معرض الكتاب 2008...شوية صور - نادي الهلال السعودي - شبكة الزعيم

DR.KHALID · #1 13/03/2008, 03:48 PM

السلام عليكم ..

كيفكم..

طبعا الكثير سمع عن معرض الكتاب 2008 .. بس اتوقع م فيه احد فكر يروح

..

بحكم تواجدي المستمر هناك يوميا ... حبيت اعطيكم فكرة عنه ... ومع شوية صور ...

طبعا الي يبي يروح يتأكد هل هو يوم عوائل او عزاب .. والي بيروح اليوم فاليوم عوائل ..

المعرض مقسم لقسمين ... قسم الأجنحة ... ويمثل أجنحة الوزارات او الجهات الحكومية او التعليمية .. والقسم الأخر لدور النشر ...

.....

بالنسبة لتوجه الأغلبية .. تقريبا 60 بالمية بدون مبالغة يبحث عن الكتب الممنوعة !!

بما انها متواجدة بالمعرض بدون رقابة صارمة ...

هذي مجموعة صور التقطتها اثناء تواجدي هناك ..

هذا احد الصفوف الي موجودة ... م كان فيه زحمة مرة ..

هنا الاستوديو حق قناة الإخبارية مسوين متوزين << يقال له كاشفهم

هنا نادي احدى الدول الخليجية .. دولة الامارات الشقيقة

هنا الهيئة المصرية ... طبعا شفت الكتب الي عندهم ... من عام 1400 الظاهر .. واغلبها مستعملة

هنا افضل جناح أعجبني , جناح اليابان ..

صح إني م أدري شيقولون

بس استانس عليهم صراحتن

الشيء الي شدني ... ياباني كبير بالسن اسمه هوندا .. يتقن اللغة العربية كتابة بشكل غير طبيعي .. لا ويتفنن في الخط العربي بشكل رهيب صراحة ... شوفوا هذا احد مقاطعه وهو قاعد يكتب خط عربي..

http://www.youtube.com/watch?v=bccYkx_6s6c

هنا جناح وزارة الشؤون الاسلامية والأوقاف

أكثر الأجنحة زحمة .. جناح مكتبة العبيكان

طبعا الشيء الي اعجبني .. هو تواجد اجهزة حاسب في المعرض تقريبا 6 اجهزة ... تجي وتكتب اسم الكتاب ويقول لك بأي دار نشر موجود ...

كيف القهوة بس

كاكو حتى بمعرض الكتاب !! ..

بس م قصروا شغالين

هنا جناح وزارة التعليم العالي ...

طبعا من ناحية الكتب الي اشتريت ... تقريبا الى الان كتابين فقط ... بس اليوم ان شاء الله بخلص كتبهم

يوميات دراجة نارية , لــ جيفارا , الي صار على كل سيارات شباب الرياض

هذا هو الكتاب ...

طبعا جايب قصته من بداياته يوم كان طالب طب .. ثم انتقل كوبا .. القصة كاملة .. طبعا كنت اشوفه على السيارات بس م كنت اعرف شقصته .. وهذا الي يحمسني اشتريه ..

طبعا الكتاب جيد ..

هذا الكتاب ال2 ...

طبعا موب كتاب يتسلى فيه بقدر ماهو لتطوير قرائتك للكتب بالانقلش.. عبارة عن مغامرات .. لــ ماك توين , ميزته بالعربي والترجمة بالانقلش , والانقلش فيه مرة سهل ..

الكتاب للقراءة بالانقلش .. كويس ..

لكن .. كقصة .. م انصحكم لانه حق بزران

الكتاب ال3 ..

الي ناقصه هم يشريه ..

امزح هذا كتاب من كتبنا بالكلية

...

لحد يتهور ويشريه

الكتاب الي جدا جدا جدا رائع وأعجبني صراحة .. هو كتاب ( كيف أصبحوا عظماء) ..

كتاب أقل م يقال عنه إنه راائع , ولو تبون تتأكدون شوفوا الرابط ... تعليقات القراء من الدول العربية على الكتاب ...

http://www.rclub.ws/?p=205#comment-114562

طبعا الكتاب يحكي سير أشخاص تحولوا لــ عظماء ... وصدقوني بعد م تقراء الكتاب ... بيغير فيك أشياء كثير ...

الكتاب رائع جدا .. وأنصح بإقتنائه ...

طبعا تتوفر منه نسخة إلكترونية .. بس م أحب النسخ الإلكترونية

.. عشان كذا م راح احطها بس الي يبي النسخة الألكترونية ... يبشر راح احطها له..

طبعا الكتاب الي م يحصله بالمعرض .. فهو موجود بالعبيكان ..

حبيت أعطيكم فكرة عن المعرض ..

وأدري جات متأخرة بس الله لا يشغلنا الا بطاعته ..

والي زار المعرض يكتب لنا الكتب إلي إشتراها ...

لا عدمتكم

تحياتي

خالد

عالم الهلال · #2 13/03/2008, 04:46 PM

الله يعطيك العافية
تغطية رائعة..

الإقبال على المعرض كبير ماشاء الله
وفي أول الأيام كنت متحمسه وبسبب الزحمة تكاسلت ووصيت على ما احتاجه
مع ذلك قائمتي ما انتهت ..
بالنسبة للمنع مازال موجود، فيه كتاب كنت أبحث عنه من السنة الماضية ومُنع وهو خالي من أي تجاوزات ..!!

من كتبك موجود عندي يوميات دراجة نارية وكيف أصبحوا عظماء شريتها من العبيكان
سابقاً ..

كل الشكر لمجهودك المميز
دًمت على طاعة الله ..

عبدالـرحمن · #3 13/03/2008, 04:50 PM

وعليكم السلام

انا رحت للمعرض اول مافتح في الصباح الباكر دخلت المعرض وكان بقراطيسه ^_^

اخذت جولة فيه

ولاحظت ارتفاع اسعار الكتب مقارنة بالاعوام الماضية خاصة في الدور الشامية .. ولاحظت تذمر من الزوار .. واصاحب الدور كانوا يعللون ذلك بتكلفة الشحن

يعني اللي يبي كتاب معين افضل انه يروح للمكتبة ويشتريه لانه بيكون بنفس السعر وفي الغالب بيكون ارخص ويفتك من الزحمة

دخلت جناح اليابان مثل ماذكرت وكان رهيب ومتكتك مثل اليابانيين

وبعد دخلت على المانيا وكانوا كاتبين ارض الافكار وهو صادقين

استقبلني الماني ورحب وكان يتكلم عربي فصيح بطلاقة

وخذ سواليف انا وياه كان رجل محترم وبشوش

تحدث عن نفسه وقال درست العربية ودرست الاسلام واعمل هنا في السفاره

واشر على كتاب عن الكورة وقال ان كنت تتابع كورة قلت ايه اتابع بايرن ميونخ .. قال فريق ممتاز

بعد كذا قال زرنا في المانيا

الصراحة انا كنت ابي كتاب معين من زمان ولا حصلته في المكتبات كل مارحت مكتبه وسألت عنه قالوا مخلص

وحصلته في المعرض

وشكراً يا خالد على هذا التقرير

تغريد · #4 13/03/2008, 05:40 PM

ماخلص؟
انا على بالي اخر يوم امس

رحتله مرتين
توقعت القاه فاضي
بس كان مره زحمه
يحليلهم اهل الرياض طلعو مثقفين

مع اني رحت مرتين لاكن ماامداني الفه كله
يبيله وووقت
والزحمه ماتساعد
وخاصه عند الساقي

امممم واش كماان
اغلب الكتب الي ابغاها مالقيتها صراحه

والاسعار توقعتها ارخص من كذا..

والسنه هذي سمحو بكتب كثير كانت ممنوعة
لكن تحفظو بزياده على الكتب الدينيه!

وبس

ثانكس على موضوعك

الغدير الازرق · #5 13/03/2008, 11:40 PM

وعليكم السلام ورحمة الله وبركاته
.
.
تغطية ولاأروع منك أخوي خالد ورده
بصرااحه معرض الكتاب اسمع به واقرى عنه
بس ماطرالي اروح له لأني انسان ماحب الزحمة

..

لكن اللي سمعت إن فيه كتب ممنوعة عرضت وسحبت في اللحظة الأخيرة من المعرض
ومنها كتاب لكاتبة علمانية اتحفظ على اسمها تحث على نزع الحجاب وكله من بركات
ابو مدني

يستاااهل التثبيت الموضوع وعساك عالقوة أخوي خالد ورده

الـساقي · #6 14/03/2008, 12:37 AM

وعليكم السلام ورحمة الله ,,
..
تغطية رائعة ومميّزة منك خالد , ومعرض الكتاب الدولي الإقبال متزايد عليه السنة مقارنةًَ بالسنوات الماضية , معرض متكامل متنوع , منهم من أقِتصر على الكتب الدينية والأخر على الفكرية وغيرهم على الروايات بأنواعها , فيه كتب رائعة وتثري العقول مثل .. سقف الكفاية وطوق الطهارة لأبن علوان , وجاهليه للجهني , و كنت في أفغانستان لـ تركي الدخيل , و يوميات دراجة نارية لـ جيفارا , و غيرها من الكتب المعروضة في المعرض ,,

كالعادة دارَ الساقي يكثُر عليها الازدحام , , وإن كان المعرض لا يخلو من منعِ لبعض الكُتب ,,

\
/

الله يعطيك العافية أخي خالد على تغطيتك بالمعلومات
وبالصور لما يحدث في معرض الكتاب ,,
من القلب شكراً لجهدك ومتابعتك الرائعة ,,
دمت بخير ,,

~بنت الزعيم~ · #7 14/03/2008, 01:41 AM

و عليكم السلام ورحمه الله و بركاته ..

إقتباس


	طبعا الكثير سمع عن معرض الكتاب 2008 .. بس اتوقع م فيه احد فكر يروح..

لا والله فكرت

وابشرك رحت

<< سوت انجاز

معرض الكتاب كل سنه يظهر بشكل آخر و رائع ..
كنت ابحث لـ كتاب إختفاء لـ ماجد والحمد لله لقيته

و كل روايات الكاتبه احلام خذيتها ورده ..

إقتباس


	يحليلهم اهل الرياض طلعو مثقفين

أغلبهم جائيين تمشيه ومسببين زحمه على قوله اخوي

كل الشكر لك اخوي خالد على التغطيه المتميزه جداً

S K Y · #8 14/03/2008, 03:02 AM

ماشاء الله عليك دكتور خالد مجهود وتغطيه أكثر من رائعه ويستحق مسمار التثبيت وإن شاء الله نزور المعرض
اعذرني اخوي خالد حبيت أصغر الصور على شان تكتمل للمشاهد

BLUE-STAR · #9 14/03/2008, 04:28 AM

يعطيك العافيه د.خالد

تغطيـــه رائعه جداااا.. صور+تعليق

ألف شـكر لمجهووودك الجميـل..

صقر فيصل · #10 14/03/2008, 08:02 AM

أهلا بالمبدع الدكتور خالد

تقرير جميل

زرت المعرض قبل أسبوع وقد اشتريت مجموعة كبيرة من الكتب الممنوعة..!

لماذاالممنوعة؟
الكثير من الكتب ممنوعة لأنها أصدرت في فترة كانت فيها وزارة الإعلام والثقافة أكثر تشددا..!
على الرغم من أن بعضها تحتوي تحليلا لوضع قائم.. بطريقة أدبية قد يتخللها بعض الشطحات

أعتقد أننا في حاجة إلى الاستفادة من هذه الكتب..!

كانت من أجمل الدور التي زرتها: دار الساقي ورياض الريس للكتب والنشر ووالمركز العربي الثقافي..

وكانت الكتب لكل من: غازي القصيبي وعبد الله الغذامي وأدونيس ودرويش ودنقل وسميح القاسم والطيب صالح ونبيل المعجل وإدوارد سعيد والطاهر بن جلون

ومن الكتب: العصفورية، الصوفية والسوريالية، أثر الفراشة، مختارات (1-8)، حالة حصار، الخطيئة والتكفير وغيرها

ملحوظة: تجد الكتب العربية عندنا في السعودية رقابة أعلى مما تجده نظيراتها الأجنبية!
ملحوظة2: تجد الكتب السعودية عندنا رقابة أعلى مما تجده نظيرتها العربية!

..،

تقرير جميل أخي الدكتور خالد

شكرا جزيلا لك

ودمت في رعاية المولى