السلام عليكم ..
كل عام وانتم بخير ومن العايدين الفايزين
واللي حجو هالسنة اضيف حج مبرور وسعي مشكور
انتم مافقدتوني خلال الايام القليلة الماضية ؟؟؟;) ;)
انا كعادة سعادتي كل إجازة عيد اطس الى البراري ..يعني أكشت
وهالمرة الطسة غير ... على وزن جدة غير ..
ليه غير ؟
لانها كشتة زيوووووووود
على وزن عزبة زيود{ اللي يضرب بها المثل للشيء الحوسة} .;) ;)
انا اقولكم وش صار ...
تولمت أنا والزقرت لنقتحم البر ونكشت ...;)
حملنا الونيت بما لذ وطاب من المعدات البرية من خيمة + عدة طبخ + جراكل موية تكفي لـ100 سنة
+ حطب سمر وارطا
+ ثلاجة مليئة باللحم الملطوش من بيوتنا
+ ماطور كهرب { أجل ماطور تلفون
}
+ وخلافه... يعني اي شيء يخطر ببالك تلقاه معنا
مابقى الا نجيب كورة بيسبول ..
المهم انطلقنا من مكان تجمعنا الى البراري في حوالي الخامسة عصرا
وكانت هذي المشاهد لنا وحنا في السيارة :
ــ السواق مبتلش بشريط نشب بالمسجل ..
ــ واحد جاي معنا غصب ...حاط يده على خده ويهش الذبان من ضيقة الصدر.
ـــ واحد يسولف معي وهو يقشم فصفص
والسواليف عن أحداث الحادي عشر من سبتمبر ويتخيل لو انه كان هناك بوقت الاتهيار ..
.وفجأة حول دفة الحوار وسألني وقال : أنت جددت رخصتك ؟؟
قلت : لا ليه ؟
قال : ورني اياها ..
طلعت له المحفظة ..ووريته الرخصة .
قال : انت فصيلة دمك -B؟
قلت وش دخل فصيلة دمي من تجديد الرخصة ؟؟
هات الرخصة اقول ..
فجأة
تحرك المغصوب على الكشتة
والتفت على السواق وقاله : وقف عند المحطة ؟
قال : السواق : ليه ؟
المغصوب : ابي اشتري جريدة
السواق على طول وقف علشان المغصوب لاتتعب نفسيته .
نزل المغصوب للبقالة .
طول علينا المغصوب بالبقالة
نزلت انا استعجله ..
ركبنا السيارة ..
كملنا طريقنا للبر ...
مشينا حوالي سبعين كيلو من البقالة الى مكان الكشتة ..
وصلنا مسيان الضعيف ..
نزلنا من السيارة كلنا الا المغصوب
رحنا لصندوق الونيت علشان ننزل الاغراض ..
نزلنا الخيمة وطقيناها ...
والماطور شغلناه و شبكنا اللمبات ..
وضبطنا مكان الطبخ داخل الخيمة ..
طبعا دخل صلاة المغرب بس صليناها جمع تاخير مع العشاء
و انا اصلي لمست مخباتي
ادور محفظتي مالقيتها .
.
تخوبلت بصلاتي ونسيت وش قريت وبديت افكر بهالمحفظة
يوم خلصت الصلاة سألت الشباب عن المحفظة؟؟
قالوا ماشفناها ..
دورنا بمكاننا ودورت بالسيارة مالقيتها ..
قلت وين راحت وجع ؟؟
المشكلة فيها اوراق مهمة والا الدراهم مافيها الا طفسه .
تذكرت يوم خويي يقولي ورني الرخصة الظاهر اني حطيتها بحجري
وطاحت مني يوم نزلت للمحطة ..
قلت للشباب لازم ارجع للمحطة ..
قالوا : يووووووووووو تروح سبعين كيلو
قلت : الشكوى لله اروح .. مابقى الا المحطة ادور فيها
المهم رحت وقعدوا الشباب يزهبون العشاء .
وطول الطريق ادعي الله اني القاها .
وصلت للمحطة وقعدت ادور بالمكان اللي وقفنا فيه ..مالقيت شي .
رحت لراعي المحطة وسألته : عن محفظة ضايعة ؟؟
قال : ايوووووه انت جمجمة الهلال ؟
قلت : اييييييييييييه انا هو انا همهمة الجلال من الفرحة تخربطت .
قال : فيه واحد لقاها ويقول انه يعرفك وراح يوصلها لك ..
قلت : من هو؟؟ ووين راح ؟؟ وش سيارته ؟؟ وشلون شكله ؟؟ وليه تخليه ياخذها ؟؟
قال : ياخي انا مالي شغل هو لقاها ..
وبعدين لو يبغى يسرقها كان ماجاء وقالي عن موضوعها .
قلت : والحل الحين وين القاه ذا ؟؟
قال : هو يقول انه يعرف مكانكم اللي تكشتوا فيه وانه راح يوصلها لك .
قلت : أكيد هالكلام .
قال : هذا اللي سمعته .
المهم اقفلت راجعا للشلة ..
اول ماوصلت سألت الشباب : ماجت المحفظة ؟؟
قعدوا يضحكون علي ..
قالوا وشلون تجي .. هي حمامة ..
فهمتهم القصة .
قالوا: يارجال ان شاء الله تجي مع الرجل المزعوم ..
تعشينا وانا مالي نفس بالأكل ...
كل شوي اناظر حولي ادور سيارة جاية
وجاء وقت النوم ..
ونامو الشباب الا انا اتقلب
ماغفا جفني ولا للنوم طاب
وكل ماسمعت صوت سيارة من بعيد نطيت من فراشي وطلعت من الخيمة
اشوف هالسيارة ..اغديه راعي المحفظة .
حتى تعبت ومليت الانتظار ونمت ..
وعلى هالحال 3 ايام ماتهنيت بالكشتة ولا جاء الرجل المزعوم اللي معه محفظتي ..
جاء وقت الرجعه .
فكينا الخيمة ..
تذكرون خوينا المغصوب
صارهو أنشط واحد فينا فك الخيمة لحاله وشال الماطور ومتحمس .. تدرون ليه ؟؟
لانه جاء وقت الرجعه ..
وانا صرت المغصوب على الرجعه ماودي يرجعون
لازال عندي أمل ترجع لي محفظتي ..
وحنا بطريق الرجعة قفلت معي وجاني احباط وبديت اكلم نفسي وأقول :
هالكشتة حوسة في حوسة
صدق انها كشتة زيود
كشتة زيوود
كشتة زيووووووووووووووووووووووووووود.
انتهت قصتي الخيالية ..
تبون القصة الحقيقية ...
أنا صار لي نفس هالموقف بالضبط بس يوم رجعت للمحطة وانا قاطع 70كيلو
لقيت المحفظة بمكانها لم تتحرك .. مع ان المحطة مليانه بالزباين ..
بس محفظتي حفظها الله سبحانه وتعالى من أعين الناس ..
وانصحكم ياأخوان بقراءة وردكم اليومي فهو حصن المسلم من كل شر .
ــ اقرأوا الفاتحة
ــ اقرأوا أول خمس آيات من البقرة
ــ آية الكرسي
ــ آخر آيتين من البقرة .
ــ اول آيتين من سورة غافر
ــ آخر خمس آيات من سورة الحشر
ـــ قل هو الله احد والمعوذتين ثلاث مرات
ـــ { اعوذبكلمات الله التامات من شر ماخلق } 3 مرات
ـــ { بسم الله الذي لايضر مع اسمه شيء في الارض ولا في السماء وهو السميع العليم }3 مرات
وماتيسر لك من الأدعية ...
والله خيرا ً حافظ وهو أرحم الراحمين
وجزاكم الله خيرا
تحياتي للجميع
أخوكم جمجمة الهلال
كشتـــة زيوووووووووووووو.. 
الوضع العادي
