في مسجدنا : طاق .. طاق .. طاقيه تبغون تلعبون سارعو بالتسجيل هنا - نادي الهلال السعودي - شبكة الزعيم

algohmani · #1 05/05/2008, 06:00 PM

بسم الله الرحمن الرحيم

السلام عليكم ورحمة الله وبركاته

عندما تصلي في مسجدنا فأنت مع موعد للفوضى في المسجد كالعاده والسبب أبو خالد اللي غثنا بولده خالد .. يجيبه معاه للمسجد .

مو مشكله لو الولد مأدب وساكت ومايؤذي الخليقه لكن الولد شقي ..

المهم ياجماعه في يوم من الأيام صلينا وفي الركعه الثانية من صلاة العصروأنا اقرأ التشهد سحب الولد شماغي وبعد

ماسحب الشماغ شال الطاقيه ..

وقعد يلف حول السطور ويردد : طاق طاق طاقيه ...

شوي ويكفخ اللي جنبي على رأسه من ورا وبهذله مابعدها بهذله مسويها فينا ..

المهم بعد مانتهت الصلاة المفروض اسبح ربي واستغفره بس مع هالدوشه قعدت أفكر في ابو خالد اناقشه بذا الولد

اللي حايس المسجد حوسه ولا ماناقشه ..

المهم قررت اكلم ابو خالد بعد ماطلع ابو خالد ناديته تعال يابو خالد .. قلي هلا

قلت ياطويل العمر ترا هالولد ماذينا بارك االله فيك وملعفسنا لعفسه فياليت تقعده مع امه

ولاعليك امر اذا ملزم يجي اربطه عند الباب حق المسجد

طالع فيني وقال يارجال ولد صغير ولاتاخذ في خاطرك منه وانا ابيه يتعود على السمجد ..

المهم انا ماحب القرقر الكثير على قولة الباكستانيين

مشيت وانا اقول في نفسي اللي يسمعك الحين يقول بيطلع

هالولد مثل بن باز ولا بن عثيمين رحمة الله عليهم . والله مايفوت عن ابوه وان فوت فوت بيطلع على عمه ..

امزح ... الله يكتبله الخير ويارب نشوفه داعيه

المهم اليوم الثاني قلت في نفسي لو ابو خالد جاب هالولد بصفق الولد بكف واللي فيها فيها ..

دخلت المسجد والولد كالعاده شماغي يحوله خرقه ( هذي اللي يمسحو السيارات بها )

وطاقيتي يلعب فيها

طاق .. طاق طاقيه .

انتهت الصلاه وبالكاد مسكت اعصابي .

اليوم الثالث قلت مالها إلا اني اجيب ولد اخوي ولد بكبر هالولد واقوله اذا احد شال شماغي تمرس في بطنه .

المهم الولد شال الشماغ والطاقيه واسمع فيه يردد : طاق طاق طاقيه وولد اخوي الضعيف يردد معاه : ريم ريم ياجالس

انتهت الصلاة واقوم اصفق ولد اخوي بكف من حرتي كف من قوته الولد بغا يصفق في خشة الإمام

بس ربنا ستر.

المهم قلت هالولد صغير ومايفهم واجيب اخوه في اليوم الرابع هذا اكبر من ذاك بسنتين واحشي فيه حشو واقله اذا

خالد شال شماغي خذلك عصا واضربه لين يبكي قال حاضر ياعمي ... قلت كفو

المهم صليت وبرضك الولد شال الشماغ وشال الطاقيه وانا اصلي .. سمعت ولد يبكي انتهت الصلاه وبدون ماطالع

لوراي قلت يارب لك الحمد اخيرا انضرب خالد

واطالع في ابو خالد وش فيه ذا مايقوم يشيل ولده الرخمه

قلت اروح اسوي نفسي مسكين ولاني مدبر شيء

واضرب ولد اخوي واقوله عيب تضرب ولد الناس

..

واجي على الموقف قدامي ولد اخوي مضروب ووجهه يسيل دم وهذاك قاعد يضحك ... ياهوه وش الحل مع هالولد

.

المهم خرجت برا وانا اقول خلني بس القا خالد بشارع يوم لوحده ماغير اتلثم واتمرس ببطنه لين يتأدب ابوه قبل يتأدب

هووه ...

للنقاش :

تعاني الكثير من مساجدنا من مثل هذه النماذج التي تسبب ارباك للمصلين وتخفض من تركيز وخشوع المصلين ..

1- هل ترى احضار الطفل للمسجد قد ينمي ويوثق علاقته بالمسجد .

2- كيف تتعامل مع الأب الذي يحضر معه ابنا مزعجا ومؤذيا للمصلين .

3- في حال رفض الاب القبول للنصيحه واصر على احضار ابنه ماهي الحلول التي تراها لردعه والوقوف ضده ...

ها في احد ساحب عليه وباقي في خاطره شيء تروني اجبرت نفسي على اني ارد عليكم وتركت اشغالي عشان ارضيكم

واحتمال احتمال اسحب هالمره

لا .. لاتصدقون ماني بساحب عليكم لأني احبكم