<><> يوميات الأعضاء في رمضان مع محبوبة الزعيم <><> - نادي الهلال السعودي - شبكة الزعيم

المنتدى الاستشاري · #1 28/09/2007, 06:35 PM

إعداد : المنتدى الاستشاري
تصميم : عاشق بو يعقوب

مرحباً بكم احبتي مع ضيفتنا الرابعة عشر في يوميات الأعضاء في رمضان
وضيفتنا هي محبوبة الزعيم متميزة في مجلسنا

,

.

... بسم الله الرحمن الرحيم ...

... وما الروعة غير اكتمال القمر بدراً في ليلة 15

... ولا يكتمل قمر مجلسنا بدراً إلا بجمال اللقاء مع محبوبة

... مرحبن افري ون وافري ونَه

... بالنسبة ليومي ، كل يوم غيـــر عن اللي قبله ، يعتمد على مزاجي بدرجة أولى ..
...ما عندي روتين معين ، يعني أنا يوم أنام فيه ويوم اصحى فيه

شفتوا قد ايش مرتبة

... فلما بحكي عن يوم من الأيام ما راح يكون دليل على باقي الأيام

.. ummmm ..

... قبل الفجر كونت جالسه في الصاله أقراء قران انتظرهـ يأذن وعلى الطريق أخذت لي غفوهـ

إلا مامتو تجي تصحيني قومي تسحري ما بقى شي ويأذن ( لست ممن يحرص على وجبة السحور لكن ابتغاء بركته ) ... ولما الساعه جت الرابعه وما فيه أحد نزل يتسحر ظهر صوت أبتي مناديا للسحور ياجماعه ما بقى شي على الأذان .. لأنو نظامنا في البيت على قولت باباتي شغل شفتات نص ينام والنص الثاني يصحى .. بعد ما صليت رحت لسرير في بداية نومي إلاااا خيتو جايه تدخل الغرفه مسرعه تقولي نمتي عاد أنا أحترت وش أقولها

تشوفني نايمه وتسألني " بسراحه ما ألومها نسيت اني فنانة تمثيل النوم "

يعني تتوقعيني أستهبل

وتصرخ وتقول بسرعه تعالي شوفي مع الشباك فيه كلب " وانتم بكرامه " قدام بيتنا

... عاد أنا قمت طيران وأطل معها من الشباك ومو واضح زين من غرفتي وأروح غرفتها أوضح واخذ كامرا الفيديو معاي إلا الدعوهـ جد كلب جالس على بقعة رمل ومو أي كلب هذي الصغار اللي تستهبل ... لااااا كلب محترم حجماً أول ما شفته جالس عادي بس بعد ما وقف شي يروع لين مامي جايه وتقول ياربي ولدي ..!

... هينا تذكرت أبوي وأخوي الصغير رايحين الصلاة أما أخوي الثاني خايف ولااااا راح للمسجد وأمي تقول وشلون ولدي بيرتاع وهو جاي .. خيو اتصل على الامن يتصرفون بسرعه قبل ما يطلعون من الصلاة بس قالوا منا فاضين نطارد كلااااب هالوقت

... قلت أنا لـ خيو شغل السيارهـ وهو بيروح وسدق قام وركض ما ندري وين راح بالضبط دقايق و خيو جاء بعدما انتهت العمليه بسلام علينا وعليه

...عاد أنا جتني فوكرا ختيرهـ وقلت لـ مامي خلااااااس ماني مداومه اليوم مدري وين راح أخاف يطلع علي فجأهـ

وتجي خيتو الثانيه تقول سح لسانك

مدرسه ماني رايحه اليوم

وحانت من أمي نظرهـ

كفيله بأن ذهبنا نهرول سوياً لغرفنا وننخمد تأهباً للدوام الاااا خيتو تقولي نوم العوافي يختي
عاد احلمي فيني عشان بكرة و احنا نفطر نفسرهـ

- -> اتكلي بس

... (طبعاً النوم طار ) وأخذت موبايلي أشيّك عليه إلااااا فيه مسج من بعض الناس <- ناس قلق يبغوني في شغله أدخل معهم نت ( للحق المسج جايني قبل بس أنا ما انتبهت له ) أمري لله أدخل ماسن مع تمتومه على أساس شوي وطالعه انام قبل ما اروح للدوام بس هالشوي سااارت ساااعاات وبعد ما خلصنا الشغل و السواليف وضيعت هي وقتي <== بيجها طراااق

... شفت الساعه ما يمديني أنام قلت لها خلينا نرد على أخبار المجلس بالنص بيني وبينك وبعد منازعات خلصنا الرد و وكل وحدهـ راحت لدوامها

... رحت الدوام وأنا نصي نوووم وتبعا في الطريق دايركت أقول أذكاري وأقراء قرآن ...

... بس أوصل للجامعه روتين عادي بنات نصبح عليهم محاضرات تسليم واجبات ...

... يخلس الدوام تبدا المعاناة اليومية مع الزحمه واحنا نحاول نطلع بس من محيط الجامعه ...

... رجعت من الدوام الساعه 1 ونص طبعاً أنا أول وحدهـ في البيت ترجع من الدوام بعدها تتوالى الوفود إلى بيتنا أخواتي الصغار أول من رجع بعدي ... وبعد رنين متواصل للجرس فتحت لهم وفيني كم تهزئيه محترمه إلااااا أوختي الصوغننه تبدا تسولف وتعطيني نشرة الانسايدر كاملة

... عاد أنا أقولها يا ماما سلمي أول وقولي دعاء الدخول ثم ابدي نشرتك

... بعدين أموت الموته الصغرى

يا حبنيلي سايرة أنام بسرعة ما أسرع مني احد يمكن اسبق نيتي إني بنام و أنام

... بعد ما اذن المغرب جاء خيو يسحيني ...
... زمان لما أصحى من النوم كونت أحتاج تقريباً نص ساعة ما أحد يكلمني فيها ، وحتى لو أحد جالس يسولف ما أرد اعتبر نفسي لسّاتني ما صحيت .. أما الحين أقوم مفجوعه

... طبعا قانون البيت ينص على انو التمر والقهوهـ والعصير إذا أذن .. أما الشوربه والأشياءات الثانيه بعد الصلاة

... فطرت على السريع , رجعت غرفتي أصلي بعدين نزلت تحت لغرفة الأكل

وهينا شفت كرسيي جالسة عليه خيتو وبدا الهواش على طاولة الأكل

كول يوم لاااا تجلسون في كرسيي هذا حقي أجي ولاااا يفيد الكلاااام ويسير هواااش غصب خارج عن إرادتنا

وينتهي الموال انو اليوم آخر يوم أسمح لكم تجلسون فيه

... ثمن رحت المطبخيشن أجيب لي ملعقة إلاااا على فوكرهـ عندنا أزمة ملاعق
ما ندري وين يختفون !

... وإحنا ناكل جا دور ريموت التلفزيون هذا من ضمن دستور العائله الهواش عليه

جالسين نطالع في أمان الله إلاااا أخوي يغيّر القناة وتجي خيتو الصغنننه طيران تاخذهـ وترجع على القناة طبعاً أخوي الفنااااااااان الموهبة الفتااااااااااكة يستفزها لما تغرد بصوتها الرنان

ويجيك كرتون المناديل طيران على أختي الثانيه في الفيس لأنها ضحكت عليها

... بعد ما خلصنا جت خيتو الصغننه توريني سنها اللي يرقص على قولتها ... له كم يوم بيطيح ولا طاااح ابلشتنا فيه

عاد أنا ماعطيتها فيس

راحت لمامي تسالها إذا طاح سني بيطلع واحد جديد عليه قرطاسه

... إلا أمي تقوول لها من وين لك هالمعلومه ..!

... هينا عاد شدني الموزوووع وجيت أدلو بدلوي .. قلت لها شوفي إذا طاح سنك مارح تقدرين تاكلين سمبوسه عشان كذا خليني الصقه لك بصمغ مسدس

<- - قالت لا لا بيحرني

<- - قلت تيب بلصاق مايعور

<- - قالت لا لا ما أبغى إذا طاح باكل على جنب

<- - أمي عاد تقولي لااا تعطينها معلومات غلت اذكري الله و روحي صلي ... حسنن يا أووومي ! هيا بنا

... قمت أصلي العشاء وتوني بقول الله أكبر إلا أسمع خيتو تعد من واحد الى 100 طالعتها موستغربه شتسوين !! طلعت تشغل وتطفي البلايستيشن مية مرهـ هزئتها يابنت ستووووب بيخرب وهي مستمرهـ تيب ليش !! تقول عشان يشتغل الشريط

... خلست عد ولا أشتغل قلت لها شفتي خربيته .. وكملت أصلي بعد ما خلصت التفت أشوفها شو تسوي لقيتها جايه ومعاها الأشرطه توها مخلصه مغسلتها بالمويه والصابون

<– مواعين مو أشرطه

... عاااد تسدقون ماشاء الله أشتغل

... فووووووووووجأأأأأأأأأأأأأأأأأأأة اسمع خيتو تصرخ من فوق بسررررررعه فاتتنا الصلاة وهينا اسم الله علي ركضت ركضة للدرج أجيب عبايتي اعتقد إني عديت الاولمبياد الأسيويه و فجأة اللي كانت في البيت صارت في المسجد

... واحنا في الطريق راجعين من الصلاة سيارات الأمن والسلامة منتشرهـ في كل مكان يعني مافي قريقعان هالسنه رمضان اللي راح منعوهـ عشان المهازل اللي تشبه الشي اللي يصير في اليوم الوطني والظاهر هالسنه كمان

... عاد وقت بعد صلاة التراويح وقت مقدّس يصير فيه طلعات ونوم ولعب وهيك حركات وسوالف وتهزيأت وهوشات كل شي يصير بهالوقت

... جتني خيتو الصغنونه

تقول تروحين معانا السوبرماركت <- - قلت لا <- -قالت الله يعافيك <- - لا لا مو فاضيه لكم تبغون روحوا مع ماما

<- - ماما راحت<- - يعني خلاس ما نقدر نروح <- - إلا احنا مستأذنين منها وقالت روحوا بس لازم احد يروح معكم <- - مالي شغل قولوا لحد ثاني <- - كلهم يقولوا لا روحي انتي معانا <- - ياربي مين بيروح وايش رح تشترون <- - بنشتري بس أربع أشياء <- - ايش هي <- - شوكلاته ومجله <- - وباقي الأربع الأشياء شو هي <- - إذا رحنا بتعرفين

... قلت تايب تيب بس بسرعه نرجع<- - إيه يله <- - رحنا وكل شي على السريع .. رجعنا وكملت أطالع المباراة .. حرق أعصاب .. وطووول الوقت يارب يارب ...

... خلصت وأنا مو مسدقه .. سح كونت متوقعه بس فرق إذا طلع الشي حقيقه

... بعدها رحت اتسكع في النت .. وكيف كان حال مونتدى الجمهور .. شي غير طبيعي.. اشياء يخجل الواحد يقراها .. من جد كانت حالته صعبه

... بعدين نزلت تحت أسولف مع مامي وباباتي .. وقلت لمامي نفسي بـ آيس كريم <- - قالت يعني إيش <- - قلت بروح اشتري أبغى أتسحر عليه <- - قالت أمي الحين مافي طلعه <- - قلت عادي إحنا برمضان <- - قالت لا الوقت متأخر وماعندي بنات يطلعون هالوقت <- - قلت ياختي في خاطري (فيه وحدهـ تقول لأمها ياختي بس عادي أمون

)<- - فيه أحد يتسحر آيس كريم <- - إيه عادي بكرهـ خميس

... بعد ما حسيت إنو مافي أمل رحت لغرفتي كتبت في اليوميه شوي .. الساعه 2 ونص تقريبا رن جرس البيت .. وأمي تناديني مازا هناك ؟ وت ؟ وبسررررعه على تحت .. طلع ماماتو وخيتو طالبين لنا آيس كريم من ماكدونالدز .. ياحوبي لك يامامتي وبوووسه على راسك والله ماتكفي

... أمي .. أمي يالحنً أعشقه .. ونشيداً دوماً أُنشدهـُ .. في مدري وشو

... أمي الله يخليها لي يارب ...

... والله إني أحوبها و أحب وناستها >> بعد احلفي مرة ثانية عشان نسدق

... والله إني أحوبها و أحب وناستها >> لا بعد مرة

... والله إني أحوبها وأحب وناستها >> هاهـ أكمل بعد ؟
<< لا خلاص الثالثة ثابتة << بتتهور وتحط سورتها

... يا ناس من أغلى من الأب في هالدنيا ؟ حتى لو هاوش والله عسل

... ماحدا ماحدا ماحدا >> اتكلمي عربي أحسن

^- - - بدت الحاله

... وبس <- فيك خير وقفتي !

... وهذا هو يومي بالتفصيل

... تم في يوم الأربعاء الموافق 14/9/1428هـ
26/9/2007 م

***

... أخيراًَ ...

.. 14 يوم مَرّ سريعا ..
.. سبق فيه من سبق ..
.. و تعثــــّر من تعثـــــّـر ..

.. باقي في رصيدك 15 يوم فما أنت فاعل ؟

.. (و اصبر نفسك مع الذين يدعون ربهم ... ) ..

.. فحلاوة الظفر تمحو مرارة الصبر !
.. نسأل الله جل علاهـ ..
.. أن يثبتنا على دينه وعلى دين نبيه محمد صلى الله عليه و سلم ..
.. و نأتي بأعمالنا بما في نيتنا , خالصين له العمل , و أن يسترحمنا برحمته و يتقبله منا جميعاً بأحسن وجه ..

.. اللهم بارك لنا في شهرك هذا و اهدنا و تقبل منا ..

***

...:: ( المنتدى الاستشاري ) ::...

.. شكراً وافراً ..
.. شكراً جزيلاً ..
.. شكراً بحجم السماء ..

.. دعواتي لكـم بالتوفيق في الدارين ..

... شكرن لكم أنتم مشاهدينا ...
... تابعونا في الحلقااات المقبلة ...

^- - - هيا بنا

.

كل الشكر للمتميزة محبوبة الزعيم وانتظرونا غداَ مع ضيف آخر

.

أرق التحايا وأطيبها من
مشرفي واستشاري
المجلس العام

<><>أرشيف يوميات الأعضاء في رمضان لعام 1428 هـ <><>