كل منا يريد ادارة وقتة

ولكن امر تنظيم جدول ووضع مهام صعب تنفيذة

لأننا جبلنا على الفوضى او هكذا اخترنا ان نكون فوضويين نؤدي العمل ولكن بفوضى

صحيح اننا نخرج بنتايج احيانا ولكن لو نظمنا وقتنا لكانت النتايج أفضل او على الأقل أسرع

تنظيم جدول تقييد ونحن تعودنا على عدم حب التقيد بشيء

بنت الزعيم

الف شكر لك والله يعطيك العافية

بعد التحية ,,

الوقت وما أدراك مالوقت ؟!

من سيوقظنا من سباتنا ليخبرنا بإننا في حاجة لإستغلال أوقاتنا فيما يعود علينا

وعلى من حولنا بالأجر والفائدة ,,

وأننا بحاجة لإن نتغاضى عن سفاسف الأمور ونتوقف عن إشغال أوقاتنا بالتوافه !!

فكل لحظة من أعمارنا تمضي دون أن نستغلها الإستغلال الجيد ماهي الا أوقات مسروقة

ونحن مسؤولون عنها !!

فأيامنا تمضي مودعة السنين ونحن نمضي معها ,,

ويبقى السؤال الأهم ..

ألم يحن الوقت لنرتقي ؟!

~ بنت الزعيم ~

بحجم مكانتك في قلبي ياغالية شكراً لك ِ ,,

.




خالد الغرام
يا هلا فيك اخوي الكريم
آميـن وإياك ورده .. و ردك الاجمل جداً جداً << ما تقلد

إقتباس لاني باختصار ادربي دميجتي لاتنظيم ولا هم يحزنون

مو بس انت طال عمرك كلنا حياتنا ميب منتظمه

إقتباس المشكله كل شئ سهل والله بس يبي جزم

صدقت حنا لو نبي نغير و ننظم حياتنا الفوضويه راح نقدر
بس حنا ما عندنا إصرار على التغير للافضل

إقتباس ابضبط وقتي بس اقول ياولد استانس الحياة ماتحلى الا بالفوضويه

وش يقرب لك اخوي << نفس كلامه لا يكون صديقه وانت اللي اقنعته بهالشي

إقتباس ويقعد يطلع من سيارته دفتر ويقعد يطالع فيه قال خلاص اوكي بكرى نطلع

ايه هذولي الناس اللي خايفين على و قتهم من الضياع اللي ماله فائده
موب حنا لا قالوا لنا مثلا يالله السوق نروح على طول نروح ولما نرجع نتذكر
اننا نسينا نخلص شغله أهم من روحه السوق << ويا كثر ما صارت لي

إقتباس قلت الله يوفقك ماتعطين دفتر مثلك المشكله انا لو ازين جدول يبي يصير كله راحه

المشكله موب بالدفتر المشكله فيك أنت
ذكرتني بوحده قالت لي انا من اليوم بسوي جدول وانظم وقتي
يوم سوته و اناظره حاطه أكثر الساعات للتلفزون والنت والجوال

إقتباس بصراحه حلوه حلوه مره مره مره واحسن رسامه اللي راسمته !!

اللي رسمتها تقول مشكور والله يسعدك على المجامله ..

إقتباس اخوك : عضو كبير يرفض ذكر اسمه

مشكور كثير على المرور اللطيف ورده بس لو تذكر اسمك


~~


الغدير الأزرق
يا هلا فيك اخوي الكريم
الله يحفظك اخوي الغدير و مشكور على المرور جداً جداً ورده

إقتباس بصراحه لأني من الناس اللي ماعندي تنظيم للوقت

كلنا كذا وانا اختك بس الأفضل إنا ما نضيع و قت أكثر
من اللي ضيعناه من غير فائده ..
لان الله بيسألنا عن كل ثانيه راحت من يومنا من دون لا نستثمرها

إقتباس (إدارة الوقت ) بصراحه يوم شفتها بالجدول قلت في بالي وش هالمادة الغبية

بالعكس أن أشوف ان هالماده لها فائده كبيره و افضل من مواد
ثانيه ما لها فائده بالحياه ..

إقتباس وراح آخذ جزئيات من موضوعك لعلى تفيدني بالتقرير ولاتخافين حقك ماراح يضيع راح اكتب بالتقرير منقووووول

والله ما نزلت هالموضوع إلا للفائده و إذا أستفدتم منه
هذا كل اللي ابيه و خذ اي جزئيه و من غير لا تكتب منقول ..

إقتباس رقم الدفاع المدني ناقص وهذا من فوائد استغلال الوقت بما هو مفيد

لا موب ناقص بس كنا ناسين الرقم و محتارين هو 998 او 997
و الحمد لله عرفنا بعدين و كملنا الرقم

اشكرك على المرور الجميل والخفيف و ربي يسعد قلبك ورده


~~


abu_riman
هلا فيك اخوي الكريم
قرأت أجزاء من هالكتاب و ان شاء الله اكمله
فيه فائده كبيره بس حنا مشكلتنا في التطبيق ..

ربي يسعدك ابو ريمان و مشكور على التواجد العطر ورده


~~


المشاغب
هلا اخوي الكريم

إقتباس شفت قبل كم يوم موضوعك عن صدى .. وأعجبني الموضوع ونويت أرد عليه بعدين ..

تدري يالمشاغب ان هالموضوع كاتبته من قبل رمضان
بس الله يهديه واحد رد و طلعه بالصفحه الاولى و احذفوه
و الحمد لله انك ما رديت و تعبت حالك

إقتباس لكن العوض في هالموضوع .. لازم نشرشح فيك شوي

شرشح بس اشوي مو كثيـر

إقتباس وش هالمسكة الغلط يا منار؟ ما لقيتي تتكلمين إلا عن الوقت؟

وش أسوي ما جاء ببالي إلا هالموضوع ..

إقتباس لا وبعد أبوريمان مبسوط ويذكر اسم كتاب عن الوقت

هذولا الناس اللي يعرفون قيمه الوقت موب انت اللي تقول ما لقيتي إلا هالموضوع

إقتباس أعوووذ بالله 3 ساعات تقريباً وأنا أبي أقوم من هالكرسي ومستحي

بالعكس الدورات اللي مثل هاذي أحبها و ما أحس بالوقت فيها
و ليه مستحي ما أعجبتك أطلع ما عليك من أحد لا تجامل على حساب نفسك

إقتباس حسيت أن جسمي خلاص لزق بالكرسي ولا جيت بأقوم بيطلع معي الكرسي ولازم فصل توائم

هههههههه لـ هالدرجه يمكن أنت من النوع اللي ما يحب يقعد لمده
طويله و تمل بسرعه و تحس الكلام اللي يقوله كلام فاضي << ما تقصد أخوها .. لا تخاف بنجيب الربيعه يقوم بالازم

إقتباس 3 ساعات يالظالم .. ويكلمنا مثل كلامك بالضبط والله كأننا أول مرة ندري .. كلامه كله معروف

و الله شكلك حقدت عليه و تبت تروح لـ هالدورات و الله يستر لا يكون حقدت علي بعد
يمكن كلامه معروف للكل بس مشكلتنا ما نطبقه علشان كذا
هم يعيدون و يكثفون جهودهم لمثل هالدورات على أمل إنا نطبق ..

إقتباس أنا منب مقتنع بأغلب الدكاترة الوطنيين اللي يعقدون دورات .. فقط قلة من يكون لهم تأثير

يكون لهم تأثير بـ أسلوبهم وطريقتهم و أغلب دكاترتنا ينقصهم هالشي

إقتباس يا منار طاهر << أخت ميسرة طاهر

لا ما أحب ميسره طاهر كان قلت منار الحبيب أحسن علشان دكتور طارق الحبيب ورده

إقتباس وكيف تقنع خصمك في 3 دقايق << يلعن أم النصب اللي عليهم

3 دقائق كان قالوا دقيقه المشكله ان الناس اتصدق هالاشياء
بس اشياء تنفعهم وتفيدهم ما يقتنعون ولا يطبقون !

إقتباس موضوعك ممكن يكون حلو .. بس لو ما ذكرني بالـ 3 ساعات اللي قعدتهم على هذاك الكرسي المشؤوم

حرام عليك وش دخل موضوعي بالكرسي المشؤم
خلاص أنساه و أبدأ حياتك من تاني << آثار الكرسي المشؤم علي

إقتباس أنا مدري وش هالحياء اللي طاح على فجأة وما خلاني أطلع؟

هذا حياء مذموم و انا أختك حاول تتخلص منه في أقرب وقت

إقتباس والله كان ودي أقطع في الرسمة لكن خايف أنها لواحدة حساسة بعدين تبلشين فيها وش يسكتها

ايه و الله لوحده حساسه لو كان أنا كان ما زعلت عادي بس لها و راح تقولي وش خلاك اتنزلينها بالموضوع و تبلغ الدفاع المدني << قصدي أمي

إقتباس والله الرسمة متعوب عليها وحلوة مرة ما شاء الله .. مبدعة من رسمتها

ههههههههههه ترى هي تفهم و بتقول الكلام موب طالع من قلوبهم
و حسبي الله على ابليسهم على بالهم بزره

إقتباس وردة لها إذا كانت كبيرة .. و << وقلب لها إذا كانت صغيرة

لا صغنونه و طماعه تبي القلب و الوردة

إقتباس بس وش هالهلال اللي وراء سيارة الدفاع المدني؟ .. ولونه أصفر بعد ..!!

المعنى في بطن الراسمه بس أكيد أنها تقصد بـ الهلال الزعيم << تفسير منطقي

إقتباس لا يكون فيه جمعية اسمها جمعية الهلال الأصفر وحنا ما ندري؟

... جاري البحث يمكن فيها ما ندري حنا

إقتباس شكلي طولت؟ صح؟ يالله مع السلامة

ايه طولت << صريحه و مشكور كثير على التواجد الرائع واللطيف ورده




.

.

.

هلا وغلا منوور .. منوره الحته

شف من يتكلم عن الوقت علمي نفسك أول


الجد عاد إننا شعب معروف بتضيع الوقت بـ [ ـغير المفيد ]
يعني أغلبنا وقته يضيع بين نت وTV وطلعآت

تصدقين عاد شاريه كتاب قبل شهر تقريباً على اساس اني اخلصه بأسبوع لأنه قليل
وإلى الآن مآ كملته

يعني لو عندي تنظيم بوقتي كان مثلا نص ساعه للقرآءه
نص ساعه انترنت <~ عاد هذي ماتدخل العقل
يعني هيك تنويع بالوقت

قولي الحين يعني زين فيه شي مشغلني ومضيع وقتي بشي مفيد مثل المذاكره
لكن بالإجازه لاحول ولا قوة إلا بالله العلي العظيم

الصدق انها جتني فتره منظمه فيها وقتي ميه ميه
فتره ايام الأمتحانات/ يعني وقتي من جد كان منظم جدا
ويوميا أخلص الماده اللي علي بنفس وقت اليوم اللي قبل
والحمد لله هذا ريحني أوي أوي




يعطيك العافيه منور على هـ الموضوع الكشخه
شرايك تجين مدرستنا تلقين محاضره عن الوقت والله
لأخلي المدرسه كل ابوها تسمع لك

سلمي لي على أختك الصغنونه وقولي لها رسمتك قميييله قدا يآ قميييل

مع التـ ح ـيه

هلا منار
موضوع جميل ..

أنا وبلا فخر دكتوراة في عدم التنظيم !!
لا ينتظم وقتي إلا من أجل الآخرين أو لعمل يخصهم
أما اموري الخاصة فالتأجيل والتسويف بشكل عام طاغي
أعرف إن ذلك خاطئ لكن الجدية تنقصني
في تنظيمه وحسن استغلاله
وها أنا احاول مرة ينتظم وعشرة لا..

..

كتاب فن إدارة الوقت لطارق السويدان رائع
فيه تمارين وتدريبات عملية لتنظيم الوقت
أثّر فيّ وتحمست في بدايته حتى خفّت الإرادة..
هو من الكتب التطويرية بشكل عام .


الله يعطيك العافية
مُبدعة دائماً ..

.



عاشقة الزعيم 15
يا هلا فيك اختي الكريمه

إقتباس للاسف اكثر ايامي تضيع بدون ما استفيد منها

و للاسف موب انتي بس انا بعد نفس الشي

إقتباس لو اني اذاكر اول بأول وانظم وقتي ماحست هالحووسه

لو تفتح عمل الشيطان و انا اختك
ابدي من اليوم و نظمي وقتك وراح تدعيلي ان شاء الله

إقتباس احلى صفقه مني للي راسمتها

تقول ما سمعت الصفقه << الله يقطع ابليسك
ربي يسعد قلبك ومشكوره على المرور اللطيف و الحلو ورده


~~


مواصل من عام 1413هـ
يا هلا فيك اخوي الكريم

إقتباس بمجرد ما أنظم وقتي أحس بأنني بدوره عسكرية

صدقني راح تتعود و تقول ليتني من زمان منظم وقتي

إقتباس صار لي الآن ثلاث أسابيع وأنا متبع تنظيم الوقت

و ان شاء الله على طوول

إقتباس تركت السهر إيجابيات كثيره لكنها ما تحضرني الآن

السهر الشي الوحيد اللي حاولت أتجنبه بس ما قدرت

إقتباس أعتقد أن للحكومه دور بتظيم حياه الشعوب فأكثر الدول غير العربية تغلق محلاتها من الساعه الـ 8 مساءاً

أنا أعتقد أنها من نفس الشخص يعني إذا هو أقتنع بـ أهميه الوقت
و تنظيمه هو راح ينظمه من نفسه من دون لا أحد يجبره
و الحكومه حتى لو سكرو محلاتهم من 8 المساء راح يكملون
سهرتهم بالبيت على التلفزيون او النت ..

إقتباس لو إنك مأخره الموضوع شوي الآن إنتي ساعدتي إنسان على الإستمرار بعدم تنظيم الوقت

ما دريت والله بس هذا من حظه الحلو

الف شكر اخوي مواصل على الحظور العطر ورده

~~

الفارس الحائر
هلا فيك اخوي الكريم
الله يسلمك من كل شر

إقتباس للاسف تقريبا ثلاث أرباع المجتمع السعودي غير منظم للوقت

مو بس السعوديين و العرب بعد ما أدري ليه هم
مقللين من أهميه الوقت وتنظيمه !

إقتباس والصراحه فكرة الجدول حلوه لكن ماأعتقد ان فيه احد يطبقها ممكن 2%فقط

و سهله بعد يقدر اي واحد يسويها و يعدل من حياته و روتينه اليومي
مشكلتنا حنا في التطبيق و ان شاء الله الجميع يطبق ..

الله يعافيك ويحفظك .. و الف شكر على التواجد الجميل ورده


~~


دااااني
أهليـن اخوي الكريم

إقتباس لكن للأسف في وسطنا العربي لا نهتم بهذا الجانب ..

بالتوعيه إن شاء الله راح يعرفون أهميته و يطبقونه

الله يعافيك و يسعدك الف شكر على الحظور الحلو ورده



.

هلا بوخيتي صراحة الموضوع رائع من العنوان إلى آخر حرف
والله انا عن نفسي أضيع أوقات كثيييييييييييييييرة بدون فايدة يعني عالتلفون والنت
وبس
ملاحظة
أتمنى تحطين لنا اسم الرسامة الرهيبة اللي رسمت صراحة روووووووووووعة
بس ودي يبيعون لوحاتها مع دافنشي
تقبلي مروري أختك
بني حارث

.


S K Y
هلا فيك أخوي الكريم

إقتباس وغالبيه المجتمع السعودي ينحصر في المربع الأحمر المهم والمستعجل

و للأسف حنا اللي نحد نفسنا لـ هالمربع يعني حنا لو منظمين الشغلات
اللي راح ننجزها ما كان انحصرنا بـ هالمربع ..

إقتباس في نفس اليوم زارني ضيف أو أتصل بي صديق يريد الخروج معي

ما أعتقد لو أنا حاطه جدول و اعرف كل ساعه وش بسوي فيها
و فجأه جاني واحد يبي يخرج معي أعتذر منه أن وقتي ما يسمح
لي و أأجل الطلعه معه لوقت ثاني و مو معقوله كل شوي اضبط
جدول ويجي واحد و اجامله ويخرب جدولي ..

إقتباس ومن الأسباب الرئيسيه في عدم تنظيم الوقت التسويف الزائد

ايه و الله صادق التسويف هذا يخرب كل اللي اخطط له دائماً
و أعيد من جديد و يخرب كل اللي ابي اسويه ولا زلت احاول

إقتباس لدرجه اني قمت أهوجس فيه احد داخل البيت المحترق والا كلهم سالمين

لا الحمد لله ما كان فيه حد بالبيت كلهم مسافرين

ربي يسعدك اخوي و انا ما كان هدفي من الموضوع إلا الفائده
و الحمد لله أنكم أستفدتم من الكلام اللي ذكرته
الف شكر على حظورك الراقي و الجميل ورده


~~


راكان _20_
أهليـن أخوي الكريم
أول شي العفو و الموضوع مميز بـ تواجدكم وأرائكم الرائعه
و ثانيه شي أعتقد أنك تقصد موضوع صدى اللي أنحذف و حبيت
أقولك أنه أنحذف لانه قديم مو لأنه مخالف و الحمد لله ..

إقتباس لا نعرف حتى نجزء وقتنا : جزء للعميل جزء للبيت و الأهل جزء للنفس جزء ...

و متى راح نعرف ! كل شي ألحين متوفر الكتاب الدورات و المحاظرات
بـ إمكان الجميع التثقف بـ هالوسائل يعني ما لهم عذر ..

العفو اخوي ربي يسعدك والف شكر لحظورك العطر ورده

~~


الهلالي الثقفي
هلا فيك اخوي الكريم
قريتها صح يا حليلي أنا كل ما اقرأ هالكلمه على بالي دلع اسمي
حتى لو حد كاتب منوره المنتدى على بالي دلعي

إقتباس و الله منار كان نفسي أرد على موضوعك برد يليق بقيمة الموضوع و جماله بس للأسف ما عندي وقت

كل الشعب السعودي ما عندهم وقت أربع و عشرين ساعه
و أنت ما عمرك قلت عندي وقت مشغول طول الوقت الله يعينك بس

إقتباس لكن مجرد تواجدي هنه هو شرف لي

و الله الشرف لي طال عمرك رغم ضيق وقتك إلا أنك اصريت ترد

إقتباس عند دورة قيمة في الإدارة اليابانية و قال إنت تعال و بس و هو راح يعطيني شهادة فيها

لو انا منه أخليك تجي و تحظر الدوره و ما اعطيك شهاده

إقتباس بس للأسف ما كان عندي وقت و لا حضرت الدورة و لا إستفدت شئ

ههههه و ين يروح وقتك انت حتى لحظور دوره ما عندك وقت اجل متى يكون عندك وقت

إقتباس يا ستي إحنا كذه بنتكلم بكلام و خلا ص

لا والله انا احب اطبق اللي اسمعه بس مشكلتي بللي حولي مثلك كذا يعني

مشكوور كثير ربي يسعدك ياسر على التواجد الظريف والخفيف ورده


~~


الزيرابوعزيز
أهليـن أخوي الكريم

إقتباس من الصغر الى الان في المدرسة طلبوا منا تعبير عن الوقت

هذا كله يدل على أهميه الوقت في حياتنا
بس حنا للأسف نتساهل في امور كثيره و ما نعطيها اي اهتمام مثل الوقت

إقتباس غير الاحاديث والايات الكريمة وقد اقسم الله بالوقت باكثر من موضع

الله ما يقسم بـ أمر إلا لـ أهميته في حياه المسلم لأن الوقت
إذا ضيعه الانسان بـ أمور تافهه راح يحاسبه الله على هالشي ..

إقتباس ويقول حان موعد نومي وتركني لوحدي مع زوجته وراح ينام

يا حليله هالياباني حلو أنه ينظم وقته بس مو حلو يخلي ضيفه ويروح عنه

إقتباس بس عذرته لأني عارف وضعهم انهم يهتمون بالوقت وترتيب جداولهم

أنا يعجبني بالغرب إهتمامهم بكل شي بحياتهم و تنظيمها و ترتيبها

مشكور كثير اخوي على التواجد العطر ربي يسعدك ورده


~~


صقر فيصل
هلا فيك اخوي الكريم

إقتباس كم أحتاج إلى أن أنظم وقتي! كم أحتاج إلى ألا أسوف في أعمالي!! كم أحتاج إلى أن أعمل بما أقرأ.. وكم أحتاج أكثر إلى أن أعمل بماأكتب!

هالتسؤلات كلها المفروض نطرحها بيننا وبين نفسنا و نجاوب
عليها و نحاول انغير الامور السلبيه فينا و حنا قادرين على ذلك ..

ربي يسعدك و الاجمل حظوركم الأكثر من رائع شكراً كثييير ورده



.

وعليكم السلام ورحمة الله وبركاته

جد الوقت يمر سريع واغلبه ضايع في اشياء غبيه

وخصوصن النت ياكل الوقت

حتى لو كان في اشايء مفيده لكن يبعد عن اشاء اهم بدون ما نحس





وعلى طاري شغل الوقت بشي مفيد

لا يفوتكم يا بنات كتاب" اساور الصداقه " فيه طريقة عمل عشر اساور من الخيوط واشكالها مررره روعه
وتنباع برا على 15 ريال واذا زينتيها ما راح تكلف الاسواره الوحده ريال واحد هذا غير انها تسليك وتشغل وقتك والطرق بسيطه وسهله

و ان شاء الله ناويه انزل موضوع عنه قريب .

إقتباس الرسالة الأصلية كتبت بواسطة ~بنت الزعيم~

الرسمه فنتاستك

بس شوفي رجل الرجال الي جنب الشاحنه على خرطوم المويه
الحين لو يسحب الرجال البعيد الخرطوم بيلتف على الرجال القريب من السياره ويتكرفس على خشته














يسلمو على الموضوع

.
.
.
بنت عبدالعزيز

هلا فيك أختي منار

للأسف اغلبنا افراد يرفضون التقيد بنظام ويشجعون الفوضى في امور حياتهم

وانا واحده لو افتك من النوم كان نظمت اموري

في اول سنه من دراستي الجامعيه .. كان عندي منهج اضافي ممتاز يتكلم عن (الأداره في حياتنا )

ومن ضمنها ادارة الوقت ..والمال ..الخ ..

عزيزتي

لو ندتبر وكل مسلم يتدبر مقولة هذا الحكيم ..

((من أمضى يوما من عمره في غير حق قضاه, أو فرض أداه أو مجد أثله أو حمد حصله أو خير أسسه أو علم أقتبسه فقد عق يومه وظلم نفيه ))

لما اعترتنا بوادر الفوضى ..





بسم الله على قلبها قولي لها تجنن

ولها مستقبل باهر بالرسم تنافس الرسام (أيمن مالكي )

ولون الشاحنه خوقاق يلموني بالاصفراني


منار طرح وموضوع أكثر من رائع غاليتي ورده