#1  
قديم 12/04/2008, 11:24 PM
الكاتب الساخر
تاريخ التسجيل: 19/06/2006
المكان: Najd
مشاركات: 1,022
Cool متوترين ؟! ( تعالوا ننبسط لا أبو أبو أبووو من يضيّق صدورنا ) !!

من باقي ما (قط َ) ؟!

ترا أي واحدن ما دفع القطـّة .. وإلا جايب(ن) قطته ناقصة !! وحاول يدخل الملعب حتى لو إننا ما حناب فيه !! نبي نحش رجلينه حش !! تقط تلعب !! ما تقط أقلب وجهك !!
.
.
.

السلام عليكم ورحمة الله وبركاته .. يا حيّ الله الزعماء .. حبيت في هالموضوع ( أسلّط الضوء على ثلاث محاور ) .. وديّ نسولف أنا وإياكم .. ونطلع عن " جو الشحن النفسي " و " التوترات اللي تصاحب النهائيات " !! وترا (الدنيا ما بها شيء يستاهل ) !! هاه نبدأ ؟!
.
.
.
.
كان فريق حارتنا مرصّع ترعيص مهوب طبيعي بالنجوم .. و كان المسؤول عن الفريق واحد ينقال له ( أبو سعد ) .. طبعا أبو سعد ما في راسه كورة !! وكان قصير لدرجة إنه يقدر يحكّ ساقه وهو واقف !! وهو الوحيد اللي معه بيجر !! والله يا هو ذلنـّا في هالبيجر اللي معه !!
وكان عندهم (جمس صحن "يعني له صندوق"<<-بالله؟ ) !! وهذا هو السبب اللي عشانه خليناه مسؤول الفريق وإلا هو موب كفو لا هو ولا بيجره !!


فكان إذا صار عندنا مباراة ( إياب) مع حارة ثانية .. قطـينا نعبّي له بنزين .. وركب (هو ) و (كابتن الفريق " صمدو " ) و (مهاجمنا : سعود الدرو ) في الغمارة .. و قفلوا عليهم البيبان وسكّروا الدرايش .. وقاموا يأشرون لنا (يعني يالله اركبوا بالصندوق) !! وركبنا بهالصندوق !! وطاروا بنا إلى الحارة الثانية .. إذا وصلنا للملعب وأثر أسلم واحد بنا فيه (322 صعرور) !!

طبعا (المهاجم سعود الدرو ) له عم ّ في الإمارة .. و كنا متهاوشين عليه .. والحارة اللي ورانا يقولون (سعود الدرو ) تبع حارتنا !! وحنا نقول لأ !! لأن " باب الرجال " واجهته على حارتنا !! وهم يقولون لأ !! لأن كيلون باب الرجال أصلا ضايع .. وسعود وأهله ما يطلعون إلا مع (باب الحريم) اللي يطلّ على حارتنا .. وجبنا (لجنة محايدة ) وكان معهم واحد يقرأ جرايد و معه قلم حبر في مخباته القدّامية !! فقال لنا : كان سعود .. هو اللي مضيّع مفتاح باب الرجال .. فهو بكذا يحاول (يلوي ذراع القوانين ) ويحاول التمرد !!
وكان المفتاح ضايع من نفسه !! فهو يعتبر من حارتكم ؟!
وجبنا سعود .. و (حلف) لـ اللجنة إن ماله دخل في ضيعة المفتاح !! وأخذوا أقوال سعود !! وخلوه يبصّم بأصابع رجلينه لأنها أنظف من يده !! وقررّوا إنه (تبع فريق حارتنا ) !!
هو تسانكم تبون الجد ؟! لعبه تسنه وجهه .. لكن عليه (رجل) وظفور بحياتي ما قد شفت مثلها !!


المهم كنـّا (نفـّرق) يوميا بملعب الحارة .. وكان ملعبنا أطلق ملعب في الديرة .. وكان (أبو سعد راعي الجمس ) هو مسؤول الفريق .. وهو اللي ( يجمع القطه ) ..
فكنا ( محددين الأوت بنعال متقطعات ) وحاطين في (الكورنر) عصيان مكانس .. بزعمنا (راية) !!
وكنا شارين لأبو سعد (طاولة) نفس حقة (الحكم الرابع) .. ومن ضمن (بنود القطة ) :
لازم نشتري (صافرة ) للحكم !!
وكورتين جلد !!
وشبكة للملعب !!
و نعبي له بنزين بخمسة لكل مباراة !!
وجالون زيت .. عشان نحط (نقطة البلنتي ) عشان ما يكثر (الاختلاف حول تحديد مكان ضربة الجزاء ) .. واللي يبقى من الزيت .. نسوي به ( دويّرة ) ينقال لنا .. نقطة السنتر !!

وكان أبو سعد بثر !! وكم مرة أفكر .. أمسكه مع شعره وآخذ به لفة على الملعب .. وإلا (أطقـّه الين يعض الأرض ) .. بس أتعوذ من ابليس واتركه .. لأنه (قصير ونفخة ) .. وكان أبوه يقول يومه كان صغير كانوا ( يمهدونه بـ شرّاب العائلة ) ..


المهم كان (أبو سعد ) هو :
الحكم !!
وهو اللي يمسك القطه !!


وهو اللي نحط عنده (العهده) اللي تتكون من : ماصته !! والكرسي حقه !! والـ(صفيرة) !! وعسيب !! و قطعتين كرتون (أصفر وأحمر) ينقال لنا : كروت حكم !!

طبعا كان يحكم وهو جالس على الماصة !! من قوة (الميانة ) علينا !! وقد عارضناه وقلنا يا أخي يا إنك تصير رجال وتقول تحكّم زي الناس .. يا جب (عهدتنا ) وضف وجهك !!

قال : أقول لا يكثر أنت وإياه لا أخليكم تروحون المباراة الجايّة (رجلية ) للحارة الثانية !!
فنسكت ولا نناقشه !!


وكان ما يجي للملعب إلا الين ندق عليه بيجر !! لأن (الكورة والعدّة كلها عنده ) !!
ومرة دقينا عليه ولا جاء .. ورحنا لمه في البيت .. ينقال لك مسويّن مظاهرات ..
قال لنا : أنا قايلن لكم .. إذا دقيتوا حطوا لي تحويلة ( 999 ) عشان أدري إنه انتم !!
وفعلا غلبنا بالحجة .. لأننا ذاك اليوم ما حطينا له بالبيجر تسعات ..


طبعا أقول لكم (كان حاط عنده على الطاولة عسيب ) .. وكنـّا مستحدثين قانون !!
أي واحد يكسّر مرتين وهو (متعمّد) !! ينجلد بالعسيب !!


واذكر مرة من المرات .. جانا واحد (من الرياض) .. طبعا كل فريقنا (حافين ) وكان (عيب نلبس كنادر) .. المهم إن هاللي جاي من الرياض طاق كنادر وتكميلة .. ومتكشّخ !!
وكان هو الوحيد اللي يسوّي تمارين إحماء على الملعب !!
لدرجة (سعود الدرو ) غار منه !!
ويوم بدت المباراة .. بدت المخاشنات بينه وبين (هاللي جاي من الرياض) ..
عاد (سعود عليه أظافر) لدرجة يوم خلصت المباراة (لاقين آثار أظافره في كنادر خويـّنا ) !!
المهم إن هاللي من الرياض ما أعجبته خشونة (الدرو) ..


فالتفت على (أبو سعد ) .. وقال هيه أنت ( يالمطـّارة) " حكّم زين " !!

يوم درينا مار يقوم من (طاولته) !! ويمسك (العسيب ) قال : تعال تعال تعال !!

وحنا كلنا ( نصفقّ ومبسوطين ) اللي يشوفنا يقول : نناظر تمثلية الحلقة الأخيرة .. ما أدري ليه (ننبسط إذا جاء أحد ينطق ) !! ونتجمع حول (ماصة أبو سعد ) .. وماسكين (اللي من الرياض) لأنه نفخ على الحكم !!

قال أبو سعد : أفتح يدك عشان أعلمّك من هو (المطارة) !!
قال اللي من الرياض : والله ما أفتح .. و إن طولتها .. تراي أباخذ هالعسيب و (أوسم) جبهتك فيه !!
وحنا نقول للهرياضي !! يا ابن الحلال !! (افتح يدك خله يطقك ) مهوب ( مكوّد) ما عليك !!
وأبو سعد .. يقول إلا أبكوّد ونص !! (أكوّد يعني أموسرك بقوة <<-- بدون شرح أوضح) !!
لا حووول ولا قوة إلا بالله !!

المهم كبرت السالفة !! قال سعود الدرو : عندي رأي .. نوديّه (للجنة المحايدة) .. وركبنا "هالرياضي" في الجمس .. ووديناه لبيت " خوينا اللي حكم في انتماء الدرو إنه يصير ولد حارتنا " !!
المهم وصلنا بيت (الرّجال) .. وقام سعود الدرو (يطق بأظافره) !! والصوت قوي كنه واحد يطق الباب بحصاة !!
المهم .. طلع علينا ذاك لابس فنيلة علاق وسروال .. و حاط جريدة بأبطه .. ومعه كاس حليب أبو قوس !! أنا ما أدري وش هالجو !! حر !! وعصر !! وحليب أبو قوس !!
فـ علمناه السالفة !!
وأبو سعد .. من قو البطرة اللي فيه .. ما نزل من الجمس .. وقال لنا (تشهدون قلنا ايه) ..


قال لنا (الرّجال) : خلاص أنا أحكم في الموضوع .. انتم روحوا كمّلوا لعبكم .. وما يصير خاطركم إلا طيب !!

رجعنا للمعب .. وكملنا لعب .. يوم جلسنا ربع ساعة ( رجع خويـّنا اللي من الرياض) ..
وهو ( متكتف) و يتعبّر فيه (الصيحة) .. قلت له : عمى وش بك ؟!
المهم : فتح لي ( يده ) !!
وأشوف في يده .. 43 43 43 43 43 43 43 43 43 <<-- صار "الرّجال طاقــّه مع يده بنعله مقاس 43 .. وطبع الرقم بيده" !!

وإذا تبون (الجد) أحسّ إنه مظلوم .. ترا أبو سعد بثر ويحوم التسبد !!
و إذا دق بيجره .. صفـّر ووّقف اللعب !! عشان يشوف من (داق) !!
فما يصفي لنا (إلا يمكن نص ساعة لعب ) والباقي جالسن يضغط فيه بيجره!!

و اذكر كان عندنا مباراة نهائية .. و احتجوّا الحارة الثانية على (أظافر الدرو) وقالوا : يا يقصصّ أظافره يا ما يلعب !!
قلنا من وين نجيب : مقص ظفور الحين؟!
قالوا هذي مشكلتكم تصرفـّوا ..
وبعدين وش هالمقص اللي يبي (يقصص) أظافر " الدرو" !!
المهم جبنا زرادّية وعفطنا أظافره وكملنا المباراة !!


وكان (أبو سعد ) مسوّي فيها إداري محنّك !!
وكان يسجّل أسماءنا .. ومعلومات كامله عن الفريق :
مثال :

الاسم : مغاط .. الوظيفة : طالب ومتسبب بعد العصر <<-- مدري وشلون تجي!!
العمر : في بيت طين في مزرعتهم اللي في الظلع !! ملاحظات : قد صفـّر بأصبعه وهو يأذن !!


الاسم : سعود الدرو .. الوظيفة : ولد حارتنا !!<<-- يخافون يموت "راعي اللجنة المحايدة ويصير تبع الحارة الثانية " ..
العمر : أكبر من مغاط بسنه .. ملاحظات : قد مزع الكورة مرتين .. وعيـّا يجيبها !!


الاسم : صمدو .. الوظيفة : كابتن الفريق ويأذن بدال أبوه إذا سافر ..
العمر : 25 رجباً <<-- لا تشرهون " على أبو سعد .. يحب التجديد " !! ملاحظات : قد شات الكورة ووطتها سيارة وانفقعت ولا دفع دراهمها !!


ما يستفاد من القصة !!

إن هالضعيّف اللي من الرياض !! جاي ويبي يلعب كورة (أنيقة ) .. ما درى إنه يبي يطيح (بسعود و أبو سعد .. وغيرهم ) ..
وقدروا ( يطلعّونه من طوره .. ويكسبون اللي يبون ) !!
لذلك (النرفزة الزايدة ) وعدم (فهم الخصم جيدا ) تجبرك "إنك تقع في مشاكل أنت في غنى عنها " !!



واعتذر بقوة على الإطالة !!



يالله اطمروا معي للجزء ( الثاني ) .. <<-- ريّض أبو الشباب !!
  #2  
قديم 12/04/2008, 11:26 PM
الكاتب الساخر
تاريخ التسجيل: 19/06/2006
المكان: Najd
مشاركات: 1,022
Cool

برايفت لـ ( الجمهور الأزرق ) !!


- سنكون ( مؤمنين ) بالقضاء " خيره وشرّه" !!
وسنصادم ( كل الضغوط التي ستواجهنا ) !!
وسنكون ( خصما عنيفا ) في مواجهة " الأحد " !!
و ستصطدم ( طموحاتهم ) بـ ( هتافاتنا ) !!
وسترهبهم ( تلوحيات أيادنيا ) !!
وسيقلقهم ( ضرب كفوفنا ) !!
وستوهن قواهم ( نبرات حناجرنا ) !!
وسنعلي الصوت !!
ولا صوت ( يعلو) على صوت (الزعماء) !!
وسنمطرهم بـ وابل ٍ الصفقات " المتلاحقة " !!
لن ( نصمت ثانية واحدة ) !!
ولن نهدأ ( لحظة ) !!
وسيمزّق (لحن أهازيجنا .. كل آمالهم) !!


وسنكون ( زعماءا ) في " طريقة ولوجنا للملعب و انصرافنا منه " !!
و سنكون ( سفراء ً لموطن الزعماء ) !!

وسنواجه كل (الألفاظ النابية ) !! بابتسامة ( مسلم ) !!
و سنقدم لهم ( درسا ً ) في " المنافسة الشريفة " !!

فستستقبلنا " بوابات الملعب " .. وقلوبنا (متعلقة بمن خلقها ) !!
وثقتنا به ( أكبر من كل ما نملكه من " شوارد الفرص" ) !!
وستردد (أفواهنا ) !! ونعم بالله !! ونعم بالله !!

وستكون (سلاح الانتصار ) !!

لن نلتفت لإساءاتهم !! ولن نلقي لها بالا ً !!
فـ (المقصد ) ذهبا !!
و (المتفضل) ربــّا ً !!



فسأخذ " مقعدي " بين الزعماء ..
تاركا خلف ظهري ( كل الانفعالات الصبيانية ) !!
وكل ( التصرفات الحمقاء ) !!
التي لا تعكس (واقعا ) !!
ولن تجدي ( نفعا ) !!


وسأصرخ ( فرحا وشكرا لله .. على منـّه ) !!
إن أهداني (ذهبا) !!

وسأبتسم .. كاتما للغيظ .. منيباً له .. في غير ذلك !!


-----------------------------------------------


برايفت ( لزعمائنا اللاعبين ) !!


مررنا ( بظروف ٍ أسوأ من تلك الظروف )
واجتزناها " وعين الله ترعانا " !!


و كم حاول "المستذهنون " (النيل منـّا)
فكان الرد " بحجم انتقاصاتهم " !!



سنغرس رؤوسنا بـ (قطن وسائدنا ) ..
(والتوكل رداءا يغطينا ) !!


وسنقوم من (سباتنا ) ..
و ابتسامات الرضا .. ترتصّ حول شفاهنا !!

وستبدد ( ثقتنا بالله ) كل "مخاوف ٍ تعترينا " !!


وسنستقبل ( قرارات الحكم )
بـ " رباطة جأش " !!
و " كياسة عاقل " !!

وسنواجه (مخاشناتهم .. و "انفراط تصرفاتهم" )
بـ (هدوووووء الزعماء ) !!
ولن " يخرجونا عن طورنا " !!
ولن " تكون ألفاظهم وتصرفاتهم " عائقا لملامسة الذهب !!
ولن " يستطيعوا أن يستدرجونا لـ كمين مكرهم" !!

وسنكون ( صدى ً يردّد صهيلكم ) !!
وسنحاكي ( شراستكم في الملعب ) !!


وستفرحون !!
وسنفرح !!

وستظفرون !!
وسنبارك !!


وستشكرون !!
وسنشكر !!
  #3  
قديم 12/04/2008, 11:28 PM
زعيــم فعــال
تاريخ التسجيل: 20/04/2006
مشاركات: 221
مشاءالله متميز كالعاده
ننتظر جديد
وانشاءالله تنزل موضوع بعد المباراه تبارك

اخر تعديل كان بواسطة » @@بوعبدالله@@ في يوم » 13/04/2008 عند الساعة » 12:15 AM السبب: اذا صرت (هلالي ثنياني) تعال تكلم هههههههههه امزح
  #4  
قديم 12/04/2008, 11:28 PM
الصورة الرمزية الخاصة بـ ALAMEER 14
زعيــم مميــز
تاريخ التسجيل: 08/06/2007
المكان: ....
مشاركات: 1,949
وعليكم السلآم . .
.
.
مغـاط :
إن هالضعيّف اللي من الرياض !! جاي ويبي يلعب كورة (أنيقة ) .. ما درى إنه يبي يطيح (بسعود و أبو سعد .. وغيرهم ) ..
وقدروا ( يطلعّونه من طوره .. ويكسبون اللي يبون ) !!
لذلك (النرفزة الزايدة ) وعدم (فهم الخصم جيدا ) تجبرك "إنك تقع في مشاكل أنت في غنى عنها " !!

.
.

مآشآء الله عليك يا مغاط . . وصف رآئع ( لكن ) نتمنى انه ما يحدث في مباراة الغد بالنسبه

للاعبين الهلال . . وبإذن الله جميع اللاعبين يكونون في الموعد

وأهم شي عزيز يحّجر لنور . .

.
.
مغاط :

وستفرحون !!
وسنفرح !!

وستظفرون !!
وسنبارك !!


وستشكرون !!
وسنشكر !!

.
.

بإذن الله راح تكون البطوله هلآليه . . يااااربـ

.
.

مغـاط . . الف الف شكر على الموضوع اللي أقل ما يقال عنه رآآآآئع . .

ورده

اخر تعديل كان بواسطة » ALAMEER 14 في يوم » 12/04/2008 عند الساعة » 11:53 PM
  #5  
قديم 12/04/2008, 11:37 PM
الصورة الرمزية الخاصة بـ abusaud
مشرف الأخبار في البوابة العربية
بالموقع الرسمي لنادي الهلال
تاريخ التسجيل: 16/03/2005
المكان: الرياض
مشاركات: 12,428
مغــاط والله انك فــله .. بـ انتظــار موضوعك بـكره ان شاء الله والهــلال محقق البطــوله

الف شكـر مره اخـــرى
  #6  
قديم 12/04/2008, 11:38 PM
زعيــم مميــز
تاريخ التسجيل: 28/02/2007
المكان: الرياض
مشاركات: 1,870
وربي تشبيه وتمثيلات قمة بالروووعة والله انك مبدع ماشاء الله عليك ..

والله يوفق الزعيم غدا وان شاء الله يقدم المستوى والنتيجة اللي تشرف فيها النادي الاميز بالقارة الاسيوية ..

وبالتوفيق للهلال ..
  #7  
قديم 12/04/2008, 11:40 PM
زعيــم نشيــط
تاريخ التسجيل: 27/05/2007
مشاركات: 517
قروووش<<<<<<< هذا العضو منسدح وميت من الظحك



الله يرجه تكفى ابي اشوف ابوسعد احس انه بثررر ودي اشوف بيجره عساه يستاهل ولا نوعيته زينه


واكيد ان لك معرفه لين اللحين بأبو سعد تكفى في الجزء الثاني قلنا يوم شرى جوال وش سوى


ووين وصلتبه الدنيا اللحين


والله حبيت ابوسعد .... واحسنت والله في الطرح كني اتخيل المشاهد امامي وانا اقرأ والله ضحك ضحك


بس اما اظافر تقصونها بزراديه خاف ربك يارجال


الله يوفق الزعيم غدا ياااااااااااااااااااااااااااااااااااااارب
  #8  
قديم 12/04/2008, 11:41 PM
الصورة الرمزية الخاصة بـ هلالي ثنياني
مشرف سابق في منتدى الجمهور الهلالي
تاريخ التسجيل: 15/01/2002
المكان: جـــــ 15 ــــدة
مشاركات: 14,273
هلا مغاط..

عشان محد يلومني يوم أسم هالآدمي (ثنيان المنتدى)
هذا هو يوسف الثنيان في حضوره (المختلف) وتأثيره (الواضح) نفسيا وأدائيا


يكتب هزل.. فيجبر الجميع على التصفيق (ضحكا) و (طربا)
ويكتب جد.. فيجبر الجميع على أن يقولوا (صح لسانك.. وسلم بنانك)

يحضر قبل الحسم.. فيخرجك من جو المباراة وينتشلك من الشحن النسي إلى أعلى قمم التفاؤل
ثم يعيدك متفائلا إلى عمق أجواء المباراة فتستشعر الفوز قبل وصوله


مغاط القلم الأبرز.. صاحب الحضور الطاغي

قرأت موضوعه وأقولها بكل صراحة.. ضحكت حتى ملأت البيت ضحكا
وبرغم ذلك ازعم أنني لم أفوت صواريخه المرسلة من تحت الحزام تجاه لجان المسابقات لدينا ومنظمي البطولات
فأبو سعد ليس بعيد عن العبدالهادي.. فمثلما أن ابو سعد عنده الكورة والصافرة والطاولة ووووو كل شي فلدينا العبدالهادي عضو في جميع لجان اتحاد الكرة
والشخص حامل الجريدة الذي حكم بينهم يذكرني بشخص لانراه الا بعد ان يطلب وتشتعل النيران برغم وجوب تواجده دائما وحتى احكامه مجرد (تصريف) وكأنه يقول (خذوا هالحكم بسرعة.. بس فكوني منكم خلوني ارجع لجريدتي)


شكرا مغاط وان شاءالله أكون اول المباركين لك
فلك دور كبير في تحقيق الفوز هذا المساء اذا تحقق بمشيئة الله

اخر تعديل كان بواسطة » هلالي ثنياني في يوم » 13/04/2008 عند الساعة » 10:16 AM
  #9  
قديم 12/04/2008, 11:44 PM
الصورة الرمزية الخاصة بـ الزعيييييييييييييييم
زعيــم مميــز
تاريخ التسجيل: 24/06/2005
المكان: شبكة الزعيم تكفيك"وزيادهـ"
مشاركات: 15,370
بكل بساطه دخلت الموضوع لان الكاتب هو المبدع مغاط ..

ماكلمت قراية الموضوع لكن الى حد ماقريته فهو ابداع ..!!


ان شاء الله لي عوده لاكمال ما قرأته ..
  #10  
قديم 12/04/2008, 11:52 PM
زعيــم متواصــل
تاريخ التسجيل: 30/05/2007
مشاركات: 131
موضوع رائع
أجل جمس بهبهاني ؟؟؟
مغاط كني عرفتك
أنت أي حارة؟؟
أنا من حارة أبو رمش
  #11  
قديم 12/04/2008, 11:53 PM
موقوف
تاريخ التسجيل: 29/08/2007
المكان: السعودية
مشاركات: 591
الله عليك يامغاط مبدع ماشاء الله عليك مواضيعك دااااااائما راااااايقة .... تحياتي لك
  #12  
قديم 12/04/2008, 11:55 PM
زعيــم مميــز
تاريخ التسجيل: 07/12/2006
مشاركات: 2,232
ملك الكوميديا بالشبكة بلا منازع

والله قشعر جلدي من سالفة الاظافر والزرادية!!
  #13  
قديم 13/04/2008, 12:04 AM
زعيــم مميــز
تاريخ التسجيل: 08/11/2005
المكان: شايفني اتهادي ؟؟
مشاركات: 3,835
جزاك الله خير يالله اروح انام عشان اصلي الفجر لعل الله يجعلنا ناخذ البطولة ولا اكون سبب في عدم كسبها بذنبي
  #14  
قديم 13/04/2008, 12:07 AM
الصورة الرمزية الخاصة بـ فن كروي
زعيــم نشيــط
تاريخ التسجيل: 29/09/2007
المكان: نجد
مشاركات: 632
اذا كانت القصة حقيقة فقد أتقنت و صفها بشكل خيالي
و ان كانت القصة خيالية فقد أبدع خيالك بوصفها كما لو أنها حقيقة

باختصار ابداع ما بعده ابداع من مغوطي ===> اسم الدلع هههههههه
  #15  
قديم 13/04/2008, 12:09 AM
زعيــم مميــز
تاريخ التسجيل: 20/08/2005
المكان: تحت أقدام أمي
مشاركات: 3,319
وسنكون ( زعماءا ) في " طريقة ولوجنا للملعب و انصرافنا منه " !!
و سنكون ( سفراء ً لموطن الزعماء ) !!

المهم كبرت السالفة !! قال سعود الدرو : عندي رأي .. نوديّه (للجنة المحايدة) .. وركبنا "هالرياضي" في الجمس .. ووديناه لبيت " خوينا اللي حكم في انتماء الدرو إنه يصير ولد حارتنا " !!

^^^^^^^^^^^^^^^^^^^^^^^^

وين ركب بالصحن ولا بالصندوق ؟؟؟؟؟؟؟؟؟؟؟؟؟؟؟؟؟؟؟؟؟

ههههههههههههههههههههههههههههههه ياحبي لك




وسنواجه كل (الألفاظ النابية ) !! بابتسامة ( مسلم ) !!
و سنقدم لهم ( درسا ً ) في " المنافسة الشريفة " !!

فستستقبلنا " بوابات الملعب " .. وقلوبنا (متعلقة بمن خلقها ) !!
وثقتنا به ( أكبر من كل ما نملكه من " شوارد الفرص" ) !!
وستردد (أفواهنا ) !! ونعم بالله !! ونعم بالله !!

أنـــــــــــــــــــــــــــــامل من ذهب ماشاء الله لااله الا الله
   

إغلاق الموضوع

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 06:49 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube