في البدايه..بسم الله الرحمن الرحيم ,ثانيا هذه الصفحة هي آه لكل من عجز او تعب وهو يقول ..آه وبلا فائده.
اعلن في الصحف الرسميه والغير ر سميه والرياضيه وغير الرياضيه عن خبر يزفه مسئول كبير في شركة الاستنزافات البشريه ..عفوا الاتصالات السعوديه عن تخفيض رسوم تقديم الهاتف الجوّال الى (800) ريال سعودي فقط لاغير ..واذا تزف الشركة هذه التهنئه الى جميع المواطنين وتذكرهم بحرصها الدائم على خدمة جميع المواطنين في بقاع هذا الوطن الغالي....وتوني اكمل قراية الخبر الا وخالي اللي كان جالس جنبي يرتفع عليه الضغط (المسكين من جيل(0554) اللي قدموا ايام الجوال بعشرة الاف ر يال سعودي ...ياحليل خالي ماخلا احد الا وشتمه ..المهم ماعلينا قرر مجلس العائله الكريمه ان يجتمع في مساء يوم الخميس .....وبالفعل جا يوم الخميس واستغربت البيت هادي مرة وكانك تحس في قرار حاسم بيطلع ..وامي مصلحه كيك بالشوكولاته اللي احبه وجريش علشان تقردن ابوي ..حسيت وقتها في شي..وبدى الاجتماع وطلبت امي الكلمه وقالت بما انكم ياكل العيال وابوكم عندكم جوالات اطالب انا و عبدالعزيز بجهاز جوّال للحاجة وللضرورة ويعلم الله انه ليس للترفيه..وقاطعت كلمتها الغراء بتعليق بس انا ياميمتي مابي جوال ومادريت الا امي توطا على رجلي وتقول لي بشويش بتسكت ولامافي كيك انت قل موافق وماعليك..كتمت الاه وقلت اه قصدي ايه موافق وامي صادزة ياحضرات الحضور ..وصارت الكلمه عند ابوي وقال لها ليه تبون جوّال عبدالعزيز يبيه يمكن يحتاجه بس انتي وش عازتك فيه..اول مرة اشوف امي تطب في ابوي لاوالله عاجبك اني كل مارحت عرس الاحق هالحريم ابي جوال ادق به عليكم ولاعاجبك اذا رحت السوق وتاخرتوا علي ..انطق عند باب السوق كاني طرارة ولا عاجبك ان حصيصة مرت اخوي عندها جوال وكل واحده من بناتها,لاجيت عندهم كل ساعه ناتقه واحده منهم تقول عن اذنتس ياخالتي جوالي رن ولا امهم حصيصة تقول لي ليه ماتطلعين جوّال عائلي ارخص ..هذا اللي ناقص نست نفسها يوم ياخذها اخوي وش كانت وش كان ابوها يومها مترصصه مع اخواتها سبع في بيت طين ....اقول بعد ولا اسكت ..وماشفت لكم الا ابوي راسه تحت الطاوله ورافع الفانيله يعني الرايه البيضا .. ويقول لها موافق موافق اذا بغيتي طلعت لك هاتف نقال حق الاقمار الصناعيه الله مير يسلمتس ويخليتس لي ..والا باخوي الكبير يقول طيب وعبدالعزيز وشلون بتقسمين الجوّال بينكم يمه ..ردت عليه امي بكل بساطة انت بس انطم لك يومين اول ماترجع من الدوام ترقى على حجرة مرتك كان مالك ام... وما يقص ضهرك انت ومرتك هالشيفه (وما=مدري وش معناها بس اسمع امي تقولها هي شتمة بالتاكيد) ..واتدخل انا احل الموقف قلت ياخي انا متنازل عن الجوال لامي عندك مانع اسكت بس ..المهم مع نهاية هذه الجلسة الحامية الوطيس قرر مجلس العائلة بما يلي ..ابوي يدفع 1200 ريال قيمة الجهاز ..اخوي الكبير 800 ريال قيمة الاشتراك.واخوي الثاني الاكسسوارات بمافيها الكار كيت ..(امي عندها امل ان الحريم بيجيهم يوم يسوقوون سيارات ) وانا علي تقديم الخط وتركيب الشريحه وتنزيل صور ونغمات من الانترنت.
يوم السبت رحت للبنك وسددت القيمة المطلوبه واستلمت الايصال وطمرت به لمكتب الاتصالات وعبيت الاستماره ومعي دفتر العايله ..طبعا باسم امي اعني استمارة التقديم مو دفتر العايله واروح بها للشباك واعطيها الموظف ويقول لي وين صورة البطاقه الشخصيه ابتسمت له قلت له صورة دفتر العايله ماتكفي قال لي لا لازم البطاقه قلت الله يحييك هالجوال لامي مو لي .قال اها طيب وين الكفيل قلت هذي طال عمرك كفالة ابوي لامي وصورة بطاقته وشهادة من المحكمة مصدقه باثنين شهود تفيد بان الكافل اعلاه هو زوج المكفوله اعلاه..ولا بمدرس نحو كان واقف وراي ويسالني مدري يسال الموظف طيب اذا الرجل طلق زوجته وش يصير يقطعون جوالها ولا هو يسحب الكفاله ولا وش الوضع ويرد عليه الموظف اقول صف زين في السرى وخلك ساكت اسالتك هذي قلها لاحد المسئولين ولا اطلع للوزارة وقابل الوزير..ويسكت الرجال اللي وراي ويلتفت علي الموظف ويقول لي نبي شهادة من عمل الكفيل بانه قادر على التسديد وشهادة بان الكافل يمتلك خط جوال او ثابت ..قلت له الله مير يسلمك الاولى معي لحظة اطلعها لك من جيبي والثانيه يعني ماخبرتكم تطلبونها من احد قال لي ايه بس اذا احد بيكفل احد لازم يقدمها قلت طيب ليه احد يكفل احد بالاساس قال لي لاتكثر هرج المسئولين يشوفون اللي انتم يالمواطنين ماتشوفونه.قلت له اجل الله يحيك اصبر لي ساعه اطمر لعمل ابوي اجيب ذيك الشهادة وارجع بس الله لايهينك اذا تبون شهادة ثانيه مثل حسن سيرة وسلوك شهادة من البلديه ..ولا شهادة تطعيم من وزارة الصحة ياليت تعطيني خبر قبل لا اروح..قال لي بس اللي طلبتها منك..واروح لعمل ابوي واخش عليه وهو في اجتماع واخذ الشهادة واصدقها من رئيسه (ساعتها حمدت الله ان ابوي مو وزير ساعتها من بيصير رئيسه) وارجع للهاتف واعطيه كل الاوراق ..ويقول لي خلاص طلبك كامل مرنا اليوم بعد العصر ونسلمك الشريحه قلت له يعني الله يسلمك اشتري الجهاز وماعلي قال ايه قلت الله يبشرك بالخير اجل العصر عندكم قال لي لا بعد العصر قلت له عارف طال عمرك بس انا طبعي حريص لاتشره علي قال بكيفك.
يوم السبت اذان العصر وانا مرتز قدام الهاتف ومعي الجهاز والسيكورتي واقف بوجهي يقول مرنّا عقب الصلاة وانا اقول له الله يخليك ابي اصلي جماعه معكم قال لي يابن الحلال كلها ربع ساعه قلت لها لا بس معكم اعظم اجري تكفى تكفى لاتحرمني من هالفخر العظيم وبالفعل دخلني وجلست اتسنن تقل اربع مرات عسا واحد منهم يقوم للصلاة واللي يسولف مع خويه واللي منسدح على تليفونه الله اعلممن يكلم المهم لهم نص ساعه على ما قام شايبهم قال ياشباب توضوا يالله الصلاة حانت (أي حانت الله يهديك الا قرب وقتها يطلع ) ويصلون وانا معهم وبعد الصلاة رحت لموظف لااستقبال واساله من وين استلم الشريحه قال لي شباك رقم سابع واروح هناك واسلمه رقم الاستماره وياخذها وهو يبتسم لي ويقول لي معليش مرنا بكره قلت وليه بكره مو طالع وزيركم يقول اضمن لكم الشريحة نفس اليوم قال الا بلا قلت طيب ليه كذا قال ياخوي معليش النظام متعطل ..قلت مو عيب عليكم تعطلون النظام قال اقصد نظام الكمبيوتر يعني الكمبيوتر المركزي قلت طيب ويعني شغلكم الحين ماشاء الله عليكم ماتشتغلون الا بالكمبيوتر وساعتها كاني شاتم واحد من اعز اهله قال لي ياخوي عيب احنا في الالفيه الثالثه وتبينا نشتغل بالورق استح على وجهك عيب يكفي هالتخلف والا انا وجهي ينقمط (يعني ينكمش) قلت له اسف طال عمرك بس متى اقدر امرك الله يسلمك قال بكره ... ومن بكره الصبح الساعه ثمان وانا عند وادخل الهاتف وكل مارحت لموظف القاه توه يفطر يقول لي يالله صباح خير خل نفطر قلت له طيب الله يسلمك واوقف انتظره وينزر فيني يقول ما احب احد يطالعني وانا افطر قلت له لا يالحساس طيب باجلس وانتظرك ومرت ربع ساعه واخينا في الله يفطر واروح له واعطيه رقم الطلب وناظره قال هذا امس قلت له ايه طال عمرك قال طيب امس النظام خرب قلت له عندي خبر قال طيب ليه جاي قلت له هم قالوا لي تعال بكره قال لا ياخوي ما امدانا نصلحه قلت له طيب الله يحييك متى بيزين نظامك ذا اللي يجلس نص السنة خربان ونص السنة اجازات قال اتصل علينا العصر وشف قلت له طيب ..واروح لبيتنا ويجي العصر واتصل واجلس نص ساعه ولااحد يرد علي المهم رد واحد قلت له السلام عليكم قال وعليكم السلام قلت له لو سمحت ياخوي انا حبيت اسال عن النظام كيفه انشالله اشوا شوي قال وش تخربط انت شارب شي قلت له ايه شارب كاسين قهر من فضل الله ثم فضلكم قال لي طيب النظام توه تحت الصيانه يبي له حول ساعه ولا ساعتين اتصل بعد شوي واتصل بعد 3 ساعات والقى السيد النظام متعطل اخر مرة اتصلت كانت الساعه 11 الليل..المهم يوم الاثنين الصباح اطمر لهم الساعه عشر واروح لخويي ذاك ماغيره ابو فطور وهو فال الجريده واقول له السلام عليكم قال نعم ..قلت له ياخوي رد السلام شايف بيغن قدامك قال وعليكم السلام قلت له بشرني عن النظام قال ابشرك زان قلت الله يبشرك بالجنه انت ووالديك قل امين..المشكله بيقهرني ماقال امين ..قلت له خذ هذا رقم طلبي ياليت تسلمني الشريحة قال وش دعوة ياخوي احنا سرعة الضوء تو النظام يزين مابعد ادخلنا طلبك وبياناتك ..قلت يعني ايش متى باستلم قال العصر انشالله ..وبعد صلاة العصر رحت لهم واروح شباك رقم سبعه واسلمه الطلب قال معليش ياخوي قلت وشو لا تقول النظام خرب قال لي لا فال الله ولا فالك بس اليوم انا مسئول عن الهاتف الثابت الجوّال عند شباك رقم 9 واروح لشباك رقم تسعه واسلمه الرقم ويقول لي انتظر احنا بنناديك واقول طيب واجلس عند الحاجز اللي يفصلنا عن قسم النساء..ماشاء الله تبارك الله طابورهم ماشي بسرعة البرق واحنا الرجال مامشا مننا الا واحد وانا بيني وبينكم اتسمع لاسامي البنات واسمع اسم رشا عبدالله ..رشا عبدالله ..رشا عبدالله ..واضحك اقول ياحليلها مطنشتهم ..ويقولون مرة ثانيه رشا عبدالله ال.... واقول في نفسي ياحليلها اسمها يشبه اسم امي (لاتستغربون ايه اسم امي رشا اللي عنده مانع يعلمني) وشوو رشا عبدالله ال... واروح لموظف الاستقبال و اقول له ياخوي ينادون على امي في قسم الاستقبال قال لي طيب وش اسوي لها قلت الله يسلمك انت مو فاهم القصة الطلب اللي معي باسم امي يعني انا اللي مفروض استلم الشريحة قال اصبر شوي ويلطعني ساعه وفي قسم النساء ينادون على رشا عبدالله والرجال يلعنون في رشا لانها معطله سراهم وانا اقول استغفروا ربكم ماتدرون وش ظروفها وشوي شوي يصلحون غلطتهم وعلى اذان المغرب سلموني الشريحة ورحت للسيارة ابي اركبها في الجهاز واركبها مير ولانفعت ولاطاعت تشتغل وارجع لهم واصف سرا عند شباك تسعه واقول له طال عمرك انتم مشكورين جزاكم الله خير سلمتوني الشريحة بس الله يرضا لي عليك الشريحة ماطاعت تشتغل ..قال رح لشباك رقم 4 هذاك للشكاوي واطمر لشباك رقم اربعه واقول له طال عمرك الشريحة ماطاعت تشتغل قال لي جبها وجب الجهاز وقام يسالني اسئلة بايخه الجهاز جديد ولا مستعمل وشحنته زين ولا ماشحنته وانا ارد عليه جديد يلق وشحنته له يوم ونص وهو ينشحن ..قال اجل الشريحة خربانه قلت له لاوالله احلف طيب بدلوها لي يالله قال لي لا ما اقدر قلت له ليه قال لي لازم نسجل انها شريحة تالفه ونبلغ المكتب الرئيسي ويعتبرونك مقدم طلب جديد قلت له يعني متى استلم قال لي وهو يضحك بكره قلت له ابشر اصلا انا ماعندي شغله الا انتم..ويوم الثلاثاء الصباح اجيهم واروح لموظف الاستقبال وقلت له الشرايح أي شباك ويبتسم لي ويقول تصدق هي شباك خمسة وتوني باروح قال لي اصبر قلت نعم قال اليوم سيارة الشرايح ماوصلت خربت اصبر يمكن توصل العصر قلت يخوي هذي شرايح جوال لو تنحط على سيكل ماتضره,, قال لي لا يا اخوي هذي عهده وش انت تحسب اجل قلت له يعني متى امر قال لي العصر واجيهم المغرب وانا شبه يائس ويقضبوني الشريحة وللمصادفه اكتشف ان الشريحة اشتغلت وضبطت واروح لبيتنا وانا طاير من الفرحة طاير واعطي الجهاز لامي.
يوم الاربعا الساعه 10 الليل وديت امي لصالة الرداح للافراح علشان بتحضر عرس وقلت له اذا خلصتي دقي علي بيجر (>>ووعع قديم بيجر ) ولا دقي على بيت صديقي سعد انا عنده ولا دقي على احد جوالات اخواني وهم يعلموني قالت لي امي طيب..وبالفعل رحت لبيت صديقي سعد وجلسنا نلعب بلوت وبلاي ستيشن وكيرم وحبشة وانا انتظر امي تدق علي وجت الساعه واحده وجت الساعه 2 الفجر ولاحس ولاخبر قلت شكل امي توري الحريم كلهم جوالها وتجي الساعه 3 قلت ماصارت امي ماعمرها تاخرت لهالدرجة حتى عروس اخواني تمشي الساعه واحد,, واحده الا ربع وادق على اخواني اسئلهم اذا امي دقت عليهم ولالا قالوا لا .دقيت على بيتنا ردت الشغاله سئلتها عن امي قالت ماما مافي يزي دقيت على بيت خالي وكلمت حصه مرته قالت امي كانت بالقصر يوم هي تطلع .وقتها قلت ياولد مابدهاش واركب سيارتي وانصا صالة الرداح للافراح والقى الصاله مظلمة وكل شي مسكر و الحارس جالس وجنبه حرمه ..البودي مو غريب علي كانه بودي امي ويوم وقفت عند البوابه الا امي تطمر على السياره وتفتح الباب وتقول لي تاخرت علي وانا امك قلت عسا ماشر وراك مادقيتي قالت لي وانا امك والله ادق بس انه مايطيع قلت لها ليه قالت وش يدريني اساله مرة مافي شبكه ومرة تعثر مرور الاتصال وبعد ساعتين يوم رن طلع لي واحد هندي مع اني داقة بيجر ..قلت ياحليلتس يمّه حطيتها اجل في الشبكة قولي ماعرفت له قالت اذا ماعرفت اشغله يالشين امش ورى هالليموزينات اللي قدامك كلها حريم كانوا معنا في العرس وصارت لهم نفس المشكله . قلت لها يمّه مو هذا الجوّال اللي كنتي تبينه خلاص ابلشي به ووصلنا لبيتنا بسلامة الله على الفجر...وابوي اللي يتلقاني ياقليل الادب وراك مهمل امك وتاركها في القصور لاخر الليالي وانا اللي احلف له ويقول لي ماتستحي ولاتنتخي تترك امك كذا ..قلت له ياقيس بن الملوّح يوم قلبك انغرف على ليلى العامريه وراك مارحت تجيبها بنفسك ..وكان الرجال كبس عليه النوم ولاسمعني ..ويوم الخميس العصر اسمع صراخ وطقاق في الصاله وانزل علشان اشوف وش القصة ولا امي تقول شف ياعبدالعزيز خلك شاهد بعد 30 سنة عشره مع ابوك,, ابوك يشك فيني قلت افا عسا ماشر يبه مهما كان هذي رشا رشرش حبيبة القلب وش سوت قال شف جوالها والمسيجات اللي فيه, ياجعله الكسر وانت تعرف قلت وين جوالك يمّه وافتح واشوف الا وصلت لها 20 مسيج وقلت ماشاء الله يمّه مالك يومين وفوق عشرين مسيج وابدا اقرا المسيجات واخزياه يمه وش هالرسايل تبين الصدق ابوي معه حق ( قلي متى قلي انا انا بشوفك قلي متى قلي ياكامل وصوفك ) والرساله الثانيه ( ياريم الفلا غير في عيني ماحلا ) والرساله الثالث حبيبتي كل العواذل تشابه تملي معاك ) والرساله الرابعه ( روحي شمال روحي يمين زي ياروحي ماتلقين ) واناظر في امي وامي تقول لي وشو لاتقول انشالله انك تشك فيني قلت لها سلامتك بس عاجبتني روحي شمال روحي يمين حشا ذي مسيج لفيفي عبده مو لك ..واقول لابوي وانا اهديه اقول يابن الحلال بزارين هالايام ماعندهم لاشغله ولامشغله الا ارسال مسيجات على الفاضيه والمليانه مهما كان امي حرمة كبيره وعاقله واشوف امي تقول لي وش تعني بكبيره قلت لها مو كبيره يعني كبيره مرة بس امراة ناضجه ..وقال ابوي لامي والله اللذي لا اله الا هو يارشا لو شفتك محتفظة باحد هالمسيجات اني لاكسر هالجوال فوق روس عيالك..وتقول امي بس لو تبطل هالحركات وهالغيره ياوائل (ايه نسيت اقول لكم وائل=ابوي ) ...وتستمر الايام على هذا المنوال مكالمات في نص الليل ومسيجات غريبه تخلي وائل يطرقع من الغضب ورشا بهذلت عيشتي كل يومين مرسلتني لمحل جوالات علشان اغير النغمات ..الى ان مامر شهرين وتوصل فاتورة جوّال امي .....طنطنطنطااااا (باشوقكم يعني).
عقد اجتماع عاجل لمجلس العائلة الموقر لمناقشة فاتورة امي اللي كانت (8755 ريال) .وبدت الجلسة وامي تبستس أي تبكي وتقول والله العظيم كذابين وابوي يصارخ اجل من,, هاه ردي واحنا يالعيال نهدي الوضع ونقرا الفاتوره اول الفاتوره كان يدين امي بصراحة مكالمة مع خالتي مدتها ساعه ونص ومكالمة لبيت جيراننا ساعتين و مكالمة لبنت خالي اللي اعرست وراحت لجده ساعه الا دقيقة قال لك امي كسرة عين الهاتف يوم ماتمت الساعه.
بس شوي شوي واحنا نقرا تفاصيل الفاتورة بدت اشياء غريبه ..مكالمتين للارجنتين ومكالمة لجزر سليمان ( يمكن وسوس ابليس في راسها وتبي تشترك في من سيربح المليون )ومكالمة لكندا و3 لفنزويلا ..كلهم ناظروا فيني انا على بالهم مكلم خط الصداقه قلت لهم قسما بالله مالمست جوّال امي الا يوم جيت بامر صديقي في الفجر ومابي ادق على جرس بيتهم ولاكلمت غيرها..وكنهم ماصدقوا وكملوا قرايه .10 مكالمات لليابان كل مكالمة اقل شي نص ساعه (ساعتها انا شكيت في امي صدق قولوا ليه لان امي اذكرها كانت تتابع مسلسل اوشين اللي كان يجي ايام حرب الخليج على القناة الثانية وابن امه يغير القناة ولا يحكي واوشين في التلفزيون .وامي ماغير بالمناديل تمسح الدميعات) المهم ماعلينا ومكالمتين للهند ومكالمة لاستراليا ..وبدت لجنة استجواب امي وما اشوف امي الا صارت هايدي يوم قالوا لها سافري فرانكفورت واتركي جدتس ..راسها على المخده وتفرفش برجولها (انتي يا امي) وتصارخ والله انهم كذابين واللهي انهم حراميه ..صراحة وقتها امي كسرة خاطري وقلت ياجماعة الربع نتصل على 902 ونتاكد بانفسنا يمكن الموضوع فيه لبس ...وهداهم الله واقتنعوا ..ودقينا 902.





(الساعه 2 ونص الظهر ) تررررررررررن ترررررررررن ترررررررررن ..غريبه ماحد يرد ..مرة ثانيه .تررررن تررررن تررررن ماحد يرد وعلى هالحال الى الساعه 3 وربع عصرا ..تررررن ترررررن ال...هيييييه في احد رد علينا ...نشكرك عزيز المتصل ونعتذر عن خدمتك لقيام الموظفين باداء فريضة الصلاة ...الله بيذبحهم الدين الحين ...وبعد نص ساعه ترررررن ترررررن ماحد يرد ترررررن تررررررن الو شركة الاتصالات السعوديه معك عبدالرحمن كيف اقدر اخدمك .هلا انا عبالعزيز كيفك لو سمحت عندي مشكله ..يرد علي الموظف هلا اخوي وش المشكله لو سمحت امي عندها جوّال ووصلتنا فاتورة امي فيها مكالمات امي ماسوتها لكندا وفنزويلا واليابان والارجنتين وجزر سليمان ونبي نتاكد ونشيك الفاتوره ..يجاوبني الموظف عادي اخوي عبدالعزيز بس اول شي الله لايهينك تسددون الفاتوره بعدين تراجعنا في الهاتف قسم الشكاوي ومايصير الا الخير قلت له اذا سددنا الفاتوره اللي طلعتوها وش غدينا به ساعتها من بيرجع فلوسنا منكم الله يبزييك ويسلمك انتم مقولتكم الشهيره ..اذا لنا حق عليكم يامواطنين جبوه بسرعه واذا لكم علينا حق بنسوي لكم به كريدت على الفاتوره ولاتخافون مايضيع لكم عندنا حق .>>>>>ايه هيّن ,,قلت له ياخوي طيب مافي حل ثاني ترى الجوّال ياخوي لحرمة كبيره ماهي راعية هالمكالمات اللي في الفاتوره (وقتها امي نحفتني أي رفستني برجلها ) رد علي الموظف ياخوي الكلام المفيد قلته لك شي ثاني ماعندي سو اللي يعجبك يالله لاتطول علينا تحسب ماعندنا شغل الا انت ...طع (>>>سكرها في وجهي) وعلشان اداري الموضوع ولا يكرونها اخواني ضحك علي طيب ياخوي يعني اذا مريتكم برايك ممكن نحل المشكله ..اهاا الله يسلمك ياخوي تعبتك معي .واقول لاهلي ياحليله موظف لطيف وذرب صراحة الشباب السعودي كفاءة عاليه يستحقون انهم ينعطون الفرصة.
وتوني حاط السماعه واطمر لمكتب الهاتف الرئيسي في المرسلات ويقابلني السيكورتي ابو وجة بشوش ويقول لي نعم خير ياخوي وش جايبك سكرنا تعال بكره قلت له ياخوي عندي شكوى ..ويكرها ضحكه اجل شكوى ضد من يالشيخ قلت ضدكم وماكملت ضدكم الا واشوف عيونه حمر وبزرت قال ضدي قلت له لا والله مو انت انت على عيني وعلى راسي اقصد الوزاره ككل يعني الفواتير ولا انت ونعم بك وسبعة انعام قال لي ايه اشوا المهم يابو الشباب مر بكره قلت له الله يسلمك اقول لك شي قال قل قلت تعرف اللي داخل يردون على التليفونات حقين 902 صح,, توني مكلم واحد منهم وشتمني وشتمك قال لي السيكورتي وشو شتمني وش قال لابوه لابو اللي جابه قلت يقول انت مانت كفو جوال حدك سيكورتي ومعلق البيجر قال لي السيكورتي: ابن الكلب مشينا عليه قلت للسيكورتي لالا انت خلك هنا اذا رحت معاي بيخاف وينكر انا بروح واجرجره لك ماعليك حقك بتاخذه على سن ورمح قال لي السيكورتي مشكور ياحبيبي بس انت قل لي اذا تبي سكين ولاعجرا تجلد فيها ابن الكلب قلت له لا لاتخاف مستعد بس انت لو تدخلني عليهم قال ابشر تلقاهم ذاك المبنى على اليسار ..وبالفعل شكرت السيكورتي ونصيت ذاك المبنى وافتح الباب وياليتني مافتحته ..صحون بلاستيك حقت مطاعم وطاولة كيرم وتتن وجلسات وورق منثر على الارض وادخل واشوف 8 اجهزة مخصصة ل8 موظفين ..هذا المفروض بس الحاصل مافي الاموظفين بس واثار تتن في طفايه مكان ثالث اما بقية الكراسي ففاضيه تصفر مافيها احد وتوني باكلم اولهم الا ويرن تليفونه ....الو شركة الاتصالات السعوديه معك منصور(ال..... ) أي خدمه ويرد عليه صوت شاب يضحك الو هلا اخوي ممكن اكلم خالد (ال...) مناوب الليلة معكم ..لاوالله ياخوي خالد استاذن الليلة تعبان وراح خير بغيت منه خدمه يرد عليه الولد ..والله يابو الشباب يعني انت تعز عليه ولالا يعني هو صديقك مره يرد عليه الموظف منصور الا صديقي هذا عزيز علي بس انت تامر يرد عليه الولد بصراحة انا من شلته يعني من العزيزين على خالد وبغيته في خدمه وياليتك تسويها لي يرد عليه الموظف امر ..قال له الولد في رقم دق على جوالي وفيه بنت صوتها خبال خبال مو طبيعي ياليتك تعلمني اسمها ..يرد عليه الموظف يعني هي اللي دقت عليك على العموم غالي ومن طرف غالي هات الرقم وانا اعطيك اسمها في ثواني....يرد الولد تسلم يابو الشباب تفضل (054.....) ويقوم الموظف وهو يبتسم ابتسامه خبيثه شكلك طحت في بنت حلوة اسمها(......)الا اقول يابو الشباب اليوم الهلال يلعب مع الاتحاد بالله كم النتيجة ..ابشرك ابشرك الهلال 2 والاتحاد 2 يرد الموظف اووف يعني متعادلين يرد الولد: ل::::ا الموظف: يقول له وشلون قال الولد ياخي هدف الاتحاد تسلل بس الحكم حاسبه عادتهم ولا بيغيرونها ..يرد الموظف أي والله وانت صادق على العموم ياقريب مدري صديق خالد انا بالخدمه اذا بغيت شي الليلة لايردك الا لسانك دق على 902 واسال عن منصور .
قلت لنفسي اللي هذا اوله ينعاف تاليه بروح اكلم الموظف الثاني وتوني باكلمه ويرن التليفون ويرد عليه ..شركة الاتصالات السعوديه معك ( طارق ال....) السلام عليكم معاك الدكتور هاشم قرنبجيه يساله الموظف ايوة يادكتور طارق تفضل وش شكواك :::د.طارق :ايوة ياسيدي انا كان عندي مؤتمر في لندن اوكيه ..اتصلت بكم عشان تعمموا المدهول قصدي الجوال بتاعي ..تمام ياسيدي لمن وصلت هناكا لندن بدي اتصل على مدامتي تغريد مابيرن جوالي مافيه حراره مرة مرتين 3 مرات اخرتها شريت بطاقات ب30 جنيه استرليني حلو الكلام ..قلت في نفسي غلطة وكل ابن ادم خطائون ...بس تجيني الفاتوره وفيها رسم تعميم وقيمة كذا مكالمة رسوم تعميم الشبكة ليه اش معنى,,اهو هادا اللي ماني فاهمه تقدر تفهمني هوا :::: الموظف :يا خوي طارق تاكد ان المشكله مو من عندنا اكيد من الشبكة في بريطانيا :::د.طارق طيب ياسيدي فسر لي شايف كيف فسر لي قيمة كذا مكالمة نظير استخدام الشبكة هادي كمان من شبكة بريطانيا ::::الموظف: يعني الحين متشطر انت وداق علينا وتهاوشنا اذا فيك خير دق على الشركة في بريطانيا ..ياخوي انت اذا صرت برا السعوديه اللي يحاسبك شركة الدولة اللي انت فيها واحنا نحاسبهم ::د.طارق: بس ياولدي ازاي كده لمين اشتكي مكالمات ب213 مين يدفع قيمتها :::الموظف:صدق انك قلق كل هالازعاج على 213 ريال ياخوي اخوي الصغير فاتورة جواله 2400 ريال وهو اخوي صدق الناس مظاهر وانت ترادد وتشتكي في 213 بس الشرهة مو عليك الشرهة على اللي يعطيك وجه وخلني اسمعك داق مرة ثانيه..مواطنين اخر زمن.. ساعتها قلت لنفسي اما اكلم ذولي في الفاتوره عز الله اللي بيتوحدون بي هنيا في المكتب خلني ساكت بس,, باجلس اتسمع لهم ....وشوي ويرن تليفون الاول (انت يامنصور) ويقول شركة الاتصالات السعوديه وتوه بيكملها ويرد عليه صوت نواعمي الو ولا الموظف تضيع علومه ويقول لها معك الموظف (مساعد.... وش ذا منصور ولامساعد )أي خدمة قالت له البنت وصوتها الم لو سمحت في واحد دايم يزعجني يدق على جوالي 24 ساعه من رقم بيته ومكتبه وجواله (طيب هي الحين وش يدريها برقم مكتبه الا انها تعرفه وطنشته ..المهم ماعلينا) وش اسوي معه تكفون انذروه قال لها وش رقمه قالت له خذ عندك وعطته الارقام كلها ..قال لها الا انتي سديم (يعني رقمك طالع عندي وبالكمبيوتر و عرفت اسمك) قالت له ايه انا سديم:::الموظف يرد عليها: طيب ياسديم انا الحين ما اقدر اسوي لك شي الا اني اعطيك اسم الشخص صاحب ذيك الارقام بس غيره ما اقدر اسوي شي لاننا خارج وقت الدوام الرسمي وبكره يمكن ما اكون موجود لاني مجاز بكره بس خذي هذا رقمي (055\\\\\\\\) ودقي علي على العصر باعلمك وش ممكن نسوي له :::سديم:يعني بكره مافي دوام في الهاتف كله :::الموظف :الا فيه بالتاكيد :::سديم:طيب ليه ادق على رقمك خلاص ادق على 902 وبيلقون في ملفي الشكوى وتارخ تقديمها ولا انا غلطانه :::الموظف: الا صحيح بس الموظفين اللي بكره الله لايوريك يابدو يا عيال صغار قليلين ادب راعين مغازل بصراحة (قال لك هو العاقل ) فانا رايي تدقين علي وانا باحل لك مشكلتك على انك قريبتي وش رايك:::سديم:خلاص اوكيه بس انتا متى تمسك مناوبة علشان ادق عليك في 902 واسال عنك يا استاذ مساعد :::الموظف:ليه تتصلين على 902 وتنتظرين وتاخرين نفسك بكره العصر دقي على جوالي وكل شي بيكون محلول:::سديم:وليه ادق عليك انت وش شايفني انت وش تقصد بالضبط ..اسمع بتخدمني مشكور اذا لك غرض ثاني مشكور مابي منك شي :::: الموظف :اصلاا انتي بنت لعابه شكله جحدك شوي وحقدتي عليه::سديم:اقول لك احترم نفسك ياقليل الادب والله لاشتكيك بكره الصباح:::الموظف: ترى رقمك طالع عندي وبانشره في الانترنت ثانيا اسمي مو مساعد اسمي عطية يالله وريني وش بتسوين اشتكي الله يخليك اخيرا لاتزعجينيي مرة ثانيه يامعقده....طع سكر السماعه في وجهها (اول مرة اشوف ولد يسكر السماعه في وجه بنت) وشوي وتحترق اعصابه ويشتم في البنت يشيل ويحط وفي هالوقت يرن التليفون ويشيله زميله (طارق ) الو شركة الاتصالات السعوديه معاك أي خدمة ..يرد شايب الوووه ياوليدي الله يسلمك من كل شر ..فاتورتي ماتجيني على صندوق بريدي ولازم اروح استلمها من مكتب الهاتف وكل مرة اتصل بكم واطلب ارسالها الى صندوق البريد ولا ترسلونها :::الموظف: ياعمي هالاشياء تصير دايما تحديث البيانات بالذات في مسالة الفواتير يتاخر وترى الخطا منك من الاول كان طلبت ارسالها الى صندوق بريدك عند الطلب:::الشايب:ياولدي والله طبت ارسالها الى صندوق البريد من الاول بس من يوم قدمت على الجوال الى يومك وانا لازم استلمها من مكتبت الاتصالات مرة من مكتب الشفا ومرة من العليا ومرة من المرسلات وقبل العام قالوا لي فاتورتك طالعه في مكتب الهدا في الطايف وسووا فيني معروف وسوا لي نسخة منها :::الموظف :ياعمي لاتبالغ تراني اعرفكم يالشياب ثانيا تعال خذها من مكتب الهاتف منها رياضه لك ومنها نتشرف بشوفتك وقدم طلب رسمي احسن لتغيير العنوان وارسالها بالبريد::الشايب:ياوليدي والله ان فيني روماتيزم محرولني حرولة ..ثانيا اتصلت عليكم 8 مرات وقدمت الطلب 3 مرات في مكتبكم بس كل مره انتظر الفاتوره تقولون لي تعال خذها من مكتب الهاتف .ارحموني تراني شايب ذبحني المرض و انا من عمر ابوك:::الموظف: اقول ترى انا ضايق صدري واللي عندي واللي حفظوني اياه قلته كله لك كلام ثاني ماعندي وبدال ماتروح لمكتب الهاتف رح للوزاره وكلم الوزير ..صدق اخر زمن شياب ومعهم جوالات يالله بس رح ناظر اخبار الجزيرة ورح ارقد ....وطع (اللعب سخن وقاموا يطعطعون السماعات في وجيه خلق الله) وشوي يرن التليفون ويرد (طارق ) شركة الاتصالات السعوديه ..نعم أي خدمه :::مواطن مرتاع : السلام عليكم ياخوي بيجري فجاة ماقام يستقبل مدري ليه كذا واحد يدق عليه ومايوصلني شي غيرت البطاريات بس مافي مشكلة في البطاريات وش الدبره:::الموظف :الحين ياقليل الادب ياللي ما تستحي على وجهك داق علينا في انصاف الليالي وتسالنا عن بيجرك احنا للجوالات فاهم يا...... ورقمك طالع عندي قسما بالله تدق مرة اخرى اني لافصل خطك فاهم علي ولالا .....طع طع...ومادريت الا منصور يقول لطارق وش رايك بس افصل الفيش موب احسن قال له طارق لالالالا شغل المسجل (شركة الاتصالات السعوديه مرحبا بكم في 902 خدمة الهاتف الجوّأل ان جميع المآمير الان مشغولين بخدمة عملاء اخرين ..فضلا يرجى الانتظار ) وشف ابن امه بيستحمل ساعه لطعه وبالفعل شغلوا المسجل ويلتفت طارق ومعه بكت سجاير ويقول منصور وين الولاعه ويشوفني قدامه ويقول لي من انت قلت له سم تحاكيني قال لي لا احاكي الجدار قلت طيب مابي اقاطعكم كمل حكيك مع الجدار وجيت باطلع الا يمسكني الموظف منصور ويقول اصبر بنتفاهم معك >>>وجلدوني الله لايوريكم واتهموني باني حرامي ولا مخرب ..بس اكتشتفت انهم طيبين كانوا يحسوبني صحافي جاي اسوي تحقيق ..بس لما عرفوا حقيقتي قرروا انهم يرفعوني لمكتب معاليييه(الوزير باعتباري حاقد على الوزاره )
كاتب الموضوع (بلاك هورس)



منقول

صدقت ياصاحبي على ما نقلته لنا في هذه الشبكه ولاكن هذا يحدث في اغلب بلدان
العالم !!!!!!!!؟؟؟؟؟؟ صدقت شركة الاتصالات وكذب الشيطان , كثر منها وسلامتك 0

قصيتلنا قصت حياتك وامي راحت وامي جت ونا رحت ونا جيت وحصه زوجت خالي ورشا وووووووووووووووووغيرها.
على الععموم مشكور على هل القصه.

هلالي صميم/ مشكور على الرد

النورس عاشق الزعيم/ترى الموضوع مش حقي عشان تنفخ <========================= واحد قوي

والف شكر على الرد

بطلت اطلع جوال بسببك 00حرام عليك00ليه كذا؟

مشكور اخوي السلطانة على الرد

بس لو تشوف اخر كلمة في الموضوع تعرف ان الموضوع منقول من احد المنتديات
ولست انا الذي كتبته

وشكرا

اسفة اذا اغضبتك بس الموضوع طويل جدا تعبت من كثرة ما قريته وما خلصت

يعطيك العافية وياليت كان نزلته على حلقات مثل ما تفعل جمجمة الهلال

اقبل اعتذري واكرر اسفي

تحياتي،،،،،،،،،،