السلام عليكم
كيفكم عساكم بخير
أنا نزلت الأسبوع الماضي موضوع وصراحة التفاعل والرسايل اللي وصلتني من الأعضاء يطلبون مني أكمل وش صار ما حبيت أردهم ابدأ في السالفة
الموجودين في السالفة:
الشابورة(هاذي المديرة شخصيتها ضعييييييييفة يعني مالها داعي)
خزون (هاذي المرشدة حاطها دوبها بدوب شلتنا)
أبو عبد الله(الحارس متعاون معناطبعا بحقه)
الشلة:
صلوح_أبرار_(هاذي تموت في شي اسمه صلاح الغيدان صاجتنا فيه)
عذور_عذاري_(هاذي نفس أبرار بس على ياسر القحطاني)
يسرى وأنا (حنا الدوافير ونصلح بعض المواقف بما إن الدوافير لهم خاطر عند المعلمات)
صالحة(هاذي مهسترة من جد كل ما قلنا كلمة جابت عليها غنية)
لجين(هاذي بنت سورية عليها دفرة لاإله إلا الله )
المهم وصلنا ليوم الأحد
طبعا في شلتنا متعارف إنه الفطور كل يوم على واحدة ذيك اليوم كان علي
ما تذكرت إلا بعد الساعة 12 في الليل وطبعا كل فلوسي الوالد صادرها فرحت أشحت من أخواني وماحد عطاني وجه لأن أبوي محذرهم لا يعطوني شي آخر شي رحت لأخوي الصغير في صف 3 إبتدائي وعطاني اللي فيه النصيب ^^هاذي آخرتها من بزر
وبعدين دقيت على أبرار:هلا صلوح بليز مافيه أحد راضي يجيب فطور دبريني
أبرار:الله يرجك ألحين تذكرتي خلاص ولا يهمك ما لك إلا فطورباي
والصباح رحنا للمدرسة الحصة الأولى كان فيه اختبارطبعا الشلة كلها تغش مني
لأن الوالد جايب لي مدرسة والحصة الثانية قرآن أخذنا فيها غفوة
أبرار:بنات لازم نهج الحصة الثالثة
البنات:لييييه
أبرار:الفطور رح يجي
البنات :خلاص أوكي
عاد يالله نصرف شنطنا وعباياتنا ونحط عند البنات أغراضنا على أساس غايبات
وكل الفصل متفقين معه إلا لجين تقول:ما إلي دخل رح إحكي للمس إنوا هربتوا
أنا :الله هربنا مرة واحدة كلها نحشة تكفين لجين لا تعلمين
يسرى:لو كنتي بنت أبوكي علمي عنّا
عذور:ياشين الدوافير والله لو فتحتي لسانك أقصه تفهمين
لجين :ما بتأدري
أنا:خلاص بنات خلوكم منها والله خلي يوصلني خبر إنها قالت شي والله لأقلب الدنيا فوق راسك
وهجينا نهاية الحصة الثالثة رحنا عند المكان المحدد اللي الحارس يحط الفطور فيه تخيلوا وش حصلناه تميس وفول وشاهي وبعد الشاهي مو في ترمس في البراد)
أنا :وش ذا الفطور يا صلوحي
أبرار :يا شيخة خلينا نغير كل يوم من المطاعم
المهم ما بدت الفسحة إلا ونحط ذيك الفطور في وسط الساحة والبنات يناظرو يقولون إن حنّا قرويات المهم ما نحس إلا وخزون فوق روسنا و تسألنا من وين جا الأكل
عاد تدرون ولا واحدة تكلمت وبعدين تهزئ وتسب الله يقلعها والمهسترة صالحة تغني^^خيرإن شاء الله
وبعدين الحبيبة تودينا للشابورة وأول ما دخلنا أقول لها:يا أستاذة والله مظلومات الكل يكرهنا ليه كذا
عاد الأخت تقول :خلاص يا حبايبي اطلعوا بس لا تعيدونها
المهم نروح الفصل ونحصل كل أغراضنا منثورة والمكياج مصادروأهم شي العلك بعد صادروه^^حسبي الله عليهم
نرجع ذيك اليوم البيت حزينة
أتمنى ألا قي ردود تسلمون

صدق وناسه فله ياليتني من شلتكمـ >>قطت وجه<<

الله يعينكم


بني حارث .. صادروا المكياج


طيب عندي سؤال لكِ : الكحل ممنوع عندكم و لا لا ؟

هههههههههههههههههه

ياحليل سواليفكم يالبنات ...

اجل كل يوم الفطور على وحده .>>>> طيب ليش ماتخلونها بالاسبوع مره >>يعني كل اسبوع يكون على وحده بس طبعا موتجيب فطور كل يوم .يعني يوم واحد في الاسبوع ..<< احسن عشان انتم بنات علمي ولازم تركزون على الدراسه اكثر واكثر ..

المهم صراحه شلتكم وناسه ..<<< الله ايام الثنوي كانت ذكريات وناسه .. كنت انا واخوياي نهرب من المدرسه في وقت الفسحه ((عشان محد ينتبه)) وكم مره يمسكونا ويتصلون على الوالد ..

بس كانت ايام مررره حلوه...

مشكووووووووووره خيتوو على الموضوع ..

تقبلي تحيات اخوك عزوز**حايل

((( وهالله هالله بالدراسه لا اوصيك خيتوو)))

حبيتين..حبيتين..حبتين


مسوين تبي تغطوون على زحف العيال..


تبطوون يأختي تبطوون..

حنى الزبنه مهوب من حصه حنى الزبنه من المدرسه كله..

ياحليلكم مكيااج بوسط المدرسه تكفيين أرحمينا ياهيفاء..

بس شابورتكم أرحم من شابورتنا..عاد ليش..يبيله موضوع..

المهم الأحد هذا الفطوور على مين..

ومشكوووره على الفلم الأكشن الي بوسط مدرستكم..

وبأنتظار القادم..

تحياتي


!!هلالي الرس!!

وعليكم السلام ورحمة الله وبركاته ..قسم بالله تخلللللللف يعني وشفيها لو البنات اكلوا من برا ...؟؟؟اتذكر مديرتنا كانت تلف عالفصول وتطل تحت الطاولات وتصادر اي صحن اكل .... قمة في التخلف صراحة .. والي يقهر نشوف المدرسات كليوم طالبين من مطعم .. ماشاء الله حلال عليهم وحرام علينا..الله يكون بعونكم خيتو بس نفس السيناريو يتكرر باختلاف الزمان والمكان عجزت احط فيسات مو راضية تطلع

^^^زين حارسنا الله يسهل عليه كليوم يزفنا هعتسلمين يالغلا

الله يهديك بس روج ومكياج أزين من ألي صادرو الدخان وحلتوه ع الهئيه وش دخلهم ما أدري..


مشكوره ع الموضوع الرائع ..



تقبلي مروري

ملك الهلال

إقتباس الله يهديك بس روج ومكياج أزين من ألي صادرو الدخان وحلتوه ع الهئيه وش دخلهم ما أدري.. مشكوره ع الموضوع الرائع .. تقبلي مروري ملك الهلال

لا أشوا مكياج أهون
تسلم على المرور

الله يعينهم ههههه

<<<< قرت السالفه بجزئيها مع بعض

وش مدخلك علمي اذا كل ها الهبال فيك انتي وشلتك

ولا تنسين ترا ثاني فيه معدل تراكمي

والله ياحليلكم انتي وشابورتكم تجنن

ماشفتي مصطفى اللي عندنا {{نك نيم المديره}}

من يشوفونها البنات تمشي في السيب تقولين نمل مرشوش عليهم فليت

سالفة كل يوم الفطور على وحده ذكرتني بأيام الثانوي كانت شلتنا نفس الشي
بس بما أن الفطورمن برا ممنوع كنا نجلس في الساحه نفطر والبنات مستغربين من اللي نسويه
وحارسنا بعد متعاون بس والله نصاب كان هو اللي يجيب لنا الفطور وياخذ على كل مشوار دبل قيمة الفطور مطلع من ورانا أكثر من راتبه << الين الحين حاقده عليه
يسلموا على الموضوع الرايق