نادي الهلال السعودي - شبكة الزعيم - الموقع الرسمي - رشوتي يا رشوتي وياقلب لا تحزن @@@

موضوعنا لهذا اليوم هو عن الرشوة<<مدرس داخل على طلابهs67s <<<دايم يتوهق بمقدمات المواضيع :d
انا اقدر اختصر الموضوع بسطرين ولكن ابطوله
ممكن مع كثر الكلام نوسع صدوركم:clap: (او نضيقها شوي:upset: )
الصراحة ما ادري من وين نبدا من يوم توضفت او اهم الاحداث اللتي لا زالت عالقة بذهني
انتم اهم شيء خوذوا لكم كاس شاهي وروقوا لموضوعي
لكن حرصا على السرية في الموضوع لا يطيرونا ورى الشمس:d
ابسولفلكم وسأخفي الاسماء اسماء الشركات والادارات الحكومية
انا يامحاتسيكم فني اتصالات خريج مبطي دخت مابين الشركات
واستقريت بشركة كبيرة الحمدلله ولكن مع تجربتي بالشركات مايبون
فني عندهم الفلبينيين مهندسين وبربع راتبي يبون واحد ينسق لهم مشاريعهم
مع الوزارات والدوائر الحكومية وانا انسان ملسون شوي:d ومخادع:naughty:
بدعت بهالمجال كثير وحصلت على ترقيات <<الحمدلله انهم قدروا والا كان طفشنا
شغلتي ادور بين مدن المملكة وتحت ادارتنا اكثر من ثلاثين شركة تعمل لدينا
في مجال الشبكات الارضية <<ماودي اوضح زيادة عن نوع الشبكات
هي شبكات هاتفية بين المدن لشركة اتصالات تعمل بالمملكة <<تراني ماقلت موبايلي والا زين والا الاتصالات السعودية <<يعني ما احد يدري<<مسوي ذكي:d
انطلاقتي بدت من الخرج ياحبي لهم اهل الخرج حبيبين:smilie47:
يوم قلتلهم اسم شركتي طارو بي وسهلوا شغلي اللي هو حفريات بالارض
وللفائدة الحفريات تحتاج موافقة جميع الخدمات من مياه وكهرباء الخ
راعي المياة قاللي عندي رقم مميز وابغى احول لشركتكم ويقولون لا زم تدفع مبلغ عشرة الاف
لأن رقمك مميز ابيك تحولي الرقم انا طبعا بدبلوماسية:naughty: قلتله سم وابشر عطني رقمك وانا اكلمهم
واحاول فيهم <<وانا متأكد انهم بيرفضون اعلمكم ليه يرفضون قدام شوي<<ماسك خط الاخ:d
وراعي البلدية قال عندي ارض وابيكم تحطون فيها برج قلت له نفس الكلام ابشر وابشوف ربعنا
بتقولون طيب ليه حبيبين <<اقولكم لأنهم خلصوا شغلي بوعود ودبلوماسية مني:naughty:
الكلام فوق طبعا داخل الخرج طيب الطريق ما بين الخرج والرياض لازم نوصله بخط هاتفي
رحنا للوزارة المعنية وتبهذلنا بكثرة الاجراءات عاد انا ما اروح الا اذا تعقدت الشركة الصغيرة من حل
موضوع او تأخرت عن استخراج التصاريح للحفر بين المدينتين رحت وقابلت المهندس المختص بصندقة لهم على الطريق وقالي شوف تبي شغلك يخلص وتفتك من الاجراءات الادارية وتعقيداتها اللي عندنا قلت ياليت قال اطرد هالشركة الصغيرة وانا امسك الموضوع عندي شركة متعامل معهم انا
طبعا عيوني:bigeek: اول مرة تصادفني مثل هالحالات المشروع بين المدينتين يكلف 600الف تقريبا
انا رحت لشركتنا وعيوني طايرة :bigeek: وزعلان:upset: ليش الابتزاز وطلب الرشوة بهالطريقة الاستغلالية
حتى يهدد يقول بنعقدكم اذا ما عطيتونا المشروع قلت للشركة انا مالي دخل وهذي هي الصورة قدامكم
لا تدخلوني بمثل هالامور <<ماتفقنا رشاوي وقلة حيا قالوا لي خلاص اطلع من الموضوع
وعرفت بعدين انهم عطوه المشروع
بعدها سافرت لمدن كثيرة وكانت اغلب طلباتهم ارضي يبي يحطون عليها ابراج
والا ارقام مميزة وخذ وعود مكذوبة:naughty:
ابجح موقف قابلته من موظف باحد الدوائر الحكومية بالمنطقة الغربية
طلب جيبين فاكس ار اخر موديل وبعد اخذ ورد قال طيب فاكس ار وهايلكس:d
طبعا طنشناه واشتغلنا بدونه وعطانا غرامات مالية تقارب قيمة الفاكسارين مع ايقاف عن العمل:upset:
وبالقانون
اصعب مدينة قابلتني هي مكة جلست فيها سنة كاملة حفظتها صم
الشركات الصغار طفشوا وبطلوا شغل هناك الرشاوي بكل مكان
من صغار الموظفين الى كبار المدراء الكل بياكل
والدخان في كل مكتب الا مارحم ربي واحد من المسؤولين الكبار
دخل عليه واحد من المراجعين من اهل مكة وهو زعلان قاله ابويا انا دعيت عليك قدام الكعبة امس
تدرون وش رد عليه بالحرف الواحد قاله انت يوم تدعي كنت متعلق باستار الكعبة والا لا:bigeek:
انا انهبلت واحد ثاني يقولي عن هالمسؤول الظالم وانا ذقت المر من ظلمه انه قاله ابدعي عليك بالحرم
قاله اذا ما تدله انا ادله اياك انا ادل بمكة احسن منك انا طبعا:bigeek: قلت وش هالفجور عند هالادمي
يطلبون منا مكيفات سبيلت لبيوتهم مبالغ مالية تتجاوز العشرين الف والثلاثين الف
وموظفيهم الصغار من الفطور الى ال اربعة الاف على طاري الفطور فيه موظف باحد الادارات
كلم واحد من المراجعين من الشركات اللي يراجعون بشكل يومي بحكم عمل شركتهم
قاله جيب لي فطور طلع اخونا وجاب له فطور من بكرا قاله اشبك جب لي فطور قاله يبويا طولتها
قاله بكل بجاحة انت دايم تجي الساعة تسعة جيب لي فطور معك :d اخونا في الله طمر وراح جاب له فطور بعدها راح لنائب المدير وكان رجل محترم واشتكاله اخلاق الموظف اللي ما تمشي المعاملات الابعد ما تعدي من عنده وهو يوجهها للمدير او نائبه قال النائب يابويا ايش اسوي هذا ابوه صديق المدير
ما اقدر اقوله شي رح للمدير راح للمدير والمدير اذن من طين والثانية من عجين

المدير نفسه راعي رشاوي طلب منا اشياء بس احنا رافضين فكرة اننا نعطي احد شيء لأنهم
بيتمادوا وبيوصل اخبارنا عند الدوائر الثانية ويصير كل واحد يبغى له حاجة
اطرف موقف قابلني دخلت على ادارة امنية عندي مراجعة لمعاملة لاحد الشركات
قاللي العسكري انا طلبت منهم اغراض وماجابوها قلت ايش قال دبابيس واقلام وتقاويم
وثوبين انا مافهمت وش يقصد بثوبين بس مثل هالامور حساسة يعني لا تقعد تفاصل فيها
يزعلون هم ووجيههم:d وطلعت اهوجس قلت بمكة الثياب غالية والا وش السالفة
ليه هالعسكري يبي ثوبين رحت للشركة الصغيرة اللي هي تحت ادارتنا وقلتلهم
الطلبات وسألتهم عن الثوبين وش هي قالوا هي الورق حق الطابعات والات التصوير:d
قلت اها طيب قالوا ماعليك حنا متعودين عليهم وعلى غيرهم ومتعاملين مع مكتبة لهذا الاساس:d

وفيه واحد بخاري يشتغل باحد الادارات الحكومية مراقب بالشارع على الحفريات
ومشغل العمال والمهندسين بالموقع كل يوم اربعاء يمر عليهم وياخذ المقسوم الف خمسمائة
والمهندس الباكستاني يقول متعودين عليه قلت ليش الاربعاء عاد قال هو ممكن يبغى يسكر ويسهر
طيب لو ما عطوه عطاهم غرامة بدبل المبلغ اضافة الى انها احيانا تصل الى ايقاف الشركة
يقولون نعطيه ويسكت عنا احسن من انه يشغلنا
ومدير هالشخص هو المسؤول الظالم خوينا فوق راعي الحرم:d
بيقولي واحد ليش ماتشتكون حاولنا رحنا للوكيل اللذي هو اكبر من المدير بالادراة
ورفض مقابلتنا وحولنا لسكرتيره والسكرتير بعد ماشرحنا معاناتنا مع المدراء في الادارات
المختلفة قال من اللي موقفكم قلنا فلان اتصل عليه وقاله بالحرف الواحد
عندي اثنين هنا يقولون انك موقفهم ايش الهرجة قاله مين هما قال من شركة كذا
ومقاولهم شركة كذا قال ايش اسمائهم سألنا السكرتير عن اسمائنا
قلنالهم الاسماءوحنا مستغربين السؤال:bigeek:
قال خلاص روحو للمدير طيب وش صار قال انتم روحو له وبس
طلعنا للمدير ما استقبلنا الا بعد ثلاثة ايام وعقدنا زيادة <<زعلان ليش نشتكيه
رجعنا للوكيل مافيه فايده واذا سمع المدير اننا رحنا عقدنا اكثر
قلنا مافيه فايده خلونا نكسب هالمدير ولا نشتكيه

بس ابشركم هالمسؤول وهو بالمرتبه الحادية عشر طيرناه:naughty:
بتقولون كيف كانت مكة بدون مدير عام<<طبعا هذا اسم مخترع للتمويه
وارسلت ايميلات للشركة عن تعطيل مشروعنا بمكة ومكة منطقة حساسة وتهم الشركة كثير خصوصا بالحج والعمرة ورمضان ارسلت لهم شرح مفصل عن عام كامل من التعطيل لشركتنا بالذات
احيانا تصل الايقافات المفروضة علينا الى ثلاثة اشهر
وجاء الى مكة نائب مدير الشركة وهو مشهور اعلاميا ومعه اربعة مدراء واربعة مسؤولين
الى المدير العام الجديد اللذي هو بالمرتيبة الممتازة<<الصراحة ما ادري وش مرتبته بس هو فوق الجميع بالدائرة هذي وهو رجل خير وكان متعقد من المسؤول هذا قبلنا
ودخلنا عليه انا والمدراء الكبار هم تكلموا كلام الكبار وانا هليت السبحة كلها يوم قالي
قلي وش المشاكل اللي تواجهونها هم يطلبون شيء فلوس قلت باعلى الصوت نعم يطلبون
واشغلونا اذا ما اعطيناهم وقفونا باي سبب تافه مشاريع بالملايين يوقفونها بكل بساطة
والحمد لله وعدنا خير وبعد ثلاثة اسابيع تم نقل وكيل الادارة للرياض وهو فهمها واستقال ومسؤولنا نفس الكلام استقال وتم نقل مدير اخر من منصبه التنفيذي الى منصب عادي لا يضر به المواطنين

نقاط متنوعة
شاهدت تساهل كبير من حيث الرشوة وطلبها بأكثر من ادارة حكومية وامنية
تساهل بعض الشركات بدفعها مما يطمع المسؤولين ويسهل لهم اخذها
شللية (عصابات) بالدوائر الحكومية يعني من اصغر موظف الى مدير القسم الى مدير الدائرة
ووكيلها متفقين على شيء واحد وما يضرون احد من اصحابهم
تساهل من الحكومة بالضرب على يد من حديد على من يفعل تلك الافعال
الاعلام يطرح قليلا مثل هالقضايا وتكون باسلوب فكاهي بمسلسلات تبدأ بضحك وتنتهي بضحك

ناسف على الاطالة وماكتبته يعتبر نقطة في بحر ماشاهدت خلال سنين عملي بهالمجال