23/09/2007, 06:42 PM
|
زعيــم نشيــط | | تاريخ التسجيل: 01/09/2007 المكان: الخبر - الرياض
مشاركات: 795
| |
قصتي مع ام صالح .. (ba7ral3sheq) بحرالعشق بسم الله الرحمن الرحيم
تحية طيبه للجميع ... اخواني سوف اقص عليكم قصة حدثت لي قبل عدة سنوات ...
وقد كتبتها في عدة منتديات وحبيت اكتبها لكم هنا
طبعا حينما استرسل بالقصه راح اقلبها عاميه ... راح اعطيكم ابرز احداث القصه تخبرون شيبنا والذاكره لكم عليها
نبدا
كان في ليلة ساهرين عندي شباب وكان محور الحديث عن المتسولات والطرق الجديده اللي قاعدين يبتكرونها
فقال لي صاحبي انه مره كان يتمشى عند الراشد ...
ولقى حرمه على ليموزين وقفته وقالت تكفى يا ولد ..
انا من اهل الجبيل وجايه هنا وما لقيت ربعي اللي انا جايه لهم
وما معي فلوس ترجعني وتكفى اعتبرني اختك ومن هالكلام
الرجال يقول طلعت من جيبي خمسين ريال او قال مية ريال وعطاها للحرمه
يقول بعدين رحت اتمشى يم الجمعه سنتر ويقول لقيت نفس الحرمه ووقفتي ... ويوم عرفتني مسكت الخط وهربت
وكان كل سوالفنا هذيك الليله عن حركاتهم وطرقهم الجديده من فواتير الخ
ومن بكره طلعت بسيارتي وكانت النية اني اروح للعمل واخذ راتبي (( شيك )) واروح اصرفه من البنك
ورحت واخذت الشيك وكملت طريقي ورحت للبنك ...
ولما وصلت البنك ما ليت موقف لسيارتي وابعدت شوي عن البنك ووقفت السياره ونزلت منها
الا شوي وتطلع لي ذيك الحرمه اللي يعني اعطيها بالعمر كجسم اقصد ... يعني فوق ال 50
شوي والا تقول لي يا ولدي قبل كل شي اعتبرني مثل امك .... وانا على طول جاء ببالي سوالفنا حقت البارح
ابتسمت ابتسامه خبيثه ....
قلت سمي امري ...
قالت يا ولدي انا من اهل الاحساء وبنتي بالمستشفى تسوي
غسيل كلى ومن هالكلام وان مامعهم فلوس وكل اللي تبيه انها تطلع بنتها وتروح للحساء
وتبي حق الطريق ... قلت يا خاله اللحين خليني ادخل للبنك وبعدها يصير خير ...
دخلت البنك وصرفت الشيك واخذت فلوسي كلها معي وطلعت
... ويوم جيت للسياره ما شفتها ...
. ما ادري جاني احساس قلت لو انها شحاذه كان ما اطلع من البنك الا وهي راكبه فوق كبوت السياره بعد
حسيت انها صادقه يعني مجرد احساس واحساس نوعا ما ضعيف
قعدت اتلفت يمين ويسار الا وهي تطلع من بين السيارات تخليني اشوفها
بس اذا انا عندي نيه اعطيها بنادي عليها
المهم رحت لها ويوم جيت لقيت معها ولد صغير عمره تقريبا 7 سنوات ما يسمع وما يتكلم
المهم قلت كم يكفيك يا خاله ...
قالت ابد اللي يوصلني بس وحق لموزين بروح اطلع بنتي من المستشفى ....؟؟
بخباثتي حبيت اشوف صدق كلامها قلت وش رايك يا خاله انا اوديك .. للمستشفى وبعدين اوديك للقطار ؟
ابغى اشوف هي صادقه ولا لا
فاجأتني بردها
قالت اي والله يا ولدي اذا ما عندك شغل والله اني مستحيه وما اقدر حتى امشي بالشارع
وما معي الا ذا الولد وانت انشاء الله انك بمقام ولدي ....
طلعت المسألة جد مو مزح
رحت ووديتها للمستشفى اللي كانت بنتها فيه ... وجيت ولقيت بنتها عمرها 21 سنه
وكانت مريضه عندها تقريبا فشل كلوي (( الله يشفيها))
المهم طلعت بنتها والان اتضحت الامور ان المسألة جد مو لعب ...
انا والله استحيت من نفسي وقتها ....
طبعا ترى بنتهم كانت بمستشفى خاص واصريت انا الا انها تكمل علاجها ودفعت التكاليف
كانت تقريبا فوق ال 700 ريال بس فيه فاعل خير تكفل ب 300 ريال ودفعت الباقي انا
المهم ركبتهم بالسياره وولدهم الاصم الابكم راكب قدام
واشوف بنت تدعي على صالح .....
انا كنت ودي اعرف من هو صالح هذا ...
وفي عز فضولي لمعرفة من يكون صالح جأت الاجابه من الحرمه الكبيره ...
قالت جزاك الله خير يا ولدي ...
انا ولدي صالح جابنا من الاحساء ونزلنا هنا وكلمته زوجته زعلانه ليه يجيبها للخبر ...
وتركنا وراح رضاء لها ... واخذ الفلوس اللي معنا بناء على طلب زوجته
والله يا عالم قالتها وهي تبكي اقسم لكم بالله ان دمعتي نزلت ولو كان صالح قدامي كان ذبحته وقتها
وصارت تشكي لي عمايل ولدها فيها وفعايله وانا وربي مو قادر ارد
ويوم وصلت للقطار نزلت وحجزت لهم بأسمي طبعا اعرف واحد هناك وما قصر معي
وعطيتهم اللي قدرني الله عليه ....
ورفضت ما تمشي الا تاخذ رقم حسابي ورفضت
وقالت طيب عطني جوالك واعتبرني امك
واي وقت تذكر ان لك ام بالاحساء
وسافرت ام صالح ....
وبعد تقريبا ثلاث سنوات بعمري ما مريت بظروف ماديه مثل هذاك اليوم وبعادتي مهما صار
ما احب امد يدي واطلب سلفه حتى من اخوي علما ولله الحمد حالتي الماديه نوعا ما جيده
ولكن يعني مر علي وقت جالس بشقتي لحالي (( عزوبي طبعا )) والله يا اخوان ما معي الا 3 ريال
ما ادري وش اشتري فيهم ... اجيب فيهم عشاء ولا فطور ولا وش اجيب والراتب باقي عليه اسبوع وقتها
وكنت فعلا متضايق
وانا في هالمعمعه دق تليفوني .....
رديت
المتصل : السلام عليكم
انا : عليكم السلام هلا
المتصل : انت محمد
انا : سم ايه محمد من معي
المتصل : ما تعرفني بس ممكن اشوفك اخوي محمد
انا : مو مشكله بس من معي ؟
المتصل : ما تعرفني بس نتشاوف ويصير خير
طبعا ما انكر حيرني هالرجال بس تواعدنا بمكان
ورحت له وما انكر مجهز العجرا بالسياره ههههه
المهم اول ما وصل للمكان وقف ونزلت الا وينزل الرجال وقال انت محمد قلت اينعم انا محمد
ثم التفت على السياره وقال تعالي يا عمه
نزلت حرمه والله ما عرفتها وقربت مني ومدت يدها وخامستني !!
وانا بحيرتي قالت ما عرفتني
قلت لا والله يا خاله ما عرفتك
قالت انا ام صالح تذكر قبل كم سنه يـــ قاطعتها ايه ايه عرفتك وسلمت عليها
قالت والله يا ولدي اني مضيعه رقمك ولي كم شهر وان ادور عليه ما لقيته
وامس وانا ادور احد الادويه بالادراج لقيت رقمك وما هنا لي بال لين ارجع لك فلوسك اللي عطيتني
رديت قلت يا خاله مالي فلوس عندك وانتي قلتيها يا خاله انا مثل ولدك وانا ما عطيتك شي وانا ابي اخذه
وتحلف حلف انها ما تركب السياره لين ترجع لي فلوسي
وزود على هذا اني لازم اسير عليهم بالاحساء
فتخيلو يا ناس لي كم سنه وانا ولله الحمد الفلوس بيديني ...
واليوم اللي تقفلت بوجهي من كل الابواب
ارسل الله لي ام صالح ....
انا يا اخوان يوم اقول لكم هالقصه ماهو افتخر فيها
لا والله بس يا اخوان اعمل خير وقطه بحر وقصتي الظاهر دليل على هالكلام
اهم مافيه يا اخوان النيه
اعتذر يمكن فيه اخطاء املائيه مو يمكن الا اكيد
بس تحملونا
لكم مني كل التحيه وكل التقدير |