<><> يوميات الأعضاء في رمضان مع خالي من الهم <><> - نادي الهلال السعودي - شبكة الزعيم

المنتدى الاستشاري · #1 21/09/2007, 03:33 AM

فكرة : سندريلا الهلال
متابعة : سهل - القاضي
تصميم : عاشق بو يعقوب
إعداد : الفيروسه الزرقاء

مرحباً بكم احبتي مع ضيفنا السابع في يوميات الأعضاء في رمضان
وضيفنا اليوم زعيــم متألــق هو خالي من الهم

بسم الله الرحمن الرحيم
السلام عليكم ورحمة الله وبركاته

مساكم الله بالخير/صبحكم الله بالخير.

أولا يشرفني أن اكون أحد ضيوف هذا الموضوع المميز

وأشكر كل القائمين على هذا المجلس العام من مشرفين وإستشاريين.

حقيقه كان يومي السابع من رمضان يوم مليء بالأكشن ومثير وياحليله من يوم

.

كان من المفروض أن أذهب للرياض يوم الثلاثاء وحجزت وخلصت أموري وقطعت التذكره ولكن للأسف طلع الحجز على الاربعاء بالليل

.

شغلت اتصالاتي والوسايط وتدبر لي حجز يوم الأربعاء الساعه 7ونص الصباح

.

وهنا بدأ اليوم .

بعد صلاة الفجر إتجهت إلى مطار أبها وكان موديني أخوي الصغير وعيونه فيها الحقد لأني ما خليته ينام

وحنا بنص الطريق أو أكثر أدور بجيبي التذاكر طلعت ناسيها في البيت طبعن أولا ما قلت لأخوي وقلت له إرجع للبيت نظر إلي بحقد وقال حسبي الله ونعم الوكيل منك لله ياشيخ

.

ويرجع ماشي طبلونه وأخذت التذكره شافنتي أمي سألت وش مرجعك قلت نسيت التذكره تدرون وش قالت لي أمي فديتها(قالت لو كنت بتدخل المجلس الي تسمونه المجلس العام بالنت حق الهلال كان ما نسيت شيء ضيعوك شلة المجلس ونسوك حتى أغراضك إتق الله في أخوك

)

عاد لا أحد يسألني وش درا أمي بالمجلس لأني مثلكم تفاجأت<<<<< ترا مو قايلها ولا شيء

.

المهم وصلت المطار وأول ما نزلت تتوقعون أخوي نزل يتوادع مني ولا شيء والله قال مع السلامه ونزلت الشنطه وأنواع العج بوجهي

.

ركبت طيارتي وأقلعنا الساعه 7ونص وصلنا الساعه 9 سالمين غانمين وذهبت وأستأجرت لي شقه .

عاد الشور يقول نام وبالفعل نمت على الساعه 10 ونص إلا والمزعج ميسي متصل الساعه 11 وربع بالله فيه أحد يتصل الساعه 11 بنهار رمضان وصرفت ميسي وأرجع أنام ويأذن وأقوم اصلي الظهر والعصر قصرا وجمعا تعرفون مسافر.

بعدين نمت وعلى المغرب صحيت.

وأنا أصيح ما فيه فطور ولا شيء أدق على الريسبشين قلت فيه قهوه وتمر قال ايه قلت فيه عصير قال إيه فرحت قلت طيب فيه سمبوسه قال لا لا لا لا

.

وأنا أصارخ من الحزن والألم كيف أفطر بلا سمبوسه ولكن طبقت المثل الي يقول ما مع المتحمد إلا عشاه

.

أفطرت وصليت المغرب ورجعت وشفت طاش وميسي أنواع الإزعاج يالله يالله أنا توقعت الشباب مجتمعين لأني خابرن إن حنا ألغينا الإستراحه الزبده خلص مسلسل بيني وبينك وذهبت للعليا كي أقابل ميسي طبعن رحنا لكافي وتخيلوا كان ميسي لوحده وأسأله وين العيال قال محد جاء قلت الشرهة على الي يركن عليك وينك بس يا أبو مقبل وينك

.

وندخل الكافي ونطلب اثنين آيس موكا

وتبدأ المباراه وحقيقة أكثر شيء ضايقني بالمباراه إن الأخ المشـــاغب أزعجني بإتصالاته الرجال مصدق نفسه إنه خليل الزياني ولا حمود سلطان وهو يحلل

.

والحمد لله كانت النتيجه جيده نوعا ما.

طلعت مع ميسي وياليتني ما طلعت سياره ما فيها مكيف خرب مكيفها اليوم

وأنواع الحر وخلصنا كرتونين فاين تقولون إني هندي راكب بالباصات الي بالبطحاء ولكن كله يهون لجل عيون ميسي

.

بعدين حلف علي بالعشاء وتعشينا الله يخلف عليه بس أكثر شيء ضايقني مع المكيف الخربان إن المشاغب لا زال يتصل ويحلل وهو من جنبها بس المصيبه الأكبر أبو طلال أتصل بي تدرون حتى أبو طلال أزعجني بالتحليل ياحبني لك يا أبو طلال وياسلطان حدكم خرفنه ومجلس والتحليل خلوه للسامي كسمو الهلال

.
بعدين قلت لميسي ممكن تقطني شقتي وقسمن بالله ساعه وأكثر لجل يدل ميسي الشقه تخيلوا من العليا للمصيف ما يدل

ياعيني عليكم يا عيال الرياض

وأسالوا ميسي عن الجيبوتي الي كان عند الاشاره

.

وصلت الشقه سالما غانما معافا وقد أخذت لي حمام سونا مجانا في سيارة ميسي

دخلت الشقه واخذت لي كوب شاهي وابي اريح فأتذكر إن اليوميات علي قلت بروح أرسلها لا يهزأني عادل وعادل هالايام ماغير يعصب علي ليه مدري

.

ووصلت لأحد المقاهي لجل أكتب لكم قصة حياة يومي

المليء بالمواقف.

ما يستفاد من يومي هذا.

*الي ما عنده واسطه بالخطوط الجويه ياحليله

.

*لا تركب بسياره في الرياض ما فيها مكيف

.

*إكتشفت أن أبو طلال والمشاغب مالهم بالكوره أبد الكوره بوادي وهم بوادي ولا الوحده كان أحسن منا ياسلطان

.

*لا أحد يسوي إستراحات وخرابيط إذا أبو مقبل مو في السالفه وآه يا ماجد

وآسف على الإطاله ولكن أن طبقت الطلب الي جاني من الأخوان يوم قالوا أذكر بالتفصيل الممل وهذا أنا ذكرت بالتفصيل والخياطه بعد

.

ختاما أكرر شكري للأخوان مشرفي وإستشاري المجلس العام على إتاحة هذه الفرصه لي للتواصل مع جمهوري العزيز <==== وش عنده ياسر القحطاني

.

وكل عام وأنتم بخير وبصحه وسلامه.

كل الشكر للمبدع خالي من الهم وانتظرونا غداَ مع ضيف آخر

.

أرق التحايا وأطيبها من
مشرفي واستشاري
المجلس العام