$$ (( ما كل بيضاء إشحمة )) قصة هذا المثل $$ .. - نادي الهلال السعودي - شبكة الزعيم

البارق · #1 23/01/2002, 09:30 PM

السلام عليكم ورحمة الله وبركاته

إخواني .......... أعزائي

أسعد الله أوقاتكم بكل خير .. نكمل معكم مسلسل قصص الأمثال ومع مثل جديد

** للذهاب للأمثال السابقة ..

مد رجلك على قدر لحافك *** اللي ما يعرف الصقر يشويه *** مواعيد عرقوب

** ومثلنا لهذا اليوم هو (( ما كل بيضاء إشحمة ))
أولا عارف إن الكتابة خطأ إملائيا ولكن كتبتها هكذا لكي تقرأ كما تنطق ..

$$ يضرب هذا المثل للذي يأخذ شيئا على أنه هو مبتغاه ولكن يكون غير صحيح .. أو للذي يعمل عملا يعتقد أنه صحيح وهو ما عنده سالفة

قصة مثلنا لهذا اليوم هي ..

قبل الشروع في القصة نتحدث قليلا عن الماضي حيث كانت المغازي والحيافة والسرقات منتشرة بين الناس وخاصة البادية

..

ونعود للقصة .. كان هناك شاب يريد أن يغزو مع بقية الشباب في عشيرته أو جماعته .. والمشكلة أنه لم يسبق له أن غزا قبل هذه المرة .. يعني (( أنواع الغشامه ))

كان له أم (( أكيد كل واحد له أم )) ..

..وخافت عليه ونصحته بالبقاء ولكنه أصر على أن يذهب للغزو ..

فقالت له : مادامك رايح رايح ومعزم .. وعندما تصلون للإبل اللي بتغزونها (( إبل العدو )) .. خذ ما تستطيع أخذه بسرعة وانصرف (( هج )) أو (( إنحش ))

.. ثم إياني وإياك تأخذ (( أم دويك )) ..
قال : وش هي أم دويك ذي ..؟؟؟

قالت له : هذي ناقة كبيرة عليها دويرع وشداد وخرج ودباديب .. هذي يتركونها الغزاة ولا يقربونها ..

ثم قالت له إسمع

يا جريس أنا ابحذرك عن بعض الأطماع *** حذري عن أم دويك لو هي وحدها
يلحقك راعـيــها على التلو فـزاع *** عشيق بنـتٍ توّ زمـت نهـدهـا

عاد راح الشاب مع جماعته .. وفي صباح يوم شافوا لهم إبل .. عاد ما صدقوا خبر (( إنقضوا )) عليها ولا إنقضاضة الدعيع على الكور ..

..
وطبعا كل واحد أخذ اللي قدامه وهم يعرفون الطريقة .. أما خوينا ذا فهو ما غير يتلفت يمين ويسار (( ما يدري وش الطبخة ))

طبعا هو عذره يقول ما شفت شيء

..
وفجأة لقى قدامه اللي وصفتها أمه له واقفة قدامه :p .. ولا حولها أحد .. أكيد تدرون وش سوى .. قال أميس ما عندها سالفة خذها بس وافرررك

فعلا طمر على ظهرها وطار (( حط رجلة ))

..
وإذا بفارس يلحق به على حصان ..!!
عاد خوينا (( الصتيمة )) ما بغى شيء على طول وقفه الفارس .. وربطه وركبه خلفه على الحصان.. (( أسره )) .. وفي هذه اللحظة ضحك خوينا

عاد سار به الفارس إلى بيوت الشعر (( المنزل )) .. قابلتهم فتاة جميلة :p أخذت بعنان الفرس .. فضحك خوينا ذا مرة ثانية ..

عاد أخذه الفارس وقعده قدام والده (( والد الفارس )) وكان شيخا كبيرا (( شايب يعني ))..

قال الفارس لأبوه : هذا شاب أخذ (( أم دويك ))

ورجعتها منه ..

عاد ضحك خوينا ذا مرة ثالثة ..

وعاد مشت على الفارس ضحكاته بس ما تمشي على الشايب

سأله الشايب : وش يضحسك (( ماذا يضحكك )) ؟؟؟

قال خوينا الدلخ (( جريس )) : إن أمي - الله يطول في عمرها - نصحتني عن أخذ هالناقة بالذات ..!! بس أنا ما مشيت بنصيحتها ..!!

وقاله الشايب وش قالت لك أمك ..؟؟؟ فقال له الأبيات ..!!!

قال الشايب : صدقت أمك ياوليدي ..

وبعدها قال (( ماكل بيضاء إشحمه )) .. فصارت مثلا يضرب ..

عاد الشايب ما قصر أمر ولده أنه يعطي (( جريس الدلخ )) ناقه بدل اللي أخذ ..

واطلقوا سراحة ثم ذهب هذا الشاب إلى أمه .. وقال (( ما لنا ومال المشاكل)) ==> هذي من عندي

وهذي هي القصة اللي جبتها من أسلوبي .. أرجو أن تحوز على رضاكم ..

وآسف جدا على التأخير .. واعذرونا على القصور ..;)

وللجميع فائق تحياتي ،،،

أخوكم / البـــارق;)

الهلاليAMJ · #2 23/01/2002, 10:45 PM

الله يعطيك العافية والله القصة للمثل حلوة مرة ولا قصرت

البارق · #3 24/01/2002, 09:04 AM

$$ الغالي : الهلاليAMJ..........

الله يعافيك ويخليك يا أخي الكريم .. وألف شكر لك على ردك وعلى تواصلك .

تحياتي لك يا غالي ..

أخوك / البــارق..

صدى الامس · #4 24/01/2002, 02:52 PM

الله يرج جريس الدلخ

تسلم يمينك يا مشرفنا

ننتظر القادم ;)

تقبل تحياتي ,.,

عنود الصيد20002 · #5 24/01/2002, 04:54 PM

يعطيك العافية على هالمجهود , ولو انه تأخر المثل هالمرة شوي

ومشكور على القصة الطريفة , وبصراحة المثل أول مرة أسمع به .. يعني معلومات جديدة

تحياتي لك,

H-CrAzY · #6 25/01/2002, 12:26 AM

والله ياخوي الأمثال الأولى الي ذكرتها كانت عندي معلومات عنها بس هالمثل والله اول مرة اسمع به

..
القصة جدا طريفة

..مشكور اخوي وياليت بس تكثر من الأمثال الغير مشهورة مثل هذا المثل

..

نايف · #7 25/01/2002, 12:51 AM

ياخـوي يالبارق.. .

نبي المثل اللي يقـول ( قال ياشريم أنفـخ قـال ماهنا برطم

) ..!!

على راوية ( ناصر القصـبي ) ..!!

alhawey · #8 25/01/2002, 04:35 AM

يعطيك ألــــــــ1000ــف عافيه

والله يالـking ان فكرتك بطرح الامثال وقصصها حلوه , تصدق عاد اني كل يوم ادخل المجلس العام وأول شي أدوره الامثال ( عاد لاتصدق قوه وتشوف نفسك علينا

)
عاد عقب هالمدح أبي منك طلب

, اذا تخبر كتب تذكر فيها الامثال وقصصها , فياليت تعطين اساميها ( الا اذا كان هذا من أسرار المهنه ..اجحد ترى عادي

)

تحياتي لك,,,