السلام عليكم ورحمة الله وبركاته
اخواني الزعماء
حبيت ان اكتب هذا الموضوع بمناسبة اعتزال ذئبنا ولاعبنا ومعشوق الجماهير سامي الجابر
كل واحد مننا اللي له موقف اوذكرى حلوه مع سامي الجابر يقولها هنا ويكتبها
وانا اولكم راح ابدء
كلكم تتذكرون نهائي عام 1413 اللي كان في مدينة جده وكان بين نادي الهلال والشباب
وانتى بفوز الشباب بركلات الترجيح
كان معسكر نادي الهلال في جده وكان مكان سكن الفريق في فندق الهوليدي ان جنب الكورنيش عاد انا تقريبا ذيك الفترة كان عمري حول 10 سنوات وكنت مجنون بالهلال من ذيك الايام
المهم وكنت كل يوم وقت ذهاب اللاعبين من الفندق للمعسكر وانا قدام الباص عاد من قدي اشوف التيماوي وعبدالله الدعيع وسامي وفيصل ابو ثنين وصالح السلومي وكثير من نجوم الهلال
المهم الموقف هو ان سامي شافني الظاهر ناشب عند الباص كل يوم واسلم عليهم
جاء سلم علي حبيب قلبي انت ياسامي والله
وقال وش تبي قلت ابيك تسجل هدف قال خلاص ا انشاءالله اني ابي اجيب هدف وانا عاد انتظر المباراه بأحر من الجمر ويوم سامي سجل الهدف الشهير اللي سحب فيه الحارس سعود السمار وانا طاير من الفرحه بزعمي ان سامي سجل الهدف لي
ومن ذاك اليوم وانا احب سامي لحد الجنون وانتظر مواقفكم مع ذئب الملاعب سامي الجابر اتمنى ان تحوز فكرة الموضوع على اعجابكم وان تنال رضاكم والسلام عليكم ورحمة الله وبركاته