27/10/2007, 01:17 AM
|
| كاتب ساخر بالمجلس العام | | تاريخ التسجيل: 21/08/2005 المكان: حيث يعيش الشلولخ
مشاركات: 6,845
| |
مـــــــــبارك والقـــــــــــــطوه
اعضاء منتدانا الرائع تحية طيبه وبعد
بعد هالغياب والله اني اشتقت لكم ..
اربعين يوم برد على كل موضوع ... واشارك بكل مسابقه .. وبعلق على كل سالفه ... ( فاضي ) والفاضي يعمل قاضي
ورجعنا للعزوبيه 
مبارك سلمكم الله واحد من زملاء العمل .... ( سولفجي ) حبيب ...( مزاح ) وحط شده على حرف الز
في مكتبنا وعندنا ( بريك ) عطانا كالعاده سالفه لكن غريبه حصلت له شخصيا مع قطوه
يقول مره من المرات كنت رايح لدوامي وبالطريق شفت ( قطوه ) على الرصيف اللى بين الشارعين ( الرايح والجاي ) وكان الشارع زحمه والسيارات ماتوقف ..
يقولي دققت في وجه القطوه لقيت في عيونها الصيحه .. تناظر السيارات وهي مسرعه يمين ويسار .. وشكلها تقول ( اعنبوو حيهم متى يخلصون ؟) ابقطع الشارع ؟!!
ماندري وش ظروف القطوه ... الرجال دق فلشر ووقف بالجانب الايمن وقعد يراقب القطوه .. يقول ودي اشوفها قطعت الشارع بسلام ...
لكن للاسف مااحد عطا هالمسكينه اي اهتمام .. يقول بغيت اروح واقطع الشارع واشيلها وقطعبها الشارع بس خفت على نفسي من السيارات 
اتصلت على الدفاع المدني ... وبكل عفويه قال : ياجماعه فيه قطوه في شار ع كذا تبي تقطع الشارع ومهيب قادره وهذي نفس .. هذي روح .. ارسلوا احد يسنعها .. رد عليه الموظف اتصل على الدوريات
اتصل على الدوريات ورد عليه الدوريات : اخوي لو سمحت فيه قطوه في شارع ... وتبي تقطع الشارع وهي بالرصيف الوسطي .. تكفون ارسل فرقه او احد يساعدها ... قاله موظف الدوريات :.. هذا موضوع خاص بالمرور علشان يرتب عمليه السير ويخليها تقطع الشارع بسلام
اتصل على المرور .. السلام عليكم ... ونفس الكلام .. إلا ان موظف المرور جزاه الله خير اخذ منه معلومات عنه .. وعن الشارع .. وعن مواصفات القطوه ... يعني الموضوع كأنه جد هالمره .. تقريبا ارضى حماس مبارك ...
مبارك يقول بعد مااقفلت من المرور .. رحت لدوامي متاخر .. وانا في الدوام افكر في هالقطوه !! وش مصيرها ؟؟
يقول طلعت بدري من دوامي وامر بنفس الشارع ... الا وهذي قطوتنا ماتحركت والمسكينه رقبتها للحين رايحها جايه تناظر هالسيارات ومتى توقف ... شكلها ( تافلة العافيه ) من الظهر لين المغرب وهي ماتحركت من زحمة الرياض .. تبي تقطع الشارع وماقدرت ؟؟ الا انه لاحظ فيه ورمه بالظهر .. وبعد مادقق في النظر فيها اتضح انها تجرائت وقطعت الشارع ودعستها سياره على طرف الظهر .. يعني سلمت الا شوي بس بتعيش باقي حياتها معاقه
طبعا طريقة سرد القصه من مبارك مظحكه .. لكن في الأخير سألته ان كنت جاد يوم تتصل... وترجع وتدق فلشر ؟؟ يعني شارب شي ( شاني مثلا ) والا تستهبل عليهم ؟ انت يامبارك يطلع منك كل هالرأفه ! الغريبه انه حلف واقسم انه مانام ذيك الليله من التفكير فيها خصوصا بعد ماشافها مدعوسه وهي مازالت عايشه
أول سعودي اشوفه مهتم في قطوه .... يمكن تستغرب لما تلقى شخص يهتم في شخص .. انسان يهتم في انسان
تبغى تقطع شارع لازم تكون بنت ... شايب قلعتك ؟؟ عجوز بقريح ... ؟؟ لاانسى موقف قدامي حصل في احد شوارع الرياض .. شايب كان يبي يقطع شارع وهو اعمى .. للاسف ولاواحد من هالشباب حاول يساعده وينزل من احدى السيارات هندي معه عائلته ويمسك الشايب مع يده ويوصله للطرف الاخر من الشارع
مبارك في هالقصه .. رغم انه من وجة نظري بالغ في امور .. إلا ان تصرفاته انسانيه يشكر عليها ...
اتمنى تقديم المساعده والرأفه بالكبير والفقير .. والضرير ... والمعاق .. والنساء كبار السن .. والاطفال .. وكل من يحتاج الى المساعده ... وحتى الحيوان يحتاج منا المساعده والرأفه
تقبلوا تحيات اخوكم الصغير ابو فارس <<< سحب على طلال  |
الوضع الشجري
