بسم الله الرحمن الرحيم ..السلام عليكم ورحمة الله وبركاته ..
هذا يا جماعة الخير ..
انا من الناس اللي ما عندهم افكار جديدة للمواضيع .. لكن لعيون الحبايب اللي كلموني على الخاص .. يطلبوني انزل موضوع ..
واللي وصل عددهم حتى الساعة 3496 شخص .. وما ادري بعد ما اخلص الموضوع كم بيصير العدد..
قررت اني اشوف اقرب واحد عشان اكتب يوم من ايامه .. طبعا لقيت لكم واحد اسمه عبد الرحمن ..
وهذي حكايته من بدايتها ..
*********************************************************************
ندخل في حياة الموضوع .. هالموضوع يا رعاكم الله يحكي قصة يوم واحد في حياة ابو داحم .. فيه كثير من الاحداث اللي تمر علينا ..
وتختلف نظرتنا لها بإختلاف موقعنا في الحدث نفسه ..
فهيا بنا .. وطبعا عشان تكونون في الصورة لازم نعرف بشخصيات الاوادم المشاركين في اليومية .. <<< مدري اشلون جات شخصيات والاوادم ..
بطولة ابو داحم ..
هالادمي .. فيه شوية تناقض ..
يكون خجول احيانا ..
واحيانا وجهه اقوى من الصبة ..
صبره قليل ..
ولا يتحمل يكثر هرج مع احد ..
لذلك يحاول يخلص اموره بأي طريقة ..
بالاشتراك مع : شليويح ..
درج .. خبل .. لوح .. شاكوش ..
كل هالصفات السابقة تقف عاجزة امام هالادمي .. ما توفيه حقه ..
ودوره في حياة ابو داحم انه خويه اللي ما يفارقه .. والسبب انه شليويح على ما فيه مما سبق الا انه قوي وجه ويجي منه احيانا ..
لكن عنده مشكلة مهيب عند احد غيره ..
على حد علمي .. اللي هي ان كثير من الكلمات عنده لها معنيين ..
وهو ما يعرف المناسب للموقف منها ..
الكومبارس : مشخط .. والشحرورة ..
ابو عبد الرحمن وامه ..
طبعا لا احد يطلبني احدد بالضبط ..
لأني ما ادري ..
بس اظن ..
ان الشحرورة ابوه .. ومشخط جدته .. <<< ..
ملاحظة كبر رأس البعير ابو سنامين .. كثير من التصرفات المذكورة ..
هي مما شاهدته بعيني ..
او سمعت عنه من صاحبه مباشرة ..
بالفصيح .. الاحداث صحيحة ..
لكن مو شرط تكون بوقت واحد او مع شخص واحد . ..
في بداية يوم حبيبنا ..
كان عنده مشاوير كثيرة بحكم ان محفظته ضائعة في اليوم اللي قبله ..
فكان من الضروري انه يقوم بدري ..
فقام بتوقيت المنبه على الساعة 30: 6 الصباح ..
وطبعا بسم الله عليه ..ما جات الساعة خمسة ..
الا وراسه صافق السقف على اثر ركلة من القدم اليسرى لوالده .. اعقبها تمتمة غير واضحة ..
لكن بحكم معرفته بأبوه يدري انه قال كالعادة ..
" قم يا مال الوجع " .. طبعا قام ابو داحم مفجوع ..
ويناظر الساعة .. لقيها قريبة من الخمسة الا خمس ..
قال يا دين الله وش يصحينا هالحزة ..ولا دائرة حكومية مفتوحة ..
وين تبيني اروح ..قال ابوه قم صل ..
ابو داحم لحظتها تذكر ان المسلمين عندهم صلاة هالحزة ..
طبعا قام الرجال وصلى ثم توضأ
<<< كني بديت اضيع .. خلص اموره وانتهى من لبسه وتجهز انه يخطو اول خطوة في ماراثون اصدار بدل فاقد ..
نزل حبيبنا وجلس بالصالة ..
<<< البهو على قولة عيال الكاش .. ولا لا يالهاوي .. والرجال جالس ع الكنبة وهو شبه منسدح .. والرجلين فوق بعض على الطاولة ..
الشحرورة : صباح الخير ..
ابو داحم : صباح النور والسرور ..
طبعا امه مسيكينه رايحة جاية من قدامه تجهز الفطور لأبوه اللي ما بعد رجع من المسجد ..
طبعا ابو داحم سمع صوت المفتاح بالباب .. وهو اللي يعدل جلسته ويضبط اموره..
دخل ابوه وسلم ..رد عليه ..
مشخط : هاه يا ولدي وين بتروح اليوم ؟
ابو داحم : والله يا ابتاه انا اليوم بروح للأحوال ثم بمر على المرور واذا بقي وقت رحت وطلعت بطاقة التأمين ومنها ع الجامعة و بمر ع البنك واطلع بطائق الصراف وفيه كم شغلة يبيلي اقضيها .. وعاد الله يعين ..
مشخط : ارهوم اريغرلبم ..
<<< يتكلم وهو يأكل .. ابو داحم : عاد دعواتك ..
مشخط : الله يوفقك ويعينك ..
طلع صاحبنا .. وشغل سيارته وتوكل على الله .. ومر على شليويح..
لأنهم متفقين انهم يروحون سوا .. ركب شليويح وسلم ..
بعدها سأل : هاه وين رايحين ؟
ابو داحم : الاحوال ..
شليويح : الاحوال يعني الاحوال المدنية .. ولا الاحوال يعني الاحوال الجوية.
ابو داحم وهو يحرك رأسه يمين يسار يبي يعبر عن انه غسل يده ان هالادمي يفهم من مرة وحدة : لا .. الاحوال المدنية ..
وصلوا اول مكان اللي هو الاحوال وحصلوا قدامهم مجموعة يمكن خمسة او ستة اشخاص ..
طبعا باقي على بداية الدوام ساعة الا ربع والناس بدت تزيد ..
قام شليويح اقترح ان الناس من انفسهم يوقفون سرى قدام الباب ..
ولما يدخلون .. يدخلون بالترتيب ويسحبون ارقام ..
وبكذا يصير اللي جاء من بدري استفاد من جيته .. الناس كلهم قالوا كلام سليم ..
وقاموا صفوا سرى .. وقبل ما تجي الساعة ثمانية بربع ساعة ..
جاء واحد وحصل قدامه سرى ولا اطول منه ..
راح بكل قوة وجه وقف عند الباب على طول ..
الناس يقولون له ياهوه امسك سراك ..
قام هو يرد : اللي يبي يمسك سرى يمسكه في بيتهم ..
هو قالها ولا ما قالها ..الا وكل الناس اللي في اخر الصف .. يزاحمونه عند الباب ..
طبعا قمة اللعانة والدف والسب والكتمة قدام الباب لمدة ربع ساعة ..
فتح السيكيورتي الباب ..
والعالم ما ترحم ...
القوي يدوس الضعيف ..
والشاب يدف الشايب ..
ولا عندك مشاكل ..
دخل ابو داحم و شليويح ومسكوا سرى ع الارقام ..طبعا في نهاية الصف ..
ويناظرون قدام الا والحبيب اللي جاي وخرب السرى اول واحد ..
شليويح : يا خسارة الجلسة ساعتين قدام الباب ..
طبعا مشى السرى حلاوة وصح انهم تأخروا شوي ..
وصلوا عند موظف كان مروق ع الاخر ..ومبسوط ذاك اليوم..
المهم هالموظف كل ما جاه واحد يقول له ..
اذا حلو تعال واذا منت حلو ارجع ..
الناس ما احد له مزاج اول النهار وهذا جالس ينكت ..
طبعا اول ما قالها لـ ابو داحم و شليويح قال له شليويح
آآآآآه ... لو انك لحقت علي وانا صغير بس .. المهم جلسوا عنده تقريبا ربع ساعة ..
وخرجوا من عنده وهم يقولون ..
" يا شين بعض الموظفين وهو متضايق والا وهو مروق "
لكن ومع كذا ..
خلصوا امورهم بدري شوي ..
وطلعوا على موعد تصوير بعد 15 يوم ..
طبعا دار الحوار التالي بين الاثنين وهم رايحين الى ادارة المرور ..
ابو داحم: شفت الموظف خفيف الدم ؟
شليويح: شفت يعني رأيت .. ولا شفت يعني الزر اللي فوق الكنترول في الكيبورد..
ابو داحم: يا خوي لا تصير سامج ..
شليويح: سامج يعني قليل ملح .. ولا سامج يعني ثقيل دم ..
وقتها اقتنع ابو داحم ان خويه مضيع واذا ما علمه عن الشغلتين ..ولا ما راح يفهم عليه .. ابو داحم: شفت يعني رأيت .. وسامج يعني ثقيل دم ..
شليويح: " ايه هذا قصدك ... أي والله شفته ..يا صبر الارض على بعض هالموظفين ..
المشكلة انك تحصل موظف الجوازات متضايق ويقول انه مستأذن من عمله ساعتين ..
عشان يخلص له معاملة بالاحوال ..
وزعلان من تعامل الموظفين ومن اخلاقهم ..وهو في عمله يسوي نفس الشيء ..
وقس على كذا موظفين شركة الكهرباء ..
والاتصالات ..
والوزارات ..
والبلدية ..
والشرطة ..
و ... و ... الخ .. "
ابو داحم: بس لا تظلمهم .. ما هم كلهم ..
شليويح: يعني اغلبهم .. لدرجة انك تستغرب اذا لقيت واحد يشتغل صح ..
ودخلوا في سكوت عميق <<< يمديكم ع التعبير .. ولا قطع هالسكوت الا صوت فرامل ..
ابو داحم مسكها بسرعة لأن فيه واحد قطع الطريق ..
شليويح قام يصيح وهو زعلان ..
" يا خوي انتبه .. ترى اليوم ثلاثاء وبكرة آخر يوم دوام ..
والله ان تقعد وتتنقع بالتوقيف الى بعد الاجازة ..
على مهلك يا خوك .. "
ابو داحم في محاولة لإستخفاف دمه .. وتغيير الجو ..
قال : تقعد يعني تجلس .. ولا تقعد يعني تبقى .. شليويح: درجها بس .. الا كم باقي الين نوصل ادارة المرور ..
ابو داحم: خلاص قريبة ..
شليويح : قريبه يعني يصير له .. ولا قريبة يعني مهيب بعيدة..
ابو داحم: وربي مدري انت امك اشلون تحملتك وانت صغير ..
قريبة يعني مهيب بعيدة ..قالها بعد تأفف ..
شليويح: خلاص اذا وصلنا انزل انت وانا بدور موقف ..
ابو داحم بعد ما اعجبته الشغلة .. وحس انها حلوة للاستهبال ..
قال : خلاص يعني انتهى .. ولا خلاص اللي هو التمر .. نزل بعدها ابو داحم وهو يمسح اثر مداس شليويح – اكرمكم الله – من على قفاه ..
دخل ابو داحم المرور ..وسأل الاستقبال ..
وش يحتاجون من اللي يبي يطلع رخصة بدل فاقد..
قال ما يحتاجون شيء ..بلاغ لو كانت مسروقة ..وبطاقة التأمين ..واثباتك ..
قال ابو داحم: بس الاثبات ضائع .. وعندي ورقة موعد التصوير .. تمشي ؟ ...
قال له الموظف : تمشي ما عندك مشاكل ..
وراح وسحب رقم ..وعشان الوقت ..
ارسل شليويح لمكتب التأمين ..
وصل شليويح للمكتب ..وطلب من الموظف اصدار بطاقة ..
قال الموظف يدك على 50 ريال ..
شليويح: " يا شيخ .. اتق الله .. السيارة كاملة .. بـ 360 ريال ..
وهالبطاقة بـ 50 ريال .. "
قال الموظف : تبي ولا لا ؟
شليويح: هات الله حسبنا ونعم الوكيل ..
رجع شليويح للمرور ..واول ما شاف ابو داحم قال له ..
حرام ان تجيب الخمسين ولا ان يسيل الدم للركب ..
فهم ابو داحم السالفة ..ووعده انه يعطيه ..وهو ناوي الجحده ناويها ..
وبعد انتظار تقريبا ساعة ..
ولما وصل ابو داحم الى الموظف ..واخذ واعطى معه ..
طلب منه الموظف اثبات ..عطاه ورقة التصوير ..
قال وش اسوي بها ذي ..رح هات اثباتك الله يصلحك..
ابو داحم: طيب خويك قال انه ...
الموظف : ما لي علاقة بخويي .. انت عندك اثبات هاته .. ما عندك .. توكل على الله .. المراجعين واجد ..
شليويح: " الله .. عرفت المراجعين الحين .. وانت ما تدري عنهم لما بغيت تاخذ لك زقارة ولا تشرب لك شاهي .. " :mad:
ابو داحم: يا خوي كل تبن انت .. تبيه يعقدها..
خلاص يا خوك ..طيب عندي جواز تقدر تمشيها به..
الموظف : هاته اخلص علي ..
عطاه النماذج يعبيها ما بين يجيب شليويح الجواز من السيارة ..
مشت الامور بدون أي شيء يذكر ..
الين بدأ الموظف يكتب البيانات على الرخصة الجديدة " القديمة " ..
ابو داحم: طيب بس انا رخصتي من الجديدة اللي هي الصغار ..
الموظف : ايه ادري .. بس النظام ما فيه بدل فاقد الى الان ..
شليويح: " الله ... وش ذا النظام اللي يصدر جديد ... ويعجز عن بدل فاقد .. "
ابو داحم: يا خوي فكنا الله يعلك ... خلاص ..
خلصت امورهم من المرور ..وطلعوا وهو يأذن لصلاة الظهر ..
وطبعا ابو داحم زعلان بقوة على شليويح الدلخ ..
وقال له : يا خي وش قصتك انت .. اقسم بالله لو انه يبي انه ما يعطينا اياها الا على نهاية دوامه ..
ركبوا السيارة ..
ودار بينهم الحوار التالي ..
<<< شليويح: الحوار يعني النقاش ... ولا الحوار يعني صغير الناقة..
<<< الخبيث جالس جنبي وانا اكتب الموضوع..
المهم قال ابو داحم بالسيارة ..
هالحين انتهينا من الرخصة ومن الاحوال ..
وبقي لنا كم مشوار لازم ننتهي منها قبل الساعة اثنين ..
شليويح: اقول هات الخمسين وبلا كثر هرج ..
ابو داحم: خلاص بعطيك اياها .. يعني جالس اسوق عليك انا ..
شليويح: اسوق يعني اقود .. ولا اسوق يعني اطقطق ..
ابو داحم : يا لييييل العنا .. عز الله اللي بنبطي على هالحالة ..
وقاطع شليويح خويه ..يقول : اربط اربط حزامك .. قدامك التفتيش ..
ابو داحم: يا خوي شايف ... اربط انت وريحيني ..
شليويح: لا انا ما يسألون عني .. اهم شيء السائق ..
ابو داحم في محاولة ثانية للتنكيت .. واستغلالا للموقف .. بما ان شليويح ما يقدر يمد يده قدام التفتيش ..
قال : السائق يعني اللي يسوق السيارة .. ولا السائق اللي هو زوج الشغالة .. وصلوا للجندي ..
قال شليويح: ورى ما تربط حزامك ؟ .. ما قالوا لك انه لازم تربطه ..
في اللحظة اللي كان شليويح يبي يتكلم ..
قاطعه الجندي قائلا : جنّب .. جنّب ..
طبعا و ابو داحم يدور موقف عشان يجنب ..
سأله شليويح: هقوتك وش يقصد يوم قال ورى ..
ورى يعني للخلف .. ولا ورى يعني ليه ..
ابو داحم: اسأله وهو يكتب لك الورقة الصفراء .. شليويح: يا رجال انا اوريك .. اتحداه يحررها بس ... انت ما تدري اني واسطة . ..
وصلوا عند الجندي ..
وقام شليويح وطلع من جيبه بطاقة العمل ..
وقال : انا من اخوياكم في شركة المجال سيرفس ماستر برتبة حارس امن.. ..
ابو داحم سحب نفسه وراح للسيارة يتلوى فيها من الضحك ..
شليويح اكلها مخالفة 100 ريال ورجع ..
ركب السيارة شليويح..
وقال : حرك حرك .. جعلك تضحك بدون سن.. ..
ابو داحم وبحس النذالة عنده ..ورغبة في زيادة المصخرة بشليويح..
قال : حرك يعني امش ... ولا حرك يعني اخلط .. شليويح: اقول .. وين الخمسين .. ترى ما لقيت من وراك الا الخساير. ..
ابو داحم: يا رجال ابشر بعزك .. الخمسين وقيمة المخالفة . ..
ويقول في نفسه : لا قدني ناوي اسحب عليك ف الخمسين .. ما تفرق معي اسحب عليك ف قيمة المخالفة بعد . ..
ورجع يكلم شليويح : بالله اشلون تعطي العسكري بطاقة موظف بالاتصالات وتقول انك حارس امن بالمجال . ..
شليويح: " والله انا مرة مع واحد اخوياي .. نفس الموقف .. خوينا عطى العسكري بطاقة ..
وقال انا من اخوياكم في امن المنشآت ..
والعسكري قال له : توكل على الله ..
بالله جاوبني .. وش دخل امن المنشآت في المرور ؟ ".
ابو داحم: يا رجال .. مشي حالك .. حالك يمشي ..ما معك الا الصبر. ..
اهم شيء شف لنا صراف الحين احتاج فلوس ..
وبعد برهة من الزمن .<<< يسمع بالتشويق .. حصلوا صراف ..
بس طابور السيارات محترم قدامه ..وقف ابو داحم في الصف ..
شليويح: يا خوك من جدك انت .. فاضي .. ولا ما تبي تخلص شكلك اليوم ..
ما تدري ان عبيط بيحطها يوميات .. اقول .. اطلع اطلع بس وقف ورى الصراف . ..
مشى ابو داحم .. ووقف ورى الصراف ..
شليويح: كم تبي تسحب ؟ وأخذ البطاقة ونزل ..
مرّت سيارة وحدة بس ..وسقط شليويح في الدور ..وسحب وخلص ..ورجع وركب السيارة ..
شليويح: هاه خلصنا .. ولا طابوري ولا طابورك ...
ابو داحم: وربي انه تخلف .. واسلوب غبي . ..
شليويح: اقول لا يكثر .. انت شفت بعينك وش صار اليوم بالاحوال .. اللي يستحي ما يعيش يا الحبيب . ..
ابو داحم : " ايه .. احنا كذا نلتزم بالنظام ونحبه لا صار في مصلحتنا ..
اما اذا عرفنا اننا بنتأخر لو التزمنا فيه .. نتذكر وقتها ان اللي يستحي ما يعيش .. " .
شليويح: يا شينك لا صرت تنصح .. وقف وقف هنا خلنا نصلي ...
*********************************************************************
بصراحة ..
خفت من الاطالة ..
ويضيع التركيز عن الاشياء اللي ابي اوصلها ...
لذلك راح تكون بقية يومهم ..
وسالفتهم في الجامعة .. وخويهم اللي قابلوه .. وقصتهم مع البنوك ..
في مكان آخر ..
الى حين اكمال اليومية ..
نوما هنيئا ..
وعلى طريق الملك خريص نلتقي احبه . ..
العبيط كعباطة العبيط ..!! 1867 م :D ..
ملا حظة / تم تعديل الموضوع لعيون طارق .. وخرب التنسيق وضاعت الابتسامات
وانا رجال وراي دوام الحين .. اذا رجعت ان شاء الله عدلتها
..
كله ولا زعل طارق