في الصيفية قبل الماضية

كلفتني الوالدة اودي اخوي الصغير حمد لستراحة خوالي
تقول ضايقن صدره ووده يروح يلعب كورة ويسبح
قلت ابشري اوديه ما عندنا اغلى منتس انتي تامرين امر
بس ما ادري البنزين يوصل ولا مايوصل << طبعا تلميح

المهم الوالدة افهمتها و ألفزت مبلغ مادي بيدي

ركب معي اخوي الصغير حمد
وكنا بنص العصر وانواع الحر

تبادر الى ذهني واحد من اخوياي قلت ابيه يخاويني يوسع صدري الاستراحة بعيدة
اتصلت على ابو سليمان

انا ابو سليمان وينك
هو وش عندك
انا اخلص وينك
هو بالفيحا
قلت يله جايك نبي نروح مشوار يحبه قلبك <<< اغراءات عشان يجي


وصلنا عند اشارة ماكدونالدز مخرج 15
لفيت يمين متجهين للفيحا

اناظر الا والله اشارة جديدة

قلت يارجال ما يضر نقطعها
وانا اللي اقطعها

وبعد 200 متر تقريبا
تفتيش

ضاق صدري قلت قسيمة مالها داعي
بدأ تأنيب الضمير

فتحت الدريشة قال الرخصة والاستمارة قلت سم
قال اصفط

صفطنا
وانزل قال طف السيارة واركب الجمس
قلت ليه وش انا مسوي << ما عادي يمدي تجحد

قال اقول اركب
قلت ما قطعت الاشارة <<< المشكلة محد طرى اشارة

قال لا قاطعها
المهم انا اشوف الجمس فيه هنود وسعوديين جمس مليان قلت الله يستر لا اركب بالشنطة

قلت معي اخوي الصغير شفه مرتاع ما اقدر اروح واخليه
نزل حمد وهو بالمتوسطة لكن اللي يشوفه يقول لاعب رمي الجلة

نزل وهو يضحك
وانا اغمز له ابيه يصيح عشان يمشينا
قال اخوك ما ينخاف عليه رجال يروح بتكسي للبيت

اثناء هذا الحوار مع رجل المرور
اتصل ابو سليمان وهو غاضب وووووووووووينك
قلت ابو سليمان تعال عند التفتيش اللي عند ماكدونالدز قال مسكوك
قلت ورا ماعلمتني ان فيه تفتيش
قال ما دريت انك بتقطع الاشارة
قلت تعال الله يمحاك
جا وقعد يكلم رجل المرور الباسل ووصلوا الى حل انه ابو سليمان ياخذ سيارتي ويوديها لبيتنا

قلت لبو سليمان ود حمد للاستراحة و لبق السيارة عند البيت
وركبت الجمس بجنب مصري ثوبه كله دم حسيت انه دابغن له واحد امه داعيتن عليه
والمصري يكلم بالجوال وشرق الرياض كله يسمع المكالمة
وواضح ان اللي يكلم المصري يهزئه
لانه يبعد الجوال
قالي المصري الله يخليك كلم كفيلي ووصلوه هنا ( يقصد وصفله المكان ) قلت ابشر ما ورنا شي
اول ما حطيت السماعة بأذني : هالحين يا حمـار وينك بالضبط
انا تغير وجهي قلت سلام عليكم قال وعليكم السلام المهم وصفتله المكان
لان المصري الله يجزاه خير يشتغل بملحمة ومعه بالسيارة ذبايح والكفيل خايفن تخرب اللحمة

مع آذن المغرب انطلقنا إلى حجز الناصرية ودرايش الجمس كلها مفتحة وصوت الهوا الجميل ورائحة الاخوان اللي معنا تعطي الواحد تفائل وامل ويتخيل انه يسمع اغنية فيروز نسم علينا الهوا من مفرء الوادي

وصلنا و حطونا بسيب كبير ووزعوا علينا زبادي
العالم تشربه شرب انا ما جيته قلت اما زبادي <<< فسقان ما درى ان الجوع بيلعن خير خيره بالحجز

دخلونا الحجز وكان شبه مليان

طبعا بدت الاتصالات على اخواني قلت منب مخلي ابوي يدري <<< قضية مخدرات مهوب قطع اشارة

جا اخوي الكبير ويحاول منا ومنا
قالوا ما يطلع الا بعد مرور 24 ساعة ودفع كل الغرامات اللي عليه
المهم اخوي عطاني بطارية جواله ووصل خوينا ابو سليمان وسواليف عند الدريشة شوي اكرشوهم رجالات المرور البواسل

انا متكي لحالي واناظر واحد هالوجه مهوب غريبن علي
واقرب منه قلت انت العصيمي اللي في القناة الرياضية
قال ايه
العصيمي هذا قد قابل معي بمعلب الملز وطلعت في برنامج والله نسيت اسمه برنامج يجي الظهر يوم الخميس يقابلون مع الجماهير

المهم سواليف معه

طبعا طولت عليكم بها المقدمة الطويلة لكن الآن راح اعرض اهم السواليف اللي حصلت بالحجز





تاكي مع مجموعة وواحد منهم يسولف اللي يسولف من دخلنا وهو يفقش علينا

وجهه اسمر وشنبه كثيف جدا
ويسولف عن تركيا والبلاوي اللي فيها مراقص وما مراقص كلام مشفر كثير
وواحد من المجموعة جالسن يخبص الورقة اللي معه بيلعب بلوت

المهم
قال راعي تركيا والله يا عيال اني حاجز الاسبوع الجاي على اسطنبول

اللي يخبص الورقة رفع راسه وقال:

وش تبا بلنان يا ولد كلها حروب وذبح وذبيح

حنا فقعنا ضحك

وش جاب اسطنبول للبنان

هذا المفروض يحطونه بزنزانه لحاله





جالسين نتكلم عن القسايم وشلون ومتى بنطلع والتسديد ومن هالامور

عشان الواحد يطلع لازم يسدد كل القسايم اللي عليه

المهم واحد قال يا عيال الحين كم قسيمة قطع الاشارة قلنا عمدا 950 والعادية 350

قال اسددها واطلع قلنا ايه تسددها وتسدد كل اللي عليك
قال اما عاد قلنا اما ثمود بعد لازم تسدد
قال اجل يا عيال اللي يطلع تكفون يجيب كرز دخان لي
الرجال مطول بالحجز ما فيه امل يسدد



بعد ما صلينا العشا كان فيه مطوع يدور وينصح الله يجزاه خير
المهم لقى مكان قريب منا

و جلس ينصح شوي

بعدها بدا يسولف وقال اني كنت مسرع قبل آذن المغرب بشوي ابلحق على المسجد بأذن واصلي فيهم

وقطعت اشارة و ركبوني وكان اللي ماسكني يقول انت مؤذن مسجد عشان اطلعك؟
فقلت له (الكلام للشيخ) لا قال اجل اركب قلنا ليه ما قلت له انك مؤذن وامام بعد
قال ماحبيت يكون فيه فرق بالتعامل بيني وبين الناس لكن لما وصلت وشفت الزحمة والحشر هذا
قلت للضابط اني
مؤذن مسجد وامام ووعدني خير وقالي ان شاء الله نطلعك وتصلي الفجر بجماعة المسجد
قام المطوع من عندنا ولا شفناها طول الليل

المهم
آذن الفجر وقمنا نبي نصلي اناظر اللي أذن الا هو خوينا المطوع
لعله الله يجزاه خير
اذن الفجر بالحجز
و صلى فينا الفجر بالحجز

عيوني توجعني من الكتابة
هذي بعض السواليف اللي صارت بالحجز
واعذروني على ثقل الدم



آسف للإطالة