<><> يوميات الأعضاء في رمضان مع المشاغب <><> - صفحة رقم 4 - نادي الهلال السعودي - شبكة الزعيم

المنتدى الاستشاري · #1 24/09/2007, 06:57 AM

فكرة وإعداد ومتابعة : المنتدى الاستشاري
تصميم : عاشق بو يعقوب

مرحباً بكم احبتي مع ضيفنا العاشر في يوميات الأعضاء في رمضان
وضيفنا هو المشاغب وهو عضو متميز في المجلس العام

بسم الله الرحمن الرحيم

في البداية أشكر مجلس شورى المجلس العام على اختياري لكتابة يوميتي في هذا اليوم..!!
كما أحب أن أبارك للفائزين في الجولة الثانية من مسابقة المجلس العام .. وبالتوفيق لعيال حارتنا..!!

وأحب أن أبارك للجميع باليوم الوطني اللي مر علينا بالشرقية ولا درينا عنه .. ما شاء الله على أهل الشرقية
في بيوتهم 24 ساعة كنهم سمك ما يطلع من البحر ..!!

بيت بمناسبة اليوم الوطني / حنا هل العوجا ولا به مراواه *** شرب المصايب مثل شرب الفناجيل

يومية المشاغب برعاية:

" أسهم المواشي امباااااااااااااااااع "

يوم السبت 10 رمضان

بكل صراحة .. كنت شايل هم هذا اليوم من بداية ما تم اختياره لي .. لأني أعرف أن يومي ممل وما فيه أي أكشن
أو أحداث مهمة

عشان كذا كنت أخطط في الأيام الماضية في صناعة أكشن بالذهاب لكل شارع في الشرقية كودني ألقى لي شيخ
جليل صدزي

أو ألقى أحد بيموت من العطش وأقوم أنقذه وأجي أهايط عندكم

بس للأسف كل هالتخطيط راح على الفاضي .. لا تقولون ليش... شوفوا اليومية وأنتوا منثبرين

من صلاة الفجر حتى أذان الظهر:

بعد ما صليت الفجر في المسجد .. رجعت وفتحت الماسنجر شوي .. ثم انسدحت على سريري العزيز ونمت..!!
قمت الساعة 8 بالضبط لأني قررت أداوم اليوم

غسلت وجهي ونظفت أسناني ولبست ثوبي وشماغي وطلعت
المفتاح من جيبي وشلته بيدي اليمين ودخلته بالباب ثم طلعت وقفلت الباب وطلعت المفتاح من الباب وحطيته بجيبي

<<< قلتوا له بالتفصيل الممل

المهم .. داومت اليوم وخلصت كل محاضراتي .. وما حصل أي شي فيها .. لأني كنت ناسي أن اليوم هو 10 رمضان

لو كنت أدري .. كان على الأقل هايطت شوي على الدكتور أو استهبلت عليه .. بس راحت علي

أذن الظهر ورجعت لغرفتي بالجامعة .. وجسدي مرهق

من صلاة الظهر حتى أذان العصر:

من التعب صليت الظهر بالغرفة ثم انقضضت على السرير ونمت نوم العوافي ..!!

من أذان العصر حتى أذان المغرب:

حسيت وأنا نايم أن فيه أحد في حاجة إلى مساعدتي

فنهضت أشوف وش يبي هالقلق؟

ما شفت أحد عندي.. فتحت المسن على طول لقيت عضو من المنتدى يسلم علي ويسألني عن عضو ثاني هل هو
متصل أو لا .!! يالله عصر خيير ..

ناظرت هالعضو لقيته متصل .. وعلمت الأول بأنه متصل ..!!
طلع الثاني صاك الأول بلوك

وابتلشت أنا بينهم .. لأنه يبيني أسوي بينهم محادثة جماعية وأنا رافض حتى يأذن
لي الثاني .. والثاني رافض..!! واستمرت مفاوضات كامب ديفيد حول ساعة لين فهمت السالفة من كل واحد..

تذكرت وقتها أن اليوم 10 رمضان .. فرحت لأن فيه أكشن ومشاكل

حسيت نفسي محكمة دولية لفض النزاعات .. فقمت أتغلى شوي عليهم

رحت صليت وتعمدت أتأخر شوي عشان ما يتصالحون بسرعة

بعد ما رجعت لهم وحسيت أني عطيتهم وجه زيادة .. حطيت لهم محادثة جماعية بالغصب .. وخليتهم يتفاهمون الله يخسهم
بصراحة مشكلتهم كبيرة وصعب حلها .. لأن سبب المشكلة بسيط وماله داعي .. بس أنا حاولت أولعها شوي لزوم الأكشن

.. بس الحمد لله ما طلعت من عندهم إلا والمشكلة انتهت .. << والله لو ما قرب أذان المغرب عندنا كان مددت الوقت لأشواط إضافية

من أذان المغرب حتى أذان العشاء:

رحت عند العيال بالغرفة .. وكان الفطور جاهز بس ناقصه السمبوسة

قلت وين السمبوسة؟ .. قالوا نسيناها بالمطعم

عصبت عليهم .. وقلت ما نسيتوها إلا بيومي؟ وش أقول الحين بالمنتدى؟ أني فطرت بدون سمبوسة؟

قالوا لي .. وش سالفة يوميتك أنت ووجهك؟
قلت لهم .. بأكتب بالمجلس العام أحداث يومي كله .. وأخاف يجي يومي يفشل وممل..!

رحنا صلينا المغرب ورجعنا على السفرة..!!
قلت للعيال .. بالله يا شباب حاولوا تسوون أكشن عشاني..!! أنت يا نواف خذ السيارة وفحط فيها لين يمسكونك
الشرطة ونجيك ونتوسط .. وأنت يا هاني امسك لك هندي من عمال النظافة وكفخ فيه عباطة عشان أجيك
وأفقع وجهك وأدافع عن المسكين..!! يالله بسرعة سووا أي شي مثل هالأشياء عشان أقدر أكتبها بكرة..!

ناظروا فيني الشباب .. قالوا الحمد لله على العافية بس .. ما حنا بفاضين لك .. بنروح نشوف طاش ومناحي..!!

حسيت أن الوضع ما يخارج .. فجاتني فكرة رهيبة لصناعة الأكشن في يومي .. فكتبت رسالة نصية في جوالي
هذا نصها : " اليوم هو يوميتي.. اللي يبي ينذكر فيها يدق علي عشان أذكر أنه اتصل علي ويشتهر .. بس تكفون
أبي أكشن في الاتصال..!! يعني واحد يدق ويهاوش .. أو واحد يدق وتجيه سكتة قلبية .. وهكذا .. أهم شي أبي
أكشن تكفوون"

ردود الفعل على الرسالة:

1- اتصل مباشرة الملحوس هامور البورصة وقعد يضحك من أول المكالمة لآخرها .. فرحت حسبت الولد انهبل وراحت شوية المخ اللي براسه ... لكن طلع الملحوس مضيع في يومه..!! يقول أن اليوم يومه هو موب يومي

قلت يا أخي اليوم 10 يعني يومي .. قال ايه أنا 9 يعني يومي يصير اليوم

حاولت أفهم هالملحوس أن يومه هو يوم الجمعة وأنا يوم السبت وأن توقيت نزول الموضوع ماله دخل بتاريخ اليوم ..
لكن الملحوس واصل ضحكه وقاعد يقول لي والله أنك ملحوس

2- الهاوي رد علي بهذه الرسالة : "بسم الله عليك!! سلطان أنت مسخن أو ما عندك أحد. يا بعد عمري أنت يا لوح يا سقيم يا فديعة

<< ترى مسوي أكشن كذا .. رح صل ركعتين .. انقلع يا صاحي .. ك.ج "..!!

أمووت وأعرف وش معنى ك.ج ؟

3- وصلتني رسالة اعجاب من رقم غريب

بصراحة الشيطان نغزني ووسوس لي عشان أدق على هالرقم لأن احساس شيطاني يقول أنها رسالة من بنت ... بس ضميري يقول حرام عليك اترك الخرفنة في رمضان

لكن شيطاني الخبيث أقنعني أنها خرفنة إسلامية

وأني بس أبي أتأكد من صاحب الرقم يمكن يطلع غلطان ولا شي وهو ما يدري المسكين

المهم دقيت على الرقم .. لقيته مقفل .. ثم جاتني رسالة حب ثانية من رقم ثاني ... من غير ما أكمل الرسالة دقيت على الرقم على طول قبل ما يبدأ ابليسي وسوسته فقعد يقول: علمناهم الخرفنة سبقونا على الجوالات

دقيت على الرقم : لأتفاجأ بصوت ماجد مقبل اللي حطمني 180 درجة

قعد أبومقبل يضحك علي ويقول : جريتك جريتك صح؟

من القهر قمت أصرف الموضوع لموضوع الاستراحة

4- كنت دخلت بيوزر ميسي عشان أضبط له في اعدادات المنتدى لأنه عليمي بهالأمور

المهم لما دخلت بيوزره .. نسيت نفسي وكتبت رد في أحد المواضيع .. وما دريت أنه يوزره إلا بعد ما رديت بس ما حذفته عشان ما يروح تعب ردي على الفاضي .. وقلت يا رب ما يدري ميسي..!!
المهم اتصل علي ميسي ورديت عليه .. فقام على طول يقول .. ما لك داعي .. منتب رجال .. ومن هالكلام

أنا انحرجت وقلت على طول .. قسم بالله ما دريت إلا بعد ما أرسلت الرد .. والله ما قصدت .. وبعدين عادي ترى..!!
استغرب ميسي وقال وش قاعد تخربط أنت؟ وش مسوي أنت بيوزري؟

قلت .. أجل وش جاي تنافخ عليه وأنت ما تقصد الرد؟
ضحك وقال .. فضحت نفسك . . ما حد يعطيك يوزره .. أنا داق عليك عشان رسالتك لأنك تبي أكشن قلت خلني أستهبل عليه وأهاوشه .. ما دريت أنك قاعد ترد على العالم بيوزي ..!!

بعدها ناظروا وجهي من الضحك على هالموقف .. اللي تعلمت منه أن الركادة زينه ..!!

من أذان العشاء وحتى صلاة الفجر:

رحت صليت العشاء في المسجد وكم ركعة من التراويح .. وقلت لازم أقرأ قرآن عشان ما يستقعد لي اللي في بالي ويقول ما تقرأ القرآن أنت؟!!

بعد ما خلصت رجعت طاير للغرفة الحبيبة .. وفتحت الجهاز والماسنجر عشان مباراتنا المرتقبة أمام "عبرت الشط " ..
استمرت الخطط بيني وبين ليو ميسي ساعات متواصلة .. وكانت عندنا خطة غير شرعية سميناها الخطة القذرة اللي كانت راح تضمن لنا فوز مؤكد 100%

.. لكن تراجعنا عنها باللحظات الأخيرة خفنا من دعاوي المظلومين بصراحة

المهم كنت بالماسنجر وأدور للأكشن أنا ووجهي على النت

جرح يشكي كان يقول لي بالمسن اطلع برا كودك تحصل أكشن لا تقعد عندك..!!
قلت له لا .. أنا الأكشن هو اللي يجيني لين عندي

المهم استمر البحث عن الأكشن حتى اقتربت مباراتنا .. وتحديداً الساعة 12 ونصف ..!!
كنت بس أنا وميسي .. قلت ميسي وين المشاكس والبرنس؟ قال لي مدري..!!
قلت وينهم ياخوي لازم تجيبهم الحين عشان نتفق على الخطة .. .. كنت أحسب ميسي بيخفف علي الوضع..!!

لكني انصدمت ببرود ميسي يوم قال .. عن اذنك بررب بأروح أشوف نمر بن عدوان

حسبت الولد يستهبل أو يمزح .. لكن طلع جد وخلاني لحالي أضرب أخماس في أسداس

دقيت عليه وخليته يدخل ويسحب على أبو من خلفت أم نمر بن عدوان

دخل ميسي ثم اتصل علي .. قاعد يقول سلطان ترى يوزري موقف .. قلت كيف؟

قال لقيت رسالة بالايميل تو : لقد تم ايقاف عضويتك لأن واحد نشبة يبي يدخل فيها ..!!

قلت لا عادي تقدر تدخل .. قال أنا دخلت بس موقف ما أقدر أشارك..!!
حسينا أننا خلاص تورطنا .. المشاكس والبرنس مو موجودين وميسي موقف .. معناها الانسحاب

على طول ظلمنا ديك الجن .. قلنا أكيد هو ولا ولد وايل استخدموا أحد طرقنا القذرة ضدنا

وقعد يضحك ميسي هو ووجهه في هالموقف

المهم بعد دقيقة يتصل ميسي ويبشرني أنه مو موقف .. وأنه الغبي شاف يوزره بدون رسايل خاصة وتوقع أنه
موقف صدق .. ونسى أني دخلت بيوزره وعدلت بالاعدادات .. أنا مدري وش مخليني أحب هالآدمي وهو كذا

بدأت المباراة واستخدمنا تكتيك جديد الحمد لله كان الفوز ساحق على أخواننا عبرت الشط ..!!

انتهت المباراة وكنت ناوي أكتب بعدها اليومية .. لكن الخاص والماسنجر والجوال والله ما وقفت لبعد صلاة الفجر ..!!
وكل ما حاولت أصرف أحد منهم وأقول أبي أكتب يوميتي وأفتك منه .. يطلع لي واحد ثاني

والله ابتلشت .. أدري بتقولون اطلع من الماسنجر .. بس بأقول لكم وش دخلكم؟ ماسنجري ولا ماسنجركم وجع

إلا تعالوا .. نسيت أقول لكم .. أن أخويانا الاثنين اللي متهاوشين العصر .. رجعوا لي مع أذان الفجر

ما دريت وش عندهم .. بس ما عطيتهم وجه .. قلت أنا يوميتي خلصت والحين لا عمركم تراضيتوا خلاص أنا اكتفيت من الأكشن اليوم .. شوفوا اللي يوميتي بعدي وتفاهموا معه ..!!

المهم كنت مشغول وما مداني أخلص اليومية إلا الحين يوم الأثنين الساعة 5:15 صباحاً ..!!
وهذاني الحين مرسلها للاستشاريين وبكيفهم هم والتنسيق أهم شي يطلع حلو..!!

واعذروني على اليومية إذا ما أعجبتكم .. عاد وش أسوي لكم .. الشرهة على اللي يعطيكم شي من خصوصياته

ودمتم بحفظ الله ورعايته ..!!

كل الشكر للمتميز المشاغب وانتظرونا غداَ مع ضيف آخر

.

أرق التحايا وأطيبها من
مشرفي واستشاري
المجلس العام

<><>أرشيف يوميات الأعضاء في رمضان لعام 1428 هـ <><>