موديل توب | 24/04/2008 11:21 PM | لن أعلقٌ على الموضوع كــامل .. لان لو أعلق عليه كله مستحيل أوفيه كل ( حقه ) . . . إقتباس:
مغــاط
معا ً ضد ( البربسة ) !!
تعرفون منـّول لا شغل ولا مشغلة .. وتلقانا نروح للمدرسة عشان (الفسحة) .. وكانت الوالدة الله يعظم أجرها .. إذا جاء الشتاء لـبستنا شمغ أنا و أخواني وتسانك ولدن لأبوك (فكـّه) !! فكانت تربطه بآخر قوتـّها .. تسـنها رابطه عفش يبي ينقلونه لبيت ثاني !! .. لدرجة مرة من المرات .. يوم جاء الدرس الثاني بغيت انكتم !! ما قدرت أتنفس !! صح إننا في الشتاء لكن ذاك اليوم حر !! المراد .. كان عندنا مادة نشيد وكان عندنا مدرس يبينا نلحّن غصب !! وهو عصبي وحار !! لو تقول له : ابمسح السبورة .. جلدك !! عاد أنا حبالي الصوتية مرتخية !! وإذا جيت ألحـّن كني واحد يزاعق لأهله وهم في السطح .. مشكلتي ما أدري عن نفسي !! وإذا طلعنا قالوا لي العيال يا مغاط حاول (تقصر حسّـك) .. وش فيك (تهوش) إذا جيت تلحن؟! ساكن مع صقهان أنت؟
المهم كنت أزمل لهالحصة .. ونتفق أنا والعيال (نلحنّ) في مادة النشيد .. لكن البزر هو اللي يعـّلم عيال الحارة !!
و كان معنا (سوداني بالفصل اسمه " أمجد" ولد مدير المستوصف) .. وكان ما عنده أي مشاكل من ناحية (التلحين) !! ولا عنده أي شي يخسره !! وبيني وبينكم أول شهرين ما تعودنا عليه لأننا ما ندري وش يقول !! بعدين عرفنا له .. وكان أمجد يتميّز بأن الله سبحانه وتعالى واهبه (أكبر أثم شفته بحياتي) وضروس كبار !! لدرجة كنـّا نعطيه "قصب السكر يقشّره لنا بسنونه" !!
و كنا ناخذه معنا إذا جينا نكشت .. تعرفون "فيه قواطي صلصلة وتقشير بصل وحوسة" وأمجد ما يقصّر !! و كان أمجد يعاني من ضروسه .. لدرجة دايم يطقونه في الطابور يحسبونه (يضحك في الصلاة) ما دروا إنه كذا (شد بلد ) !!
المهم ما علينا كانت (الإتفاقية) تهوّن شوي !! لأن مال أمها داعي يدرون عنك العيال (إنّك مرتـّل وإلا ملحـّن أنشودة) !! طلعت على السبورة أنا وشماغي .. أمشي بشويش من قوة الربط !! كني شايل طوفرية فيها بيالات حارّة !! و ألتفت عليهم بشويش !! وأبدأ ألحـّن وأنا مغمض .. لأنهم كاتمين الضحكة .. وأنا معرّق و اللي فيني كافيني !!
المهم إنـّي ما دريت عن نفسي .. و تحمست مع الأنشودة .. و افتـّرت رقبتي .. و انـتك ّ الشماغ على إثمي ودقني من تحت !! ولا قويت أكمـّل الأنشودة !! قاموا هالمبزرة .. وشالوني وذبوّني في المغسلة .. يبوني اتنفس .. بس ماش ما قدرت !! وهم يتشاقلوني ويطيرون بي لغرفة المدير !! وأنا وجهي مرة أخضر مرة أحمر مرة بيج .. وعيوني صفر!! ويجي (مدرّس التوحيد) الله يذكره بالخير .. كان نشيط .. لدرجة كان يتفخ سياكل عياله بأثمه !! وهو يعض شماغي يبي يحاول يفكـّه بسنونه !! لكن " هيهات" !!
وهم يحاولون .. واللي يقول لهم : يا جماعة دقـّوا على الدفاع المدني !!
ويطلع لي وجه أمـّي وهي مدخلتني بين رجلينها .. وتربط شماغي بكل حيلها !! وأجي وأرفع أصبعي السبابة .. أبتشهد لأني حسيت إني احتضر !! وأسمع " تش تش تشششش " وأثر الفرّاش جايب .. بخـّاخ صدأ .. و (سبانه .. وأبو جلمبو) !! وحاولوا بالشماغ .. و أبشرّكم انفـّك !!
ومن ذاك اليوم وأنا عندي عقدة من الأناشيد ومن (اللطمة) !!
المهم طلعنا من المدرسة .. على أساس إن عندنا مباراة نهائية مع حارة ( السلنتح ) ..
ومقررين نجتمع عند البقالة الظهر .. عشان نرسم الخطة .. اللي من عرفت نفسي .. وهي تعال مسرع وأطمر الكورة والثاني يمزعها !!
رحت لم البيت .. وأنا رقبتي لافـّه .. وصاير شكلي كني واحد يقول : خير ؟!!
يعني صاير شكلي كني واحد ( يناظر مع عين سحرية) !!
و جهه أرفع من الثانية !! وآثار الروعة إلى الحين ما بعد راحت !!
وكان كفر سيكلي منفقع .. المهم انسدحت بجنب السيكل لأني ما أقدر أشوفه وأنا (سيده) لازم ألـّف معه .. فكيت الكفر وطلعت اللستك .. وجبت (المرقعة) .. ورقعت الكفر وركبته وقلت إذا جيت متغديّ ربطت (الصواميل) !!
توني قاضي متغدي .. إلا وعيال الحارة عند الباب ( يصفـّرون) و (يزاعقون بطريقة كنهم بواري هواء) .. غسلت و لقطت السيكل وطلعنا !!
و أطلع عليهم أنا ورقبتي ماسك سيكلي !! وفاصخ نعالي وحاطهّـن وراء باب الصالة عشان ما يتوصخهن !!
و انطلقنا على شكل موكب .. المهم بدوا العيال يرفعون (غزالة) بسياكلهم !!
وكان عندنا نظام أي واحد يسـّوي شي لازم (نسايره) ونسـّوي مثله !!
تونـّي آخذ عزم عشان (أرفع غزاله ) .. و اذكر إني (ماربطت صواميل الكفر) !!
وهو ينطلق (الكفر) قدامـّي بمترين !! وأنا ماغط بسيكلي !! والعيال اللي وراي يقولون ( يؤ يؤ !! ) واللي يقول : عزّ الله تزلـّغ وجهه !! وأنا أقاوم وأقاوم !! وتتلخبط خلايا المخ !! وقررّت اتجـّه لـ أقرب (عتبة باب) أهون علي من إني اتكرفس في هالقار !! وأنا أعقد النيـّة واتجه لعتبة باب الناصر !! ويلـّخ ملقاط سيكلي حافة الدرجة .. ولو (بابهم مشّرع) كان ماردتـّني إلا صالتهم !!
المهم مع الطيحة ما عاد أدري وين أنا به .. ومن الوجع ودّي أصيح !! بس العيال حولي !! ولا أقدر !! و يتعفط سيكلي كن (تكر) منبرش عليه !!
ويجيني التواء بالرجل .. عاد منوّل ما عندنا شي اسمه التواء .. يا يجيك (كسر) يا خل عنك الخراط الزايد !!
وكان في الحارة واحد يسمونه (أبو رشيد) .. كان أخو (مدرّس التوحيد) !! وكان أنشط من أخوه .. لدرجة إذا جاء يشيل غنمة .. مسكها مع شعر ظهرها .. كنه شايل شنطة (لاب توب) !!
وكان بنفس الوقت " طبيب شعبي" المهم نص العيال شايلين سيكلي !!
ونصهم شايليني ..
و ودّوني لمه !! ويوم وصلنا بيته .. ونقعد نصّوت له .. عاد عيال الحارة .. والله من قل الدبرة !!
وهم يصوتون له : أبو رشيد افتح معنا (صويب) !! <<-- أما صويب .. اللي يشوفهم يقول مطعون بمعركة الشنانة !!
المهم صار عنده واحد يقلع ضرسه .. قال لنا : اصبروا !! و حنـّا نحتري دورنا .. شوي إلا يوم دخل علينا (أمجد) معه (كفري القدّامي جايبه من الحارة الثانية ) !!
جاء أبو رشيد .. قال لي : سلامات ؟! قلت لا والله شوي صادم <<-- من قوّ الوجع ما عاد قدرت أجمـّع !! كل هذا والعيال شايليني .. قال لهم : نزّلوه نزلوه !!
نزلوني .. وهو يقعد يناظر رجلي !! قال لي ذي رجلك ؟!
قلت : لأ .. ذي رجل أخوي !!
قال : يا أخي أقصد .. ذي الرجل اللي توجعك؟!
قلت أيه !! المهم .. جاب (فـص بصل "فحل بصل") مطبوخ !! و قربّ الدافور !!
قلت أنت تبي تعالجني وإلا تبي (تسوي شكشوكة) ؟!
قال : اقطع وأخس .. ألين أقضي !!
المهم ويفرك رجلي بـ(فص البصل) !! ويدهن ساقي !! وينادي (أمجد) .. وياخذ قطعه من سرواله ويربط رجلي !! قال لي يومين إن شاء الله وترجع رجلك مثل أول !!
طلعنا منه .. وركبت مع "أمجد" ورجلي مربوطة .. وانطلقنا للملعب !!
يوم وصلنا قالوا (السلنتح) !! وش فيكم أبطيتوا !! قالوا العيال: مغـّاط صادم عتبة !!
قالوا طيب يبي يلعب وإلا لأ ؟!
عاد ما فيه " مهاجم إلا أنا " !!
قلنا طيـّب وشرايكم نؤجل المباراة لـبكرة .. وترا ما عندنا شي ولا عندكم شي !!
و ياما أجلـّـنا لكم مباريات !! آخرها يوم يخرب ددسن أبوكم !! ويوقف بنص الملعب !! وجينا ندفـّه لقيناه ساحب الجلنط و حاطـّه بالأول !! وأجلـنـّا المباراة !!
وأثر معهم واحدن بثر .. يسمونه " خالد الضاطور" !! راعي (بسطة) و(كل مباراة يجيب قدر بليله ) ويبيع عند الملعب !! ومستغل مبارياتنا بـ (تسويق بليلته) !!
قال لنا : معصي !! تقام المباراة في وقتها .. يعني تقام في وقتها !! وش علينا منكم !!
قلت لهم : مهيب مشكلة يالضاطور !! دامك مصّر .. نبي نلعب المباراة بوقتها ونبي نوطى جبهتك أنت وبليلتك هالمخورة ( مخورة : يعني كنها ريحة شغالة توّها جايـّة) !!
المهم وحنـّا نتناقش معهم .. ونلتفت على (أمجد) لقيناه يحاول يعدّل ملقاط سيكلي بسنونه !! يوم شافنا نناظره استحى .. وتركه !! و أمجد يصلح يشتغل أي شي !! ميكانيكي !! فوّال !! يليـّص عماير !! لكن (كورة) ما به أمل!! لأنه ما يعرف إلا (حركة وحدة) حوّم تسبودنـا بها !! ولا من زين الطبايع ما قد سوّاها صح !! قلت له شف يا أمجد !! مخابطك .. وتفلسفك ما نبيه !! وياليت هالنشاط اللي بـ(خشك) صاير برجليك !! أقل شي نطلع منك بفايدة !! و تراك تبي تلعب بدالي .. رأس حربة !!
المهم لعبنا المباراة .. وقدرنا " نعلـّم الضاطور" إن الله حق !! ولأننا نلعب عشان (الحارة) واسم (الفريق) !! قدرنا (ننتصر) !!
ما يستفاد من القصة !!
- فيه بعض الناس .. أمثال ( الضاطور) ما ودّك تدخل معهم بنقاش ( ودّي) أبد !! لأنهم مهمب كفو !! فالتحاور معه لابد يكون (بشكل رسمي) !! عشان إذا (طوّل لسانه) مرة ثانية .. دسّينا خشته في (قدر بليلته) !
- مشكلة فريقنا في (البديل الجاهز) في بعض المراكز !! و وجود (أمجد) في الفريق أكبر غلط !!
|
بصراحه مقالات مغاط أكثر من رائع تجمع بين الجديه والسوالف والضحك الخ .. << متعوب عليها .. :d
بصراحه أنتظر موضوع صباح الخير ياهلال ... متشوق لـ مغاط وسوالفه المميزة .. والهادفه
ياليت يوصل مغــاط سلامي الخاص والحار بالاعجاب به وبـ مقالاته .. ( سوالفه )
Mr.GoaL
كل الشكر لك والتقدير والحب والمودة على العمل المميز الذي قدمته لنا كـ جمهور هلالي
محب لهذا الكيــان .. ونتمى من الله عز وجل التوفيق لك .. إقتباس:
متى تتوقع راح نلقى نصراوي عاقل؟
( مشاركة من العضو : نـعيــم )
إذا جبت لي ( لبناني "خال" ) جبت لك ( نصراوي عاقل ) !!
| بصراحه فطست عليه ضحك .. من جد أنت روعه مشاء الله عليك
واحب أبارك للاعضـاء المميزين أو المبدعين ... http://upload.alhilal.com/img/013/qqwq%20(35).jpg
الامير بندر بن محمد يقول لـ جمال أبوعمارة
تصدق توني متصل على الاعب الخفي ويقول الحمدلله أنا ساري المفعول ..
والبلوي يقول لـ جمال أبوعمارة قوله منصور البلوي راح يفاوضه ويربح الصفقه :d إقتباس:
قدّم لكم هذا العمل ..
algohmani
الظــاهـرة
مغـاط
الهاديو
هلالي من ارض اليمن
الـــذيـــب sami
™£ابـو شـوشـن£™
المصمم : "(( الزعيم ))"
المصممة : |[ big heart ]|
نيوتن
|
عمل أكثر من مميز جداً
كل الشكر لكم
ويعطيكم ربي ألف عااااااافيه
ودمتم في حفظ الله .. |