نادي الهلال السعودي - شبكة الزعيم - الموقع الرسمي

السلام عليكم ورحمة الله وبركاته

عيدكم مبارك خخخخ اقصد رمضان علينا وعليكم يارب يتبارك ادري بتقولون تو الناس
بس وش اسوي تعرفون الكرف والنفخ والطبخ تخليك تنسى اسمك موب التهنئه <-- كنتس تبالغين
المهم اليوم جيتكم بموضوع من تعبيري واعذروني على اسلوبي لاني مانيب ذاك الزود بالتعبير
حتى من زود الفلاحه يوم كنت برابع ابتدائي قالت المدرسه (نجاه) الله يذكرتس بالخيركانت شديده وتروع ماعندها يمه ارحميني
المهم قالت عبرو عن الجمل واجيكم امسك خط الرياض الشرقيه في التعبير كتبت حول الصفحتين
تدرون وش كتبت اتذكر جزء منه اقول فيه وركبت جملا وركب ابي اخر وركب اخوتي
وتمشينا بالجمال <- -- وش رايكم فيني بس ابداع صح

المهم يوم قالت الاستاذه اسمي وقومي اقري تعبيرتس وانا اللي احس بالفشيله واقوم اعبر من مزاجي
احط كلمات من عقلي واعبر شفهي وطبعا ماقلت اللي كتبته والا كانت فضيحتي بجلاجل وعطتني الاستاذه اثنين من خمسه <-- مايقدرون المواهب خخخ
لذلك لاتشرهون علي من ناحية التعبير الاهم تاصل فكرتي

تعرفون حنا يالحريم مانطب المسجد الا بثلاث مناسبات التراويح و صلاة العيدين ونجي متشووقين بقوه
بس في اشياء تخليك تفقد اعصابك وتحدك تفتح صفحه جديده وتدهر تكتب موضوع <- --- ياي اجل يدهر
منها ..... صح قبل لااقول منها ترى الكلام للكل حريم ورجال
نرجع لـ منها ونكمل لما يجي جنبك واحد ريحة صنانه (عرقه) واصله اقصى المسجد
ياخي استحي على خشتك والله لو رايح لزواج ان تسبح وتعطر وتجي ضارب الكشخه على الاخر
ابي اعرف ناسين ان المساجد بيوت الله؟؟
والا وش القصه؟؟

وموب كذا وبس لما تجي الحرمه ريحتها طبخ
والا توها منظفه بكلوركس وطابعه الريحه في يده

ياعالم يابشر هذا بيت الله
والدليل قوله تعالي :( وأن المساجد لله)
متعيجز تغير ملابسك؟؟ متعيجز تروش قبل تصلي؟؟
والله ماتاخذ منك وقت كثير............

الرسول صلى الله عليه وسلم قال للي اكلو بصل او ثوم
:( من أكل البصل والثوم والكراث فلا يقربن مسجدنا ، فإن الملائكة تتأذى مما يتأذى منه بنو آدم) . رواه مسلم
هذا وهو رائحه بالفم بس ماتطلع الا اذا فتحت فمك
فما باللك باللي اذا تحرك شوي صرعتك ريحته الى درجة ماتقدر تركز وانت تصلي شوي الا تنصرع ويغمى عليك

الشيء الثاني في المسجد نكون جماعه كبيره نصلي جنب بعض ولايفصلنا الا سنتمترات بسيطه .. في بعض الناس هداهم الله
لاجاء يقرى قرى بصوت عالي كنه يسمع والمشكله انا من النوع اذا اللي جنبي صوته عالي اتلخبط
ولااقدر اكمل قرأه واضطر اعيد الفاتحه مره ومرتين وكل مره اضيع وين وصلت
فأيش يضرك لو قريت في صدرك؟؟

لازم نحاول مانؤذي المصلين ونشتت خشوعهم
باي طريقه من الطرق سواء بالرائحه النتنه او بالصوت العالي او بالامهات اللي تاخذ كل
بزرانها وترصهم بالمسجد وتعال شوف الازعاج على اصوله اللي يتلفتون يمين ويسار واللي يتطاردون
ومرات صياح والا ضحك وانواع القلق وغيره
اذا انتي تدرين ان عيالتس مزعجين وشوله تجيبينهم؟؟؟ خليهم منثبرين بالبيت
ليه تجيبينهم للمسجد وتضيع صلاتنا وحنا نحاول جاهدين اننا نخشع بس ماش مانقدر ذا بزر ناط في وجيهن
وذا ياخذ الغطاه وذا يتحرك يمين وشمال غير اللي يصيح والمشكله

بعضهن تقول بنت وحده ماتضر انتي تجيبين بنتس وهذي تجيب ولدها وذيك تجيب ويمتلي المسجد بزران
موب الحريم وبس حتى قسم الرجال
اكبر دليل الحاجز اللي بين الحريم والرجال تشوف البزران كل شوي رافعينه والا محركينه
واللي يدخل اصابعه من تحت واللي يويق والضحيه الحريم اللي بالطابور الاول..

لذلك
خلونا من اليوم نطالع بأنفسنا هل ازعجنا المصلين؟؟
هل نحن في مظهر يليق بالصلاه ؟ الايه تقول :( يا بني آدم خذوزينتكم عند كل مسجد)

والرسول عليه افضل الصلاة واتم التسليم قال
:( لولا أن أشق على أمتي لأمرتهمبالسواك عند كلصلاة)
ليه عند الصلاه؟؟ لنطهر افواهنا من روائح الاكل وغيره

اتمنى ان بكره الصلاه تكون بلا روائح وبلا ازعاج ومليانه خشووع وانتباه