طبخات سهله و خفيفة للمغتربين - نادي الهلال السعودي - شبكة الزعيم

كاريزمـا · #1 26/12/2007, 10:49 AM

السلام عليكم ورحمة الله وبركاته

صباح الرضى للكل وردهورده

انا فتحت موضوعي لأنه بالتأكيد الكثير من {المغتربين و المغتربات } تعبوا من أكل ريسترانت فوود ومشتاقين للهوم فوود

فحبيت أنزل لكم طبخات خفيفه وسريعة التحضير ماتكلف تغسيل صحون

( سندوتشات - حلى - عصيرات - اصناف للعشاء )

وأن شاء الله تعجبكم ..

واللي عنده طبخات يحبها لو يقدر يضفها للموضوع ...عشان نستفيد ..

ورده كلوب هاوس ورده

سهله مره

3 طبقات من خبز التوست أو بريد .. تقطع على شكل مثلث ...

الطبقه الأولى: توست +بيض قرص +جبن شرائح + بعدين طبقة التوست

الطبقه الثانيه : تونه اوكشنة دجاج أو مرتديلا (على حسب الرغبه ) + مايونيز + جزر مبشور

+ كزبره + خس امريكي ..

بعدها نغطيها بطبقة التوست ونغرس بوسطها شوكه بلاستيكيه وعلى راسه زيتونه >> تبع الشكل الجمالي

و عشان ماتفكك عليكم السندويتش

ورده حلى اللؤلؤ (حلى قهوه ) ورده

الطريقه :

كيك شوكلاته ( كيك امريكانا الجاهز )

نفتت الكيك بالصينيه ونضغط عليه باليد لحد مايتماسك ..

الطبقه البيضاء الثانيه :

4 حبات جبن كيري - علبة قشطه - كأس بسكوت مطحون ..

ونخلط المقادير مع بعضها بالخلاط ثم نصبها على الكيك بالصينيه وندخلها الثلاجه يتماسك شوي

الطبقه الثالثه السوداء:

جلكسي ساده + نصف علبة قشطه ..

نحطها في حمام مائي >> كني اسمعكم تقولون وش هو الحمام المائي

والا تدرون ريحوا روسكم واشروا علبة جلكسي سايل جاهزه ..

وتحطون الخلطه السوداء على الخلطه البيضاء وتدخلونها الثلاجه لحد ماتجمد

بعدين تقطعون الحلى ياشكل ( مربع أو دائري ) ثم تجملون كل قطعه بحبة {المالتيزرز }

وبالهناء والعافيه .. ورده

وأي شي تبغونه من صنوف

الأكل عددوا لي وانا بأذن الله أجيبها لكم بطريقه مبسطه

والله يوفقكم بدراستكم ويعينكم على الغربه

بحفظ الرحمن ..

أختكم ريما ..

family guy · #2 26/12/2007, 04:46 PM

شكرن .... مره مفيد

صقر فيصل · #3 26/12/2007, 08:55 PM

هلا بالشيف ريري

ما شاء الله موضوع ممتاز لنا
<< أشوى انه بالشرقية

.. بس انه عزوبي

ألف شكر لك..

ما ادري يا أختي ممكن حلى ثاني أسهل شوي وما فيه مكسرات أو بقوليات؟

صراحة ودي أخسر كريسبي كريم

..،

الله يعطيك العافية أختي ريما على هالموضوع

الرائع في محتواه

والجميل في تنسيقه

تقبلي تحياتي وتقديري الفائقين

hmadh al-hilaly · #4 27/12/2007, 12:57 AM

مشكوره اخت ريما على الاصناف الحلوه .. بس ياليت تحطين لنا وشلون نسوي مكرونه بالبشاميل ..
تقبلي مروري..

Canada's gallant · #5 27/12/2007, 12:28 PM

أحلى

الأخت ريما قالطة معنا

إذا رجعت لبيتي بأجرب شيء منهم بس يويلك اذا ما كانوا حلوين

واصلي أختي و خذي حسنات في الغلابة

يعطيك العافية

هلالية بنت هلالي,, · #6 28/12/2007, 02:07 AM

السلام عليكم ..

جبتلكم (ايها المغتربون)

حلى رهيييييييييييييب مرررررره (حلى قهوة) ..
مررررررره سهل ومقاديره سهله جدا جدا جدا

اتمنى يعجبكم..
ولا اوصيكم تذوقون اخوياكم الاجانب عشان يعرفون ان عندنا طبخات سنعه

..

وهو بالبدايه ..سمو بالله

المقادير:
كرتون كيك يمامه (او اذا ماكان عندكم اي كيك يشبه له),,
17حبة بسكوت شاي
2باكيت كريم كارميل
اكاس ماء
ملعقه كبيرة نسكافيه
3 ملاعق حليب بودره

الطريقه:
الطبقه الاولى: نجيب (قدر)

<<<حلووة قدر
ونحط فيه كاس ماء و2باكيت كريم كارميل .. و3ملاعق حليب ,,ونحطه بالنار ليين يغلي

الطبقه الثانيه: نحط بالخلاط 17 حبة بسكوت مكسر كسر صغيره و علبة قشطه وملعقة نسكافيه
بعدين نصب عليها المقادير اللي ع النار ..
في الخلاط طبعا

بعدين نجيب صنيه (احسن تكون قزاز) ونفك كيك اليمامه من النص ونصفه عليها بعدين نحط الخليط فوقها ..

في الاخير نحط عليها شوووووووي كاكاو مر

ونحطها بالثلاجه
لين تصير شوي جامده

وبالعااااافيهـ ,,

ملاحظه: انا مني مسؤلة لو كلتوا اصابكم !!

الرمش الحنون 9 · #7 28/12/2007, 03:38 AM

طيب بنجربهااااااااااا
وياويلك اذا ماطلعت كشخه

family guy · #8 28/12/2007, 04:17 AM

صعبه جدن

كاريزمـا · #9 28/12/2007, 11:12 AM

كل الشكر لمن زار متصفحي ..

***********

ابو صقر تفضل

مافيه لالوز ولا مكسرات

((حلى القراطيس))

هذا حلا بصراحه شكل وطعم وسهل مررررره

وهوعباره عن أشكال حلاو مقرطسه

وهذا الشكل النهائي للحلى ..

المقادير:

1- سبرنج رول مربعات كبيره

2- حلاو جالكسي أوباونتي أوسنكرس أومارس

3- علبة حليب مركز( نستله) وهيرشي للتزيين

وهذي صورة المقادير

الطريقه
قطعوا السبرنج رول زائد يعني أربع قطع

777

ناخذ كل قطعه ونحط بها قطعة الكاكاو

وبعدين نلفها على شكل أصابع

نلف طرفها بخيط مكره بدون ربط بس لف بقوه

777

والطرف الثاني نفسه بعد بيطلع شكلها زي الحلاوه

777

نقليها بزيت حار

ونفك الخيوط منها

ونرصها بالصينيه ونصب فوقها الحليب المركز والهيرشي

وإنتبهوا ترى السبرنج رول الصغار ماينفع يتقطع معاكم لازم الكبير وإنتم قطعوه

(( الصور منقوله ))

وبالعافيه

ولا تنسوني من دعواتكم

ورده

كاريزمـا · #10 28/12/2007, 12:01 PM

hmadh al-hilaly

هذي هي طريقة المكرونه بالباشميل ان شاء الله تكون سهله لك وتضبطها

المقادير :

1- كيس مكرونه

2- حشوة لحم او دجاج حسب الرغبه ..

كيف نعمل الحشوه :

2بصل نقطعه صغير ونحمسه بشوي زيت ثم نضيف عليه ملعقة بهارات
بعد مايحمر البصل نضع عليه اللحم ( الدجاج ) ويملح ونتركه على نار هاديه مع التقليب لحد ماينشف الماء ثم نسكر عليه

3- باشامل ..

طريقة الباشامل :

نخلط 1كوب ماء + 2ملعقة حليب + 2ملعقة دقيق + رشة ملح

نحركها على النار مع بعض لحد ماتغلي وتغلظ >> تصير ثقيله

اذا ماضبطت معكم لأنها شوي صعبه وحنكليه

حطوا عوض عنها ( 6 حبات جبن مثلث + 1 علبة قشطه ) بالخلاط وتقوم مقام الباشامل

الطريقه :

- تسلق المكرونه في (ماء . ملح . زيت ) مانخليها تطول عشان ماتصير خبيصه

- نحضر الصينيه ونحط اول شي تحت نصف مقدار المكرونه ثم فوقها شوي من الباشامل ثم فوقها حشوة اللحم ثم باقي المكرونه
ثم نغطي الوجه بباقي الباشامل
وندخلها الفرن شوي لحد ماتحمر من فوق ...

وهذا شكلها النهائي :

وبالعافيه على قلوبكم

ورده

*****

Canada's gallant

هلا بك اي جيت عندكم

نشوفكم تبون شي ماشيات

يالله انت جرب وشوف شرط الاقيك مسنتر بموضوعي

أطلب واتمنى

حياك الله ..

هامور البورصه · #11 28/12/2007, 12:46 PM

هلا والله بالشيفه ريري

انا جاي طاااير واقول وش هالسنع عند هالقصيميه متوقع انك حاطه اكلات

مثل ام حسين وام وليد وام طارق

اثااريها مرتدلا وبيض وحلى قهوه

ريري الله يجزاك الف خير واصلي يالشيفه

ترى والله جد العزوبيه المغتربين

يعانون من اكل المطاعم حتى انهم يصيرون ياكلون بس عشان يسدون جووعهم

شكراً ايتها الشيفه ريما

يا شيفه

،،،،،،،،،،،،،،،

بس جد والله مهوب قصدي تحطيم والله قصدي مزح

والله يعطيك العافيه يالله انا برب برووح اتغداء

<== شطح

abo_nasser · #12 28/12/2007, 01:49 PM

هلا وغلا اختي ريـــــــــــــما...

والله صرتي تسيرين على المغتربين الغلبانين..

نحمدالله ونشكره اني مغترب في بيت ابوي..

الله يعطيك العافيه اختي ريما وكثري من الطبخات الخفيفه والسريعه
لانك تعرفين الشعب السعودي نشيط بشكل ما كبير..

والله يحفظ اخواننا المغتربين ويوفقهم ويهون عليهم غربتهم..

سلاااااااااااااااام

family guy · #13 28/12/2007, 07:54 PM

يمال الجنه ياريري هكتور
انا ان شاء الله بسوي المكرونه
واصلي على هالعمل التطوعي الجميل
يعطيك العافيه ....... مفيد جدن

hmadh al-hilaly · #14 28/12/2007, 08:25 PM

الف شكر لك اختي على طريقة المكرونه..

رعبوبة الزعيم · #15 29/12/2007, 04:28 AM

هلا وغلا ماما ريمـا

ماشالله عليك اثرك طباخه ماهره

.. خلاص اجل ابيك تعلميني بعدين
على الطبخ لان محاكيتك ماتعرف تسوي الااندومي حتى البيض تحرقه

انا مغتربه بغرفتي

الله يخليك لنا ياماما ريما وتطعمينا من اكلك اللي يخلي الواحد يصير كنه هيا الشعيبي

الله يرجع كل المغتربين والمغتربات بالسلامه لوطنهم ..
والله يعينكم..

عواافي ريري ورده