السلام عليكم ورحمة الله وبركاته
أخواني الزعماء
مرئياتي بكل اختصار على ظروف المباراة
خطين متوزايين يحكون أسباب خسارة الهلال للمباراة
1-
- ياكوزمين للمرة الثانية بعد المليون جمهور الزعيم ما غلط لما انتقد ضعف اداء العنقري في مركزه اللي هو فيه وحصل ماحصل يوم المباراة يعني وقف الزعيم على العنقري في هذي الخانة؟ أجل وش فايدة الأربعين لاعب اللي بالقائمة
بعدين كيف يا كوزمين تشيل أظهرتك وانت محتاجهم العنقري على بلاه كان ماسك خانة والزوري على عدم تمكنه من الهجوم إلا أنه بعد ماسك خانة
ولا عزيز كيف تجي براسك يا مستر كزمين انك تخليه جنبك وانت محتاجه سويت مثل اللي يدور على شي ضروري وهو جنبه ولكنه مو شايف. مساحة فاضية كان يلعب فيها نور وكريري على كيفهم ما كان لها داعي لو أبو عزيز موجود
بعدين إلى الآن ما اقتنعت أنه ياسر يبيله واحد ثاني جنبه؟ ليه ما تفعل طريقة تبادل المراكز بين اللاعبين تراها ميزة في الهلال وفي المدرب الناجح مو تتفلسف في مراكزهم لكن تقارب بينها
- الفريدي تبي تسمع الجمهور ينتقدك كان بها ما تبي ترا الهلال مثل ما أبرزك قادر أنه يبرز غيرك ويرجعك للدكة
يالفريدي من بعد مباراة الشباب اللي غاب فيها التايب وبديت المشوار وأنت كل تفرغك البحث عن قطع كرات الخصم أو تأخير الهحمة لما تجيك الكورة أو التمرير الخاطئ جدا واللي رجع علينا بنتيجة عكسية كثير من المرات وشي ثاني بالنسبة لك يا فريدي مدري ليه ما تحب تسجل أهداف بطريقة سهلة مع أنه تهيأت لك كم كورة بهالمباراة وغيرها لكن نقول يا رب تنحل بالنسبة لك. أنت تتبع أسلوب خاطئ لما تجيك الكورة أنك بدل ما تحاول الهرب من اللاعب الخصم تتجه إليه بحيث يسهل عليه قطعها منك وأي مهاجم ذكي يسوي العكس منك بحيث إذا ماقدر يراوغ يحاول الهرب بالكورة بعيد عن الخصم حتى يلقى مساحة يقدر يقطع فيها مسافة يوصل الكورة فيها أو يسدد.
- الزوري كلمة وحدة بس وينك؟
- الشلهوب لا عليك لوم قتلهم عطوني إجازة وماعطوك بكيفهم اللي قدرت عليه سويته
- أبو سعيد صحيح أننا نقدر نكون بالنهائي إذا أراد المولي عز و جل لكن أنك تضغط نفسك وزملائك وتقول أننا قادرين نفوز بستة فهذا شي مرفوض جداً من الممكن أننا نفوز بالثلاثة أو بالأربعة إن كثرت بهذي الظروف لكن مو بالستة
الثقة شي ورؤية الواقع شي ثاني. إذا تقدر تجيب هاتريك وتخلي البقية بين زملائك هذا شي حلو. تحملني يا بو سعيد من حبي لك اقولك كذا
- المرشدي بالله وش استفدنا من تصفيقك للحكم والمشكلة انها بعد المباراة اخذت الكرت. الحين خيارات كزمين إما خيرات أو المفرج واثنينهم حالياً مو على نفس استعدادك وتهيئتك للمباراة أقرب واحد منهم لعب خيرات قبل ثلاث أو أربع مباريات
أتمنى من الإدارة الخصم عليك حتى تمسك أعصابك مرة ثانية
2-
- حكم المباراة رجل أعمال وكلام فاضي ما يهمنا هالكلام أنتو اشمعنى تكونوا نجوم في بلدانكم ولما تجونا تخنبقون خنبقة يضحكون عليكم فيها حكام الدرجة الثانية عندنا؟
ألا متى وحنا نعاني أو بالأحرى إلى متى وجميع أندية العالم تعاني من الحكام دون أن ينالهم أي شئ من العقاب أو الجزاء يعني متى نسمع بعد ما عاينوا المباراة لقوا انها فيها أخطاء جسيمة أنها تنعاد وهذا أبسط حقوق المتضرر؟
لا حد يقول أنها جزء من اللعبة أخطاء الحكام. لأن الحكم يحكم مباراة بخيرها وشرها ينساها بعدين لكنها بين الفريقين تاريخ يكتب وخسائر بالملايين
شوف لك حل يا بلاتيني عدل بدل زيد نقص المهم مسألة أن الحكام ينفدون بجلدهم هكذا بسهولة غير مقبولة أبداً
- لجنة الانضباط شوفي اللي صار زين مو عين حمرا علينا وعين وردية عليهم
أنتظر ترتيب الهلال في قائمة الفيفا الشهرية لأندية العالم بفارغ الصبر
تحملني يا هلال
لكنك بطل هالبطولة
نخبة الزعيم