اشرح لك رحلة المعاناة ( من البيت الى الملعب الى البيت )

1- اطلع من البيت واول معاناة دوار تقاطع الشيخ جابر مع الأمير بندر << خذ جهاد >> لز هذا وحد هذا دق بوري لهذا وانتبه من هذا ..

2- تدور مكان للسيارة ..

3-تخش الملعب تبي تشتري تذكرة تلاقي اقرب كوشك تذاكر مقفل واللي بعده مفتوح لكن البوابة اللي حولة مقفلة واخيراً تلاقي كوشك تذاكر والطابور فيه 100 واحد عاد لازم تكون مثلي قوي وجه تخش في وجه واحد تحس انه حبيب وتعطيه الفلوس وتقوله بالله ابي تذكره الله لايهينك..

4-التفتيش ( ابو المعانات ) يفصفصك العسكري فصفصة تجي الملعي وانت محمل ( علم,شال,بوك,جوال,مفتاح,سبحة,قلم,دخان,ولاعة,كيس فصفص,علك,كبك,وووو) في الأخير تدخل بالجوال بعد حب خشوم والباقي يروح والله اعلم انهم يتقاسمونها ويبيعونها بالحراج واللي ماينباع ياخذونه لهم..واذا كنت حلو ولا بلاش كلكم تعرفون الباقي...

5- يجيك التفتيش الثاني ونفس ما ذكر انفاً حلوة ( انفاً )...

6-تخش الملعب ثم تلاقي الجماهير اشكال ماانزل الله بها من سلطان...اللي جنبك إذا لف وجهه صقع شنبة في وجهك.!!

7-ريحة دخان اعوذ بالله يكتمون نفسك..واذا جاء هدف اللي وراك يحط يديه على كتفك واللي قدامك يحرك العلم ويصكه بوجهك..

8-بين الشوطين تبي تطلع تصلي تلاقي اقرب باب لك مقفل تروح تمر من عند التلفزيزنات عرفتوها ؟ اللي فوق..ثم تروح للباب الثاني تلاقيه مفتوح تطلع تصلي بعدين تلاقي زحمة على الأكل يالله تشتري اول ماتشتري يكون بدأ الشوط الثاني .تجي تبي تخش بالأكل يعيون تدق على اخوياك يقوولون محنا فاضيين الشوط الثاني بدأ.! تشرب موية وبيبسي وتذب الباقي وتخش الشوط الثاني ..

9_انتهت المباراة والله يعين على زحمة الطلعة..


10-تلاقي واحد مسكر على سيارتك..وانت خلاص مقفلة معك تنتظرة يجيك نص ساعة ..

11-تطلع علم من السيارة وترفع المسجل يبلشون بك الحكومة..


12-100 تفتيش من الملعب للبيت ..

13-تخش البيت الساعة 1 وبكرة دوام تلاقي ثوبك معدوم وشعرك وصخ ( فيه فصفص ) من اللي ورآك الله يهديه..

وتستمر المعاناة ..

بالله عليكم ماتصير لكم ذي؟؟؟

ههههههههههههههههههههههههههههههههههههههههههههه

ملعب ادارته منسمه

ليش ما تقول انو قانون ليش تقول تخلف قصدك من العسكري ولا ادارة الملعب ان كان العسكري وهو المقصود طبعا فهوا يطبق اوامر عليه بس مو فاضي يناقشك وراك الاف
اعتقد انو كان من الأفضل انك ما تكتب الموضوع التافه ذا
او كتبته بأسلوب احسن