نادي الهلال السعودي - شبكة الزعيم - الموقع الرسمي - لا تضايق ماتشين إلا تزين .. من صبر يكسب ولا عمره ندم

:d هههههههههههههههههه :d

لا تستغربون اذا بدأت مقالي بضحكه وإبتسامه تشق الوجــه .. على بالكم متضايق والا زعلان من الظلم اللي حاصل للزعيــم ؟؟ :d
والله ان تبطي يافيصل عبدالهاادي وتبطون يافرقه حسب الله تضيقون صدري والا تعكرون صفوي وفرحتي بالزعيـم اللي ســل الدوري من غمد المستحيل وفرّح بها الشعب الهلالي العظيم أكبر جمهور في المملكه وآسياا .. والله ان تبطي تزعلني على الموسيقار الليبي طارق والا على جمهورنا الوفي

أفرح ياهلالي ماعاش من يكدر خاطرك .. أصلا وش اللي خسرناه على شان نتضايق .. ؟؟ طارق التايب ؟؟ دايم نقولها اذا غاب لاعب ظهر لاعب آخر وحقق لنا المراد وهو الفوز .. أفرح ياهلالي بأبتسامه تشق الوجـه :d وخلك مثلي دايم أغني وأصفق وأطبل للهلال وأقول ( ياهلال نادتك البطوله ولبيت .. تستاهل الأمجاد مجد ورا مجد ) افرح ياعم مافيه زعيم غير ناديك في المملكه وآسيا .. وسجل معي رساله شكر لـ فيصل العبدالهادي وشلته على دعمهم الكبير لنادي الهلال !!
معليش خلونا واقعيين ياهلاليين .. فيصل العبد الهادي ولجنه الإنضباط قدموا لنا خدمه ودعم في هذا الموسم منقطع النظير ويستاهلون عليه الشكر والتقدير .. دعم معنوي ودعم ملمووس وانا قد كلامي والمفروض نفرح ونبتسم ونضحك ونعيش الأفرااح ولا يتعكر مزاجنا لأننا ماخسرنا شي مثل ماخسره النادي المدلع

دقيقه يا هلالي خلني أشطح شويتين

وين العلماء نيوتن و جبريل فهرنهايت و جون دالتون اللي سطروا التاريخ بأختراعات وأكتشافات عظيمه تدرّس في الجامعات والمدارس .. وينهم ؟؟ والله أتحداهم يفسرون ويحلون لي هالمعادله المجنونه .. انا أول مره أشوف نادي إذا أنظلم وتعرض لضغوط وإجحاف وإيقافات بالكريك يصير أفضل وأقوى نادي ؟؟؟ كيف ؟؟؟
في قاموسي ومحدوديه عقلي اللي اعرفه ان النادي اللي مفروش في طريقه ورد وريحان وشويه واسطات يصير أقرب للنجااح والبطوله وكل علمـ(ن) غانم خصوصا اذا كان في أرضه وبين جمهوره بعكس النادي المظلوم اللي المفروض مكانه الأخير أو قبل الأخير ينافس على الهبوط ؟؟ شلون تفسرون لي هالمعادله المقلوبه ياعلماء الأرض ؟؟

نرجع لـ رساله الشكر اللي المفروض نقدمها مع طلب الأستئناف لـ فرقه حسب الله

أتقدم بالشكر لـ لجنه الأنحطاط .. عفوا لجنه الإنضباط :d ( انا ما ادري ليه هالكلمه دايم على لساني ) اتقدم بالشكر لأنها أعطتنا دعم وطموح أكبر وهمه وعزم وجعلت الهلال ينافس لا للحصول على البطوله فحسب .. ولكن أصبح ينافس لإثبات الهيمنه والقوه في أصعب الظروف حتى أكل اليابس قبل اللين وكوش على الموسم كله ( لاتحسبون بطوله فيصل لأنها كانت في جيبنا لكن خليناها صدقه جاريه :d )

فيصل العبدالهادي يخدم الهلال ويمنح لاعبينا عزم أكبر وهو لا يعلم ويعتقد أن القانون العقلي الثابت ينطبق على الزعيــم وهو (كلما زاد الظلم على نادي معين يهبط ويسقط إلى الهاويه) لأنه وببساطه يمتلك عقليه محدوده المدارك لا تتجاوز مكانه المعتاد ويعتقد بهذه الطريقه انه يخدم النادي المدلل وهو في الواقع يضرّه ومع ذلك يتلقى رسائل الشكر والحب والعرفان من صديقه ورفيق دربه منصور البلوي .. أليس حري بنا ياهلاليين أن نفرح ونضحك عليهم وعلى جهلهم ؟؟

يا أعزائي القراء .. نادي الهلال قلب الموازين وغير الأسس العقليه الثابته وأحدث فارق كبير جدا وحصل على بطولتين ولعب في نهائي بطوله فيصل ولو كان حاط بطوله فيصل (-23) أكبر همه كان جابها بالراحه وهو مظلوم .. يعني لو نادي آخر تعرض للي تعرض له الهلال كان مكانه الحين درجه أولى والا مطرود من الدوري خير شر

افرح ياهلالي لأن الزعيم لا يتأثر بـ عبث الأشقياء وطرق الضعفاء للحصول على (بطوله) ولا يسقط بقرار نقل مباراه ولا إيقاف لاعب بهذه (السهوله) والدليل هو حصولنا على بطوله الدوري في ضروف مستحيله على أي نادي آخر ولكنها غير مستحيله على الزعيم بل هي ضروف أقدر أسميها في الوقت الحاظر ضروف محببه للهلال
بصراحه ولا تزعلون علي انا مبسوط بقرار نقل المباراه تدرون ليه ؟؟ لأني رأيت في عيون الاعبين والجهازين الفني والإداري حماس وإصرار على الظفر بالبطوله وقوه مجنونه تكاد تنفجر وتحرق العريجا وماجاورها بعد القرار المجحف والظلم الغير مستغرب من شله الأنس .. وبصراحه وخلونا واقعيين احنا الجماهير كنا نقول اذا جات بطوله الملك خير وبركه واذا ماجات عاادي حصلنا على الدوري وولي العهد وراح نتوج في نهايه الموسم من الملك عبدالله وحصلنا ايضا على الهدف الأهم وهو اللعب في أبطال آسياا .. !! ولكـن .. !! بعد القرار الأخير والظلم والإجحاف صارت بطوله الملك أكبر همنا وغايه وطموح كبيرعلى الصعيد الإداري و الفني و الجماهيري وراح نحققها بأذن الله ثم بعزم الرجال وقوه الأبطال وراح نبكيك يافيصل مره ثانيه وثالثه وراابعه إلين تشوف لك نادي غير الهلال

أفرح ياهلالي أنت تشجع نادي صعب وقوي في الرخاء وأقوى وأصعب في الشده إذا انظلم وتعرض لضروف صعبه يعني في الحالتين بتجيب بطولتين وإذا فيه حاله ثالثه راح تجيب البطوله الثالثه وعليكم الحساب ياحبايب قلبي :d

ياعيال عمي يقول القائل ( أبتسامه الخاسر تفقد المنتصر لذه الأنتصار ) وانا أقول ( ابتسامه المظلوم تفقد الظالم لذه الظلم ) بصراحه أحس هالمثل ينطبق علينا أو قريب من حالتنا .. قولوا لي شلون ؟؟
الغضب الكبير والردود الصاخبه في الشارع الرياضي الجماهيري الهلالي بشكل عام .. تعطي فيصل وإعدائنا فرحه ونظره إستهزاء لأن أفعالهم المشينه لقت صدى كبير وردود ممتعه ومسليه لهم .. ولكن عندما نرد عليهم بأبتسامه الواثق وبرود العاقل ونطالب بحقوقنا المسلوبه بالقانون والإثبات بالأدله والكلام المنطقي وفضح أعداء النجاح على الصعيد الإعلامي أو حتى في المنتديات راح نفقد فيصل وشلته لذه الظلم وندخل في قلبه الخوف والرعب
و رد الاعبين وقتها يكون كالعاده في الملعب بالبطولات والإنجازات ونقهر فيصل مثل ماكان يبي يقهرنا .. انا بصراحه متفائل كثير في بطوله الملك مثل ماكنت متفائل في بطوله الدوري لأني أثق بالمدرب وباللاعبين بدون إستشثناء وبأي تشكيله وفي أي ملعب وتحت أي ظرف .. حتى لو نلعب في بيت البلوي على قوله الأمير المحبوب بندر بن محمد :d لأننا نملك قوه هائله مكانها الدوري الأنجليزي أو الإيطالي مو دوري أشبه بدوري الحواري اللي عنده واسطه ومشبك الحكم يجيب له هدف والا بلنتي واير لس
عندنا إداره طموحه لا ترضى إلا بالذهب عندنا شرفيون يدعمون النادي بالغالي والنفيس عكس بعض الأنديه المجاوره :d من ينتظر من الحكم بلنتي أو هدف مزيف يحقق بها فرحته ويدافع بالأتصال على القنوات الفضائه بالتبرير عن الهدف المزيف بأسلوب مضحك وغير مقنع حتى يدافع عن وسيله الفرح الوحيده اللتي لا يمكن أن يفرط بها بسهوله :d ( ياشباب كم وصلت أسعار سماعات البلوتوث هالأيام ودي أشري سماعه :d ) .. يا عزيزي الهلالي .. عندنا لاعبين يلعبون للشعار وحب الهلال .. الوفاء والتضحيه هو عنوانهم وهمهم وديدنهم الوحيد عكس بعض الاعبين الذين يزايدون انديتهم بـ 12 أو 13 مليون .. عندنا محمد الدعيع حامي العرين الأزرق وعميد حراس العالم ومصدر الثقه والإطمئنان للجماهير الهلاليه بقوه بأسه ونشاطه وحماسه .. عندنا ياسر الكاسر القناص الماهر صاحب الحس التهديفي العالي ( والله تبطي ياروبن هود تصيد المرمى مثل مايصيده ياسر ) .. عندنا الشلهوب المشاغب الموهوب قاهر الضروف ومتحدي الصعاب صاحب الأخلاق العاليه .. عندنا طارق التايب الموسيقار والأمير الليبي أفضل ملحن عربي وأفضل وسط وصانع لعب في المملكه والخليج والعالم العربي .. عندنا تفاريس صخره الدفاع وعنوان الحب والوفاء والتضحيه أفضل مدافع في المملكه حاليــاا ومستقبلا إعتبار من تاريخه .. عندنا المحارب خالد عزيز قاهرهم ومحجر لهم (تبيه دفاع تلقاه تبيه وسط تلقاه تبيه صانع تلقاه بسم الله لا إله الا الله .. الله لا يضره) .. عندنا المايسترو عمر الغامدي اللي يقدم مستويات كبيره مع الهلال والمنتخب ولو فيه منه أثنين كان ماخليت ولا واحد أحتياط :d .. عندنا الخثران الجوكر مرعب الخصوم الله لا يضره .. عندنا الفريدي والكلثم والدوسري مستقبل الهلال اللي راح يحفظون تاريخ الهلال العريض ويواصلون أمجاده بأذن الله .. عندنا نجوم تطمئن لها القلوب وترتاح لها .. تحت أي ضرف وفي أي وقت
منتخب لا إله إلا الله .. الله لا يضرهم ويحفضهم من العين

الظروف أحيان لو تقسـى تعين .. لو تراجع شبر تمشي لـك قدم
لا تضايق مـا تشيـن الا تزيـن .. من صبر يكسب ولا عمـره نـدم
لا تلـوم الحـظ وتلـوم السنين .. حتى لو حظك في عمرك ماخدم
جامل أيامـك ولا تبقـى حزين .. من صواديف الزمـن لا تنصدم
مساعد العفار

بذمتك ياهلالي فيه شي يسوى زعلنا ؟؟