال أنه شافه بعيونه راكب مع الشرطة؟
قال : هذا اللي خلاني أستغرب .. أول ما قال لي الواسطة هالكلام رحت لغرفة وليد ولقيت قطرات دم وريحة شينة مرة عند الغرفة .. مدري وشلون أقول لك ؟
قلت : يالفاهي اعقل وش هالكلام اللي تقوله ؟ معقولة ؟
قال : بصراحة العبقري لما طلب مني الديفيديهات عشان يوصلها راح وشاف اللي فيها ولقاها أشرطة مخله فعصب وقال أنه بيروح للبنقالي وبيأدبه ..!
قلت : وتوك تقول لي هالكلام؟
قال : مدري .. خفت وما توقعت يصير شي .. قلت يمكن تهاوشوا وجات الدورية وأخذت العبقري صدق ..!!
ضاق صدري .. ومباشرة دقيت على 999 وطلبت منهم يجون ياخذون البنقالي الحقير ..!!
وصلت الشرطة للاستراحة .. ولكن للأسف قدر البنقالي أنه يهرب في غفلة منا قبل دخول الشرطة للاستراحة ..!
فتشت الشرطة فيما بعد غرفة البنقالي ولقت اقامته وآثار الدم ما انمسحت بشكل كامل .. وبعد التحقيق تم اكتشاف حقيقة مقتل العبقري اللي كان على يد وليد البنقالي بمساعدة من بعض جيرانه البنقال واللي تم القبض عليهم واعترفوا بأن وليد راح جدة ومن هناك تم ترحيله إلى بنقلاديش ..!!
بعد كل هالأخبار .. اتفقت أنا والفاهي وأبو كتف أن نتوب من الانحراف ونرجع لشلة الدشرة من جديد ..!!
وهكذا رجعت كما كنت أنام النهار وأسهر الليل .. حتى مرت 6 شهور منذ اعتزالي الانحراف ..
وفي يوم من الأيام وحنا سهرانين في الاستراحة نشرب ونرقص جاني اتصال رديت عليه وأنا شبه فاقد ..
- ألووو مدير ..
سمعت الصوت وراحت السكرة .. الصوت هذا ما هو غريب علي .. معقوووووولة؟؟؟؟؟
قلت : أيوه مين؟
- ألووو مدير .. معلوم أنا مين؟ أنا وليد يا مدير .. أنا الحين في سعودية في رياض .. أنا ما في وليد .. أنا في راجو الحين في اقامة جديدة .. أنتا ابغى يشوف العبقري؟ ان شاء الله انتا بكرة يشوف هوّا في الجنة هاهاااااهههههههااااااه 
::::::::::::::::::::::
انتهت قصتي .. والله يرحمني ..!!
يــوم أصــبــحــت " مــنــحــرفــاً " ...!! 
الوضع الشجري
