بسم الله الرحمن الرحيم ..

السلام عليكم ورحمه الله وبركاته ..

ترددت كثيرا في انزال الموضوع بيوزري .. وذالك تلافيا لمشاكله مشاهده الاطراف الوارده في القصه لهذا الموضوع ..

لكن توكلت على الله .. وما بيصير الا المكتوب .. و تظهر الدنيا على حقيتها افضل من اني اضل مخدوع ..

يا اخوان اتمنى انكم تفيدونني وتساعدوني .. بما تملكونه من حكمه وفائده .. و اتمنى من الجنس اللطيف مساعدتي في هذا الموضوع بعتباره مندرجا لديهم واعتذر على هذا الوصف .. ( والي يستغرب من الاعتذار يشوف القصه اول .. )

في الحقيقه حنا اربع شباب .. قرر الله علينا وسافرنا .. لاحدى المدن .. طبعا هناك مثل معروف .. اذا تبغي تعرف زميلك هل ( سنع ) او لا ,, سافر معه .. وهذا الي صار ..

حنا بطبيعه الحال اربعه اشخاص .. لنسمي الشخصيات باسماء وهميه لكي تضح القصه ..

نحن الاربعه لنـا بحمد الله سبع سنوات نعرف بعض .. و زماله .. ما يفرقنا الا الزمن ومشاكله !

الاول : انا ,, سالم .. / الثاني : فيصل * / الثالث : ابراهيم * / الرابع : صالح ..

* تعني انهم ابطال القصه !


القصه وهي اننا سافرنا الى جهة معينه من مدن مملكتنا الحبيبه .. وهي الشرقيه .. مع الاخ فيصل .. بـسيرته البسيطه ( اكسنت ) مع احترامي لـمالكي هذه السياره ..

كانت روحتنا للشرقيه بمجملها ( نكد ) .. حيث لم نستفد اي شي من طلعتنا .. وبالعربي ( طلعت فضايح ) .. والله العظيم ليتني ما سافرت معهم .. الاخ فيصل صاحب السياره ما يدري وين الله حاطه في السنع .. لا شغل لا عمل ولا ترتيب .. بالله عليكم احد يروح للشرقيه ما يطب الخبر ! ولا يخاف من الناس والزحمه ولا يسكن باثقبه وحنا عزوبيه ! واربع وعشرين ساعه قاعد و ساكن الدمام وفرحان .. ولا بعد خايف على سيارته مع انها مصدومه ومصلحه بـ 5 الاف ! كل ذالك يهون .. والاتي يهون .. اخينا في الله ماسك القطه .. وهي عبارة عن 1200 ريال .. كقطه عبارة عن سكن وبنزين بس + اذا اذا صارت عشاء او غداء .. مع ان الجدول حنا الي نطبخ حسب سنع الاخ فيصل في الرياض !

اخينا في الله من القطه غير الفريون حق السياره .. بحجه انه المكيف ما يبرد .. ولا قيد ولع لنا المكيف ابد ! بحجه انه ما فيه امبير حراره بالسياره ! يعني ما استفدنا من فلوس القطه الي راحت على الفريون واهو المستفيد .. اخينا في الله ايضا اخذ حق تغير الزيت مننا مع انه ما غير الزيت الا في الرياض ! بس كذا !

وغير كذا ما طلعنا زي الناس (مولكنا تبن ) .. يطلعنا متى ما بغى ويجعنا متى ما بغى .. ولا في الدمام ..

زياده على ذالك القطه بقي منها قرابه 400 ريال .. بحكم اننا ما صرفنا غير الشقه 450 ريال .. و 150 اكل .. و 50 بنزين .. و 50 ريال اغراض متنوعه .. اخينا في الله اخذ من حق القطه لمخباته الكريم فوق 200 ريال .. وبقي صافي بحسبته الكريمه 200 ريال .. وزع علينا 50 لكل شخص .. ومخبي الـ 200 ! مدري وين راحت .. يعني اننا صرفنها !

كل هذه ليست القصه وليس هذا هو المطلوب باعتبار ان كل الي فوق سخافه ولا يسوى شي ولا ياثر شي في حياتنا .. انما مقدمه للموضوع ..

انا بعد هذه القصه والاشياء التي حدثت في السفره و صراخه علي و سكوتي له وامشي له الامور بعتبار انه راعي السياره و خل الطلعه تمشي احسن من تصير مشاكل .. وامشي له ولا ارد عليه واهدي نفسي .. يعني كتمت كل شي بصدري ولا رديت عليه ولا صارحته بشي .. بالعكس .. خليت الدنيا تمشي بدون مشاكل ولا شي ..

رجعنا للرياض .. الاخ فيصل حبيت ما اطلع معه ثانيه او اسافر معه لكي لا اخسره .. لان الاخ ما ينطلع معه ابد .. وخل علاقتي معه ( اجتماع اسبوعي ) عادي .. لعب سوني و شاهي .. نحن الثلاثه البقيه ..

انا و صالح وابراهيم .. اذا ابتعد عنا فيصل .. جلسنا نسولف عن الشرقيه وكيف وضع فيصل بيننا .. وانه وشغله و اخذه للقطه .. كل هذا حديث ودي .. وكلنا نتفق في كلمنا .. خصوصا ابراهيم .. ولا بعض الاحينا يزود علينا ويذكرنا باشياء ثانيه ناسينها !


حتى صار الي صار ..

واخينا في الله ابراهيم خر كل شي لـ فيصل .. وان سالم يقول انك مسوي كذا .... الخ ..

و سبق ان صارت خلافات لي مع مع الاخ ابراهيم بسبب حراكته الا تفكيريه و هماجة اسلوبه وسوء تفكيره .. وعدم حسن التصرف في المواقف المهمه .. بكل بساطه .. ما يعتمد عليه .. يواعد ما يجي .. تقوله شيء و يسولف معك و يزيد على كلامك ويثني عليه .. وبكرى رايح قايل كل شي للي كنا نتكلم عنه ..

هذا الي صار .. كل كلمنا عن فيصل .. راح قاله له .. من ( ا ) الى ( ي ) ..

وفيصل ما قصر قام ينفخ ويخربط و انا وش سويت .. وكيف .. انا بطبيعه الحال سكت وخليته يطلع كل شي وكتمت عشان ما تصير مشاكل .. ولا هو خلاص طاح من عيني ..

ومشيت له الامور ..

وودي اعرف وش اسوي الحين .. مع فيصل وابراهيم الي نقل كل الكلام لفيصل .. هل ارد عليهم واتركهم خلاص .. لان بصراحه فيصل تكلم علي باسلوب غير حضاري ويصارخ وانا ما رديت عليه .. ولو رديت عليه بابداء بكلام لا يليق لان فيني عصبيه قبليه .. و اذا تكلمت معه بخسره مره .. واعتقد فهمتوا المقصود ..

وكذالك وش اسوي مع ابراهيم ؟

هناك ملاحضه بسيطه .. هناك اختلاف جذري بيني وبين الاخ فيصل .. من ناحيه الوضع والمعيشه و المستوى التعليمي والنسب ( لصالحي ) .. تؤثر كثيرا في علاقتنا ولها دور كبير ..

وآسف على الازعاج ..