حدث في جامعتنا هذا اليوم !!!!! - نادي الهلال السعودي - شبكة الزعيم

"هلاليه أنا " · #1 04/11/2007, 07:57 PM

مساء الخير
أو
صباح الخير

حسب الوقت عندكم

مثل كل بنت في الثانوي كان عندي أحلام كثيره مثلاً :

* كان حلمي أكمل دراستي برا وحاولت بكل الطرق عشان هالحلم يتحقق وفي الأخير ماتحقق الحلم

* كان حلمي أدرس في جامعه كلها حدايق , ورود , أشجار , بوفيهات , قاعات واسعه , تكييف مثل الناس وما تحقق الحلم

* كان حلمي أشوف ثعبان على الطبيعه لو سافرت وكملت دراستي في الخارج أو درست في جامعه على إسمها جامعه أو رحت غابه يمكن ماأشوف حلمي لكنه جا عندي في الجامعه وأخيراً
تحقق لي حلم في جامعتنا الموقره

من المشاهد اللي نشوفها كل يوم في الجامعه !!

* بنت ماشيه ورازه خشتها ويا أرض أنهدي ما فوقك قدي وشويه إلاهى على وجهها
من كثر الحفريات <<< إحرااااج

* وحده ثانيه واصله معها وودها تخرج من الجامعه تفتح عبايتها إلا وفار ناط على
وجهها << مدري وينها بعد ذاك الموقف ماعاد شفتها شكلها حلفت ما عاد تكمل دراسه

* بنت << هذي أنا >>في قاعة الأختبارمسرحه تدور الجواب ولما لقيته وجات بتكتبه
لقيت على ورقة الإختبار عنكبوت

وطارت المعلومات اللي أمس واللي اليوم واللي بكره وأخرتها 4 من 20

( الله لا يعيده يوم )

كل هالأشياء صارت مألوفه عندنا لكن ثعبان مره وحده قويه

القصه كنا جالسين قريب من قاعه الحمدالله ماني فيها فجأه

إلا صراخ البنات في القاعه بعد شويه طلعوا من الشبابيك شفنا البنات يجرون وإحنا وراهم ما ندري وش السالفه

..واللي أنكسرت واللي أغمي عليها << هذا والله من زود الدلع
سألنا بنت شكلها متحديه

ولا هامها شي قالت ثعبان طلع في المكيف عاد أنا يوم سمعت بالثعبان قلت والله لا أشوفه وأحقق حلمي .
جلسنا ربع ساعه ننتظره يطلع حاصروه من فوق المكيف ومن تحته إلين ما طلع وقامت عليه أستاذه مصريه بالمكنسه إلين ما لعن اليوم اللي جا فيه جامعتنا << ياقلبي عليه حتى الثعبان ماسلم من هالجامعه >>

اليوم في جامعتنا ثعبان وبكره توقعوا تسمعون عودة الديناصورات بعد الإنقراض في جامعتنا ....

Canada's gallant · #2 04/11/2007, 08:06 PM

شدني عنوان الموضوع

حدث في جامعتنا هذا اليوم ..!!

سمعت أن هناك حالة قتل في أحد كليات البنات في المملكة

تلقيت الخبر من صديق على المسن

أتمنى من لديه المعلومات الكافية تزويدنا بها

أما بالنسبة للثعبان فهي حادثة طبيعية جدا في دور التعليم في المملكة للأسف

الحمد لله على سلامتكم

يعطيك العافية أختي

"هلاليه أنا " · #3 04/11/2007, 08:57 PM

الله يسلمك
أما بالنسبه لحالة القتل ما أدري يمكن تقصد محاولة الإنتحار اللي في كلية البنات بالطايف
الحمد الله لحقوا على البنت قبل ترمي نفسها
هذا اللي أعرفه
ومشكور على المرور

Bojan Krkic · #4 04/11/2007, 09:09 PM

الحمد الله على سلامتكم

طيب وش اقول انا اللي يدرسون في المطبخ

هو كان مطبخ لكن حولوه معمل انجليزي

انواع الروائح

يعطيك العافيه

عبـدالمحسـن · #5 04/11/2007, 09:16 PM

ثعبـان مـره وحـده..!!

واللــه كــل شــي صــار متـوقـع بهالـوقـت
مشكــوره جــدا علــى النقــل مــن أرض الحــدث

"هلاليه أنا " · #6 04/11/2007, 09:18 PM

Bojan KrKic

الله يسلمك

والله مطبخ أرحم أجل لو تدري جامعتنا إش كانت أسطبل خيول وربي ما أكذب

حـــــــــــــاله

الله يعافيك ومشكور على المرور

الجاحظ · #7 04/11/2007, 09:18 PM

بعد التحية،

إقتباس


	إلين ما طلع وقامت عليه أستاذه مصريه بالمكنسه

أضحك الله سنك

والله يصبركم على هالمعاناة....

عندي اعتقاد -مجرد اعتقاد- أن البنات مظلومات في منشآتهن أكثر من البنين...

لا بأس عليكن،

احتسبوا في طلب العلم

"هلاليه أنا " · #8 04/11/2007, 09:21 PM

عبد المحسن

شفت كيف ؟؟

العفو ومشكور على المرور

"هلاليه أنا " · #9 04/11/2007, 09:23 PM

إقتباس

الرسالة الأصلية كتبت بواسطة الجاحظ


	بعد التحية، أضحك الله سنك والله يصبركم على هالمعاناة.... عندي اعتقاد -مجرد اعتقاد- أن البنات مظلومات في منشآتهن أكثر من البنين... لا بأس عليكن، احتسبوا في طلب العلم

والله كلامك صحيح بالذات جامعتنا شي مو معقول بس وين اللي يسمع

والله يصبرنا

الف شكر لك على المرور

هامور البورصه · #10 04/11/2007, 10:22 PM

كم احبك يا جامعتي

الله يحلل جامعتنا عندكم

اجل جامعتكم كانت اسطبل

الله يخلف بس

اساساً البنت المفروض ما تتعلم تجلس ببيتها

عشان كذا حاطينكم بسطبل

بالله وش اسم جامعتكم

صرااحه اسلووبك حلو خلاني اضحك مع ان المزاج

زفت .. بس جد جامعتكم فيها فيران ؟.. قسم بالله وسااخه كيف تقدرون تدرسون

فيها

ولا بعد فيها حفريات

وش بيسون بيمدون سلك التلفون لمكتب العميده

ولا بعد ديبان بعدين انتي عليك احلاام مدري شتبي لا عمرك تحلمين

اجل ودك تدرسين برى عشان تشوفين ثعبان ع الطبيعه

تشكراتي لكِ

هلاليه 15 · #11 04/11/2007, 10:34 PM

اسلوبك يجذب الواحد تشكرين عليه

من ناحية ديناصور ههههههههههههههههه ليش لا ..

الدنيا كل شي جايز فيها <<<<<<<<<< تحسب الدنيا كوره خبله

واخبار العنكبوت هل مات مثلا ولا توفي او قتل ولا وش صار عليه ..؟؟<<<<<< هذا اللي همها هع هع

يعطيك العافيه

سعود بن وليد · #12 04/11/2007, 10:46 PM

السلام عليكم ورحمة الله وبركاته
الحمدعلى السلامه اولا
ثانيا ياكثر الى بتشوفينه من كثرة التجارب في جامعتنا. وانا سمعت حالات اخطر من هذا بس الواحد يقول يالله الستر والعافيه والمثل يقول عش اكثر وتشوف اكثر

««× هلاليــــه ×»» · #13 04/11/2007, 10:59 PM

هلايه انتي باي جامعه لاتقولين سعووووووووووووووود <<<<<<<<بتتحطم من اللحين

بني حارث · #14 04/11/2007, 10:59 PM

خخخخخخخخخخ وناسة تصدقين
بالله قولي لي وش اسم جامعتكم علشان أجيها

asim 9 · #15 05/11/2007, 06:49 AM

الحمدعلى السلامه

اجل ثعبان مرة وحدة ماقول غير الله يخلي جامعة عبدالعزيز الي كانك جالس بقهوة موجامعة