رحلة أبو عبدالله البرية ( تبطح بالغمارة وبزاليا بدون ملح وعجائب على كيف كيفك ) - نادي الهلال السعودي - شبكة الزعيم

algohmani · #1 24/12/2007, 09:12 PM

السلام عليكم ورحمة الله وبركاته

هلا وغلا بحبايبي اللي بالمجلس العام :

رحلة أبو عبدالله البرية

قبل كم يوم فكرنا نروح نكشت كشته في البران عاد واخوكم يحب يروح مع الشباب بس خواف درجة أولى .
ولما رحنا باليوم الثالث للعيد رحنا المغرب من عقب ماصلينا بمسجد الحارة ( حارة أبو هشام على غفلة )
كنا راكبين في هايلوكس وصالون ( صالون هذي عندنا يمكن عندكم جيب .... إيه صالون مو صابون )
الطريق اللي رحنا معاه هالمره غير والمشكلة في واحد من الشباب مسوي نفسه فاهم وإنه عارف الطريق وحطينا أرواحنا تحت رحمة أطلس اللي من جنب القدة .
مشينا يمكن ثلاث ساعات شكيت بالرجال قلت يمكن ناوي يسوي فينا طاش ماطاش حلقة بث مباشر واحنا ماندري ؟
دقيت على الرجال لأنه يسوق قدام السياره اللي أنا فيها ( ها يابو الشباب وين طاعس بنا يكون ناوي علينا واحنا ماندري
رد علي وقال : (والله يابو الهلال ترا حنا مضيعين الخط بس ماعليكم انتم في أمان ) .
صاحي الرجال مضيع الخط ويمشي قدام ويقول إنتم بأمان المهم الرجال بعد خمس ساعات من رحلتنا وصلنا لمكان يياه عليه ( اسويلة دعاية والا بمجلسكم مسوين حذر للدعايات )
المهم نصبنا خيمتنا اللي مشققه وماكنا عارفين تقل فستان نانسي عجرم ( تعوذو من ابليس ولاتروحون بعيد ) تعوذتم ... نكمل

حطينا خيمتنا وضبطنا كل شيء بقي من يسوي الشاي عاد كلنا نعرف نسوي الشاي المحبوك حبكه تمخمخ راس الطفشان
عاد سوينا قرعه وجت في واحد أنا مغسل يدي من الشاي حقه بعد المره اللي طافت ( سوا شاي وحط ملح بدل السكر يبي يسوي مقلب)
حسبي الله ونعم الوكيل مزاجي خربان ( ودية للمهندس ) ويبيلة شاي وذا فاضي للمقالب .
المهم رحت عنده وهمست بإذنه همسه ( يابو خالد ترا الشاي يحطون علية سكر مو ملح قال : أدري أدري بتعلمني )
الرجال سوا شاي متعوب عليه بصراحه ومتعوب بقوه والدليل إنه نسى يحط السكر
جيت لين أبو خالد قلت يابو خالد أنت رايق على طول ياخي وين السكر قال : إيه إيه انا خليت السكر برا عشان كل واحد يحط السكر

على مزاجه ( متشيطن خارج نفسه )
عاد بالليل السالفه غير وشكيت منها أكثر من مره أنا رجال مقدر أنام إلين اسمع صوت المكيف خصوصا مكيف غرفتي اللي يوم اسمع صوته أقول أول أشوفلي واحد يشخر وهو صاحي بس ترونه يبرد مكيفنا( قولو ماشاء الله لو عطيتوه عين مجلسكم بيدفع التكاليف )

المهم الشباب نامو والجو بارد مايحتاج مكيف بس أنا براسي حبه ماتندق الا بصوت المكيف عاد الشباب يعرفون وضعي واحد منهم كان مجهز لي تجهيزه خاصة الله يجزاه بالخير مادريت عنه ( مسجل صوت المكيف حقهم في جوالة ومشغله ) اطالع يمين يسار الجماعه كلهم نيام من وين هالصوت مدري
المهم انا رجال رقدت على هالصوت وصحيت الصباح أنشد ياشباب أحد جاب مكيف شيء معه قالولو والله يابو عبدالله هذا ناصر الرجال قال بيسوي فيك معروف خابرينك رجال تتقلب بالليل يمين يسار عشان تنام قلنا نجيب مكيف لك .
المهم الحين عاد احنا من الجوع أحس أن بنقلب خشبة ماتعشينا البارح بسبب اننا كنا كسلاين قلت شباب نبغا فطور ..

قلتها بطريقه حسوا منها الشباب اني ابي ساندوتشات من بوفية ؟؟؟؟؟؟؟؟ هذي خلوها بدون دعايات

المهم طباخنا قال اصبرو إلين عشره والساعه بذاك الوقت سبعه قلت من جدك تراي جيعان

ولاتستغرب من الجوع آكلك حبيبي

قال : زين زين يابو عبدالله تسعه وعلشانك

قلت يالله صباح خير مالها الا الطباخ الغشيم يسوي فطور الصباح

خذيت القدر وحطيت الزيت من عقب ماولعت النار و قطعت البصل وياهو تقطيع كل قطعه بكبر خشتي

بس وش اسوي البصله كبيرة

حطيت بزاليا في القدر وعليها حبه تونه ( آه يابوفية أبو عبدالله فكره جات براسي وانا أطبخ ) وحطيت

الموية ( بنات المجلس يفتونا المويه قبل ولا البزاليا )

المهم الحين كشنتي ياكشنتي فوق النار ومدري

متى أخرجها بالضبط ياخوفي اخرجها نيه وياخوفي اخرجها محروقة .

سويت البزاليا والخبز معانا خبز جاهز المهم بسم الله وصحيت الشباب تقل معاي مضغوط ولا صحن من صحون الحاشي اللي على مستوى

بدينا ناكل انا ماكلت قلت بشوف وجيه الشباب وبحكم على طبختي أول أكل قال من اللي سوا البزاليا

أطالع فية !
خير وش فيها

قال ماعلموك بمكان الملح ولا إيش

قلت بسوي فيها فاهم زي خويي : ماحطيت الملح علشان كل واحد يحط ملح على مزاجه

ياعيني جدتي على هالتصريفة

الطباخ زعل وقال مره ثانيه بطل لقافة ولاعاد تحشر نفسك بزاوية ماهي لك ( انا شفت الراية حاسبها

لي اجل ضربة مرمى ) .

الغدا سواه الطباخ وماعليه كلام بس أخ لو البيبسي موجود ذبحونا بهالسفن .

في العصر خذيت الهايلوكس قلت باخذ جولة لوحدي والشباب يحبون المشي المهم نشرت بالهايلوكس نشره مجنونه بصراحه

طعست بمكان لو في الجوجل إيرث مايخرجونه لا وأبشركم غرزت ( قلناها سوو سفلت في الصحراء محد سمعنا )

ايو الله جد مو فضيحه واحد سواق زيي يغرز ؟

لا وبغيت ادق على احد الشبكه ولا برج ياعيني الشباب مايدرون عني أنا حي ولا ميت جا المغرب علي

وانا أبغا اطلع السياره من هالنشبة اللي انشبتها فيها وماهي راضية تفك تعليقتها

قلت يازين التبطح في الغماره ولا يجي ذيب وياكلك لو أسد مو مشكله بس ذيب لا المهم قفلت على نفسي بالغماره ولاحس ولاخبر جيعان مو جيعان مو مشكلة مكيف مو مكيف برضو مو مشكلة المهم إني حي

جلست مدري حول ثلاث ساعات في الغماره وإلا بواحد من الشباب يوم هو يدق على زجاج السيارة ياعالم تقل شايف خشة رئيس دولة ولا وزير مو خشة ناصر اللي تقل ساحة بغداد من كل جهه فيها طقه
( أخ ياعلية طق بس كيف أنطق مدري وأسالو مجرب ولا تسألو خبير )

الرجال مسك جوالي ودق على الشباب جوالي عام عشان كذا خلوه سبيل كل واحد معاه إتصال يدق محولينه كابينه وأنا مدري مسكت الشبكه معه ( بدري تو الناس ليلة كاملة بالغماره وتو تمسكين )

ودق على الشباب وسحبو السيارة .

قضينا يومين على مستوى في البرية مواقف وطرائف بس وين قناة المجد عن كشتي

مانطول عليكم عاد هنا ضيوف والمثل يقول ياغريب خلك أديب

أتمنى ان لا أكون ضيف ثقيل على مجلسكم بس إنتهبوا ترون الشباب في مجلس الجمهور حذروني من التعاقد معكم ولو جتني رساله خاصه زي اللي جات المره السابقة بيشتكون على مجلسكم

عقدي ساري حتى ثلاث شهور مع مجلس الجمهور الجماعه دافعين 50 مليون في العقد

تصبحون وتمسون على خير

أخوكم : أبو عبدالله