تعرفني

السؤال الثالث
(( اذا اتتك مذمتي من ناقص فهي الدليل باني ولله الحمد ما مثلي ))
أ. مر عليك هذا البيت ؟
اذا كان الجواب نعم متى .. واذا لا .. ليه
وذا ما تدري أجل وشوله عايش
ب. وش رايك فيني من الناحية العاطفية ؟

السؤال الرابع
ماذا يعني لك التالية أسماؤهم .........
ولا تدري كنسل السؤال هذا .. لان الجواب معروف مستحيل تذم أحد

السؤال الخامس
هل تعرف الاصنصير ؟
اذا كان الجواب نعم جاوب على السؤال .. اذا لا برضو جاوب على السؤال
لما توقف عن الأصنصير كم مره تضغطه

السؤال السادس
لو انت في الصحراء أعزل ولوحدك وجاك أسد ونمر ولبوه يتطاقون عليك
وش بتقول لهم

السؤال السابع
هل انت نادم أشد الندم على قبول الاستضافة

السلام عليكم والرحمه،،

معليشات قسم بالله توي أستقر وأقر و أفضى..

لا علينا ها أنا بذا بوه


_______________________________


فرصه ضايعه

إقتباس 1-ماذا تعني لك هذه المدن الرياض ,, مكه ,, لندن ,, زيلامسي ,, ماربيا ,, مونتريال ,, امستردام

الرياض : أقسم بالذي رفع السماء بلا عمد إني أحب الرياض>> مهوب عاقل عبدالرحمن اللادن
ولا أقدر أعبر بأحسن من كذا بالذات هالايام

مكة : المكرمة

لندن: الغلااااء الفاااحش

زيلامسي: تذكرني بآل مهدي اللي رشح نفسه بالانتخابات البلديه، حيث نشدوه يوماً عن أجمل مدينه زارها فقال مدينة زيلامسي بالنمسا >> ابومهدي ما عنده قروش أبد >> ماشاء الله

مربيا: لا أعرف عنها سوى أنها في دولة كانت ذات يوم تقع ضمن خارطة العالم الاسلامي!

مونتريال: اسمها يصلح يصير ماركة مكيفات

أمستردام: تذكرني بسالفه صارت لي بمحل لبيع التمور اشتغلت فيه يوم إني بالثانوي ، وأحلى تحيه لأبوسليمان اللي يذكر ماجرالي، فيما لو وقعت عينه على هذه السطور..

إقتباس 2- لو أن الحياه كائن حي متمثل امامك ، كيف يمكنك وصف هذا الكائن وما هي شخصيته ؟

إقتباس 3- ماذا تعـني لك الدمـــــوع و هل هي عـار عندما تسكـب من جـفــــون الرجـــل ؟

تعني أن غداً سيكون مختلفاً تماماً ، وستكون عارً على رجلٍ سمح لغيره بأن يراها..
وعموماً ترى الدموع أفضل غسول للعين..

إقتباس 4- كثيرا ما يقال ( سبقت عبراته عبـارته ) متى أحس الهاوي (عبدالرحمن) بأن عبراته كانت أبلغ من عبارته ؟

عندما كنت في الثالثة والعشرين من عمري وأردت إخبار والدي(أمد الله بعمره ورزقني بره) بأني بذلت ما بوسعي وأُثقـِل كاهني ولم أعد أحتمل المزيد..
أتذكر حينها أنه كانت لي عبرات صعُب علي إخفائها..

إقتباس 5- الفرح والحزن طرفي نقيض في حياة البشر يتجلى كل منهما في مواقف عديدة بعيداً عن شخصية عبدالرحمن الخارجية وانتقالاً إلى أعماق قلبه هل يسيطر الفرح على الحزن في قلبك أم العكس ؟ وهل تؤثر الظروف المحيطة بك في شخصيتك ؟

أسعى جاهداً لأن أعكس صورة الفرح الظاهر على حقيقة الكَبَد الباطن ..

وأنا جزء من هذا المحيط ولا بد أن أتأثر بما يتأثر به ..

إقتباس 6- لو ُطلــــب منك أختيــار إحـــدى الأمـاكـــن فأيــها يفضلها قلبك ولماذا ؟!...: 1\ بــــحر في ليلة حالكة شتــوية بارده .؟ 2\ بســــتــــــان يمتلــــئ بالورد وعطــره الفواح .؟ 3\ غـــــرفه معتمة اللون ممتلئه بالصور والذكريات القديمه .؟

أختار البحر في ليلةٍ بارده >>> اخس يا حسين فهمي

أما لماذا، فلأن الغرفة الممتلئة بالذكريات ستفقدني شخصيتي، والبستان المملوء بالورود سيجعلني أشعر بأني لا أريد أكثر مما أنا فيه، لكن أمواج البحر ستكون بأمر مجريها مقبلةً علي بالأمل ، وبرد تلك الليلة يجعل مني شخصاً يؤمن بأنه لا حياة لمن يستغني عن أحبابه..

إقتباس 7- ليـل ,, هـدووء ,, عيـوون الهاوي على السمـا والنجـوووم ,, فكـرك ويـن يـوصـل ..؟

روضة الخفس

إقتباس 8-انت بصفتك عضو لك قدر كبير بالمنتدى هل رأيت بأن أحد المشرفين أو الاستشاريين لايستحق أن يكون مشرف أو متخاذل ومتكاسل عن أداء واجبه >>> احرجتك صح بس جاوب بصراحه

كلام كبير ذا

أمتلك حق جحد هذا السؤال

إقتباس 9- آخر سؤال بهالرد بس يهمني كثير لو ماقدرت ترد على اسئلتي رد على ذا السؤال لو كنت أنا أختك وش راح تنصحني فيه ، وراح تخليني اقعد بالمنتدى ذا والمنتديات المختلطة ولا لا ؟؟!!

سؤال جميل ..

سأثق بنضج عقل أختي قبل كل شي، وأنصحها بتقوى من يطلع عليها بالسر والعلن، وسأقول لها استمتعي باحترام الآخرين لكي من خلال عدم التجاوب مع كثير مما يُقال في حقك وان أعجبك ظاهره..

وأسأل الله العلي القدير أن يهدينا ويصحلنا ويحفظنا من كل شر..

إقتباس إذا فيه إمكانيه أجي عطني الضوء الأخضر بردك الجاي

الضوء دايم خضر


تشكرااتي لك ،،


_______________________________



حزش

إقتباس س1: من متى وانت هنا؟

مبطي جاي ، ليش هل كنت تدوّر أنا؟؟

إقتباس س2: ايهم اطول رقبة الزرافه ولا النمر اسرع ؟

اصبر شوي وتجيك مسابقة مزايين الزرافات بساحل العاج ، وحينها تبي تعرف الجواب الله يخلط مخ أنت كما خلطت مخي

إقتباس س3:وش القلم الي تكتب فيه بالمنتدى ومن وين شاريه؟

قلم من نوع كتكاتي وشاريه من محلات سعيد باخشوين للمجوهرات


تشكرااتي لك،،


_______________________________



صدى الأمس


ياليت يسمحون لي الأعضاء أخالف القاعده اللي قلتها في أول رد لي وأقول هلا باللي وصل عطره قبل توصل مراسيله ، ودي أقول أكثر بس أخاف يقال بأن الهاوي لحس العسل كله >> تكفون اسمحو لي تراه عميد وكبير سن ولا ناااب أشوفه وااجد

إقتباس شئ يقهرك بالمنتدى .. وودك انه يختفي ..؟؟

والله اني قلت من زمان( ويذكر كلامي ابومقبل) وقبل لا أقرأ كلامك ، أن السواليف الفاضيه والمبالغ فيها والشتشته الزايده، هي أكثر شي مضيق صدري بالمنتدى..>> يحلف عشان ماتقول انه غش منك

إقتباس فيه امكانية ان العضو يشتت ويأخذ راحته بس على الاقل يحلها من تحت اكه يعني يكتب له كم كلمه تخص الموضوع وباقي الرد تشات مهوب كل الرد تشات × تشات ؟؟

أما " يحلها من تحت اكه " هذي بلحاها مدرسه خاصه في كيفية توصيل المعلومة لا تلقينها..

إقتباس ووش السالفة اللي خلت الاعضاء تمسك معهم على الظاهره هذي ؟؟

في دمجتي واحد من الأسباب الرئيسية جداً لكن المصلحة العامة تقتضي عدم نشره >> ياشين اللي يمن بالهرج

إقتباس تحب تشوف الاخبار ؟؟ ولك اهتمام فيها وبالبرامج السياسية ؟؟

ايه بالحيل

إقتباس وش هي قناتك المفضلة بعد غصب واحد وغصب اثنين << قديم ؟؟

الجزيرة بالنسبة للأخبار، والعربية بالنسبة للبرامج ، وكلاهما تفضيله نسبي ، بمعنى أنها أفضل الموجود..

وعموماً فان أخبار التاسعة (أو التاسعة والنصف) في غصب 1 غالباً لا تفوتني ، ولا تنشد عن السبب فقد أصبحت عاده..

إقتباس وش البرنامج اللي تحرص عليه وماودك يفوتك ابد ؟؟ مهما كان نوع البرنامج ..

برنامج اضاءات، وخصوصاً أن بداياته كانت بمواضيع سياسيه لم يسبق وأن نوقشت بالطرقة التي يقدمها تركي الدخيل..

أحب أتابع برنامج آدم وحواء، كبرنامج اجتماعي

برامج الإفتاء عموماً على قناة المجد..

بعض برامج ام بي سي فور اللي تعرض قضايا الشعب الأمريكي..

وإذا وقع الريموت على قناة تعرض توم وجيري أو بيب بيب ، فأحتاج لمن يلفعني كي أغير..

إقتباس حياتك اليومية مرتبة والا كل يوم لك جدول ؟؟

غالباً مرتبه على نهج واحد ، لكن هذا مهوب معناه أنها مرتبه بشكل جيد

إقتباس تحب تخطط لكل شي في حياتك والا مثل ماتجي الامور تمشي عليها ؟؟

حياتي العمليه أخطط لها بشتى وسائل التخطيط، أما حياتي الخاصه فغالباً أجتهد فيها بدون تخطيط..

إقتباس السفر وش يعني لك ؟؟ وانت من الناس اللي تقدر السفر والا لا ؟؟

السفر هو الجانب الأكثر متعه في حياتي شريطة أن يكون خارج حدود خريطتنا وان كان لأوربا فأزين وأزين..

وأكثر شي حببني فيه هو أن السؤال اللي يقول وش هوايتك؟ صار من أسهل الاسئلة عقب ما كان يذبح قلبي..

إقتباس وتحب تغير وتشوف كل مره ديرة جديدة والا اذا طحت بديرة محدده ماتغيرها ؟؟

أحب أغير

إقتباس مكان تبي تسافر له وتعتبر هالديرة هي امنيتك بالسفر ؟؟

ما ودي أقول انها أمنيه ، لكن ودي أزور ولاية سياتل بأمريكا..

إقتباس تحب تسافر مع عدد كبير من الاشخاص والا عدد بسيط ؟؟

غالباً أسافر مع شخص واحد ، وأحياناً نكون ثلاثة ، و لا ودي أبد نزيد عن 3 وعلى قولته اذا كثرت دبرت

إقتباس لو قالوا لك اختار لك ثلاث اعضاء وتبي تسافر معهم من هم ؟ واي ديرة تختار ؟؟ طبعاً انا واحد منهم هذا شي قاضي منه << مثل اللي يقول تكفى قل اسمي طبعاً محفول مكفول اخاف باتسر تهون تحسب كل شي عليك

أختارك أنت ومعك واحد تختاره أنت بعد ، لأن ألزم ما علي وناستك بس لا تجيب لنا واحد متزوج الله يرحم والديك أخاف أن زوجته تحسبها رحله سربتيه وتدعي علينا وتقلب بنا الطياره على بحر قزوين..

نفر دول أوربا الوسطى سلوفاكيا ، أوكرانيا، التشيك ، والأخيره نبي نروح لها علشانك وعلشان ثالثنا والا أنا عبيت عيني من روعتها، وترى أهم ميزه بهالديار انك ما تشوف بزارين لندن وباريس والطقه..


وأنا أتكفل بمصاريفك وأنت تكفل بمصاريف اللي تختاره >>> لسان حال العميد يقول ما سوينا شي

إقتباس لو قالوا لك نبي نكشت واختار لنا 8 من الاعضاء برضوه غيري << يقاله واثق انك تبي تقول اسمه ؟؟

ياحبك للتوريط والاحراجات..

صراحه إني عديت اللي ودي بهم ووصلوا 12 واذا ساق الله لنا مطرة خير وربّعت الأرض أبصلح أنا واياك كروت دعوه للمكشات ونوزعها عليهم..

إقتباس من يعجبك من الشعراء ؟؟ وعطني رأيك بـ محمد بن الذيب .. سعد بن علوش

جاوبت على الجزء الأول من السؤال

ويعجبني ابن الذيب زمن شعراء الفطره على قولتهم ، أما سعد علوش مهوب يجوز لي قوه..

إقتباس وش رأيك بـ العزوبية .. الاستراحة

فيه ألفيه كتبتها وقلت عند حرف الشين :

والشين شانت نفسي عليهن .. وعفت عيشتهن ياكود مسيار
وبابعد عنهن وشقى ايدهن .. وبابني بدربهن عالي جدار



أما الاستراحه ففي رموز أبوبدر ما يؤكد ادماني عليها

إقتباس ما تحس اننا شعب يحب الزحمة والغثى ؟؟ الحين العالم تدري ان رمضان يبي يجي والعيد .. لكن ما يجوز لهم التسوق الا اذا قالوا ترى باتسر رمضان والا عيد ؟؟!! وش رأيك بالاشكال هذي ؟؟ ماودك تفرشهم ؟؟

يارجل هذولا مثل اللي ما يذاكرون الا قبل الاختبار بساعتين، وبعده يقولون الاسئله صعبه ومعقده..

ومن جانب ثاني صارت تسليه عند كثير من الناس وفيها أكشن يحرك حياتهم ..

ما أقول الا الله يطول بعمر أميمتي اللي من يدخل رمضان لين يقضي ماتطلع الا للمسجد..

إقتباس بالله مهوب يحز بالخاطر انك تسمع الاشياء هذي ؟؟ وفوق هذا كله برمضان ؟؟ ماتحس ان اليوم الوطني طلع بخساره علينا ؟؟ << تراه سؤال ملغم ناوي على ترقية على حسب اجابتك

الله يرحم الحال وانا اخوك..

بس قسم بالله ماحزت بخاطري كثر ما رفع ضغطي كلام واحد من المفتين بعدها ، خصوصاً وان اللي بربسوا بذيك الليله أغلبهم أطفال، لكن هذا الله يخلف رجل كبير والمفترض انه عاقل..

على فكره يالعميد ياخي رجع أشرطتي حقت فوق هام السحب وكل سعودي بهالبلد، بسرعه يارجل تراهن أبطن عندك >>> والله ما تاخذ الترقيه على ظهري


تشكرااتي لك،،


_______________________________



نجمة الابداع

إقتباس ْ في رحلة الحياة أين يكمن جمال الدنيا ؟

في رضا الله ثم رضا الوالدين

إقتباس ْ تختلف الظروف بين فرحة عارمة وحزن قاتل وسعادة مطلقة وجرح نازف بين تلك وذاك مواقف تبرز وعلى شخصية الإنسان تبرز متى وجد ضيفنا الكريم الظروف قادته نحو الأفضل ؟؟

عندنا مثل بالعاميه يقول : ما تصتك الا وتنفرج

وسبحان الله العظيم، كل ما ازدادت الظروف صعوبة، كل ما أعقبها فرجٌ ونجاح يوازي شدة قسوتها وإحباطها..

أكثر الظروف صعوبة ً كانت تلك التي أحاطتني أيام دراستي الجامعية، حينها كان ذهني مرهقاً جداً بظروفي الأسرية ، ووضعي المادي محبطٌ لأبسط طموحاتي، حتى عافيتي لم تكن على ما يرام، وحين بلغت هذه الظروف نقطة الذروة بفقدي لمن كان يقف دوماً بجانبي، شاء المولى عز وجل أن تكون هذه النقطة بداية تحدٍ مع النفس وسباقٍ مع الوقت واقتناع داخلي بأن عاقبة الصبر الفرج ، فتحقق لي جل ما أريد، و أمسيت كما أصبحت أحمد الله في كل حين..


تشكرااتي لك،،


ومن قليل معرفتي أقول بأن هنا مثال لكل عضوه تسأل عن الطريقٍ الأجدى لتسلكه عبر هذا المنتدى..


_______________________________



هلالي _11

إقتباس أولاً : وش لونك عساك طيب ؟؟؟

بخير يامال الخير..

إقتباس ثالثاً: وش أزين في رأيك الزعيم ألحين 2007 و لا في 2001 و بصراحه بلا مجاملات خخخخ ؟؟

2001 ، وبغض النظر عن أني أميل لكل ما هو قديم..




تشكرااتي لك،،


_______________________________


طفيت ياجماعه، وابرجع إن شاء الله

تحيه طيبه للجميع للمعلوميه أنا من المقصرين بالمجلس ولــكن اعدئكم بالوجود المستمر ....

سؤالي للضيف وهو بصراحه راعي محل :::

س / من هــو قدوتك يالحياة ؟
س / وما هو أفضل بيت شعر أعجبك ؟
س / وماهي حكمتك بالحياة ؟

ودي أجيب لك علل بس حسيت أني طولت

يالله بالتوفيق

the bast

إقتباس تسمع دائما قول الجاهلون أذا سمعوا فتوى لشيخ بتحريم أو تحليل يكون غير مقتنع وعندما تسأله عن السبب يقولكـ بالعامية (مزاج( .. مارأيكـ بهذا ؟

هذا شخص جاهل ومكابر بنفس الوقت ، وأمور الدين ما فيها مجال للعب والتساهل، والمفروض مادام انه جاهل بأمور دينه أن يأخذ العلم من أهله..

وكون أنه ينسب ذلك لعدم قناعته معناه أنه يفتي ! ، والتحريم والتحليل شي مهوب سهل ، والرسول اللهم صلي وسلم عليه يقول : ((أجرأكم على الفتيه أجرأكم على النار)) أو كما قال صلى الله عليه وسلم..

إقتباس مارأيكـ بالردود الساخرة بمنتدى الجمهور الهلالي ..؟

توي أدري منك إن فيه شي اسمه ردود ساخرة بمنتدى الجمهور..

إقتباس من يملكـ عضوي بشبكة الزعيم يحق له الفخر .. هل تحس بالفخر هذا ..؟

والله ياخي أنا سعيد ومسرور بأن لي يوزر في شبكة الزعيم وأني أشارك فيه وأتواصل مع أعضائه..

إقتباس مارأيك بأخواننا الصغار : أبو طلال .. الكلاسيكي...كل الفن هلالي

قلت رأيي بأصدقائي ابوطلال والكلاسيكي..

أما كل الفن هلالي فهو من أنشط الأعضاء بالفترة الأخيرة ما شاء الله عليه، ويكفي أنه بدع بتنزيل الأخبار اليومية ، وهو مكسب لمجلة عالم الزعماء..

تشكرااتي لك،، وفواصلك ذكرتني بربع أبو حته


__________________________________




الغريب


هلا وغلا بمن هو زي الأخ الذي ولدته أمي>> المشرف لازم نحييه مرتين لزوم التضبيط

إقتباس .. وتحس بمرن بصدرك .. وتسنك قاعدن تناظر مباراة بين الوحدة والقادسية يوم الجمعة بالليل والمعلق حافظ جمعة الله يرحمه وأنت عندك بكرة واجب ( فقه ) وحفظ ( مطالعة ) ولا حليت ولاحفظت .. وبك نومن عظيم .. وودك تصيح

والله يابوبدر كنك توصف حالتي يوم هبطت الطياره بهالديره ، بس على العموم دق لي ولد يمكن أرجع بأي لحظه..

إقتباس 1-وش أبرز 3 عيوب تشوفها في شخصيتك وتتمنى تتخلص منها ؟!!

والله ياخي عيوبي كثيره ، لكن الحراره والعجله في بعض الأوقات ، إضافة إلى الجرأه الغير محسوبه في بعض المواقف، هي أبرز العيوب اللي ودي أتخلص منها، وأكيد عندك غيرهن بس أرسلهن لي وسائط..

إقتباس 2- ماالذي كنت تتمنى أن تكونه لو لم تكن مهندسا كيميائيا ؟!!

مهندساً مدنياً

إقتباس 3-هل تسمح لي بأن أطلق عليك لقب ( الباشا ) في المنتدى ؟ ومارأيك بهذا اللقب ؟

اسمح لك بعد ما تجيب موافقه خطيه من ابوصالح..معي.

وهو لقب جميل وأحسن بكثير من لقب ملك السوني..

إقتباس 4- لمن تقول الكلمات التالية :

- زين زين ! : لملك الريموت
- ياذيب ! : لأقرب واحد لزمزمية الشاهي
- الكبير كبير !: لملك الألعاب المختلفه
- هنا ذبيحة !: لأسقم لاعب واعد
- يامغرور ! : لنصير شما
- يا أرعن !: للخباز

والله يوسع صدرك على هالسؤال

إقتباس 6- ماهو رأيك الصريح بالذيب سامي الجابر ؟ واحلف إنك ماصحت يوم أعلن اعتزاله !! ( وجه شرير جدا )

كان صرحاً من خيالٍ فهوى، وأكيد أبصيح بحفل اعتزاله إذا شفت دموعك..

أصرح من كدا ايه يابوبدر ، وألزم ما علي إسعادك بإشباع رغبات الشر في داخلك

تشكرااتي لحضورك الونيس



__________________________________



المشاغب

إقتباس أجل ما لقيت إلا أنا تغلط علي؟

ودك أحب خشمك ، أو ما ينسيـّك الخطا حب الخشوم

إقتباس وبالنسبة للأسئلة فإن شاء الله لي عودة متى أراد الله .. ولكن قبل ذلك أريد أن أسألك : أنّى لك هذا؟

هو من عند الله ثم من أنّى ابومقبل ، والله يوسع صدرك وصدره بالرضى والعافيه كما جعلتموني أكركر عليها كلما قزيتها مكتوبه..

إقتباس س1) حسب خبرتي وموهبتي في قراءة شخصيات الآخرين وجدت أنك من النوع الذي يثق في الناس كثيراً ولا يحذر في تعامله معهم ..!! السؤال هنا : ألم تتعرض لخيانات لهذه الثقة جعلك تندم عليها؟

حصل ياصديقي ، وصدز أني أشغلتكم بألفيـّتي لكن الحاصل أن فيها أجوبه لكثير مما أُسأل عنه ، كيف لا وهي تصف تفاصيل حياة مشخبطها >> بالله وش رايكم بـ " كيف لا "


قلت عند حرف الظاد واصفاً ذاك الآدمي الذي خدعني :

والظا ظنيت بالردي خير ... غرني شكله يمشي بوقار
أثره رخمةٍ نذل ٍ حقير ... بمدحه لو قلت انه حمااار


لكني ولله الحمد لست بقاصر كي لا أتعلم وأستفيد من تلك التجربه..

وعموماً يظل حسن الظن بالناس منهجاً قائماً بالنسبة لي..

إقتباس س2) أيضاً من خبرتي اكتشفت أنك تحب.. ولا أريد الخوض في التفاصيل والخصوصيات.. ولكن هل ترى أن الزواج قد يكون الحل المناسب لينسى الحبيب حبيبه؟

خبرتك خانتك هالمره فأنا لا أحب بل أعشق إن كنت تريدها من فمي..

و لا علاقة بذلك لا من قريب ولا من بعيد بأمر الزواج ، بل لا علاقة للأنثى به..

إقتباس س3) عطني رايك بهالأسماء:

أ- ماجد مقبل..

لم أغير نظرتي في موضوع نشأة الصداقة من خلال المنتديات إلا من خلال لقائي به أول مره..


ب- كلي هلالي..

أنا بس اللي محيرني وما خلانيش أنام ... ازاي أنا بأدر أسهر وازاي يئدر ينام

قلت لك قبل إن سالم أحبوش وانا ما اعرفهوش..


ج- الفيروسة الزرقاء..

مدين ٌ لها بأن كانت من أول من رحب بمعرف الهاوي ودعم كتاباته بعد انقطاعه ..


د- أبو ريمان ..

كلماتٌ تنقلت بيني وبينه جعلتني أقول بأنه رجل ٌ من فئة الكبار وله كل معزة وتقدير..


هـ - القاضي..

قلت رأيي بابوعبدالله في أول رد لي على هذا الموضوع.


و- الغريب..

عشر سنوات أو ما يزيد من الصداقة معه تجعل شهادتي فيه مجروحه، وهو بالنسبة لي أكثر من أخ..


ز- خالي من الهم..

إن كان لشبكة الزعيم عشاق فهو أميرهم ، وما شاء الله عليه يجمع بين طموح لا محدود وروح مرحه لدرجة أني أتقبل منه ما لا يعجبني من غيره..

إقتباس س4) وش موقفك لو اكتشف أن أحد الأشخاص دخل لرسائلك الخاصة وفتش فيها بدون علمك؟

أبسأله عن آخر رساله جتني ، من مرسلها وما هو محتواها ..

إقتباس س5) آخر سؤال .. بما أنك صريح كما أعرفك .. أتمنى تعطيني أبرز عيوبي بكل صراحة .. وتعطيني معها الحلول حسب وجهة نظرك ... مع العلم أني غير ملزم بتطبيق هذه الحلول أو الاقتناع بوجهة نظرك بس أبي أعطيك جوك وأخليك تتفلسف شوي

لو لم يكن المشاغب من الأعضاء الذين تعجبني فيه صراحته وقوة ردوده بالحق ،وجمال اختياره لمواقع هذه الردود، لما قلت بأن مستواه انخفض عن ما كان عليه ، ولعل لشعبيته سبب مباشر في ما أراه من تركيزه على سؤال العضو عن أحواله لا عن أحوال كتابته ، مع أني ممن يحب الجمع بين الاثنين ..


ويا صاحبي، إن كان أحدهم يظن أنه استطاع استغلال صراحتي (في هذه النقطة بالذات) ليوقعني في الحرج، فلا أطلب منه سوى العودة لتصفح الردود..





تشكرااتي لك،، وترى ريكي ورايس وجهان لعملة واحده


__________________________________



leo messi

إقتباس وسؤالي وش كنتوا تقولون يوم تقابلتوا انت وماجد وخالي <--- ابوك يالفضول

كنا نقول ليش الناس تحب الببس أكثر من السفن آب مع أن السفن يغني أحياناً عن الشاهي

إقتباس 1-لو قُدر لك ان تكون وزيرا للعمل لمدة 24 ساعه ما أهم القرارات التي ستتخذها خلال هذه المدة ؟؟!!

قلت وش اللي راح أسويه، بس تكفى خل هالـ24 ساعه ذي تكون في يوم أثنين ..

إقتباس 2-عندما تريد ان تعبر او تتحدث لشخص وعندما تواجهه لتُعبر فجأة طار جميع الكلام اللي براسك كيف تعالج هالموقف ؟؟!!

أقول له ياخي وراك مكشر؟؟ وأول ما يصقعني بابتسامه سأتذكر ما كنت أريد قوله..

إقتباس 2-لو طلبوا منك تقييم شخص ... وش هي مواصفات ومقاييس تقييمك له ؟؟!!

سؤالك عام جداً، وبالنسبة لي تستحيل الإجابة عليه دون معرفة طبيعة عمله التي أستقي منها تقييمه..

ولو كنت تقصد تقييم عضو في المنتدى فأنا أقيمه من خلال أطروحاته ونوعية مشاركاته..

مع تركيزي على أن تقييم العضو يختلف تماماً عن إبداء رأيي في شخصه( ان حصل وتعرفت على شخصه)..

إقتباس -متى ودك تبطل الهواية وتدخل عالم الاحتراف

متى ما قالوا لي ترى الحياة مهيب ساعةً وساعة ، فسأذلف إلى عالم الاحتراف ..


تشكرااتي لك،،



__________________________________




خالي من الهم

إقتباس ما هو السبب في عدم حبك لمدينة جده عروس البحر الأحمر؟؟

لأني أحب الرياض جدا وجدا وبالحيل ، واستر ما واجهت الله يرضى عليك..

إقتباس ما هو السبب في كرهك للسفر بالطيارات لدرجة أنك تقول لو الأمر بيدك لسافرت على الحمير أكرمك الله واكرم الحاضرين لكلامي ؟؟

ما عمري خفت من ركوب الطياره وأسافر بها كثيراً لدرجة أني مره رحت للقصيم بطياره وما أمدانا نربط الحزم إلا والطيار يقول انزلوا ولا تنسون حقائبكم وسندويشاتكم!

لكن الطيران التركي – الله لا يكثر من عينته- علمني أن أصرخ بعالي الصوت "يازين الأرض"

إقتباس أبيك ترد لي ببيتن على هالبيتين إذا ممكن يعني . ترا هالبيتين قلتها هنا من موقف وصرت اكررها دايم الوفا طبعي على مر السنين****والغدر ماله على قلبي مكان ياشينها لو صاحبك عضد اليمين**** إنتسى ودك وحبك ثم خان

لا تلتفت تكفى لغدر البايقين ... ولو كان واحدهم عالي الشان
طبع البشر بكل يومٍ مقفـّين ... ويجازون الوفا بظلم ٍو نكران

إقتباس أخيرا / كلمه توجهها لسامي الجابر

وش السالفه ؟؟ شكلك منسق مع الغريب

تشكرااتي لك،،



__________________________________


ملـــ الهلال ـــك

إقتباس س1 - ماذا رائيك في المفرج ..؟

مع تقديري لشخصه ، مهوب لاعب كرة قدم

إقتباس س2- ماهو أفضل سيـاره لديكـ ..؟

هايلكس 88 و بي ام دبل يو 2007 >> اصطباتها اللي ورا تذكرني بعيون ليلى حقت قيس..


__________________________________


أبوقف عند صاحبي المواصل لعل الله يقر عينه بالنوم


وراااجع للغالين ان شاء الله،،

إقتباس س1) كم مرة تتمضمض في اليوم؟ أتحداك تجاوب ــخخخخخخخخخخخخخخخخخخخخخخخخخخخخخخخخخخــ

سلطان أتحداه انا بعد .

وأضيف له سؤال أخير.

وش أخبار شوقي وصبري

مواصل من عام 1413هـ

إقتباس ما عندي أسئله لك ، لكن حبيت أقول للأعضاء شخصية alhawey تنحب من أول مره تشوفها.

عساك تسلم ياغالي ، وتشكراات لحضورك

>>> شكلك بكالوريوس إعلام


_______________________



العنا

إقتباس هلا بسمي ولد اختي يعني انا خال سميك يعني احترمني

أنا بكل الأحوال أحترمك، لكن وش مطلوب مني لو كنت أنا سمي ابن اختك ومهوب هو سميي ؟؟

إقتباس ابي منك اقل من سطر عن كل اسم

إقتباس بوريمان بوعبدالله اليعععع بين قوسين ولد الظهران صدى الذكريات بين قوسين العمده

قلت رايي فيهم خلال الردود، ولهم مني كل المودة والتقدير..

إقتباس اسيره النكبه الماسه اللي تابت ماصارت حراميه

أكرر هنا أن حظي الشين ووقتي الضيق حرمني من مصادفة مواضيع لكتاب أجزم من خلال ردودهم أنهم راقين في كل شيء ..

إقتباس انا بين قوسين العنا

مثل هلال رمضان ،وسيع صدر وما نشوفه إلا بالسنه مره ..

إقتباس السوال الثاني في بالك مواصفات تبيها في زوجه المستقبل وتحس انك لولقيت وحده بالمواصفات المطلوبه وتقدمت لها بيقولون مرتبطه يعني يصرفونك تشيل فكره الزواج من راسك نهائيا او تاجلها او تتنازل عن بعض المواصفات وتدور لك وحده على قدك اذا مستحي دحوم اعتبرها مو زوجه اعتبرها سياره تبي سياره غاليه وماعندك الا فلوس شويه عندك الخيارات اللي فوق عطني واحد منها

ما قلت لك انك وسيع صدر ما شاء الله..

ياخي عجزت أعرف هذا سؤال أو سالفه أو شاهي حليب ، بس اللي أعرفه أني ماغير أتبسم وأنا جالس أقراه وبالأخير وصلت إلى التالي:

لو أني لقيت بنت الحلال اللي أبيها لكن الله ما قسم إنها تكون من نصيبي فما والله تفرق عندي كثير، لأني على كل الأحوال أبيها كاملة الأوصاف -الكامل وجه الله- ، وما فيه وحده كامله أوصافها ، واللي خلاني أتقدم لها وهي بعيني ناقصه ، يخليني أتقدم لغيرها ..



تشكرااتي لك ،،

_______________________




فهد

إقتباس فأكيد لك مواقف في المدرسة؟!! مع أساتذة أو حتى طلاب حاولت تستخدم روح الفكاهة عندك أو بشكل أفضل تستهبل عليهم وصار لك موقف وشو!!

والله ياخي إني كنت جيد وراعي دراسه ولست لعاب أو راعي مشاكل، لكن أذكر يوم إني بـ 6 ابتدائي كان معنا واحد غثيث وما غير يستذب علينا ودايم اذا سألناه عن أي شي معه يقول لنا هذا جايبه ابوي من أمريكا !! وكنت دايم أتهاوش معه..
المهم مره كان عندي اختبار مطالعه شفوي ونهائي وكان استاذنا (مصري) يحط طاوله بالسيب وكل شوي ينادي طالب ويختبره، وكان اسمي بالكشف يجي عقب اسم هالغثيث ، صوّت له المدرس وهو جالس يلعب ولاهي ، وأجي وأطلع وأقول للمدرس فلان غايب وأنا اللي بعده، واختبرني ورجعت للفصل يوم شافني الغثيث قال اختبرت ؟! قلت ايه وأنا مستانس؟ قال وأنا ؟؟؟ قلت وش علي منك سألني الأستاذ وقلت انك غايب ، فجأة طب علي _ الله يذكره بالخير_ ودبجني دبج أليم لدرجة أني كنت ما أشوف الا خده، فقررت أني أعضه لكني تحمست بالحيل بالعضه لين بدأ الدم يرشق بكل جهه !! المهم كبرت السالفه واشتكاني ابوه عند المدير ومدرسنا المصري نكب عفشي وقال الواد دا كداااب، وفصلوني من المدرسه يومين ثم رجعت..

وهالسالفه ما أنساها أبد خصوصاً يوم فصلوني عسى الله يفصل مرير أمريكا، الجدير بالذكر أن الغثيث لكمني بوقس انتفخت منه عيني ولا دريت عنها، وكنت أصيح يوم رجعنا للبيت ومعي ملفي وكان أخوي الاكبر مني يقول ميخالف لا تصيح خل عينك تخف شوي ونسجلك بمدرسه ثانيه>> والله من زين رفع المعنويات


تشكرااتي لك،،


_______________________





كل الفن هلالي

إقتباس ماهو شعورك وانت ترى هذه الصورة مرتزة فوق هل أصابك مغص في بطنك ؟ هل اوغميا عليك مثلا نأمل بإجابة شافية وكافية دون لف أو دوران ؟

حسيت إني مشهور و إني بديت أطلع بالدعايات وبغيت أتحمس وأروح لزماني ألقط لي صوره وأنا على جنب (حركات) وأكزها لسهل أغديه يحطها بجنب السامر..

إقتباس اختر الاجابة المناسبة وضعها في الفراغ

إقتباس ا- تمشي في الشارع لقيت اثنين يتضاربون ................. ( أتفرج عليهم / أفزع مع الضعيف / أحاول اشعللها أكثر / ارمي عليهم شرخ وانحاش )

ذكرتني بلكاعة واحد من الدكاتره حط لنا سؤال فيه خياراات ولا واحد منهن صح ، وبعد الاختبار قلنا له وقال اللي ترك السؤال فاضي ياخذ درجه عليه!!

أنا ما أبي منك درجه وأبقول إني دايم أشوف مثل هالمواقف بالشوارع وأمشي ولا كني شفت شي..

إقتباس ب- تقود السيارة وواحد حدك من غير قصد ................. ( تكتفي بتعليق البوري / تحده وتنشبه في العمود / تحاول تستوقفه للتفاهم معه / جميع ماذكر )

الخيار الأول

إقتباس ج - رحت لأمريكا وأنت هناك حنيت لموطنك وفجأه لقيت سعوديين ...... )تسلم عليهم / تتصدد عنهم / تسوي نفسك خواجه / تقول لهم بالاحضان (

كمان الخيار الأول مادامي حنيت

إقتباس د- اشتريت سيارة فخمة وشفتني امشي بالشارع (تركبني معك / تصدمني / تقول لي بكل اريحية (

أفا عليك بس أكيد أبصدمك عشان أوقف معك وقفة رجال وأصير مرافق لك بالشميسي ونصير صديقين بعض>> من غير شر ان شاء الله..

إقتباس واذا طرأ في راسي اسئلة ثق ثقة تامة اني مراح أتردد

واثق فيك يابعدي وحياك ربي نوباتن ونوبات..




تشكرااتي لك،

_______________________




هلاليه كووول22

إقتباس هلا فيك أخوي alhawey منور المنتدى ماعندي أسئلة ماشاءالله الاعضاء ماقصروا

الله يحييك وتشكراات لحضورك



_______________________



فرصه ضايعه


وشلون صار كذا أذكر ردك ذا مافيه أسئله!! الظاهر ان المنتدى صدز مسكون

إقتباس دوك اسئلتي الثانيه مع أني استغربت عليك طامر سؤالي السياسي وهو تخصصك

والله اني ما شفته إطلاقا البته!!
وش السالفه شكلك تلعبين بالنظام وتحررين وتضيفين على كيفك

عموماً السياسه أميل لها لكن مهيب تخصصي، ودوتسي سؤالك واجابته:

إقتباس - بنغير النمط شوي ونخش بالغويط لماذا امريكا بنظرك رغم تطوراتها الهائلة لم تفلح بالقبض على بن لادن الى حد الآن

لأن أمريكا وحلفائها لا يريدون إلقاء القبض على ابن لادن قبل إلقاء القبض على كل خير ظاهرٍ وقوةٍ باطنه في بلدان العالم الاسلامي، فشخص أسامة لا يهمهم كثيرا وان أظهروا ذلك ،وهم يعرفون حق المعرفة أن مشكلتهم تكمن في أن هناك مليار شخص قانعٍ بأن ذروة سنام دينه هو الجهاد، وذكائهم ظهر في عدم انتظار إفاقة هذا المليار من نومٍ يجزمون هم قبل غيرهم بأنه لن يطول، ومرور عشر سنوات من الزمن تعني بلغة السياسة مرور شهرٍ واحد..

سؤالك كان حلو جداً مره

إقتباس قل لي سر محبة الناس لك؟؟

سؤال صعب لكني وبعد تردد جزمت أكتب اللي يدور في خاطري الآن..

بكل صراحة ٍ أقول بأني تذكرت حديث الرسول اللهم صلي وسلم عليه(( من أحب رضا الناس بسخط الله، سخط الله عليه وأسخط عليه الناس، ومن أحب رضا الله بسخط الناس رضي الله عليه وأرضى عليه الناس ))
ثم تذكرت بأني شخص مقصر وعندي ذنوب ظاهره لكثير من الناس ، وأسأل الله أن يمن علي وعليكم بالصلاح ..
فتوصلت الى اقتناعٍ داخلي بأن محبة الناس لي ، إن حصلت، فهي محبةً غير حقيقية وإنما هي مجرد إعجاب وإحساس بالقرب..

ابوريمان تصدق ودي أرجع للرياض هالحين وأقابل الشيخ ابن جبرين ، أحس إني بديت أشطح وأبيه ينوّر دربي بعلمه ونصحه..

إقتباس جريمه تتمنى ان ترتكبها؟؟؟ ماهي ؟؟ وبحق من ؟؟؟

استغفر الله العظيم من أن أتمنى حرق كل حقير أوكلت له أمانة ومسؤولية فخان وظلم وأفسد..

إقتباس افتح بوكك الحين وقلنا كم فيه من الدراهم ووش نوعهن جدد ولا قديمات

258 ريال ، الـ 200 جدد ، والخمسين قديمه، والريالات ما بعد شفنا منها الجديد..

إقتباس سؤال متوقع أحد يسأله ولا سألناك إياه ؟؟؟ وشو وجاوب عليه

إقتباس ليش تحط نقطتين بعد كثير من كتاباتك؟؟

واللي يجاوب عليه من الأعضاء له مني 258 ريال أو ما يكافئها

أمزح أخاف بنقلب الموضوع شات

أضع نقطتين بعد كثير من الجمل ، لأقصد من خلالها بأن عندي المزيد لأقوله لكنه إما أنه غير صالح للنشر أو أن الوقت لا يسعفني لكتابته.. >> ترى النقطين الاخير ذي حاطها عباطه

إقتباس كل يوم ننصدم ببعض القرارات الهمجيه في بعض الوزارات والمؤسسات الحكوميه !!؟ متى ينصلح الحال بنظرك ؟؟؟

عندما تكون الجريمة التي يتمنى كل الناس القيام مثل الجريمة التي تمنيت القيام بها في سؤالك السابق..

!
!
!
اعذروني ياجماعه جاني شغل مهم ولا زم والله أغادر هالحين

سأعود لإكمال ماتبقى من أسئلة الفرصه الضايعه ، والأسئلة الجديده من الأعضاء الكرام>>> طااااااااير

دعواتكم،،